ILUKU 7
7
IJisọsị Họ Ọnchẹ nya Olegbeju Ọgbahị nya Ịsọja Uda
(ịMatiyu 8:5-13)
1Ịnyị lẹ, ụka ká iJisọsị ya ẹla ịwẹ ta iru nya angịnyị ẹ-ẹga ọọwa kpá wuu lẹ, ọ rụ bwu ụwa kele ka epweji nya ịKapẹnawụm lẹlẹ. 2Ụka ọọwa, olegbeju ọgbahị nya ịsọja nya ala iRom ọhẹ juwa ụ-ụwa kọ la ọnchẹ ọhẹ ọlẹ kọ họ́ọ lụmẹ kaka kpoye. Ẹdụrụ tị jụ ọnchẹ nyamwụ ọọwa nụwa ọ-ọbẹ nya igu. 3Ụka ká olegbeju ọgbahị nya ịsọja ọọwa wo oja chajị nya iJisọsị lẹ, ọ du ịgabwọ nya ala iJuu ịhyẹ ẹrụ kele ka ẹga nya iJisọsị kaka bịlọọ, kọ ka kele kaka họ ọnchẹ nyamwụ ọọwa uda họọ lẹlẹ. 4Ụka ká ịgabwọ nya ala iJuu ịịwa pwụ ẹga nya iJisọsị, ị bịlọọ yẹkẹẹ, “Ayịbahị ịtịcha, chuchuu ká kaka họ ọnchẹ nya olegbeju ọgbahị nya ịsọja ọhẹ lalẹ uda họọ chẹẹ mẹ! Chajị, ọ ri ọngịnyị ọnyịịla lẹ, ọ chịla ká ka dọọ ụbwọ. 5Ọlẹng ọọwa ri ọngọlẹ kọ la ọháha ẹ-ẹga nya ụpwọma nyahị lụmẹ. Ọ nwụ́ ube ọ-mẹ ẹla nya Ohe Oluhye jẹ nyahị ahị ala iJuu ọhẹ hahị lalẹ.”
6Ịnyị, iJisọsị a hu ang juwa baa kele ka ẹpwa nya ọngọọwa lẹlẹ. Ụka ọlẹ ká iJisọsị jẹ ju ọnụ ẹpwa nya olegbeju ọgbahị nya alịsọja ọwẹ chwẹẹ lẹ, olegbejwọọwa a du aligu nyamwụ ịhyẹ ẹrụ, kaka byi iJisọsị yẹkẹẹ, “Ọngọlahị, a nwụ ịlọng tụtụm warị wẹ ẹpwa nyam kpong-kpong kaka. Chajị, am ayịdang á chịla kpụ ká ka ya egbeju nyang jụ kpẹẹ wẹ ẹpwa nyam kpong-kpong ka. 7Chajị nya ọchịla-chịla-ka nyam ọọwa a du kaam ayịdang á dọmwụ pwoku ọ-ka warị wẹ ẹga nyang la ịlọm kpong-kpong ka lẹ. Ayịbahị, ya ẹla ọlọnụ ọlam-ọlam ọlẹ kem mẹ aalẹ, ọnchẹ nyam ka la gogo lẹ. 8Chajị am ayịdang kpangga ri ọngọ ji ekpeleji nya ọngịrị nya ehile nya ịsọja alegbeju ị-gụm gụ. Ụka myị́ ụka kaam ayịdang á tị byi ịsọja ilekpeleji nyam ọhẹ-lọhẹ yẹkẹẹ, ahụ, kele ka ẹga ọlaanyị mẹ, ọ kaa kele. Ọ́ tị ri kam byi ọngọ ọkịla yẹkẹẹ, ahụ, kẹwẹ wẹ ẹgẹlẹ, ọngọọwa kaa warị ịnyịnyị. Ọ́ tị ri kam byi ọnchẹ nyam yẹkẹẹ, ahụ, kẹwẹ ká họ ang ọlẹ ham, ọ kaa họọ ham ịnyịnyị.”
