ỊMAKỊ 10

IJisọsị Mẹ Ang Jẹ Chajị nya Ahụ Bala Ọrụ Ọ-pwa Awụlẹ Pwa

(ịMatiyu 19:1-12; iLuku 16:18)

1Ịnyị, iJisọsị a rụ bwu ẹgẹwẹ lẹ, ọ chịpwụrụ bwu ọpyị nya iJudiya kpoye koye ọlaanyị nya Ihu ịJọdan lẹlẹ. Aliru nya angịnyị lụmẹ-lụmẹ bọọ kele ka ụwa. Ọọwa lẹ, iJisọsị a mẹ ang jaa ụ-ụwa jaabwọ ká abwẹla nyamwụ ri lẹlẹ.

2Ụka ọọwa, ala ịFarịsii ịhyẹ juwa tịtọ kị ka kpa ẹla yẹ iJisọsị dada, chajị kị ka jẹ́-ẹ ya eje wọọ. Ị tọ iJisọsị ịtọ ọhẹ yẹkẹẹ, “Ayịbahị ịtịcha, ehile nyahị myị ọnụ ha ọrụ-ahụ ọhẹ-lọhẹ yẹkẹẹ, nyị pwa ahụ nyamwụ ụka myị́ ụka kịị nyị họ́ọ mẹ?”

3IJisọsị byaa yẹkẹẹ, “Anyị, iMosisi a tị́ danụ ehile ya, anụ nyị họ ene?”

4Ị wẹ byi iJisọsị yẹkẹẹ, “IMosisi byihi yẹkẹẹ, ọrụ-ahụ ọnyị myị ọnyị ọlẹ kịị nyị́ tịtọ kịị nyị́ ka pwa ahụ nyamwụ lẹ aalẹ, nyị da ụpwụ nya ibeenu ọ-ka kpa pwa ahụ ọọwa ene kịị nyị ka pwọọ mẹ.”

5IJisọsị wẹ byaa yẹkẹẹ, “Ang odudu ká iMosisi danụ ehile ọwẹ ịnyị ri chajị nya ọkịlẹtụ ọnyọọngịrị lụmẹ nyanụ anụ ayịdang. 6Ma, Ụpwụ Ịgọgọ họ kahị jẹ́ yẹkẹẹ, bwu ọmwụ ọdada nya ọgbanyẹ-ọgbanyẹ ká Ohe Oluhye họ odehe ọlẹ lẹ, ọlẹng ookpokpo bala ọnyang ookpokpo kem, ọ họ kị ka ri ahụ bala ọrụ lẹ. 7Chajị nya ọlẹ, a du ká ọlẹng ọnyị myị ọnyị wuu ka tụụbwọ hi adamwụ bala ịnamwụ kele kaka ye ahụ nya ụbwọ nya ịlọmwụ lẹ. 8Ọọwa lẹ, ahụ bala ọrụ ọọwa angị imimiiye, a ka yẹ ri ọngịnyị ọngọ ookpokpo lẹlẹ. Ụka ọọwa, ahụ bala ọrụ ọọwa á ri angịnyị angị imiiye kaka. Ma, ọngọ ookpokpo, ị ri ugbẹnyị lẹlẹ. 9Chajị nya ọọwa lẹ, ang myị́ ang ọlẹ ká Ohe Oluhye ayịdang á chị ori bawụlẹ ene lẹ aalẹ, ọngọngọhẹ a yi ang ọọwa, ori hi awụlẹ kokoo.”

10Ụka ká iJisọsị bala angịjụgbẹyị nyamwụ tịrẹkpẹ kele ka ube myịmyị, ị tọọ ịtọ u-uhye nya ẹla ọlẹ kọ ya wẹ. 11IJisọsị wẹ byaa yẹkẹẹ, “Ọrụ-ahụ ọnyị myị ọnyị ọlẹ kọ pwa ahụ nyamwụ, kọ kele kaka ye ọnyang ọkịla lẹ aalẹ, ụya a wẹ kọ họ ba ahụ onyogo nyamwụ lẹlẹ. 12Ọ́ tị ri ọnyang ahụ ayịdang, kọ pwa ọrụ nyamwụ kele ka rụrwọ ọlẹng ọkịla lẹ aalẹ, ụya a wẹ kọ họ ba ọrụmwụ onyogo ịnyịnyị lẹlẹ.”

