ILUKU 1

1Ẹnwa iTiyofilọsị olihi ọtụka. Iru nya angịhyẹ nyahị da ụpwụ kaka tịrọnụ nya ang ịlẹ kị họ jịra ẹ-ẹpwarịrị nyahị kpá wuu ene-ene lẹ. 2Angịịwa da kpehe ẹ-ẹpwụ nya apwụ nyaa, jaabwọ ká angịlẹ kị kpẹhị nya ịlaa yẹ ang ịịwa bwu ọmwụ ọdada, ya ala ịịwa dodehe jehi kpẹẹkpẹẹ. Alibeenu ịịwa ya ẹla nya Ohe Oluhye u-uhye nya ẹrụ ọnyịịla ọọwa pyẹ ịnyịnyị. 3M jẹ́ kọ ka ri ang ohiigu nyọlẹ kam lẹẹ da ala ịịwa kpehe ụ-ụpwụ kpẹẹkpẹẹ du wang, ẹnwa iTiyofilọsị olihi ọtụka. Chajị am ayịdang wo oja nya ala ịịwa wuu yẹẹyẹẹ bwu ọmwụ ọdada ịnyịnyị. 4M họ ịnyị chajị kaahụ ayịdang ka jẹ́ ẹla ịlẹhị ọkpangga nya oja ọlẹ kị ya jeng wẹ wuu datị.

Ị Ya Ọmama nya ỊJọn Ọngọ Hụ Enyi Ohe Dodehe

5Ụka ká iHerọdụ ri Adịrahụ nya iJuda, ọngọkiliya ha Ohe Oluhye ọhẹ juwa ọlẹ kị wụrụ ịSẹkaraya. ỊSẹkaraya ọwẹ bwu ebwo nya alogu ikịla iya ha Ohe Oluhye ịlẹ kị wụrụ ẹnyị nyaa Abija. ỊSẹkaraya ye ahụ nyamwụ bwu imwawụ nya Erọn anyị, ịlẹ kị ri angịkiliya ha Ohe Oluhye ịnyịnyị. Ẹnyị nya ahụ nyamwụ ọọwa ri Elisabeti. 6ỊSẹkaraya bala Elisabeti ahụ nyamwụ ri alabwẹla ọnyịịla ị-ịlahị nya Ohe Oluhye lụmẹ. Ị kaa ba ehile bala ọna ọdada nya Ohe Oluhye jẹ jịra hiigu-hiigu lụmẹ ịnyịnyị. 7Jaabwọ ká Elisabeti ri ọnyang ọtụma lẹ, ọ́ ma ọnyị ọhẹ-lọhẹ ha ịSẹkaraya ka, gbee kịịwa angị imimiiye chị okwirichi kụnyẹ-kụnyẹ.

