ỊMAKỊ 15

IJisọsị Ụ-ụwa Ị-ịlahị nya ỊPayịleti

(ịMatiyu 27:1-2,11-14; iLuku 23:1-5; ịJọn 18:28-38)

1Ụka ká ahị pyẹ ahyaahị bwaaa lẹ, alegbeju nya angịkiliya nya Ohe Oluhye bala ịgabwọ nya ala iJuu wuu bala ịtịcha ị-mẹ ehile nya iMosisi jẹ bala angị hihi ịkịla ịlịkọtụ nya eje ọgụgụ nya ala iJuu wuu, a me obyi gu awụlẹ kpọng-kpọng ju iJisọsị lẹlẹ. Ịnyị, ụka kị chị iJisọsị ori mẹnẹ-mẹnẹ lẹ, ị kpọọ kele kaka ju ịPayịleti ụ-ụbwọ kọ ka lọọ eje haa lẹlẹ. 2Ụka ká iJisọsị godayị rịrị ị-ịlahị nya ịPayịleti, ịPayịleti tọọ wo yẹkẹẹ, “Ahụ ayịdang a ri Adịrahụ nya ala iJuu ịnyịlẹhị lẹ?” IJisọsị wẹ byoo yẹkẹẹ, “Ịnyị, ahụ ayịdang a tị́ kpa ọnụ nya ịlọng wụrụm wẹ.”

3Ọọwa lẹ, alegbeju nya angịkiliya nya Ohe Oluhye ịịwa a juwa chị ala ba iJisọsị u-uhye nya ang lụmẹ-lụmẹ ụ-ụwa lẹlẹ. 4ỊPayịleti myịmyị tọ iJisọsị ịtọ yẹkẹẹ, “O-ri ahụ ayịdang á ye ẹlẹlẹhẹ ka wẹ u-uhye nya iru nya ala ịwẹ kị wẹẹ chị bang kpong-kpong kaka?”

5Ma, iJisọsị myịmyị hu ịPayịleti ujiji kpini-kpini gbee kọ la ịPayịleti ẹbyẹbyị lụmẹ kaka kpoye.

Ị Ya Eje nya Igu Wu IJisọsị

(ịMatiyu 27:15-26; iLuku 23:13-25; ịJọn 18:39—19:16)

6O-ri abwẹla ọhọhọ nya ala iJuu wuu, ẹka myị́ ẹka lụka nya Ang Oriri Ọchịpwụrụ ọlịịwẹ ká ịPayịleti ka tụụbwọ hi ọlagba ọnyị myị ọnyị ọlẹ ká aluche nyaa á me ụchụ họọ. 7Ụka ọọwa, ọlẹng ọhẹ ọlẹ kọ ri aruwoka, ká ẹnyị nyamwụ ri ịBarabasị juwa u-ube nya agba bala alogu nyamwụ ịkịla. ỊBarabasị anyị ịwẹ nwụ ọngọhẹ lụka nya ojigi-jigi bala ẹla ọmwọmwọ ọlẹ kị kpa kpehe ị-ịpyị nyaa. 8Ịnyị lẹ, ala iJuu ịwẹ a kele kaka tụguru ịPayịleti, juwa byoo yẹkẹẹ, ahụ nyị tụụbwọ hi ọngọhẹ ha ịwa jaabwọ kaahụ nyị kaa họ ha ịwa ẹka myị́ ẹka mẹ. 9Ụka ọọwa, ịPayịleti taa wo yẹkẹẹ, “Ee lẹ, anụ tịtọ kam ka chị ọlẹng ọlẹ kị wụrụ Adịrahụ nya ala iJuu da hanụ ihwẹnyị lẹ?” 10Ụka ọwẹ lẹ, ịPayịleti ayịdang jẹ́ yẹkẹẹ, ajị nya imajẹ nya alegbeju nya angịkiliya nya Ohe Oluhye anyị ịwẹ nyaa du kịị nyị wu iJisọsị kpa warị wẹ ẹga nya ọọwa lẹ.

11Ma, ụka ọọwa, alegbeju nya angịkiliya nya Ohe Oluhye anyị ịwẹ kele kaka du iru nya angịnyị ịlụwa ju yẹkẹẹ, anụ nyị bịlẹ ịPayịleti kịị nyị chị ịBarabasị da hanụ ọkọkọ nya iJisọsị pyii mẹ. 12ỊPayịleti myịmyị taa ịtọ yẹkẹẹ, “Ee lẹ, ịịyẹ anụ tị́ tịtọ kam ka họ ẹ-ẹga nya ọngọlẹ kanụ wụrụ Adịrahụ nya ala iJuu tị tị mẹ?”

