ỊMAKỊ 14

Ị Me Obyi nya Igu Ju IJisọsị

(ịMatiyu 26:1-5; iLuku 22:1-2; ịJọn 11:45-53)

1Ụka ọọwa, ụtụrụ imiiye kẹnẹ-kẹnẹ a hi ká ụka nya Ang Oriri Ọchịpwụrụ ọlẹ kị kaa ri ịkaa ọmịrịị mịrị-ka ụ-ụwa ka pwụ eji lẹlẹ. Alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ anyị me obyi gu awụlẹ kpọng-kpọng wuu jaabwọ kị ka bwu wu iJisọsị yoyi-yoyi kpa kaka nwụ. 2Chajị, angịwẹ wuu gbile awụlẹ ụbwọ ụ-ụrụ yẹkẹẹ, “Áhị́ ka họ iJisọsị abwọhẹ lụka nya Ang Oriri Ọchịpwụrụ ọlẹ kpangga ka. Ó-ri ịnyị ka, tụbwọ aalẹ, iru nya angịnyị ịwẹ ka kpa ojigi-jigi ọtụka-ọtụka warị o-oluhye nyamwụ.”

Ị Wụ IJisọsị Ida Ụ-ụwa Ị-ịBẹtanị

(ịMatiyu 26:6-13; ịJọn 12:1-8)

3Ụka ọhẹ, iJisọsị juwa ẹ-ẹpwa nya ịSayịmọn ọhẹ ọlẹ kọ ri olekpo e-epweji nya ịBẹtanị. Ụka ká iJisọsị hụhụ i-itebwuru nya ang oriri ụ-ụwa, ọnyang ọhẹ hu ida ochoru kwọkwọ ọnyịịla ọlẹ kọ la ịnya lụmẹ kị wụrụ “ịnaadị,” kpa kaka bene hụ iJisọsị e-egbeju. Ị ya ida ọọwa ju ẹ-ẹpwụ nya ichu-ọta ochiche olido tene ọlẹ kị kpa ẹjwọ nya “alabasịta” kọ. 4Ma, ụka ká angịhyẹ ịlụwa yẹ ang ọlẹ ká ọnyang ọọwa họ lẹ, ọ waa ẹjẹ lụmẹ. I juwa byi awụlẹ yẹkẹẹ, “Ịịyẹ a tị́ ri apyobwuna nya o-hu ida ọnyịịla ọwẹ bịrị hụrụ ododu mẹ? 5Ọkọkọ nya ọwẹ lẹ, ịnọ, ó-ri kị hu ida ọwẹ ra okpoko lala akpa ịta, kị hu okpoko ọọwa gịla ikpehika, ịnọ, ọ́ ka hagụ ka?” Ọọwa lẹ, angịwẹ a juwa kpụ ọnyang ọwẹ abyị ịnyịlẹhị ịlẹhị lẹlẹ.

6Ma, iJisọsị wẹ byaa yẹkẹẹ, “Anụ ba hi ọnyang ọwẹ chịng pyii! Ịịyẹ a tị́ du kanụ juwa ju olo nya abyị ọkpụkpụ chwọọ ododu ịnyị kpong-kpong? Anụ wo mẹ! Ang ọnyịịla nya ịlẹhị-ịlẹhị, a wẹ ká ọnyang ọlẹ họ ẹ-ẹga nyam. 7Chajị, ikpehika ịwẹ ka jam tanụ ụka wuu pyịyọọ. Ụka myị́ ụka kọ háanụ, anụ ka họ ang ọnyịịla haa myị́. Ma, am ayịdang lẹ, ḿ tị ka jam tanụ pyịyọọ ka. 8Ang ọnyịịla ọwẹ ká ọnyang ọlẹ ka jụ họ ham myị́ a wẹ kọ họ lẹlẹ, chajị ida ọlẹ kọ ya yẹ hụm wẹ lẹ, ọ ri ang ọnwụla ugbinyịrọ nyam nọ gbe ụka ọlẹ kị ka jum eji. 9Nya ịlẹhị-ịlẹhị, m byinu yẹkẹẹ, ẹga myị́ ẹga kị ka kpa ẹrụ ọnyịịla ọlẹ kaka ya pyẹ, ẹ-ẹpwụ nya odehe ọlẹ wuu, alụwa ka kpịtịya nya ọnyang ọlẹ pyii ịnyịnyị lẹ. Chajị, ị ka kpa oja nya ang ọlẹ kọ họ wẹẹ alẹ pye-ebile dịrẹ ẹrụ ọnyịịla ọọwa ju ka ẹga myị́ ẹga wuu ịnyịnyị pyii lẹ.”