8Ẹnụtụrụ ookpokpo ọhẹ, ịSẹkaraya juwa myị ẹrụ nya iya ọkịlaakịla ha Ohe Oluhye ụka ọlẹ kọ hi pwụ alebwo nyamwụ. 9Chajị, ụka kị diwo lẹ, ịSẹkaraya, iwo a wu nyọka ri ọngọ kpa ụbwọ tụ ila ju iya ochoru kwọkwọ ẹnụ ọọwa, jaabwọ kị kaa họ ene-ene u-ube ịgọgọ ọtụka nya Ohe Oluhye nya ala iJuu lẹ. 10Ụka ọọwa, iru nya angịnyị godayị rịrị odehe, juwa kpa abwọ rị ha Ohe Oluhye lụka nya iya ọ-jụ ila ochoru kwọkwọ ọọwa. 11Ụka ọọwa, ịSẹkaraya chẹhị kaka yẹ olegu-ẹrụ nya Ọngọlahị Ohe Oluhye ọhẹ, kọ kele kaka godayị rịrị koye upwuriri nya ẹga ọkịla iya o-jụ ila ochoru kwọkwọ ọọwa. 12Ụka ká ịSẹkaraya yẹ olegu-ẹrụ ọọwa, ugbodu gwọọ ene nya ịlẹhị-ịlẹhị. Uhi jwọọ ịnyịnyị. 13Olegu-ẹrụ ọọwa byọọ yẹkẹẹ, “ỊSẹkaraya ee, a juhi kaka. Ohe Oluhye wo omyi nya abwọ ọrịrị nyang lẹ! Elisabeti ahụ nyang ka ma ọnyị ọlẹng hang. A ka wụrụ ẹnyị nyamwụ ịJọn. 14Ahụ ayịdang ka chị ọkẹkẹnị lụmẹ-lụmẹ chajị nya ọmama nya ọnyị ọọwa. Iru nya angịnyị lụmẹ-lụmẹ ka chị ọkẹkẹnị ọọwa tang ịnyịnyị. 15Chajị ọnyị ọọwa ka ri ọngọ ọtụka ị-ịlahị nya Ohe Oluhye Ọngọlahị. Ọnyị ọọwa ayịdang á ka nwa ere lee ang ọnwanwa ọnyọọngịrị ọhẹ-lọhẹ kpong-kpong ka. Ọnyị ọọwa ka myị la ọngịrị nya Olegu Ịgọgọ nya Ohe Oluhye bwu ẹpwụ-ẹpwụ nya ịnamwụ. 16Ọnyị ọọwa a ka ri ọngọlẹ kọ ka kpa iru nya ala Isirẹlụ tịrẹkpẹ nya chị Ọngọlahị Ohe Oluhye nyaa ọgụ ị-ịlahị lẹ. 17Ọnyị ọọwa ka kpa ọngịrị bala olegu nya Ịlayịja ji ịlahị nya Ọngọlahị kaka nwụla angịnyị nyamwụ nọ yẹẹyẹẹ gbọọ. Ọ ka họ ká ọkịlẹtụ nya adịda ị-ma anyị ka pwọ kpuru ẹ-ẹga nya anyị nyaa yẹẹyẹẹ. Ọ ka họ ká angịlẹ kị ri angị ju ihi nya ẹla nya Ohe Oluhye ene-ene ka, ka jẹ́ ụgbẹyị nya abwẹla ọnyịịla nya Ohe Oluhye hiigu-hiigu. Ọwa ka họ ká angịnyị nya Ọngọlahị ka nwụla ịlaa nọ gbọọ lẹlẹ.”

18ỊSẹkaraya byi olegu-ẹrụ ọọwa yẹkẹẹ, “Anyị, m tị́ ka họ kam ka jẹ́ yẹkẹẹ, ala ịlẹ ká ya wẹ ka họ jịra myị́, chajị am bala ahụ nyam chị okwirichi kụnyẹ-kụnyẹ wuu lẹ!” 19Olegu-ẹrụ ọọwa wẹ byọọ yẹkẹẹ, “ỊSẹkaraya, wo mẹ! Ẹnyị nyam a ri iGebirẹlụ lẹ. Am ri ọngọ myị ẹrụ i-ijata nya Ohe Oluhye. Ohe Oluhye ayịdang a dum ẹrụ warị kaka jang oja ọnyịịla ọlẹ lẹ. 20ỊSẹkaraya, wo mẹ! Ẹla ọlọnụ nyam ọwẹ ka họ jịra lụka nyamwụ pyii lẹ! Ma, ahụ ayịdang ka ku ọnụ. Á ka jẹ́ ya ẹla kaka gbee pwụ ụka ọlẹ ká ẹla ọọwa ka họ jịra wuu. Chajị a da ịwẹẹ ju ẹla nyam ọọwa lẹ.”

21Ụka ọọwa, iru nya angịnyị juwa godayị gbe ịSẹkaraya. Ọ laa ẹbyẹbyị lụmẹ chajị nyọlẹ ká ịSẹkaraya hụ tata lụmẹ kaka kpoye ẹnụ ọọwa ẹ-ẹpwụ nya ube ịgọgọ ọtụka nya Ohe Oluhye nyaa ịwa ala iJuu. 22Ụka ká ịSẹkaraya gba kpehe bwu ube ịgọgọ ọọwa kpá, kọ jẹ́ ya ẹla ta angịnyị kaka lẹ, ịwa wuu a jẹ́ yẹkẹẹ, ịSẹkaraya nyị yọyị a-arụrụ u-ube ịgọgọ nya Ohe Oluhye lẹlẹ. Ịnyị, ịSẹkaraya a juwa kpa abwabwọ kem, ya ẹla taa ụ-ụwa chajị nya ọnụ okuku nyamwụ ọọwa lẹlẹ.

