ALA IROM 1

Ọnụ Ọdachị

1Ụpwụ ọlẹ bwu ẹga nyam am ịPọlụ ọnchẹ nya ịKịrayịsị iJisọsị ọlẹ ká Ohe Oluhye chụm, kam ka ri ọngọ myị ẹrụ ọnyịịla nyamwụ du kọ chịm ịgọgọ ju ha ịlọmwụ, chajị nyọka kpa ẹrụ ọnyịịla ọọwa ya pyẹ kịlahị họọ.

2Ohe Oluhye kpa alọmwụ nyamwụ ịlẹpwụ nya Ụpwụ Ịgọgọ ya ọnụ ọmyịmyị nyamwụ u-uhye nya ẹrụ ọnyịịla ọọwa ịnyị dodehe ene-ene lẹ. 3Ẹrụ ọnyịịla ọọwa ri chajị nya Ọnyẹwẹ nya Ohe Oluhye ọlẹ kọ ri iJisọsị ịKịrayịsị Ọngọlahị, ọlẹ kị ma warị wẹ odehe ọlẹ kaka ri ọngịnyị ehe bwula ụtẹ nya Adịrahụ iDevidi onyogo. 4Ohe Oluhye chị ịKịrayịsị ọọwa ehe lala Ọnyẹwẹ nya ịlọmwụ ọlẹ kọ la ọngịrị lụmẹ chajị ọhịhị nya Ọngọlahị iJisọsị ịKịrayịsị ayịdang la ịgọgọ lụmẹ bwula ụbwọ ọdada nya Olegu Ịgọgọ ọlẹ kọ wule ịKịrayịsị ọọwa eji bwula igu. 5Bwula ịKịrayịsị ọọwa, Ohe Oluhye a hu ọngịrị ọ-kpa họ ụkụrwọ bala iwe-ahụrụ nya ẹrụ ọnyịịla ọmyịmyị ọlẹ hahị lẹẹ, kahị ka kpa ẹnyị nya ịKịrayịsị ya pyẹ je alepwoja myị́ epwoja wuu, chajị kị ka kpa ọmyịmyị ọlala ju ihi nya ẹla nyamwụ ọọwa lẹlẹ. 6Anụ angịnyị nya Ohe Oluhye ịla iRom, anụ juwa ẹ-ẹpwụ nya iru nya angịlẹ ká Ohe Oluhye be ẹkọ wụrụ bwu epwoja la datị-datị kaka ri angịnyị nya iJisọsị ịKịrayịsị ịnyịnyị!

7Lẹ, anụ ala iRom ịlẹ kanụ há Ohe Oluhye lụmẹ du kọ be ẹkọ wụrụụnụ kaka ri angịnyị nya ịlọmwụ, m lẹẹ da ileta ọlẹ du wẹ lẹ. Ká ọnahị bala okpunyi nya Ohe Oluhye Adahị bala ịnya Ọngọlahị iJisọsị ịKịrayịsị a juwa tanụ mẹ!

Abwọ Ọrịrị nya Obe Ojiji Ha Ohe Oluhye

8Ọhọhẹ ọhọhẹ, m jam ji Ohe Oluhye nyam obe bwula iJisọsị ịKịrayịsị chajị nyanụ wuu o-oluhye nyọlẹ ká ọmyịmyị ọlala nyanụ juwa ru ohi yịrị odehe ọlẹ yịrị ju ka ẹga myị́ ẹga wuu lẹ. 9Ohe Oluhye Ọngọlẹ kam lẹẹ myị ẹrụ ha ẹ-ẹpwụ nya olegu nyam wuu ẹ-ẹpwụ nya ẹrụ ọnyịịla o-ya pyẹ nya ịKịrayịsị Ọnyẹwẹ nyamwụ ri ibeenu nyam yẹkẹẹ, am nyị kaa kpịtịya nyanụ ẹ-ẹpwụ nya abwọ ọrịrị ụka myị́ ụka wuu ịnyịlẹhị. 10M kaa bịlẹ Ohe Oluhye chajị kọ ka họ kọ ka chịkpẹẹ ham lẹẹlẹẹ, nyọka warị, kaka wụlaanụ yẹ bwula irya nyamwụ lẹ! 11Iwoo nya ọwarị wẹ kaka yẹnụ, jam wum nya ịlẹhị-ịlẹhị, chajị kam ka jẹ́-ẹ warị kaka chị ịhaha nya Olegu Ịgọgọ nya Ohe Oluhye ịhyẹ ehe hanụ, kanụ ka jẹ́-ẹ yeji giri-giri ẹ-ẹpwụ nya ọmyịmyị ọlala nyanụ gụ ọọwa. 12Ọọwa ri yẹkẹẹ, kam bala anụ ka họ ká ila ọchịchị nya ọmyịmyị ọlala nyahị ka chị kịla awụlẹ, chajị kaahị angị imimiiye ka la ọhụ ojuju bwu ẹga nya awụlẹ bwula ọọwa.

