Imatiwu 14

Ị́jọọnụ ọhwọzenyi meme sú

(Ịmk 6.14-29; Irk 3.19-20; 9.7-9)

1Ụmẹ ọnọọ Ịhẹrọdị ọnọba ộ wụ́ ịrẹyị Ijeesu. 2Dị ọ kà a yị ezi ahụ anị dị ọ ka, “Ịjọọnụ ọhwọzenyi yọ nọ! Ọ sị ha hụụnị isu; agụvị avọọ ụkọrọ ẹbanyị ẹnẹnị maanị aa mẹẹ hụụnị ẹngụ anị aanị.” 3#Irk 3.19,20Ịhẹrọdị vị ana vịdị za Ịjọọnụ, dị ọ sụ́ ọọ dị ọ sị ọọ tụ́ ịnị ẹngwa nị agụvị Iherodiya. Iherodiya vịdị vị ose Ihwiripi, ọyịnyara Ịhẹrọdị. 4#Ire 18.16; 20.21Iruvo ọnọọ sị zaa ọ vị ka Ịjọọnụ ộ kà a yị Ịhẹrọdị ka ọ yị vọrọ ka ọ̀ dọ ọyịnyara anị ọnẹẹ nyị. 5Ịhẹrọdị yaanị sị Ịjọọnụ wụ, ama angwa aza ee hí ọọ, agụvị ka avaba aza ệ dọ ka Ịjọọnụ vị ọnịsẹ. 6Ẹkụhị ọnya Ịhẹrọdị aa rị eche ẹkụhị anaa sị ma a. Di ozi ọnẹẹ Iherodiya nyị ẹzẹ, dị ẹzẹ ọnọọ zé Ịhẹrọdị eyi pooro nị. 7Dị Ịhẹrọdị hyeku ka ịsị ozi ọnọọ òo họ̀ use anị kẹnẹ, ọnị aa sịị yọ nị. 8Dị ọnyị anị tụ́ ọ ịrẹyị nị; agụvị avọọ dị ọ kà a yị Ịhẹrọdị ka, booro aanị oni ee sì ka à sị ịrẹsụ Ịjọọnụ ọhwọzenyi tụ́ ịnị ịchacha yị ọnị. 9Ẹngụ ọnọba ọ sị vahi, ama agụvị eku ọnị ọ sị hị́ ini eyi avaba ọzọga anị, ộ mẹ̀ ọda ka à na sị ọ va yọ. 10Dị ọ tụ́, dị a nọ ịnị ẹngwa, dị a na jị ịrẹsụ Ịjọọnụ nị. 11Dị a sị ịrẹsụ anị tụ́ ịnị ịchacha, dị a sị yị ozi ọnẹẹ ọnọọ, dị ọ sị ọ na yị ọnyị anị nị. 12Dị ezirẹma Ịjọọnụ va sị oku anị, di e ne ne e nị; dị ẹnịnị na kà a yị Ijeesu nị.

Ijeesu ộ sị ịsa pá aza ọrụrụ-ọrụrụ

(Ịmk 6.30-40; Irk 9.10-17; Ịjọ 6.1-13)

13Ịjị Ijeesu wụ́ ọ, dị ọ hụụ ịzọọ, dị ọ ngụ ẹpa, dị aa nọ aha ọnya ịzị ọnịnya kẹnẹ vaa yà nị. Aza mẹ̀ sị yẹ, dị ẹ hụrị ẹkụra ẹnịnị, dị ẹ sị ahụ dụ ọ aa na nị. 14Dị Ijeesu jịnẹ hụụnị ẹpa nị. O mè re ọkọnị aza ẹnẹẹ, ayị ẹnịnị ộ vá a, dị ọ mẹ ọnịkụ ẹnịnị ụkụ nị. 15Óruva mè si tù, di ezirẹma anị ve tù ọọ, dị ẹ ka, “Oruva o si tù, ọ. Ẹ yị nyị ọza ana ra ịzẹnị. Kà a ka ọkọnị aza ẹnẹnị ẹ̀ẹ na, dị ẹ̀ na hị́ ịsa rị ịnị ẹkụra!” 16Ama di Ijeesu tụ́ ohi, dị ọ ka, “Ẹ yị nyị ka ẹ̀ na, ọ! Ẹwụ nịnị ụvọta ọ̀ sị ịsọyịrị yị wa!” 17Dị ezirẹma anị ka, “Akara ẹẹhị beri ivovo ẹẹva kẹnẹ ị nyị tụ́ ịzẹnị nọ.” 18Dị Ijeesu ka, “Kụ́ ọọ va mị nịnị!” 19Dị ọ ka aza ẹnẹẹ ẹ̀ yaayịtẹ ịnị avị ohwoohu nị. Dị ọ sị Ịbụrẹẹdị ẹẹhị beri ivovo ẹẹva ẹnẹẹ, dị ọ sị eyi tụ́ ẹba, dị ọ kụ́ Ohomorihi avọ tụ́ ọọ nị. Dị ọ dà Ịbụrẹẹdị ẹnẹẹ yị ezirẹma anị, dị ezirẹma anị sị yị aza ẹnẹẹ nị. 20Dị avaba ẹnịnị rị, dị ịnẹ há wa nị. Dị ẹ kụ́ ana vọ, dị ọ vị ohihi uji ẹwụrẹva nị. 21Ọnọrụ ana rị ịsa vị akahị-akahị oze ẹẹhị (5,000). Ọza ọyị za anyẹnẹẹ ọnịrị ezweyi tụ́ ọọ.