9Ụka ká iJisọsị wo ẹrụ ọlẹ ká olegbeju ọgbahị nya ịsọja ọwẹ du tọọ lẹ, ọ lọọ ahịbwuu lụmẹ. Ịnyị, ụka ká iJisọsị jahị kpata da iru nya angịnyị ịlẹ kị juwa bọọ jẹ lẹ, ọ byaa yẹkẹẹ, “Nya ịlẹhị-ịlẹhị, m byinu yẹkẹẹ, am ayịdang á yẹ ọngọngọhẹ ọlẹ kọ la ọmyịmyị ọlala ịnya ọlẹng ọlẹ ẹ-ẹgẹhẹ nya ọpyị nya ala Isirẹlụ wuu lẹpwụ-lẹpwụ ẹnẹnẹhẹ lẹka.”
10Ịnyị, ụka ká alẹrụ nya olegbeju ọgbahị nya ịsọja ọọwa rụ kele ka ẹpwa lẹ, ị yẹ ká ọnchẹ nyamwụ ọọwa la gogo hiigu-hiigu lẹlẹ.
iJisọsị Wule Ọnyị nya Ahụ-ogu Ọhẹ Eji Bwula Igu
11Ụka kọ nọ chẹẹ, iJisọsị kele ka epweji ọhẹ ọlẹ kị wụrụ iNeen. Ụka ọọwa, angịjụgbẹyị nyamwụ bala Iru nya angịnyị lụmẹ-lụmẹ bọọ kele ka ụwa ịnyịnyị. 12Ahyaahị ká iJisọsị anyị jẹ kaka ju ọnụ ogirigba nya epweji ọọwa chwẹẹ, ị tọ iru nya angịnyị kị juwa bwu epweji ọọwa kpehe la ogu nya ọnyị onjwo okolobya ọhẹ juwa kpa kaka ju eji. Okolobya ọọwa a ri ọnyị olookpokpo nya ọnyang ọhẹ ọlẹ kọ ri ahụ-ogu ụ-ụwa lẹlẹ. Aliru nya angịnyị bwu epweji nya ahụ-ogu ọọwa, kaka chọọ ẹgba nya onyobyi ọwẹ. 13Ụka ká Ọngọlahị iJisọsị yẹ ahụ-ogu ọọwa, kọ la olegu nya ahyẹẹrwẹrwa ẹ-ẹga nyamwụ lẹ, ọ byoo yẹkẹẹ, “Ba mẹ ịnam! A jida kaka.” 14Ụka ọọwa, iJisọsị kele kaka yụbwọ gu akpa nya ogu ọọwa. Ịnyị lẹ, angịlẹ kị juwa kpa akpa ọọwa a godayị rịrị chịng lẹlẹ. Ọọwa lẹ, iJisọsị a ya ẹla, byi ogu ọọwa yẹkẹẹ, “Okolobya, m bying yẹkẹẹ, wuleji lẹẹlẹẹ mẹ.” 15Ọọwa lẹ, ogu okolobya ọọwa a chahị bwula igu, wuleji hụhụ jẹ́ juwa ya ẹla ahyaahị-ahyaahị lẹlẹ. Ọọwa lẹ, iJisọsị a kele kaka yụbwọ chọọ kpa kele kịla ịnamwụ lẹlẹ.
16Ụka ọọwa, ejiri wu angịlẹ wuu kị juwa ụ-ụwa nya ịlẹhị-ịlẹhị. I juwa gwogbo ha Ohe Oluhye ụ-ụwa yẹkẹẹ, “Ọlọmwụ ọtụka nya Ohe Oluhye ọhẹ warị wẹ ẹpwarịrị nyahị alẹ lẹ. Ohe Oluhye ayịdang hireji warị wẹ ẹpwarịrị nya angịnyị nyamwụ kaka chaa da alẹ lẹ.”
17Ịnyị, ị kpa oja nya ụkụrwọ ẹbyẹbyị nya iJisọsị ọọwa ru ohi ju ka ẹga myị́ ẹga nya ịpyị nya iJudiya wuu bala epweji ịlẹ kị dagaga ju ụwa lẹlẹ.