IJudasị Ye Okpoko Chajị nyọka Pịrị IJisọsị Ha

(ịMatiyu 26:14-16; iLuku 22:3-6)

10Ụka ọọwa, iJudasị Isikarọtụ ọlẹ kọ ri ọngọhẹ lẹpwụ nya angịjụgbẹyị angị iwo kụrụ imiiye, kele ka ẹga nya alegbeju nya angịkiliya nya Ohe Oluhye kaka myị ọnụ haa yẹkẹẹ, ọwa nyị ka pịrị iJisọsị hanụ lẹ. 11Ụka ká angịwẹ wo ẹla oyaya nya iJudasị ọọwa lẹ, ọ kpaa ịpyọ lụmẹ kaka kpoye. Ịnyị lẹ, ị myị ọnụ kị ka nwụ iJudasị uri kwiwa nya ọọwa lẹlẹ. Bwu ụka ọọwa lẹ, iJudasị Isikarọtụ a juwa kụ kee gbe ụka ọlẹ ká ẹga ka chị dọọ chajị kọ ka jẹ́-ẹ pịrị iJisọsị ha lẹlẹ.

iJisọsị Ri Ang Oriri Ọchịpwụrụ Bala angịjụgbẹyị nyamwụ

(ịMatiyu 26:17-25; iLuku 22:7-14,21-23; ịJọn 13:21-30)

12La ẹnụtụrụ nya ọgbanyẹ-ọgbanyẹ nya ang oriri nya ịkaa ọmịrịị mịrị-ka, ụka ọlẹ kị kaa kpa nwụ ọnyị ọkpịlọ ọkịla iya nya Ang Oriri Ọchịpwụrụ, angịjụgbẹyị nya iJisọsị tọọ wo yẹkẹẹ, “Ayịbahị, ale, a tị́ tịtọ kahị kaka nwụla ẹga ọhụhụ nọ hang ká ka hụ ri Ang Oriri Ọchịpwụrụ ọlẹ?” 13Ịnyị, iJisọsị a du angị imiiye bwu ẹpwarịrị nyaa ẹrụ lẹ, ọ byaa yẹkẹẹ, “Anụ kele ka ẹpwụ nya epweji ọwẹ mẹ. Ụka kanụ pwụ ụwa, anụ ka tọ ọnyị ọlẹng ọhẹ kọ ka juwa nya ogo ụ-ụgbẹyị la ọta nya enyi. Anụ́-ụ bọọ jẹ mẹ. 14Ụka kanụ bọọ pwụ ẹpwa nyaa kpá, anụ kele kaka byi ayịdẹpwa ọlụwa yẹkẹẹ, ‘Am Ọngọmẹjẹ ayịdang nyị yẹkẹẹ, ẹpwụ nya ube nya angga oyina kpangga, am bala angịjụgbẹyị nyam nyaa tị́ ka hụ ri Ang Oriri Ọchịpwụrụ ọlẹ?’ 15Ụka ọọwa, ayịdẹpwa ọọwa ka kpanụ kele ka ube-oluhye nyamwụ kaka mẹ ẹpwụ nya ube ọtụka-ọtụka ọhẹ ọlẹ kị nwụlanọ yẹẹyẹẹ, ká ekeji ị-da hụhụ juwa ụ-ụwa wuu ene-ene lẹ jẹẹnụ. Ụ-ụwa, anụ ka nwụla iwe-ahụrụ nọ gbehi lẹlẹ.”

16Ịnyị, angịjụgbẹyị nyamwụ ịịwa a hu ang kele ka epweji ọọwa lẹ, ị yẹ ang myị́ ang ụ-ụwa wuu jaabwọ ká iJisọsị ya jaa ene-ene lẹlẹ. Ọọwa lẹ, ị nwụla iwe-ahụrụ nọ gbe ụka nya Ang Oriri Ọchịpwụrụ ọọwa ịnyịlẹhị lẹlẹ.