Ijeesu ộ zị ụsẹ ị́rẹsụ enyi

(Ịmk 6.45-52; Ịjọ 6.15-21)

22Obooboro ọnọọ, dị Ijeesu ka ezirẹma anị ẹ̀ wụsẹ ngụ ẹpa dọ ọvịdị anị, dị ẹ̀ẹ nọ akẹnẹ irehu ọsa nị. Dị ọ ka ọkọnị aza ẹnẹẹ ẹ̀ẹ nọ eehi nị. 23Ọ mẹ̀ sị ọọ kà ka aza ẹnẹẹ ẹ̀ẹ na, dị ọnịnya hịrẹ nọ ịnị ataba ka ọnị ọ̀ na mẹ̀ aduwa nị. Ịjị oruva si tù, dị ọnị ịnyara yà ịzọọ nị. 24Ịjọnọọ ẹpa ọnị yà ịnị akakana irehu, ahị aa sị ọọ vaachi vaa hịrẹ, agụvị ka ahị aa tụ́ụ kú wa. 25Ịnị ẹhụụ etumeyọnị, dị Ijeesu aa ká waa na, dị aa zị ụsẹ ị́rẹsụ enyi nị. 26Ịjị ezirẹma anị re e, ọ màa zị ụsẹ ị́rẹsụ enyi, ô hí wa irenu ẹnẹmẹhị. Dị ẹ ka arịjẹnụ yọ. Di e nowu, ángwa mèe hí wa nị. 27Dị Ijeesu wụsẹ kà ịrẹyị yị wa nị, dị ọ ka, “Và ayị nẹtẹ nịnị! Ẹmịị yọ nị, asị u hí angwa nịnị!” 28Dị Ipita ka, “Ananyị yị, àa vị ẹwụụ yọ ịzẹyịza, mẹ ọdaa mị ka ma zị ụsẹ ve tù wu ị́rẹsụ enyi!” 29Dị Ijeesu kà ọọ vẹ nị. Dị Ipita jịnẹ hụụnị ẹpa, dị aa zị ụsẹ ị́rẹsụ enyi naa gẹrị Ijeesu nị. 30Ama ô mè re ahị maa tụ kukuku, dị angwa hí ọ, di o nyima ee chíi ngụ enyi nị, di o nowu ka, “Ananyị yị, dọ mị tụ́!” 31Dị Ijeesu wụsẹ tana ụvọ anị, dị ọ za a nị. Dị ọ kà, “Ẹdọwụ awụ ộ da weyi kẹnẹ. Sị ẹ vẹ dị ụ waa mẹ ayị ẹẹva?” 32Dị ẹnị ẹyịva ngụ ịnị ẹpa, dị ahị sị jẹẹ nị. 33Dị aza ene hi ịnị ẹpa va ku ẹtẹ, dị ẹ ka, “Ịzẹyịza, Ozi Ohomorihi ụ vị nị.”

Ijeesu ộ mẹ̀ ọnịkụ ọnya ụkụ Ígenesareeti

(Ịmk 6.53-56)

34Ẹ sị jịnẹ irehu, di e chí hi ẹtẹ ịnị ẹkụra Igenesarẹtị nị. 35Aza ene hi ịzọọ ệ yẹ Ijeesu. Dị ẹ tụ́ na hị́ avaba ọnịkụ ene hi okokooro ịzọọ, dị ẹ kụ́ wa vẹ ịda Ijeesu nị. 36Ệ dá ịpẹ yọ ka ọ̀ navọ ọnịkụ nịnị ẹ̀ sị ụvọ kanyị ụtọ ịta anị kẹnẹ. Avaba aza ana sị ụvọ kanyị ọọ bemi, ẹngụ ẹnịnị ộ ta.

Currently Selected:

Imatiwu 14: EBTP

Highlight

Copy