IJisọsị Wahị Kụrụ Anyị Anjwo Ichiche

(ịMatiyu 19:13-15; iLuku 18:15-17)

13Ụka ọọwa, angịhyẹ kpa anyị anjwo ichiche kele ka ẹga nya iJisọsị, chajị kọ ka yụbwọ nịraa wahị kụrwaa. Ma, angịjụgbẹyị nyamwụ yalibyi la angịịwa. 14Ụka ká iJisọsị jẹ́, ọ wụ ẹjẹ lụmẹ. Ọ yalibyi la angịjụgbẹyị nyamwụ yẹkẹẹ, “Anụ ba hi anjwo ichiche ịwẹ kị warị wẹ ẹga nyam mẹ! Anụ kwaa iwe ka, chajị ịpyị Adịrahụ nya Ohe Oluhye ri ịnya angịlẹ kị ju ọkịlẹtụ ọgbagbịla lala anyị anjwo ichiche ịlịịlẹ. 15Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ ka ye ịpyị Adịrahụ nya Ohe Oluhye la ọkịlẹtụ ọgbagbịla lala anyị anjwo ichiche ịlẹ ka aalẹ, ọ́ ka jẹ́-ẹ jụ kele ka ụwa myị́ kaka.” 16Ọọwa lẹ, iJisọsị a tụ anyị ịịwa ba ịlọmwụ lẹ, ọ yụbwọ nịra ọngọngọọng nyaa e-egbeju lẹ, ọ wahị kụrwaa ụ-ụwa lẹlẹ.

Ọlụdụ Okolobya

(ịMatiyu 19:16-30; iLuku 18:18-30)

17Ụka ká iJisọsị juwa rụ bwu ẹga ọọwa, ọlẹng ọhẹ kele kaka ya arụụ nyamwụ kụ eji ị-ịlahị nya iJisọsị byoo yẹkẹẹ, “Ayịbahị ịtịcha ọnyịịla, ịịyẹ m tị́ ka họ pyii, ene kam ka la ọhịhị ọmyịmyị-ka?”

18IJisọsị wẹ byoo yẹkẹẹ, “Ịịyẹ a tị́ du ká juwa wụrụm ‘Ọngọlahị ọnyịịla’ ene? Ọngọngọhẹ á ri ọngịnyị ọnyịịla kpong-kpong ka. Kẹnẹ-kẹnẹ, Ohe Oluhye ụbwọọmwụ mẹ ịnyị!” 19IJisọsị myịmyị byoo yẹkẹẹ, “A tị́ jẹ́ ehile nya Ohe Oluhye ịlẹ kị da ụ-Ụpwụ Ịgọgọ ene-ene lẹ. Ịwa lẹẹ lẹ: A nwụ ọngịnyị ka. A da ẹla-ahụ lee ọ-họ ụya ka. A yoyi ka. A ri ibeenu ọnọọkịla ka. A họ ọngịnyị ri ka. Ju ihi nya adang bala ịnang.” 20Ọọwa lẹ, ọnyị ọlẹng ọwẹ, a wẹ byi iJisọsị yẹkẹẹ, “Ayịbahị ịtịcha, ịngịịwẹ wuu ri ang ịlẹ kaam ayịdang kaa họ ene-ene bwu enjwo-enjwo nyam lẹ!”

21Ịnyị, iJisọsị a kpẹhị nya ọháha mwụụrụ yẹ ọlẹng ọwẹ chịng lẹ, ọ byoo yẹkẹẹ, “Oligu nyam, ịngịhyẹ ookpokpo hi hang wẹẹ! Kele ka ẹpwa, ká go ang myị́ ang nyang wuu ra, ká ya okpoko nyamwụ ga ha ikpehika mẹ. Aalẹ, a ka la ụdụ olepwoohe lẹ. Ká kẹwẹ kaka bam jẹ mẹ.” 22Ọọwa lẹ, ọlẹng ọwẹ a pyị ahị kpanya-kpanya juwa yegiri rụ la ayiiji ọtụka-ọtụka o-oluhye nya ẹlẹwẹ ká iJisọsị byoo lẹlẹ. Chajị ọwa ayịdang kpụ ụdụ lụmẹ kaka kpoye.

23Ụka ọọwa, iJisọsị yọyị dọgịlẹ ju angịjụgbẹyị nyamwụ lẹ, ọ byaa yẹkẹẹ, “Ọ ka ri ang olujwo ọtụka nya ịlẹhị ha angịlẹ kị ri alụdụ nyọka jẹ́-ẹ jụ ka ịpyị nya Adịrahụ nya Ohe Oluhye myị́.”