13Anụ anyadam ẹ-ẹpwụ nya ịKịrayịsị, m tịtọ kanụ ka jẹ́ yẹkẹẹ, ụka lụmẹ-lụmẹ juwa kam kaa maga nyọka warị wẹ ẹga nyanụ. Ma, ọ́ tị kaa chịkpẹẹ ham ịnyị kpong-kpong ka. Ang odudu ká ọwarị wẹ ẹga nyanụ hám ri, chajị nyọka la ugbe nya ẹrụ ọnyịịla ọlẹ bwu ẹpwarịrị nyanụ, jaabwọ kam la bwu ẹga nya ala iJentayịlị ịlẹga ọkịla ene-ene lẹ. 14Chajị, m kpa uri nya ụkụrwọ nya ẹrụ ọnyịịla ọlẹ ọ-ka kpa kaka ya pyẹ je ala iJentayịlị wuu, tụ angị wụrụ ẹhị bala angị wụrụ ẹhị-ka, tụ angị jẹ́ ang lụmẹ bala angị jẹ́ ịngịngịhyẹ-ka ịnyịnyị. 15Chajị nya ọọwa lẹ, ọnwụla nọ nya irya nyam wuu lẹpwụ-lẹpwụ ri yẹkẹẹ, m tịtị ka warị lẹẹlẹẹ kaka ya ẹrụ ọnyịịla ọọwa pyẹ jenu anụ ala iRom ịnyịnyị lẹ.

Ọngịrị Ọtụka Ọlẹpwụ nya Ẹrụ Ọnyịịla

16Chajị, ó ri ang oyoyi ham kpong-kpong, nyọka kpa ẹrụ ọnyịịla nya ịKịrayịsị ọlẹ ya pyẹ ka. Chajị, ẹ-ẹpwụ nya ẹrụ ọnyịịla ọọwa kpangga, ọngịrị nya ọchịda nya Ohe Oluhye a ji ha ọng myị́ ọng ọlẹ kọ myị la ẹla ọọwa lẹ. Ọ juwa ha ala iJuu họhẹ-họhẹ, ene kọọ hi pwụ ala iJentayịlị wuu ịnyịnyị. 17Chajị, ẹ-ẹpwụ nya ẹrụ ọnyịịla ọlẹ, abwẹla ọnyịịla nya Ohe Oluhye ọlẹ kọ kaa chị ehe hahị bwula ọmyịmyị ọlala nyahị a ji lẹ. Ọọwa lẹ, ọmyịmyị ọlala nyahị ọọwa, a kaa wu abwẹla ọnyịịla nya Ohe Oluhye ọọwa kụrụ ẹ-ẹpwụ nyahị pyịyọọ lẹlẹ. Chajị, ị da kpehe ụ-Ụpwụ Ịgọgọ yẹkẹẹ, “Ọmyịmyị ọlala nya ọlabwẹla ọnyịịla a kaa wu ọhịhị nyamwụ kụrụ họọ myị́ lẹ.”