ỊJọn Ọngọ Hụ Enyi Ohe Du Ẹrụ Tọ IJisọsị
(ịMatiyu 11:2-19)
18Ịnyị, angịjụgbẹyị nya ịJọn ọngọ hụ enyi Ohe a kpa oja nya ụkụrwọ ẹbyẹbyị nya iJisọsị kele kaka ya joo lẹlẹ. 19Ọọwa lẹ, ịJọn a wụrụ angịjụgbẹyị nyamwụ angị imiiye ịhyẹ lẹ, ọ daa ẹrụ tọ Ọngọlahị iJisọsị kaka tọọ ịtọ ọhẹ yẹkẹẹ, “Ahụ kpakpakpa a ri ọngọọwa ọlẹ kahị jam ya ẹhị rịrị gbe ká Ohe Oluhye ka du ẹrụ warị lẹ? Lee, ọngọkịla ọhẹ tị́?”
20Ụka ká alẹrụ nya ịJọn pwụ ẹga nya iJisọsị, ị byoo yẹkẹẹ, “Ayịbahị, ịJọn ọngọ hụ enyi Ohe a duuhi ẹrụ tọng lẹẹ lẹ. Ọ ya, ahị nyị bying yẹkẹẹ, ‘Ahụ ayịdang kpakpakpa a ri ọngọọwa ọlẹ kahị jam ya ẹhị rịrị gbe ká Ohe Oluhye ka du ẹrụ warị lẹẹ? Lee, ọngọkịla ọhẹ tị́ wẹẹ?’ ”
21Iijata-ijata ọọwa, iJisọsị juwa họ iru nya angịnyị ịlẹ ká ụma nya ẹdụrụ la datị-datị jụ uda bala angịlẹ ká alegu inyibyi juwa wu ịnyịnyị. Ọ họ ká angị kpidu jẹ́ juwa yọyị ịnyịnyị. 22Ọọwa lẹ, iJisọsị a byi alẹrụ nya ịJọn yẹkẹẹ, “Anụ kele kaka ya je ịJọn, ụma nya ang ịlẹ kanụ wẹẹ kpẹhị nya ịlọnụ yẹ bala ọ-kpa ụrụ nyanụ wo mẹ. Anụ tị́ yẹ jaabwọ ká alidu jẹ́ wẹẹ yọyị lẹ. Ikpehika tị wẹẹ jẹdịyẹ lẹ. Alekpo tị wẹẹ la cheri-cheri lẹ. Angịkpịla tị jẹ́ wẹẹ wo ẹla lẹ. Egu tị jẹ́ wẹẹ wuleji bwula igu juwa hịhị myịmyị lẹ. Anụ tị wẹẹ yẹ jaabwọ ká angịlẹ kị ri ikpehika wẹẹ wo ẹrụ ọnyịịla nya ọchịda ọlẹ kị wẹẹ ya jaa lẹ. 23Ahị ọwawa ọtụka ka juwa ha ọng myị́ ọng ọlẹ kọ ka la ọkịlẹtụ ujujwo jahị dam, ka juwa da ịwẹẹ ju ẹla nyam kpong-kpong ka.”
