ALA IROM Ọdawụlẹ
Ọdawụlẹ
ỊPọlụ da ụpwụ kịla ala iRom chajị ka alịchọọchị ịlụwa ka nwụlanọ gbe ụwa ọkaka nyamwụ. ỊPọlụ nwụlanọ kọ ka họ ụkụrwọ ta angịnyị nya ịKịrayịsị ịlụwa, kị tị ka dọọ ụbwọ chajị kọ ka bwu ụwa kele ka iSipeen ịnyịnyị.
Ụka ka ịPọlụ da ọnụ chị ala iRom kpa, ọ byaa ọwa nyị kaa juwa raabwọ chajị nyaa ụka myị ụka. Ọọwa, ọ ya egbejụ nya ụpwụ nyamwụ jaa lẹlẹ. Egbeju nya ụpwụ ọọwa ri “Ẹrụ ọnyịịla ya jaabwọ ka Ohe Oluhye kaa họ ka angịnyị kaa la kpẹẹkpẹẹ ẹ-ẹga nyamwụ: Bwula ọmyịmyị ọlala ụbwọọmwụ ịnyị” (1:17). Ẹrụ ọnyịịla ọlẹ ka ịPọlụ kaa kpa pyẹ ri “Ọhe Oluhye la ọngịrị nyọka chị angị myị lọọ wuu da ó-ri ka angịịwa-á ri ala iJuu lee í ri ala iJuu ka” (1:16).
ỊPọlụ kpụ ala iRom ịtịya nyori alodehe wuu nyị họ ang onyobyi lẹ, ọngọngọhẹ nyaa nyị́ la ọhịhị ọkpẹẹkpẹẹ pwoku ụmụmẹ nya Ohe Oluhye myị ka. Ma angịnyị ka la ọhịhị ọkpẹẹkpẹẹ ẹ-ẹga nya Ohe Oluhye bwula ọ-myị la iJisọsị ịKịrayịsị.
Ẹla ọkịla ọlẹ ká ịPọlụ ya ri ọhịhị onyeewe ọlẹ ka ọngịnyị kaa la ẹ-ẹpwụ nya ịKịrayịsị ụka kọ myị la Ohe Oluhye. Ọ ya ọngọọwa nyị kaa la okpunyii ẹ-ẹga nya Ohe Oluhye, ọngịrị nya Ohe Oluhye kaa họ kọọ la ịlọmwụ bwu ẹpwụ nya ọngịrị nya ang onyobyi ọhọhọ bala igu ogbugbu. Ẹ-ẹpwụ nya egbeju 5-8 ịPọlụ ya ang odudu ka ehile nya Ohe Oluhye bala ọngịrị nyamwụ baba ẹ-ẹga nya ọngịnyị. Ọ myịmyị wẹ ịtọ ọlẹ kị tọọ jaabwọ ka ala iJuu bala alụma ịkịla juwa ẹ-ẹpwu nya obyi omeme nya Ohe Oluhye nyọka chị angịnyị ehe da.
ỊPọlụ chị ẹla nyamwụ eju bwula ọ-ya ọlẹ ka ala iJuu nyị pwa iJisọsị nyị ba obyi omeme nya Ohe Oluhye jẹ nyọka kpa angịnyị wuu wẹ ka yẹ ahyẹẹrwẹwa nyamwụ bwula iJisọs ịKịrayịsị. ỊPọlu ti la ọmyịmyị ya ala ịJuu nyi juwa ka tịrẹkpẹ nyà chị iJisọsị ọgụ wẹẹ. Ọ da ụpwụ jaabwọ ka angịnyị nya ịKịrayịsị ka la ọhịhị bala ọháha ẹ-ẹga nya angịkịla. Ọ ya ẹla u-uhye nya ẹrụ ọ-myị ha Ohe Oluhye bala jaabwọ ka angịnyị nya ịKịrayịsị ka la ọhịhị ẹ-ẹga nya igomenti bala ẹga nya awụlẹ, tụ ẹla u-uhye nya irya omeme ọla ọkịlẹtụ nya ọngịnyị.
Ọọwa, ịPọlụ a tụ ụpwụ nyamwụ ku la ọna ọdada bala ogbo ogwogwo ha Ohe Oluhye lẹlẹ.
Ẹla Ịlụpwụ Ọlẹ
Ọnụ ọdachị bala egbejụ nya ẹla 1:1-17
Ọchịda baba ha ọngịnyị ehe 1:18—3:20
Ụgbẹyị nya ọchịda ọlẹ ka Ohe Oluhye ya da 3:2—4:25
Ọhịhị onyeewe ẹ-ẹpwụ nya ịKịrayịsị 5:1—8:39
Obyi omeme nya Ohe Oluhye ẹ-ẹga ala Isirẹlụ 9:1—11:36
Jaabwọ ka ọngịnyị nya ịKịrayịsị ka la ọhịhị 12:1—15:13
Ẹla ohyẹẹkpẹ bala ọnụ ọdachị nya ịPọlụ 15:14—16:27
Currently Selected:
ALA IROM Ọdawụlẹ: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.