13Aliru nya angịnyị ịịwa wẹ la omyi o-gboo byi ịPayịleti yẹkẹẹ, “Ahị tịtọ ká ka gwoo iloo ba okoji hahị pyii lẹ!”

14ỊPayịleti wẹ byaa yẹkẹẹ, “Ịịyẹ a tị́ du kam ka gwoo iloo ba okoji? Ẹla ịyẹ nya igu, ọ tị́ da kpong-kpong?” Ịwa wuu myịmyị juwa ya gboo gụ olene-ene yẹkẹẹ, “Ahị tịtọ ká ka gwoo iloo ba okoji pyii lẹ! Ahị tịtọ ká ka gwoo iloo ba okoji pyii lẹ!”

15Jaabwọ ká ịPayịleti juwa tịtọ kọ ka họ ang ọlẹ kọ ka kpụ iru nya angịnyị ịịwa ịpyọ lẹ, ọ chị ịBarabasị ọwẹ da haa ịnyịlẹhị lẹlẹ. Ịnyị, ụka kị kpa ọngịrị nya ịPayịleti wa iJisọsị ugboji wuu lẹ, ịPayịleti a tụụbwọ hi iJisọsị haa nyị kpọọ kele kaka gu iloo ba okoji ha ala iJuu ịnyịlẹhị mẹ lẹlẹ.

Ịsọja Juwa Kpa IJisọsị Họ

(ịMatiyu 27:27-31; ịJọn 19:2-3)

16Ụka ọọwa, ịsọja ịwẹ kpa iJisọsị rụ kele kaka godayị rịrị o-okilolo nya ọdọdẹpwa nya adịrahụ ịPayịleti. Ọọwa lẹ, ị wụrụ alogu nya ịsọja ihihi aanaa kaka jịra ụ-ụwa lẹlẹ. 17Ịsọja ịwẹ hu awụrụ ọnyọmịla ogbileji kụrụ iJisọsị ụ-ụwa. Ọọwa lẹ, ị họ okpo nya ejwo-ejwo kụrụ iJisọsị e-egbeju ụ-ụwa ịnyịnyị lẹlẹ. 18Ịnyị, ịsọja ịịwa a juwa kpa iJisọsị họ juwa byoo yẹkẹẹ, “Ịjachi! Ahụ Adịrahụ nya ala iJuu a ka hịhị gbe oyi myị́ oyi.” 19I juwa kpa ugboji wa iJisọsị e-egbeju, juwa chị́ ide hwọọ ụ-ụwa. Ọọwa lẹ, ị juwa ya arụụ nyaa ku eji ha iJisọsị lala adịrahụ lẹlẹ. 20Ụka kị kpọọ họ ụ-ụwa kpá nwa ịlaa lẹ, ị pwọ awụrụ ọnyọmịla ogbileji ọwẹ hi iJisọsị lẹ. Ị go ịwụrụ nya ịlọmwụ kụrwọọ lẹlẹ. Ọọwa lẹ, ị juwa kpa iJisọsị rụ kele kaka gu iloo ba okoji lẹlẹ.

Ị Gu IJisọsị Iloo Ba Okoji

(ịMatiyu 27:32-44; iLuku 23:26-43; ịJọn 19:17-27)

21Ụka ọọwa, angịdẹwụ ịịwa tọ ịSayịmọn ola ịSayịrin ụ-ụgbẹyị kọ juwa kpehe bwu ẹgẹhẹ. Ọọwa lẹ, ị woo lagbụrụ lẹ, ị ya olo nya agurube nya iJisọsị chwọọ lẹlẹ. ỊSayịmọn ọọwa a ri adịda nya Alẹkịsanda bala iRufọsị lẹ. 22Ịnyị, ị kpa iJisọsị jẹ gbee pwụ ẹgẹhẹ ọlẹ kị wụrụ iGolugota ọlẹ ká etu nyamwụ ri “ẹga nya ogo nya egbeju” lẹlẹ. 23I hu ere ọnwanwa ọlẹ kị ya utoji ọhẹ ọlẹ kị wụrụ “ịmaa” ju, ha iJisọsị kọ ka nwa ụ-ụwa. Ma, iJisọsị á myị ye ere ọọwa nwa ka. 24I-iGolugota ọwẹ, ịsọja ịịwa a gu iJisọsị iloo ba okoji lẹ. Ọọwa lẹ, ị go ịwụrụ nyamwụ gịla awụlẹ, juwa diwo jwaa kị ka jẹ́ ọngọlẹ kọ ka la awụrụ ọnyọnyọọnyị lẹlẹ. 25Ụka nya oje ihikichu nya ụtụrụ, ị gu iJisọsị iloo ba okoji ẹnụ ọọwa lẹ. 26Ị da ịnaaba nya ẹla ọlẹ kị chị ba iJisọsị u-uhye nya agurube ọlẹ kị gwoo iloo ba. Ị da yẹkẹẹ, “Ọlẹng ọlẹ a ri Adịrahụ nya ala iJuu lẹ.” 27Angịwẹ gu aleyi alẹng imiiye ịhyẹ iloo ba okoji ju iJisọsị chwẹẹ ịnyịnyị. Ọngọhẹ nyaa ji koye upwuriri nya iJisọsị. Ọngọkịla nyaa ji koye ụpụpịla nyamwụ. [28Ẹlẹwẹ ri ọ-họ jịra jaabwọ ká Ụpwụ Ịgọgọ ya ẹla rụ́ iJisọsị lẹẹ yẹkẹẹ, “Ị ka wọọ jula alọhọbịrị ụka ọọwa ịnyịnyị.”]