24Ụka ká angịjụgbẹyị nya iJisọsị wo ẹla ọọwa, ọ laa ahịbwuu lụmẹ kaka kpoye. Ma, iJisọsị myịmyị byaa yẹkẹẹ, “Anụ anyị nyam, ọ ka ri ang olujwo lụmẹ kaka kpoye ha angịlẹ kị hu ọkịlẹtụ nyaa wuu nịrọ ụdụ nyaa, nyọka jẹ́-ẹ jụ kele ka ịpyị nya Adịrahụ nya Ohe Oluhye. 25Chajị, ọ ka chịkpẹẹ ha ụnyịrẹ-ịkamẹlụ nyọka jụ kpoye bwu iwa nya ọgang ọ-gá apwụ gụ, alụdụ ọ-ka jụ kele ka ịpyị nya Adịrahụ nya Ohe Oluhye myị́.”

26Ụka ká ẹla ọọwa la angịjụgbẹyị nya iJisọsị ahịbwuu lụmẹ kaka kpoye lẹ, ị tọọ wo yẹkẹẹ, “Ó-ri ịnyị lẹ, o-owo a tị́, tị tị ka chịda myị́ mẹ?” 27IJisọsị mwụụrụ yẹ angịjụgbẹyị nyamwụ chịng lẹ, ọ byaa yẹkẹẹ, “Ẹ-ẹga ká angịnyị ehe ji lẹ, ọ ri ang olujwo lụmẹ kaka kpoye. Ma, ọ́ tị ri ang olujwo ẹ-ẹga nya Ohe Oluhye ka. Chajị ang myị́ ang wuu chị Ohe Oluhye kpẹẹ la ọhọhọ.”

28Ụka ọọwa, iPita ya ẹla dodehe yẹkẹẹ, “Ọngọlahị, a tị́ yẹ jaabwọ kaahị ayịdang tụụbwọ hi ang myị́ ang nyahị wuu, lẹẹ bang jẹ lẹ!”

29iJisọsị wẹ byoo yẹkẹẹ, “Nya ịlẹhị-ịlẹhị, m byinu yẹkẹẹ, ó-ri ká ọngọngọhẹ á tụụbwọ hi ẹpwa nyamwụ wuu lee anyịnamwụ alẹng bala anyang lee adamwụ, lee ịnamwụ lee ahụ nyamwụ, leg, anyị nyamwụ lee ịpyị ị-kpa họ ang nyamwụ wuu, chajị nya ẹnyị nyam bala ẹrụ ọnyịịla ọlẹ, 30aalẹ, ọngọọwa ayịdang ka ye ịngịịwẹ wuu mwụ aba ba ịlọmwụ ugbabwọ ohu ịrụ chiriri ẹ-ẹpwụ nya ọhịhị olodehe ọlẹ. Ọ ka la iru nya ebe, ọ ka la anyịnịna alẹng bala anyang. Ọ ka la ịnịna bala ọ-la anyị bala ọ-la ịpyị ọ-kpa họ ang. Ọngọọwa tị ka la ị-tụ pyịpyị u-uhye nya ịngịịwẹ wuu odehe ọlẹ kpịlọ. Ma, ọ ka la ọhịhị ọmyịmyị-ka lụka ohyẹẹkpẹ ịnyịnyị. 31Ma, iru nya angịhyẹ ịlẹ kị jene ka dachichi yẹ kaka ri angị ku ẹkpẹ. Iru nya angịlẹ kị tị ri angị ku ẹkpẹ ka mwọọgịlẹ yẹ kaka ri angị jene ịnyịnyị.”

IJisọsị Ya Ẹla Rụ́ Igu nyamwụ Ụka Ọhata

(ịMatiyu 20:17-19; iLuku 18:31-34)

32Ụka ọọwa, iJisọsị bala angịjụgbẹyị nyamwụ juwa jahị da koye oluhye kele ka iJerusalẹm. Angịjụgbẹyị nya iJisọsị bala angị ịkịla juwa bọọ jẹ ẹ-ẹkpẹ-ẹkpẹ. Ugbodu juwa gu angịjụgbẹyị nya iJisọsị ene. Angị ịkịla ịịwa tị juwa juhi. Ụka ọọwa, iJisọsị be ẹkọ wụrụ angịjụgbẹyị nyamwụ angị iwo kụrụ imiiye myịmyị kele ka ẹgẹhẹ lẹ, ọ juwa ya jaa ụma nya ang myị́ ang ọjụjụ ịlẹ wuu kị juwa ka họ ẹ-ẹga nyamwụ lẹlẹ. 33Ọ byaa yẹkẹẹ, “Anụ yẹ mẹ! Ọlẹ kahị lẹẹ kele ka iJerusalẹm lẹ, ị ka pịrịm am Ọnyị nya ọngịnyị ehe ọlẹ ha alegbeju nya angịkiliya ha Ohe Oluhye bala ịtịcha ị-mẹ ehile nya iMosisi jẹ. Angịịwa ka ya eje nya igu wum, tụụbwọ him ju ala iJentayịlị ụ-ụbwọ ịnyịnyị. 34Ala iJentayịlị ịịwa ka kpa Ọnyị nya ọngịnyị ehe ọlẹ họ, juwa chị́ ide hwọọ ụ-ụwa ịnyịnyị. Ị ka nyoo enyiri la ugboji. Ị ka nwọọ. Ma, ọ tị ka wuleji bwula igu ẹnụtụrụ ọhata, juwa hịhị myịmyị.”