Eje nya Ọhọbịrị Ọhọhọ Wu Angịnyị Ehe Wuu

18Chajị, agbama nya Ohe Oluhye jam chị ehe bwu epwoohe jahị da uhi nya Ohe Oluhye ojuju-ka bala egbeju ọnyọọngịrị nya angịnyị ehe, ịlẹ kị juwa kpa ịhọbịrị ịhọhọ nyaa tụ ẹla nya ịlẹhị nya Ohe Oluhye pyịpyị. 19Ọ ri nya ịlẹhị, ịnọ, Ohe Oluhye mẹ ang ọlẹ kọ chịla jẹ angịnyị ehe gede-gede chajị nya ịlọmwụ lẹ. Ma, ị́ tị myị kpong-kpong kaka. 20Chajị, ọngịrị o-gbe oyi myị́ oyi nya Ohe Oluhye bala ụma nya Ọngọlẹ kọọwa ayịdang ri kpangga, ịlẹ kị ri ang ịkpịbaa hi ẹhị nya ọngịnyị ene-ene lẹ, ị chị ehe gede-gede mẹjẹ angịnyị ehe bwula ang-abwọ ilodehe ịlẹ ká Ohe Oluhye ayịdang họ lẹ. Chajị nya ọọwa lẹ, ọngịnyị ehe á ka jẹ́-ẹ ye ịngịngịhyẹ yụbwọ chị kpa ya eje rụ ịlọmwụ u-uhye nya ọọwa myị́ kaka. 21Ịnọ, ịwa ayịdang jéjé yẹkẹẹ, Ọngọhẹ nyị ri, Ohe Oluhye ri juwa! Ma, ị́ tị myị jwoo ihi lala Ohe Oluhye kaka. Lee, ọ-myị ji Ohe Oluhye obe chajị nya ang ịlẹ kọ họ haa kpong-kpong kaka ịnyịnyị. Ma, ọkọkọ nya ọọwa lẹ, ị mwọọgịlẹ juwa me irya i-hi deeji kem, gbee kị ju apyobwuna ọhẹ-lọhẹ chajị nya ang ọlẹ ká Ohe Oluhye haa chajị nyamwụ kaka. Ọọwa lẹ, ọkịlẹtụ ụhwahị nyaa ọọwa a yẹ ri ukpowu kpem-kpem ẹ-ẹpwụ nyaa lẹlẹ. 22Ịnọ, ị juwa wa ịlaa kpá lala angị jẹ́ ẹla lụmẹ lẹ. Ma, aluchi ịlam-ịlam, ị tị ri lẹ! 23Ịnyị, ọkọkọ nyọlẹ kị ka juwa gbịgba ha Ohe Oluhye ọlẹ kọ kaa gbu myị́ ẹnẹnẹhẹ kaka lẹ, ị mwọọgịlẹ juwa raabwọ ha ihye ekpeku ịlẹ kị ju abwụma nya angịnyị ehe lee abwụma nya ịchịnụ lee abwụma nya iyo ịlẹpwamẹ lee abwụma nya iyo ịlẹ kị kaa kpa apwụ gbile eji lẹlẹ.

24Chajị nyọlẹ ká angịnyị ehe chị́ uchi lụmẹ ịnyị, a du ká Ohe Oluhye hwaa ujiji ẹ-ẹpwụ nya imyi nya ang nya ịnyịrọ ọlẹpwụ nya ọkịlẹtụ nyaa ọlẹ kọ chịrị lụmẹ, du kị juwa kpa ugbinyịrọ nyaa họ ang oloyoyi ta awụlẹ ịnyịnyịịnyị lẹlẹ. 25Ịnyị lẹ, ị hu ẹla nya ịlẹhị chajị nya ogbo nya Ohe Oluhye kaka nyẹ ọnọọkịla lẹ, ị juwa gbịgba bala ọ-myị ẹrụ ha ang-abwọ ịlẹ ká Ohe Oluhye họhọ mwọọgịlẹ hi Ọwa Ohe Oluhye Ọngọ họ ang ịịwa wuu bala o-ri ọngịnyị nya ahị ọwawa pyịyọọ gbe oyi myị́ oyi lẹlẹ. Amẹn.