24Ụka ká alẹrụ nya ịJọn ọngọ hụ enyi Ohe ịịwa rụ kpá lẹ, iJisọsị a juwa dọmwụ nya ẹla oyaya rụ́ ịJọn ọwẹ byi aluche nya angịnyị ịlụwa yẹkẹẹ, “Anụ ya jem wẹẹ! Ụka kanụ wo oja nya ịJọn ọngọ hụ enyi Ohe ẹ-ẹpwamẹ u-ugbileji, kanụ juwa bọọ kele lẹ, ịịyẹ anụ tị́ yẹ ụ-ụwa? Amẹ ịlẹ ká igbachịwụ juwa kpa che geng geng ịnyị? 25Ee lẹ, o-owo, anụ tị́, tị tị yẹ ụ-ụwa mẹ? Ọngọlẹ kọ kụrụ awụrụ ọnyịịla-ọnyịịla, anụ yẹ ụ-ụwa lẹ? Anụ wo mẹ! Angịlẹ kị kaa kụrụ ịwụrụ ịnyịịla ịlịnyị bala ọ-kaa ra ang ịlịnya ịtụka kem lẹ, ẹ-ẹpwa nya ịdịrịhụ, angị lịnyị, a kaa ji lẹ! 26Ee lẹ, ụma nya ọngịnyị ọlanyị, anụ tị́ kele kaka yẹ ụ-ụwa mẹ? Ọlọmwụ nya Ohe Oluhye ịnyị? Ee, ọlọmwụ nya Ohe Oluhye ịnyịlẹhị ịnyị! M jam byinu yẹkẹẹ, ọngọọwa ayịdang dọmwụ lụmẹ gụ ọlọmwụ nya Ohe Oluhye wẹẹ! 27Chajị ịJọn ọwẹ kpangga, Ohe Oluhye a ya ẹla dodehe u-uhye nyamwụ lẹẹ, ụ-Ụpwụ Ịgọgọ lẹ. Ọ yẹkẹẹ, ‘Yẹ mẹ! Am Ohe Oluhye ayịdang juwa du ọlẹrụ nyam ọhẹ ẹrụ ji ịlahị nyang kaka nwụla iwe-ahụrụ nọ gbeng lẹ!’ ”
28IJisọsị myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, ẹ-ẹpwụ nya angịnyị ehe ịlẹ wuu kị ma bwu ẹpwụ nya ọnyang kpehe lẹ, ọngọngọhẹ á juwa kọ ka la ehe kpá lala ịJọn ọngọ hụ enyi Ohe ọwẹ kaka. Ma, ọngọlẹ kọ ka ri ọngọ ochiche kpá gụ wuu ụ-ụwa ị-ịpyị Adịrahụ nya Ohe Oluhye tị ka lụmẹ gụ ịJọn ọngọ hụ enyi Ohe ọwẹ ẹ-ẹpwụ nya iwe ahụrụ.”
29Ụka ká angịlẹ wuu kị juwa bala angị nyẹ angịnyị ẹpwa wo ẹla oyaya nya iJisọsị kpá lẹ, ịwa wuu a juwa gwogbo ha Ohe Oluhye juwa yẹkẹẹ, “Ohe Oluhye ri Ọngọ chịla-chịla lụmẹ!” Angịịwa wuu hụ enyi Ohe nya ịJọn ọwẹ kpá wuu ene-ene lẹ. 30Ma, ala ịFarịsii bala ịtịcha ị-mẹ ehile nya iMosisi jẹ lẹ, ị pwa obyi omeme ọnyịịla ọlẹ ká Ohe Oluhye me chajị nya ugbodu okpukpuru nyaa. Ịnyị a du kị myị kele kaka hụ enyi Ohe nya ịJọn ọọwa kpong-kpong ka lẹ.