Ọbịlẹ-bịlẹ nya iJemsi Bala ịJọn Ọnyịnamwụ

(ịMatiyu 20:20-28)

35Ụka ọọwa, iJemsi bala ịJọn, anyị nya iSebidi kele ka ẹga nya iJisọsị kaka byoo yẹkẹẹ, “Ayịbahị, ịngịhyẹ jam ọlẹ kahị tịtọ ká ka họ hahị.”

36IJisọsị taa wo yẹkẹẹ, “Ịịyẹ anụ tị́ tịtọ kam ka họ hanụ?”

37Ị wẹ byoo yẹkẹẹ, “Ụka ọlẹ ká ka warị kaka ri adịrahụ la ogbo nyang ụ-ụwa ị-ịpyị adịrahụ nyang lẹ, ahị tịtọ kahị ka hụ ẹ-ẹchị adịrahụ nyang tang. Ká ọngọhẹ nyahị ka hụ u-upwuriri nyang, ká ọngọkịla ka hụ ụ-ụpụpịla nyang.”

38IJisọsị wẹ byaa yẹkẹẹ, “Anụ ya kaanụ ayịdang jẹ́ ụma nya ang ọlẹ kanụ wẹẹ bịlẹm kpong-kpong? Anụ ya jem wẹẹ. Ụma nya ukoku ọ-nwa enyi nya akama ọyẹyẹ nyam anụ tị́ ka kpa kọnụ tam myị́ wẹ, lee? Ụma nya ịlọ onyinyi ọlẹ kịị wẹẹ ka nyi hụm bwula akama ọyẹyẹ, anụ tị́ ka kụ ụwa gbe myị́ wẹ?”

39Ụka ọọwa, ị wẹ byoo yẹkẹẹ, “Ee, ahị ka haa wuu myị́, Ayịbahị!”

IJisọsị wẹ byaa yẹkẹẹ, “O hiigu. Ó-riri kaanụ ayịdang á ka kpa ukoku nya akama ọyẹyẹ nyam ọọwa, kọnụ myị́ tam ta lee ọ-ka kụ ụwa gbe ụma nya ịlọ onyinyi nya akama ọyẹyẹ nyam ọọwa myị́ ịnyịlẹhị, tụbwọ aalẹ, 40ebwo nyọka ya ẹga da hanụ, kanụ ka hụ tam u-upwuriri nyam lee ụpụpịla nyam, á juwa ẹ-ẹpwụtụbwọ nyam kpong-kpong ka. Iwe ahụrụ ọlịnyị juwa ẹ-ẹpwụtụbwọ nya Ohe Oluhye ayịdang, ọlẹ kọ nwụla iwe-ahụrụ ọọwa nọ gbe angịlẹ kọ jẹ́ yẹkẹẹ, nyị pwokwaa.”