23Ụka ọlẹ ká ụka nya ẹrụ ọmyịmyị nya ịSẹkaraya olube ịgọgọ ọtụka nya Ohe Oluhye chịpwụrụ kpá lẹ, ọ rụ bwu ụwa ka ẹpwa nyamwụ lẹlẹ. 24Ụka kọ nọ chẹẹ lẹ, Elisabeti ahụ nya ịSẹkaraya ọwẹ a jẹnyị lẹ, ọ tụ ịlọmwụ kpịbaa lala ịya ịrụ gbẹgbịlẹ lẹlẹ. 25Ụka ọọwa, Elisabeti ya ẹla dodehe yẹkẹẹ, “Ohe Oluhye Ọngọlahị kiji yẹm ahyẹẹrwẹrwa du kọ wụm ido ododo nya ọnyị ọmama-ka o-bwu ụbwọ nya angịnyị ehe ugbẹnyị lẹ.”

Ị Ya Ọmama nya IJisọsị Dodehe

26Ụka ká Elisabeti kpa ẹnyị nyamwụ lala ịya ịrwọnyẹ lẹ, Ohe Oluhye a du olegu-ẹrụ iGebirẹlụ ẹrụ kele ka epweji nya ịNasareti ụ-ụwa ọ-ọpyị nya ịGalili lẹlẹ. 27IMeri ọlẹ kọ ri onjwo ọyẹẹnọ ọ-jẹ́ ọlẹng-ka ọlụwa, Ohe Oluhye a du iGebirẹlụ ẹrụ ta lẹ. Ụka ọọwa, ọlẹng ọlẹ kị wụrụ iJosẹfụ juwa kpa ẹla nya iMeri ọọwa ya chajị kọ ka yọọ nya ahụ nyamwụ. IJosẹfụ ọọwa bwu imwawụ nya Adịrahụ iDevidi. 28Ụka ká olegu-ẹrụ ọọwa pwụ ẹga nya iMeri, ọ byọọ yẹkẹẹ, “IMeri, okpunyi ọtụka a juwa hang ahụ ọngọlẹ ká Ohe Oluhye Ọngọlahị hụ tang la ọnahị nyamwụ lụmẹ kaka kpoye. [Ahụ a ri ọngịnyị nya ahị ọwawa kpá gụ anyị anjwo anyang ịkịla wuu lẹlẹ.]”

29Ụka ọọwa, ugbodu juwa gu iMeri ene lụmẹ kaka kpoye. Ọ juwa me irya yẹkẹẹ, “Ụma nya ọnụ ọ-da chị ọlanyị, a tị́ wẹ ká olegu-ẹrụ ọwẹ da chịm ịnyị?” 30Olegu-ẹrụ ọọwa byọọ yẹkẹẹ, “IMeri ee, a juhi kaka ẹnwa! Chajị ọnahị nya Ohe Oluhye ji uhye nyang lụmẹ kaka kpoye. 31IMeri, yẹ mẹ. A juwa ka jẹnyị. A ka ya ẹnyị ọọwa ma ọnyị ọlẹng. A ka wụrụ ẹnyị nyamwụ iJisọsị. 32Ọnyị ọọwa ka ri ọngọ ọtụka lụmẹ. Ị ka wụrwọọ, Ọnyị nya Ohe Oluhye Agụgụ. Ohe Oluhye Ọngọlahị ka hwọọ adịrahụ kọ ka hụhụ ẹ-ẹchị adịrahụ ku ọmwakpa nya iDevidi adamwụ ogogo. 33Ọnyị ọọwa a ka ri Adịrahụ nya alụpwọma nya iJekọbụ wuu pyịyọọ gbe oyi myị́ oyi lẹlẹ. Chajị, ịpyị Adịrahụ nya ọnyị ọọwa á ka jẹ́-ẹ la ọbaba kaka.”

34Ụka ọọwa, iMeri wẹ byi olegu-ẹrụ ọọwa yẹkẹẹ, “Anyị, a tị́ me irya kọọwa ka jẹ́-ẹ chịkpẹẹ myị́? Chajị am ayịdang á jẹ́ ọlẹng ọhẹ-lọhẹ ẹnẹnẹhẹ lẹka.”