29Ụka ọọwa, angịlẹ kị juwa chịpwụrụ bwu ẹga nya agurube nya iJisọsị juwa kpọọ họ juwa ya abwọ nyi akụ lẹhụ-lẹhụ, juwa nyi egbeju kile-kile ịnyịnyịịnyị. I juwa byi iJisọsị yẹkẹẹ, “Ahụ ọngọlẹ ká yẹkẹẹ, ọwa nyị ka tụrụ ube ịgọgọ ọtụka nya Ohe Oluhye ọlaanyị ju eji kọọwa nyị ka mọọ nwụ́ myị́ ẹ-ẹpwụ nya ẹnụtụrụ ịta kẹnẹ-kẹnẹ lẹẹ! 30Ahị pyẹ dụwẹ hang lẹ, chị ịlọng da alẹ, ká hireji bwu uhye nya agurube ọwẹ kahị yẹ mẹ!”

31Ụka ọọwa, alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ anyị juwa kpa iJisọsị họ byi awụlẹ yẹkẹẹ, “M me ọwa a tị́ kaa chị angịkịla da lụmẹ lẹẹ, kọ rụ́? Ọ́ tị jụ ịlọmwụ chịda myị́ kaka wẹ lẹ! 32Ọwa-à tị́ ri ịKịrayịsị Adịrahụ nya ala iJuu kọ rụ́ lẹlẹ. Ọ hireji bwu uhye nya agurube ọwẹ lẹẹlẹẹ kahị yẹ wẹ mẹ. Aalẹ, ahị ka myị lọọ lẹ.”

Ụka ọọwa, aleyi ịlẹ kị gu iloo ba agurube ju iJisọsị chwẹẹ, juwa kpọọ họ ịnyịnyị lala angịkịla.

Igu Ogbugbu nya IJisọsị

(ịMatiyu 27:45-56; iLuku 23:44-49; ịJọn 19:28-30)

33Ụka ká oje iwo kụrụ imiiye nya ẹnụ họ lẹ, ukpowu ọtụka-ọtụka a chị kpem-kpem ụ-ụwa ọ-ọpyị nya ala iJuu wuu gbee ju ka ụka nya oje ịta nya obyi lẹlẹ. 34Ụka ká oje ịta nya obyi họ bwaaa lẹ, iJisọsị a chị eko la omyi ogboo yẹkẹẹ, “Ẹlọyị, Ẹlọyị, Lama Sabakịtanị” ọlẹ ká etu nyamwụ ri yẹkẹẹ, “Ohe Oluhye nyam, Ohe Oluhye nyam, ịịyẹ a tị́ du ká juwa ji ẹkpẹ dam ịnyị?”

35Ụka ọọwa, angịhyẹ ịlẹ kị godayị rịrị ụ-ụwa kị wo ẹlẹwẹ ká iJisọsị ya, juwa yẹkẹẹ, “Anụ ke ụrụ kanụ wo jaabwọ ká ọlẹng ọwẹ lalẹẹ be ẹkọ wụrụ Ịlayịja wẹẹ!” 36Ọọwa lẹ, ọngọhẹ ẹ-ẹpwụ nyaa a rụnyẹ kele kaka hu akuruhya, kpa kaka kpụ ẹpwụ nya ere ọ-chagbịlangịrị ọhẹ lẹ, ọ hu akuruhya ọọwa chị ori ba okoji lẹ, ọ nịrọọ kpaa kaka ju iJisọsị ọ-ọnụ, kọ ka nwa lẹlẹ. Ịnyị, ọngọọwa a juwa byi angịkịla yẹkẹẹ, “Anụ ba wẹẹ! Kahị yẹ mẹ. Ó-ri ká Ịlayịja á ka warị kaka chọọ da lẹ, kahị yẹ alẹ mẹ!”

37Ọọwa lẹ, ụka ká iJisọsị chị eko la omyi o-gboo bwaaa lẹ, ọ chị ẹjẹ lẹlẹ.