17Ụka ká obyi hi ẹnụ ọọwa lẹ, iJisọsị bala angịjụgbẹyị nyamwụ angị iwo kụrụ imiiye a kele ka ube ọọwa kaka hụhụ nyọka ri Ang Oriri Ọchịpwụrụ ọọwa lẹlẹ. 18Ụka kị juwa kpa ang oriri ọọwa ri i-itebwuru lẹ, iJisọsị a byaa yẹkẹẹ, “Nya ịlẹhị-ịlẹhị, m byinu yẹkẹẹ, ọngọhẹ lẹpwarịrị nyanụ anụ angịjụgbẹyị nyam juwa ka pịrịm ha lẹ! Ọngọhẹ lẹpwarịrị nyanụ anụ angịlẹ kanụ lẹẹ ri ang tam ịnyị!”

19Ụka ká angịjụgbẹyị nya iJisọsị wo ẹla ọọwa lẹ, ọ taa olujwo lụmẹ kaka kpoye. Ụka ọọwa, ịwa wuu juwa tọ iJisọsị ịtọ, ọngọhẹ ọngọhẹ yẹkẹẹ, “Ọngọlahị, am ịnyị? Ọngọlahị, am ịnyị?”

20iJisọsị wẹ byaa yẹkẹẹ, “Ọngọhẹ lẹpwarịrị nyanụ anụ angị iwo kụrụ imiiye ọlẹ kọọwa ayịdang wẹẹ kpa ịkaa hi ọhọ bwu ẹja ookpokpo tam ịnyị! 21O-ri nya ịlẹhị, am Ọnyị nya ọngịnyị ehe ọlẹ juwa ka gbu jaabwọ kị da ụ-Ụpwụ Ịgọgọ rụ́m ene-ene lẹ. Ma, ọngọlẹ kọ wẹẹ ka pịrị Ọnyị nya ọngịnyị ehe ọlẹ ayịdang ha-à wẹẹ, ọ ri enyi gu obyi lẹ! Chajị, ó-ri kị dọmwụ ma ọngọọwa ma warị wẹ ẹpwụ nya odehe ọlẹ kpong-kpong ka, ịnọ, ọ ka hiigu họọ gụ lẹ.”

Ang Oriri Ịgọgọ

(ịMatiyu 26:26-30; iLuku 22:14-20; 1 Ala ịKọrịntị 11:23-25)

22Ụka kị juwa kpa ang oriri ọọwa ri ịnyịnyịịnyị lẹ, iJisọsị a hu ịkaa lẹ, ọ wahị kụrwọọ ẹ-ẹpwụ nya abwọ ọrịrị lẹ, ọ gwoo ene, hwoo ha angịjụgbẹyị nyamwụ lẹ, ọ byaa yẹkẹẹ, “Anụ ye ịkaa ọlẹ, kanụ ri mẹ. Ọwa-à ku ọmwakpa nya ugbinyịrọ nyam lẹlẹ.”

23Ọọwa lẹ, iJisọsị a hu ukoku nya ere lẹ, ọ ji Ohe Oluhye obe u-uhye nyamwụ lẹ, ọ hwoo ha angịjụgbẹyị nyamwụ lẹ, ọng myị́ ọng lẹpwarịrị nyaa a nwa ere ọọwa lẹlẹ. 24Ọọwa lẹ, iJisọsị a byaa yẹkẹẹ, “Ere olukoku ọlẹ a ku ọmwakpa nya ịwọ nyam ọlẹ kam ya yẹ hụrụ wọnụ nya iru nya angịnyị ehe ju u-uhye nya iro ọnwanwa onyeewe nya Ohe Oluhye lẹ. 25Nya ịlẹhị-ịlẹhị, m byinu yẹkẹẹ, am lẹ, ḿ ka nwa ere nya alakọnụ ọwẹ gụ ọlẹ kaka gbee pwụ ẹnụtụrụ ọlẹ kam ka nwa onyeewe nyamwụ ụ-ụwa ị-ịpyị Adịrahụ nya Ohe Oluhye.”