35Olegu-ẹrụ ọwẹ wẹ byọọ yẹkẹẹ, “IMeri, wo mẹ! Olegu Ịgọgọ nya Ohe Oluhye ka warị kaka hụ tang, ọngịrị nya Ohe Oluhye Agụgụ tị ka chị kụrụng ịnyịnyị! Chajị nya ọọwa lẹ, ị ka wụrụ ọnyị nyang ọọwa Ọnyị Ọlịgọgọ. Ị ka wụrwọọ, Ọnyị nya Ohe Oluhye ayịdang ịnyịnyị. 36IMeri, yẹ mẹ. Elisabeti ọọnang ọlẹ ká angịnyị wuu jọọ lala ọnyang ọtụma lẹ, ọ juwa la ẹnyị lala ịya ịrwọnyẹ lẹẹlẹẹ lẹ. 37Chajị ịngịngịhyẹ á kaa la Ohe Oluhye ujwo la ọhọhọ kpong-kpong ka.”

38Ụka ọọwa, iMeri wẹ byi olegu-ẹrụ ọọwa yẹkẹẹ, “O hiigu. Am ayịdang ri ọnchẹ nya Ohe Oluhye Ọngọlahị lẹ, jaabwọ ká ya lẹ, Ohe Oluhye a họ ịnyị ham mẹ oo!” Ọọwa lẹ, olegu-ẹrụ ọwẹ a rụ bwu ẹga nya iMeri lẹlẹ.

IMeri Kele Ka Ẹga nya Elisabeti

39Ụka ọọwa, iMeri wuleji la agaga kele ka epweji ọhẹ u-uhye nya ọgbọdọ ọ-ọpyị nya iJudiya. 40Ụ-ụwa, iMeri kele ka ẹpwa nya ịSẹkaraya kaka da ọnụ chị Elisabeti ahụ nyamwụ. 41Ụka ọọwa, ahyaahị ká Elisabeti wo ọnụ ọ-da chị nya iMeri lẹ, ọnyị ọlẹpwụ nya Elisabeti a juwa gu achwọ lẹlẹ. Ọọwa lẹ, Elisabeti a myị la ọngịrị nya Olegu Ịgọgọ nya Ohe Oluhye ụ-ụwa lẹlẹ. 42Ịnyị, Elisabeti a juwa ya ẹla la omyi ogboo yẹkẹẹ, “IMeri, ahụ a ri ọngịnyị nya ahị ọwawa kpá gụ anyang ịkịla wuu lẹlẹ. Ọnyị nyang ọlẹ ká wẹẹ ka ma ka ri ọngịnyị nya ahị ọwawa ọtụka-ọtụka ịnyịnyị. 43Am ayịdang tị́ ri ịyẹ, ká ihi ọtụka-ọtụka ọlẹ ri ịnyam kpụ kaahụ, ịnịna nya Ọngọlam la lẹpwụ-lẹpwụ warị kaka jum ụga? 44IMeri, yẹ mẹ! Ụka ọlẹ kam wo ọnụ ọ-da chị nyang bwaaa lẹ, ọnyị ọlẹpwụ nyam a jam gbajị nya ọkẹkẹnị ọtụka-ọtụka ẹ-ẹpwụ nyam lẹlẹ! 45A kpa ọkịlẹtụ nyang wuu lẹpwụ-lẹpwụ dahịhile ọ-họ jịra nya ẹla ọlẹ ká Ohe Oluhye Ọngọlahị ya jeng wẹ lẹlẹ, ahị ọwawa ka ri ịnyang pyịyọọ lẹ.”

IMeri Juwa Gu Ogbo Ha Ohe Oluhye

46Ụka ọọwa, iMeri yẹkẹẹ,

“Am ka kpa ugbodu okpukpuru nyam wuu ya ụmụmẹ nya Ohe Oluhye Ọngọlahị dodehe.

47M ka juwa kpa olegu nyam wuu,

chị ọkẹkẹnị ọtụka-ọtụka ẹ-ẹpwụ nya Ohe Oluhye Ọngọchịmda.

48Chajị Ohe Oluhye kpịtịya nyam am ọnchẹ ochiche nyamwụ ọlẹ lẹ.

Chajị, o-bwu alẹ ọlẹ kele kịlahị,

aloyi myị́ oyi wuu ka wụrụm ‘ọnyang nya ahị ọwawa’ pyịyọọ lẹ.