38Ụka ọlẹ ká iJisọsị chị ẹjẹ bwaaa lẹ, apwụ ọtụka ọlẹ kị ya ke ẹ-ẹpwụ nya ube ọlịgọgọ ọgụgụ olube ịgọgọ ọtụka nya Ohe Oluhye nya ala iJuu, a gu ene imiiye bwu uhye-ọgba lalala kaka gu eji lẹlẹ.

39Ịnyị, ụka ọlẹ ká olegbeju ọgbahị nya ịsọja ohu ịrụ ọlẹ kọ godayị rịrị jahị da iJisọsị mịlẹ-mịlẹ, ri ibeenu jaabwọ ká iJisọsị bwu chị ẹjẹ ịnyị lẹ, ọ ya dodehe yẹkẹẹ, “Nya ẹla ịlẹhị ịnyị, ọlẹng ọlẹ ayịdang ri Ọnyẹwẹ nya Ohe Oluhye ịnyịlẹhị!”

40Ụka ọọwa, anyang ịhyẹ godayị rịrị hwẹẹ, juwa chẹhị kaka yẹ ang myị́ ang ọlẹ kọ juwa họ ẹ-ẹga nya iJisọsị. Ẹnyị nya angịhyẹ nya anyang ịịwa ri iMeri ọla ịMagịdala bala iMeri ọlẹ kọ ri ịnịna nya iJemsi ochiche bala iJosesi. ỊSalomi juwa ịnyịnyị. 41Ụka ká iJisọsị juwa i-ịGalili lẹ, anyang ịwẹ kaa bọọ jẹ, juwa myị ẹrụ họọ ụ-ụwa. Iru nya anyang ịkịla ịlẹ kị ba iJisọsị kele ka iJerusalẹm juwa ụ-ụwa ịnyịnyị.

Ị Ju Ogu nya IJisọsị Eji

(ịMatiyu 27:57-61; iLuku 23:50-56; ịJọn 19:38-42)

42Ịnyị, lụka nya obyi ohihi ẹnụ ọọwa, jaabwọ ká ẹnụtụrụ ọọwa ri ẹnụ nya ịFụrayịde ọlẹ kọ kaa ri ụka ọ-kpa nwụlanọ gbe Ẹnụtụrụ Ọhịnyọ Lụkụrwọ nya ala iJuu, 43ọlẹng ọhẹ ọlẹ ká ẹnyị nyamwụ ri iJosẹfụ a pwụ eji kele lẹlẹ. IJosẹfụ ọọwa bwu epweji nya Arịmatiya. Ọ ri ọngọhẹ lẹpwụ nya angị la ihi lụmẹ ịlịkọtụ ọtụka-ọtụka ọgụgụ nya ala iJuu wuu. IJosẹfụ ọwẹ ayịdang juwa la ẹhị ọrịrịị-rịrị gbe ịpyị Adịrahụ nya Ohe Oluhye. Ịnyị a du ká iJosẹfụ kele kaka bịlẹ ịPayịleti ogu nya iJisọsị kọ ka hwoo kpa kaka ju eji lẹ. 44Ụka ọọwa, ịPayịleti juwa da ịwẹẹ, ó-ri ká iJisọsị á ka dodoo gbu ahyaahị lẹ. Ịnyị, ọ be ẹkọ wụrụ olegbeju ọgbahị nya ịsọja ịkpẹhị rịrị iJisọsị kaka tọọ wo kọ ka jẹ́, ó-ri ká iJisọsị á gbu lẹ. 45Ụka ọlẹ ká ịPayịleti wo bwu ẹga nya olegbeju ọgbahị nya ịsọja ohu ịrụ ọọwa yẹkẹẹ, iJisọsị nyị gbu dẹyị-dẹyị lẹ, ịPayịleti a myị ọnụ ha iJosẹfụ yẹkẹẹ, nyị hu ogu nya iJisọsị kpa kaka ju eji mẹ, lẹlẹ. 46Ịnyị, iJosẹfụ a hiri ogu nya iJisọsị eji lẹlẹ. Ọọwa lẹ, ọ kpa apwụ onyoowuru o-ju ogu eji ọlẹ kọ ra kele kaka rị ogu nya iJisọsị lẹ, ọ hwoo kpa kaka ju eji i-iworu ọhẹ ọlẹ kị bebe u-uhye nya ẹjwọ lẹlẹ. Ọọwa lẹ, ọ rị ẹjwọ ọtụka-ọtụka ọhẹ kaka tụ ọnụ nya iworu ọọwa ku lẹlẹ. 47Ụka ọọwa, iMeri ọla ịMagịdala bala iMeri ọlẹ kọ ri ịnịna nya iJosesi anyị yẹ ẹga ọlẹ kị ju iJisọsị eji.

Currently Selected:

ỊMAKỊ 15: IBNO

Highlight

Copy