26Ịnyị, ụka kịịwa wuu mwu eje ịgọgọ ọhẹ ụ-ụwa kpá lẹ, ị rụ bwu ụwa ka Ọgbọdọ Olivu lẹlẹ.

iJisọsị Yẹ Ọmwụ Rụ́ IPita ọ-ka Pwọọ Pwa Rwarụ

(ịMatiyu 26:31-35; iLuku 22:31-34; ịJọn 13:36-38)

27Ịnyị lẹ, iJisọsị a byi angịjụgbẹyị nyamwụ yẹkẹẹ, “Abwọ ka chị́ịnụ wuu pyẹpyẹ ẹ-ẹga nyam du kaanụ wuu ka nyi epepe rụ him jaabwọ ká Ohe Oluhye ya ẹ-ẹpwụ nya Ụpwụ Ịgọgọ ene-ene yẹkẹẹ, ‘Am Ohe Oluhye ka nwụ ọngọgbikpịlọ nyam Am ayịdang. Ụka ọọwa, ịkpịlọ ịịwa wuu ka nyi epepe gbanggbang.’ ” 28IJisọsị myịmyị byaa yẹkẹẹ, “Ma, ụka kam wuleji bwula igu kpá, m ka ji ịlahị nyanụ rụ kele ka ịGalili.”

29IPita ya ẹla dodehe byi iJisọsị yẹkẹẹ, “Ọngọlahị, am lẹ, óo-riri ká abwọ á ka chị́ angịkịla wuu chị́ pyẹpyẹ, kị ka ji ẹkpẹ nyaa ji dang tụbwọ aalẹ, aḿ ka họ ịnyị kpong-kpong ka.”

30IJisọsị wẹ byi iPita yẹkẹẹ, “Nya ịlẹhị-ịlẹhị, m bying yẹkẹẹ, ene ká ọwọọwọ ka da ịgbụ ụka imiiye lodu ọlalẹ kpá, ahụ iPita ọwẹ ka pwam rwarụ ugbabwọ ịta.”

31Ma, iPita pwa la ọngịrị nya ịlẹhị-ịlẹhị yẹkẹẹ, “Ọngọlahị ee, ọ́ dọmwụ ri igu riri, kam ka gbu tang wẹwẹ aalẹ, ḿ ka pwang rwarụ kpong-kpong ka.” Ọọwa lẹ, angịjụgbẹyị nya iJisọsị angịkịla wuu a juwa ya ịnyịnyị lala iPita lẹlẹ.

IJisọsị Raabwọ Ụ-ụwa I-iGetisemeni

(ịMatiyu 26:36-46; iLuku 22:39-46)

32Ịnyị lẹ, iJisọsị bala angịjụgbẹyị nyamwụ a kele ka ẹgẹhẹ ọlẹ kị wụrụ iGetisemeni lẹlẹ. Ụ-ụwa, ọ byi angịjụgbẹyị nyamwụ yẹkẹẹ, “Anụ hụhụ ẹ-ẹgẹlẹ gbem, kam kịlahị ẹga ọlaanyị kaka raabwọ ha Ohe Oluhye wẹẹ.”

33Ụka ọọwa, iJisọsị kpa iPita, iJemsi bala ịJọn ba ịlọmwụ kele ka ụwa ịnyịnyị. Ọọwa lẹ, olo nya imahị bala ang ọjụjụ ọtụka-ọtụka a myị ọkịlẹtụ nya iJisọsị ụ-ụwa nya ịlẹhị-ịlẹhị lẹlẹ. 34Ịnyị, iJisọsị a byaa yẹkẹẹ, “Anụ wo mẹ! Ugbodu okpukpuru nyam myị la olo nya ang ọjụjụ lụmẹ kaka kpoye pwụ igu lẹ! Chajị nya ọọwa lẹ, anụ hụ ám ẹgẹlẹ kanụ juwa gbeji mẹ.” 35Ịnyị, iJisọsị a rụ tụ kele kịlahị chẹẹ lẹ, ọ hịda keji, juwa raabwọ ụ-ụwa bịlẹ Ohe Oluhye chajị ká Ohe Oluhye ka họ kọ ka be hi akama ọtụka ọlẹ kọ nyi enyi nụwẹ gboo lẹlẹ. 36Ọọwa lẹ, ọ yẹkẹẹ, “Oo, Adada Ohe Oluhye Adịda nyam ee! Ang myị́ ang wuu chịkpẹẹ hang. Lẹ, chuchuu, myị ká ukoku nya ang ọjụjụ ọtụka ọlẹ a chịpwụrụ him chẹẹ mẹ! I-irya nyam am ayịdang a tị ka họ koo! Ma, ọlẹ kọ ri irya nyang ahụ Adịda ịnyị!”