31Ụka ọọwa, iJisọsị myịmyị ya ẹla dodehe yẹkẹẹ, “Ịịyẹ m tị́ ka chụ aloyi ọlẹ kaka me kpá lẹẹ mẹ? Ịịyẹ a tị́ ka pwoku ọhịhị nyaa kpá lẹẹ mẹ? 32M ka chwaa kaka pwoku ayịlọ ọkọkọ nya anyị anjwo ichiche ịlịịlẹ lẹ: Ịwa ayịdang lala anjwo ichiche ịlẹ kị kaa kele ka ojiya nya ayịlọ, chajị nya ayịlọ odudu kị mwọọgịlẹ kaa rwarụ ta awụlẹ ụ-ụwa yẹkẹẹ, ‘Ịịyẹ a tị́ du kahị jam du ayịlọ kanụ myị chewo ka? Ịịyẹ a tị́ du kahị jam chị eko kaanụ angịkịla á myị jida tahị ka?’ 33Ịnyịnyị, aloyi ọlẹ a jam rwarụ nya o-ye ọngịnyị ẹla ododu lẹ. Chajị ụka ká ịJọn ọngọ hụ enyi Ohe warị, kọ juwa nọ limyi ha Ohe Oluhye ịnyịnyịịnyị, kọ kaa nwa ere kpong-kpong ka lẹ, aloyi ọlẹ jam ya ẹla rụ́ ịJọn yẹkẹẹ, nyị chaaa! Olegu onyobyi nyaa tị́ wẹẹ kpa ịJọn kpa họ ịnyị! 34Ma, ụka kaam Ọnyị nya ọngịnyị ehe ọlẹ tị warị, kam jam ri ang oriri bala ọ-nwa ang ọnwanwa lẹ, anụ tị jam yẹkẹẹ, nyị chaaa! Ọngọ tụ ang-ang da juwa ri ang oriri bala ọ-nwa ang ọnwanwa kem, am Ọnyị nya ọngịnyị ehe ọlẹ nyaa tị́ riri! Oligu nya angị nyẹ angịnyị ẹpwa bala ịnya alọhọbịrị i-hi deeji ịwẹ kem, am nyaa tị́ riri! 35Ma, ọng myị́ ọng ọlẹ wuu kọ la ẹla ọjẹ́jẹ nya Ohe Oluhye ẹ-ẹpwụ nyamwụ aalẹ, ẹga myị́ ẹga wuu ká ọngọọwa a yẹ ẹla ịlẹhị nya Ohe Oluhye, ọ ka jọọ datị pyii.”
IJisọsị Ụ-ụwa Ẹ-ẹpwa nya ịSayịmọn Ola ỊFarịsii
36Ola ịFarịsii ọhẹ họ ang oriri wụrụ iJisọsị ẹpwa. Ọọwa lẹ, iJisọsị a kele kaka hụhụ ụ-ụwa, juwa ri ang oriri tọọ lẹlẹ. 37Ọnyang ọhẹ juwa e-epweji ọọwa kọ ri ọngọhọbịrị lụmẹ. Ụka ká ọnyang ọọwa wo oja yẹkẹẹ, iJisọsị nyị juwa ri ang oriri ẹ-ẹpwa nya ọla ịFarịsii ọọwa lẹ, ọ kele ka ụwa lẹlẹ. Ọ kpa ida ochoru kwọkwọ ọhẹ ọlẹ kọ la ịnya lụmẹ-lụmẹ ba ịlọmwụ kele. Ị ya ida ọọwa ju ẹ-ẹpwụ nya ichu ọta ochiche-ochiche olido tene ọlẹ kị kpa ẹjwọ nya “alabasịta” họ. 38Ụka ká ọnyang ọọwa pwụ ụwa, ọ kele kaka godayị rịrị ẹ-ẹkpẹ nya iJisọsị, hiri kpẹẹ, juwa jida hụ iJisọsị a-ata lẹ, ọ juwa kpa inyi ilegbeju nyamwụ yịlẹ egbejida ịịwa hi iJisọsị bala o-juwa ju iJisọsị ọnụ a-ata nyamwụ lẹlẹ. Ọọwa lẹ, ọ hu ida ọọwa wụ ata nya iJisọsị ụ-ụwa ịnyịnyị lẹlẹ. 39Ịnyị lẹ, ọla ịFarịsii ọwẹ kọ wụrụ iJisọsị ẹpwa a juwa me irya la ịlọmwụ ịlọmwụ yẹkẹẹ, “Anụ ya ká ọngọlẹ ri ọlọmwụ nya Ohe Oluhye ịnyịlẹhị wẹẹ? Ó-ri ịnyị lẹ, ịnọ, ọwa ayịdang ka jẹ́ ụma nya ọngọlẹ ká ọnyang ọlẹ kọ wẹẹ kpa ụbwọ gwoo ri lẹ. Chajị ọnyang ọwẹ ayịdang ri ọngọhọbịrị lụmẹ.”
40Ọọwa lẹ, iJisọsị a byi ayịdẹpwa ọwẹ yẹkẹẹ, “ỊSayịmọn! M la ẹlẹhẹ ka ya tang lẹẹlẹẹ.” ỊSayịmọn wẹ byoo yẹkẹẹ, “O hiigu: Ayịbahị ịtịcha, ya mẹ.”