41Ụka ọlẹ ká angịjụgbẹyị nya iJisọsị angị iwo chiriri ihihi wo ẹla ọọwa lẹ, ị wụ ẹjẹ ta iJemsi bala ịJọn lụmẹ. 42Ọọwa lẹ, iJisọsị a be ẹkọ wụrụ angịjụgbẹyị nyamwụ wuu kaka jịra lẹ, ọ byaa yẹkẹẹ, “Anụ tị́ jẹ́ yẹkẹẹ, angịlẹ kị ri ịdịrịhụ nya ala iJentayịlị angị jẹ́ Ohe Oluhye-ka lẹ, ị kaa kpa alekpeleji nyaa la ụbwọ ọnyọọngịrị lụmẹ kaka kpoye. Angịlẹ kị ri alegbeju ilukido nya ịdịrịhụ ịịwa kaa da angịlẹ kị ji ekpeleji nyaa ehile ọnyọọngịrị jaabwọ kọ háa. 43Ma, ẹ-ẹga nyanụ anụ lẹ, ọ́ chịla kọ ka la ịnyị koo! Ọkọkọ nya ọọwa lẹ, ọngọlẹ kọọwa ayịdang á ka ri ọngọ ọtụka gụụnụ anụ angịkịla wuu lẹ aalẹ, ọngọọwa ka nwụlanọ nyọka myịnụ ẹrụ lala ọnchẹ nyanụ, anụ angị ihihi wuu lẹ. 44Ọng myị́ ọng ọlẹ kọ tị tịtọ kọọwa ayịdang a ka ri olegbeju ọ-kụ ịlahị nyanụ anụ angị ihihi wuu lẹ aalẹ, ọngọọwa ka nwụlanọ nyọka juwa myị ẹrụ hanụ lala ọwa ayịdang nyaa dọmwụ ri ọnyọhị nyanụ lẹ. 45Chajị, am Ọnyị nya ọngịnyị ehe warị wẹ odehe ọlẹ lẹ, ḿ warị nya ọngọ ọtụka, kị ka myị ẹrụ ham ka. Ma, m warị kaka myị ẹrụ ha angịnyị ehe lala ọnchẹ nyaa, gbee kam lẹẹ ka hu ọhịhị nyam kịla iya wọnụ nyaa ịwa wuu ju. Chajị ká iru nya angịnyị ka jẹ́-ẹ bwula ọọwa la ọchịda nya Ohe Oluhye.”

IJisọsị Họ Olidu ỊBatimyọsị Uda

(ịMatiyu 20:29-34; iLuku 18:35-43)

46IJisọsị juwa jẹ ịnyịnyịịnyị gbee kọ pwụ epweji nya iJeriko bala angịjụgbẹyị nyamwụ, Iru nya angịnyị lụmẹ-lụmẹ juwa bọọ jẹ. Ụka ọọwa, ọlẹng okpidu ọhẹ ká ẹnyị nyamwụ ri ịBatimyọsị ọnyị nya iTimyọsị, hụhụ ụ-ụwa ọ-ọka nya ụgbẹyị juwa bịlẹ ang. 47Ụka ká ịBatimyọsị ọọwa wo oja yẹkẹẹ, iJisọsị ọla ịNasareti nyaa wẹẹ chịpwụrụ kam lẹ, ọ hu ọnụ hwaa, juwa ya ẹla dodehe gboo yẹkẹẹ, “IJisọsị, ahụ ọnyị nya iDevidi, chuchuu, yẹm ahyẹẹrwẹrwa!”

48Ụka ọọwa, Iru nya angịnyị juwa kpọọ ịkata yẹkẹẹ, “Ba la ọmọnyọ ọwẹ pyii!” Ma, ọkọkọ nyọka ba chịng lẹ, ịBatimyọsị juwa ya ẹla gboo gụ olene-ene yẹkẹẹ, “IJisọsị, ahụ ọnyị nya iDevidi, yẹm ahyẹẹrwẹrwa! Ahụ ọnyị nya iDevidi, yẹm ahyẹẹrwẹrwa!”

49Ịnyị, iJisọsị a godayị lẹ, ọ byi angịhyẹ yẹkẹẹ, anụ nyị kele kaka wụrwọọ warị mẹ. Angịịwa kele kaka byi ịBatimyọsị yẹkẹẹ, “La ẹjẹ ọkpụ́kpụ ugbẹnyị mẹ! IJisọsị lalẹẹ be ẹkọ wụrụng lẹ. Wuleji ká kele mẹ!” 50Ọọwa lẹ, ọ wuleji ahyaahị, nwụla awụrụ owurum nyamwụ deeji lẹ, ọ kele ka ẹga nya iJisọsị lẹlẹ. 51iJisọsị byoo yẹkẹẹ, “Ịịyẹ a tị́ juwa tịtọ kam ka họ hang?” ịBatimyọsị wẹ byoo yẹkẹẹ, “Ayịbahị, m tịtọ ká ka họ kam ka jẹ́-ẹ yọyị myịmyị.” 52iJisọsị wẹ byoo yẹkẹẹ, “Rụ mẹ! Ọmyịmyị ọlala nyang họ ká idu ọkpụkpụ nyang myị́ alẹ lẹ.” Ịnyị lẹ, ịBatimyọsị ọwẹ a jẹ́ yọyị iijata-ijata lẹ, ọ juwa ba iJisọsị jẹ lẹlẹ.

Currently Selected:

ỊMAKỊ 10: IBNO

Highlight

Copy