37Ụka ká iJisọsị warị wẹ ẹga nya angịjụgbẹyị nyamwụ angị ịta ịwẹ, ọ yaa kị juwa kpa une nọ. Ọ byi iPita yẹkẹẹ, “ỊSayịmọn, ahyu! Ọ ri yẹkẹẹ, Ununuune, anụ jam nọ lẹlẹ? Ọ ri yẹkẹẹ, ánụ ka gbeji la awa ookpokpo ọlam-ọlam ọlẹ myị́ ka? 38Anụ juwa gbeji giri-giri, kanụ juwa raabwọ ha Ohe Oluhye ọgwọgụ ịnyịnyị, chajị kanụ ka chabwọ ju ka ẹpwụ nya ọmayẹ nya ang onyobyi ọhọhọ kaka mẹ. Olegu ọlẹpwụ nyanụ lẹ, ọ la ila ọchịchị lụmẹ juwa lẹ! Ma, ugbinyịrọ tị la dẹwụ-dẹwụ lụmẹ kaka kpoye.”

39IJisọsị myịmyị mwẹẹkpẹ rụ kele kaka raabwọ ha Ohe Oluhye ẹ-ẹga ọọwa, ẹga ọọwa, juwa ma ala ịlẹ kọ ya ẹ-ẹpwụ nya abwọ ọrịrị nya ọgbanyẹ-ọgbanyẹ ya myịmyị ụ-ụwa. 40IJisọsị myịmyị tịrẹkpẹ kele ka ẹga nya angịjụgbẹyị nyamwụ angị ịta ịwẹ. Ọ myịmyị yaa kị juwa kpa une nọ ụka oheeye, chajị une go rịraa a-ahị la egbahị nyaa juwa laa ilo nya ịlẹhị-ịlẹhị. Ọọwa lẹ, angịjụgbẹyị nyamwụ ịwẹ a jẹ́ ẹlẹlẹhẹ ọlẹ kị ka wẹ iJisọsị kaka lẹlẹ. Ịnyị, iJisọsị a rụ kaka raabwọ myịmyị lẹlẹ.

41Ọọwa lẹ, iJisọsị a tịrẹkpẹ kele ka ẹga nya angịjụgbẹyị nyamwụ ịwẹ myịmyị ụka ọhata lẹ, ọ byaa yẹkẹẹ, “Ó-ri anụ jam nune, jam mwụ ịnyọ pyịyọọ da warị wẹ ụka ọlẹ wẹẹ? Ọ nwa lẹ! Anụ wo mẹ! Ụka ọlẹ kị ka kpa tụụbwọ him am Ọnyị nya ọngịnyị ehe ọlẹ ju alọhọbịrị ụ-ụbwọ pwụ lẹ! 42Anụ wuleji kahị rụ mẹ. Anụ yẹ mẹ! Ọngọlẹ kọ juwa ka pịrịm ha ji ọnaabwọ lụmẹ lẹ!”

Owuwu nya IJisọsị

(ịMatiyu 26:47-56; iLuku 22:47-53; ịJọn 18:3-12)

43Ahyaahị, ụka ọlẹ ká iJisọsị juwa kpa ẹla ọọwa ọ-ọnụ ya wẹẹ lẹ, iJudasị Isikarọtụ ọlẹ kọ ri ọngọhẹ lẹpwarịrị nya angịjụgbẹyị angị iwo kụrụ imiiye, a pwụ eji warị wẹ ẹga nya iJisọsị lẹlẹ. IJudasị kpa angịnyị lụmẹ-lụmẹ ba ịlọmwụ. Angịịwa kpa ige bala ekwiji a-abwọ nyaa. Alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ bala ịgabwọ nya ala iJuu wuu a du angịịwa ẹrụ kele lẹ. 44IJudasị ọngọ pịrị iJisọsị ha ọwẹ ya je iru nya angịnyị ịịwa ene-ene yẹkẹẹ, “Ọngọlẹ kam wẹẹ ka ju ọnụ a ri iJisọsị ọọwa lẹlẹ. Anụ́-ụ woo, kpa ụ-ụwa giri-giri, kanụ kpọọ rụ mẹ.”