41Ụka ọọwa, iJisọsị jọọ oja ọlẹ yẹkẹẹ, “Ọngọhẹ juwa ọlẹ ká angịnyị angị imiiye kpọọ uri. Ọngọhẹ nyaa kpọọ uri nya akpa ịrụ lẹpwụ-lẹpwụ. Ọngọkịla nyaa kpọọ uri nya ụpang ohu-iye kụrụ iwo kem. 42Ụka ọlẹ ká angị imimiiye ịwẹ á jụ uri nyaa ọọwa nwụ myị́ kaka lẹ, ọngọ la okpoko ọọwa a tụụbwọ hi okpoko ọọwa ga haa ịwa angị imimiiye lẹlẹ. Lẹ, ịSayịmọn, o-owo lẹpwarịrị nyaa ịwa angị imimiiye ịwẹ a tị́ ka la ọháha ẹ-ẹga nya ọlẹng ọọwa gụ ọngọkịla?”
43ỊSayịmọn wẹ byoo yẹkẹẹ, “Ọ lam lala ọngọlẹ ká okpoko nyamwụ lụmẹ gụ wẹ ịnyị.” iJisọsị wẹ byoo yẹkẹẹ, “ỊSayịmọn, a jẹ́ wẹ hiigu lụmẹ. Ịnyị ọ la lẹ.” 44Ịnyị, ụka ká iJisọsị jahị kpata da ka ẹga nya ọnyang ọọwa lẹ, ọ byi ịSayịmọn yẹkẹẹ, “ỊSayịmọn, a tị́ yẹ ọnyang ọlẹ wẹ lẹ, ụka kam jụ warị wẹ ẹpwa nyang lẹ, á chị́ enyi ọhẹ ham hụ́ ata koo. Ma, ọnyang ọlẹ tị kpa egbejida nyamwụ hụ́m ata bala ọ-kpa inyi nyamwụ yịlaa. 45M warị wẹ ẹpwa nyang lẹ, á jum ọnụ ọhẹ koo. Ma, ọnyang ọlẹ tị mwiiji warị wẹ ẹpwang nyang lẹ, ọ́ tị kpụ ba la o-ju ẹta nyam ọnụ koo. 46M tị mwiiji warị wẹ ẹpwang nyang lẹ, á gu ida ọhẹ kaka wụm egbeju koo. Ma, ọnyang ọlẹ tị warị lẹ, a yẹ jaabwọ kọọwa ayịdang kpa ida ochoru kwọkwọ ọlẹ ka wụ ata nyam wẹ ịnyịnyị. 47Chajị nya ọọwa lẹ, m jam bying yẹkẹẹ, ịhọbịrị nyamwụ ịlẹ kị lụmẹ laa wẹ lẹ, m hịnyọhyaa họọ wuu lẹ. Chajị, ọwa ayịdang la ọháha ẹ-ẹga nyam lụmẹ kaka kpoye. Ma, ọngọlẹ kị hịnyọhi ha pyịnyẹng, kaa la ọháha ọpyịnyẹng ịnyịnyị.”
48Ọọwa lẹ, iJisọsị a byi ọnyang ọwẹ yẹkẹẹ, “M hịnyọhi ịhọbịrị nyang ịwẹ wuu hang lẹ.”
49Ịnyị lẹ, angịlẹ kị hụhụ ụ-ụwa i-itebwuru ta iJisọsị a juwa ya ẹla ta ịlaa yẹkẹẹ, “Ụma nya ọngịnyị ọlanyị, a tị́ lẹẹ, kọọwa ayịdang jẹ́ jam hịnyọhi ịhọbịrị nya angịnyị ehe haa myị́?”
50Ịnyị, iJisọsị a byi ọnyang ọwẹ yẹkẹẹ, “Ẹnwa ọnyang, rụ la okpunyi mẹ! Ọmyịmyị ọlala ọtụka nyang chịng da lẹ!”
Currently Selected:
ILUKU 7: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