26Chajị nyọlẹ ká angịnyị ehe chụ irya nya ịlaa hi irya nya Ohe Oluhye ịịwẹ, a du ká Ohe Oluhye hwaa ujiji ẹ-ẹpwụ nya uhila nya ụya oloyoyi lụmẹ nyaa ọlẹ kị juwa họ lẹlẹ. Ọọwa lẹ, anyang nyaa a mwọọgịlẹ, juwa yẹ ụgbẹyị ọlẹ, ịnọ, kọ chịla kịịwa bala alẹng ka bwu nọ ta awụlẹ da abwọ ọkịla lẹ, ị mwọọgịlẹ juwa nọ ta awụlẹ la ụgbẹyị ohideeji ọlẹ kọ pwoku kpong-kpong kaka, lẹlẹ. 27Ọọwa lẹ, alẹng nyaa a tịtị juwa tụụbwọ hi ọ-nọ ta anyang deeji lẹ, imyi nya ụya ọhọhọ ọlẹpwụ nyaa ọlẹ kọ juwa chị ila nya ịlẹhị-ịlẹhị, a juwa kpaa kele kaka họ ang oloyoyi bwula alẹng o-juwa nọ ta alẹng aanaa mwọọgịlẹ dachichi lẹlẹ. Ọọwa lẹ, ị juwa ye uri nya ang ọjụjụ ha ugbinyịrọ nyaa bwula ang onyobyi ọhọhọ nyaa ọọwa ịnyịnyị jaabwọ kọ pwokwaa lẹlẹ.

28Ịnyị, chajị nyọlẹ ká angịnyị ehe kpa irya nya ịlaa chụ yẹkẹẹ, ịwa nyị́ ka kpa ang ọlẹ kịịwa nyị jẹ́ chajị nya Ohe Oluhye họ ụkụrwọ kpong-kpong kaka, lẹlẹ, ọọwa a du ká Ohe Oluhye tịtị gbaa ugu deeji kpọkọlọ lẹ, angịnyị ehe a wẹẹ me irya ọháha-ka kem bala o-juwa họ abwẹla opwoku kaka lẹlẹ. 29Ọọwa lẹ, ọhịhị nyaa wuu lẹpwụ-lẹpwụ a myị la abwẹla onyobyi ọhọhọ la datị-datị lẹlẹ. Ang ịịwa a lẹẹ lẹ: Ang onyobyi ọhọhọ, [ụya ọhọhọ,] ẹhị ọrịrị ang nya ọngọkịla, ọkwọ ọlala, ijiiji onyobyi ọlala, angịnyị ọnwụnwụ, ẹla ọmwọmwọ, angịnyị ọ-họ ri la ijẹẹhị, ọnụ ọ-kpa họ angịkịla, ẹla onyobyi oyaya juwa bịrị angị ịkịla kwiikwii, 30angịnyị ọ-kpa kụ, Ohe Oluhye ọ-wụ angịnyị ehe ẹjẹ, oyoyi ọ-chị ju angịnyị angịkịla, ọbọọchẹ ohihi, achala oyaya, ang inyibyi inyeewe inyeewe i-be họ, ihi nya adịda bala ịnịna ojuju kaka, 31ọ-jẹ́ myịmyị ọhẹ-lọhẹ ọlala ẹ-ẹpwụ ọkịlẹtụ kaka, ọnụ ọmyịmyị ọhọhọ jịra ka, ọnahị ọ-kpa me irya ju angịkịla ka bala ahyẹẹrwẹrwa ọlala ẹ-ẹga nya angị ịkịla ka wuu. 32Ọ ri nya ịlẹhị, ịwa ayịdang jéjé yẹkẹẹ, angịlẹ kịị nyị wẹẹ bịrị ehile nya Ohe Oluhye bwula ọ-họ ịhọbịrị ịlịịwẹ wuu lẹ, eje nya igu nyị wu aa ị-ịlahị nya Ohe Oluhye. Ma, ọ́ tị ba oo-ri yẹkẹẹ, ịwa ayịdang juwa họ ịhọbịrị ịlịnyị kem ka. Ma, ị juwa chị ọkẹkẹnị ju angịkịla ịlẹ wuu kị juwa họ ang inyibyi ịlịnyịnyị kpịlọ.

Currently Selected:

ALA IROM 1: IBNO

Highlight

Copy