45Ụka ká iJudasị pwụ ụwa lẹ, ọ kpụrụrụ kele ka ẹga nya iJisọsị, juwa wụrwọọ, “Ayịbahị, Ayịbahị!” juwa ju iJisọsị ọnụ ụ-ụwa ịnyịnyị lẹlẹ. 46Ọọwa lẹ, alogu ẹdịyẹ nya iJudasị Isikarọtụ a kele kaka wu iJisọsị lẹ, ị yụbwọ dụrwọọ kịrẹkpẹ kpọọ ụ-ụwa gogoogo lẹlẹ. 47Ịnyị, ọngọhẹ lẹpwarịrị nya angịlẹ kị godayị rịrị ụ-ụwa ta iJisọsị, a gbile oge nyamwụ pịlala lẹ, ọ hụla ụrụ ọhẹ nya ọnchẹ nya olegbeju ọgbahị nya angịkiliya nya Ohe Oluhye hwaarịị dụwa ị-ịpyị lẹlẹ. 48Ụka ọọwa, iJisọsị byi alogu ẹdịyẹ nya iJudasị Isikarọtụ ịịwa yẹkẹẹ, “Ọlẹ kanụ wẹẹ kpa ịma nya ẹwụ bala ekwiji warị wẹ la ọ-ka wum wu lẹ, m ri oloyi nyanụ? 49Ụka kaam ayịdang juwa tanụ, kam kaa mẹ ang jẹ ẹnẹnẹẹnụ u-ube ịgọgọ ọtụka nya Ohe Oluhye nyahị ala iJuu lẹ, ánụ jụm jụ wuwu myị́ ka! Ma, ang ịlẹ wuu tị jam la ịnyị alẹ chajị kọ ka ri ang ọ-họ jịra nya ala ịlẹ wuu kị da ẹ-ẹpwụ nya Ụpwụ Ịgọgọ rụ́m ene-ene.”

50Ịnyị lẹ, angịjụgbẹyị nya iJisọsị wuu a rụnyẹ rụ, nyi epepe hyoo ụ-ụwa lẹlẹ.

51Ụka ọọwa, ọnyị onjwo okolobya ọhẹ ọlẹ kọ da igbagiri onyoowuru kem kụrụ, juwa dịrẹ iJisọsị ẹ-ẹkpẹ-ẹkpẹ. Ọọwa lẹ, ụka ká angịlẹ kị juwa kpa iJisọsị rụ, juwa tịtọ kị ka wu ọnyị ọlẹng ọwẹ ịnyịnyị lẹ, ị yụbwọ dụrwọọ i-igbagiri kịrẹkpẹ lẹlẹ. 52Ịnyị, ọnyị ọlẹng ọwẹ a nwụla igbagiri nyamwụ ọọwa jwaa ụ-ụbwọ lẹ, ọ rụnyẹ rụ lọhị lọhị lẹlẹ.

IJisọsị Ụ-ụwa Ị-ịlahị nya Angị Lọọ Eje

(ịMatiyu 26:57-68; iLuku 22:54-55,63-71; ịJọn 18:13-14,19-24)

53Ụka ọọwa, angịlẹ kị wu iJisọsị, kpọọ kele ka ẹga nya olegbeju ọgbahị nya angịkiliya wuu. Ọọwa lẹ, alegbeju nya angịkiliya nya Ohe Oluhye bala ịgabwọ nya ala iJuu wuu bala Ịtịcha ị-mẹ ehile nya iMosisi jẹ anyị a kaka jịra ụ-ụwa lẹlẹ. 54Ụka ọọwa, iPita juwa ba iJisọsị anyị jẹ ẹ-ẹkpẹ-ẹkpẹ hwẹẹẹ, ịnyịnyịịnyị gbee ju ka ọdọdẹpwa nya olegbeju ọgbahị nya angịkiliya ọwẹ. IPita kaka hụhụ ụ-ụwa, juwa wo ila ta alịdanggeri igbeji ịlụwa. 55Ụka ọọwa, alegbeju nya angịkiliya nya Ohe Oluhye ịwẹ wuu bala angị hihi nya alịkọtụ nya eje ọgụgụ nya ala iJuu wuu, juwa tịtọ nya ibeenu ọlẹ kị ka kpa chị ala ba iJisọsị ụ-ụwa, chajị kị ka jẹ́-ẹ ya eje nya igu woo. Ma, ị́ tị ye ibeenu ọlịnyị ọhẹ-lọhẹ kpong-kpong kaka. 56Chajị, ịnọ, angịhyẹ kpa ibeenu ịnịịkịla ịhyẹ kpehe ụ-ụwa, ma, jaabwọ ká alibeenu ịịwa ayịdang á tị myị ju awụlẹ ka lẹ, ibeenu oriri nyaa á la kpakpa ka.

57Ịnyị lẹ, angịhyẹ lẹpwarịrị nyaa, a godayị rịrị, juwa ri ibeenu ọnọọkịla tụ iJisọsị pyịpyị yẹkẹẹ, 58“Ahị wo ká ọnyị ọlẹng ọlẹ juwa ya dodehe yẹkẹẹ, ọwa ayịdang nyị ka la ọngịrị tụrụ ube ịgọgọ ọtụka ọlaanyị, ká angịnyị ehe nyị nwụ́nwụ labwọ nyaa kọọwa nyị ka myịmyị-ị̀ me ube ọkịla ọlịnyịnyị ọlẹ ká ọngịnyị ehe nyị́ ka kpa ụbwọ nyamwụ nwụ́ ene kaka, ẹ-ẹpwụ nya ụtụrụ ịta kẹnẹ-kẹnẹ myị́.” 59Alibeenu ịịwa á tị myị ju awụlẹ ẹ-ẹpwụ nya ibeenu oriri nyaa ọọwa kpong-kpong ka.

60Olegbeju ọgbahị nya angịkiliya ọwẹ tọ iJisọsị wo yẹkẹẹ, “A tị́ wo ala ịlẹ wuu kị chị bang wẹ lẹ! Ahụ ayịdang la ẹlẹlẹhẹ ka da ọnụ waa kpong-kpong?”

61Ma, iJisọsị hwoo ujiji kpini-kpini. Ọ́ wọọ ẹlẹlẹhẹ bwu ọnụ ka. Ọọwa lẹ, olegbeju ọgbahị nya angịkiliya ọwẹ a myịmyị tọ iJisọsị ịtọ yẹkẹẹ, “Ya jem wẹẹ! Ahụ kpakpakpa a ri ịKịrayịsị Ọnyẹwẹ nya Ohe Oluhye Ọngịnyị nya ahị ọwawa lẹ?”

62IJisọsị wẹ byoo yẹkẹẹ, “Ee, am ịnyị. M jam byinu yẹkẹẹ, ụka juwa warị ị-ịlahị kanụ ka yẹm am Ọnyị nya ọngịnyị ehe ọlẹ kam ka rụ kele kaka hụhụ u-upwuriri nya ọngịrị nya Ohe Oluhye Agụgụ. Ụ-ụwa, Ọnyị nya ọngịnyị ehe ọlẹ a ka bwu hi ehe u-uhye nya egbamwụ nya epwoohe ụka kọ ka mwẹẹkpẹ warị wẹ odehe ọlẹ lẹlẹ.”

63Ụka ọọwa, olegbeju ọgbahị nya angịkiliya ọwẹ gu awụrụ ọlịnyịrọ nya ịlọmwụ ene hwanng lẹ, ọ yẹkẹẹ, “Anụ ya ká ibeenu ọkịla ọhẹ ji, ahị ka tịtọ gụ ọlẹ wẹẹ? 64Anụ wuu tị́ kpa ụrụ nyanụ wo ẹla oyaya pyị ẹ-ẹga nya Ohe Oluhye bwula ọlẹ kọ yẹkẹẹ, ọwa nyaa ri Ọnyẹwẹ nya Ohe Oluhye ịlẹhị lẹ wẹ lẹ. Lẹ, anụ alịnyahị, anụ ju ẹla ọlẹ egbeju ham kam wo mẹ.” Ọọwa lẹ, ịwa wuu a myị ju awụlẹ yẹkẹẹ, eje nya igu nyị wu iJisọsị lẹlẹ, nyị ka gbu pyii lẹ!

65Ịnyị, angịhyẹ nya angịwẹ a juwa chị́ ide hụ iJisọsị lẹlẹ. I kele kaka hu apwụ ọhẹ chị iJisọsị a-ahị. Ọọwa lẹ, angịhyẹ nyaa a juwa mịlọọ awụ ịnyịnyịịnyị, juwa byoo yẹkẹẹ, “Ahụ ọlọmwụ ọtụka, bwuru ẹnyị nya ọngọlẹ kọ mịlang ẹwụ wẹ ịnịịnọ jehi mẹ.” Ọọwa lẹ, alịdanggeri ịlẹ kị wu iJisọsị a juwa wa iJisọsị abwọ hi ta awụlẹ ịnyịnyị lẹlẹ.

IPita Pwa IJisọsị Rwarụ

(ịMatiyu 26:69-75; iLuku 22:56-62; ịJọn 18:15-18,25-27)

66Ụka ká iPita juwa o-opwokpuru nya ọdọdẹpwa nya olegbeju ọgbahị nya angịkiliya ọwẹ, ọnchẹ ọnyang nya olegbeju ọkịla iya ọọwa ọhẹ kele ka ụwa. 67Ụka ká ọnchẹ ọnyang ọọwa chẹhị kaka yẹ iPita ụ-ụwa kọ juwa wo ila, ọ mwụụrụ yọọ chịng lẹ, ọ byi iPita yẹkẹẹ, “M jẹ́ kaahụ ayịdang ri ọngọhẹ lẹpwụ nya angịnyị nya iJisọsị ọla ịNasareti ọlaanyị ịnyịnyị!”

68Ma, iPita pwa rwarụ ụ-ụwa byoo yẹkẹẹ, “Eheehe! Am jẹ́ ẹlẹlẹhẹ lee o-wo etu nya ẹlẹlẹhẹ ọlẹ ká wẹẹ ya tam kpong-kpong ka.” Ọọwa lẹ, iPita a wuleji bwu ẹgẹwẹ rụ kele ka ọnụ ogirigba nya ẹpwa nya ayịdẹpwa ọwẹ lẹ, [ọwọọwọ ọhẹ a da ịgbụ lẹlẹ.]

69Ụ-ụwa, ọnchẹ ọnyang ọọwa myịmyị mwụụrụ yẹ iPita chịng lẹ, ọ byi angịhyẹ ịlẹ kị godayị rịrị ụ-ụwa yẹkẹẹ, “Ọngọlẹ ri ọngọhẹ lẹpwụ nya angịjụgbẹyị nya iJisọsị!”

70Ma, iPita myịmyị pwa rwarụ ụ-ụwa. Ịnyị, ụka kọ nọ chẹẹ lẹ, angịhyẹ ịlẹ kị godayị rịrị ụ-ụwa a kele kaka byi iPita yẹkẹẹ, “Nya ẹla nya ịlẹhị ịnyị, ahụ ayịdang ri ọngọhẹ lẹpwarịrị nya angịjụgbẹyị nya iJisọsị, chajị, ahị jẹ́ng ká ri ola ịGalili.”

71Ma, iPita juwa gọlọ ju ịlọmwụ, juwa pwa rwarụ nya ịlẹhị-ịlẹhị yẹkẹẹ, “Am jẹ́ ọlẹng ọlẹ kanụ wẹẹ ya ẹla rụ́ kpong-kpong ka.”

72Ahyaahị, ká iPita ya ịnyị kpá bwaaa lẹ, ọwọọwọ a myịmyị da ịgbụ ụka oheeye lẹlẹ. Ọọwa lẹ, iPita a kpịtịya nya ẹla ọlẹ ká iJisọsị ya tọọ ene-ene yẹkẹẹ, “Ene ká ọwọọwọ ka da ịgbụ, ugbabwọ imiiye kpá lodu alẹ, ahụ iPita ọwẹ ka pwam rwarụ ụka ịta yẹkẹẹ, ọwa nyị́ jẹ́m ka.” Ịnyị, ọ ta iPita olujwo lụmẹ lẹ, ọ juwa jida ụ-ụwa nya ịlẹhị-ịlẹhị lẹlẹ.

Currently Selected:

ỊMAKỊ 14: IBNO

Highlight

Copy