49Chajị, Ohe Oluhye Agụgụ họ iru nya ang ịtụka ịnyịịla ham lụmẹ.

Ẹnyị nyamwụ la ịgọgọ lụmẹ kaka kpoye.

50Ahyẹẹrwẹrwa nya Ohe Oluhye kaa juwa ha angịlẹ kị

kaa juhi nyamwụ pyịyọọ ju ka oyi myị́ oyi wuu.

51Ohe Oluhye nịra ụbwọ ọnyọọngịrị nyamwụ kpaa,

ka ẹga nya angịlẹ kị ri alọbọọchẹ lẹ.

Ohe Oluhye hu ojigi-jigi bala epepe ha irya nya imahị omeme ọlẹpwụ nyaa wuu lẹ.

52Ohe Oluhye ayịdang pwọ ịdịrịhụ ịtụka ịmwụ cheji hi ẹchị adịrahụ nyaa lẹ.

Ohe Oluhye hu angị bẹdẹẹ ilekpeleji nya ịdịrịhụ ịịwa kele ka iwe-ahụrụ oluhye lẹ.

53Ohe Oluhye họ ká angịlẹ kị juwa la imyi ye ang ịnyịịla ri wu ẹpwụ lẹ.

Ohe Oluhye tị họ ká alụdụ juwa la abwọ ehwo-ehwo lẹ.

54Ohe Oluhye da ala Isirẹlụ anchẹ nyamwụ ụbwọ jaabwọ ká ọnụ ọmyịmyị ahyẹẹrwẹrwa nyamwụ la kaka ba wuu lẹ.

55Ọ họ ọnụ ọmyịmyị nyamwụ ọọwa jịra jaabwọ kọọwa

ayịdang myị ọnụ o-gbe oyi myị́ oyi ha Ebiraham bala anyị nyamwụ anyị wuu ene-ene kaka ba.”

56Ịnyị, iMeri a hụ ta Elisabeti lala ịya ịta ene kọ rụ bwu ụwa ka ẹpwa nyaa lẹlẹ.

Ọmama nya ỊJọn Ọngọ Hụ Enyi Ohe

57Ụka ká ẹnụtụrụ họ jịra, Elisabeti ya ẹnyị nyamwụ ma ọnyị ọlẹng. 58Ụka ká alọyawụ ẹpwa nya Elisabeti bala aanamwụ wuu wo jaabwọ ká Ohe Oluhye Ọngọlahị la ahyẹẹrwẹrwa ọtụka ẹ-ẹga nya Elisabeti, ịwa wuu chị ọkẹkẹnị tọọ lụmẹ. 59La ẹnụtụrụ ọhaneku nya ọmama nya ọnyị ọọwa, aanịna nya ịSẹkaraya kele kaka da ọnyị ọọwa ụwụwụ. Ịnọ, ị juwa tịtọ kị ka ya ẹnyị nya ọnyị ọọwa wụrụ ịSẹkaraya adamwụ ene. 60Ma, Elisabeti ịnọnyị ayịdang pwa: Ọ byaa yẹkẹẹ, ịJọn nyaa ka ri ẹnyị nya ọnyị ọọwa lẹ.

61Ụka ọọwa, angịịwa wẹ byoo yẹkẹẹ, “Elisabeti ee, ọọnang ọhẹ-lọhẹ á ri ẹnyị ọwẹ ẹnẹnẹhẹ lẹka lẹ, ahị pwa!” 62Ịnyị, ị kpa abwabwọ ya ẹla ta ịSẹkaraya ayịdọnyị kị ka jẹ́ ẹnyị ọlẹ kọ tịtọ kị ka ju ọnyị ọọwa lẹlẹ.

63Ụka ọọwa, ịSẹkaraya byaa yẹkẹẹ, nyị kpa uginikpo ọ-da ụpwụ warị wẹ ọwa mẹ. Ọọwa lẹ, ọ da ụpwụ ụ-ụwa yẹkẹẹ, “Ẹnyị nya ọnyị ọlẹ ri ịJọn.” Ọọwa lẹ, ọ laa ịwa wuu ahịbwuu lụmẹ lẹlẹ. 64Ịnyị, ọnụ nya ịSẹkaraya a wụrụ lẹ, ọkụrụ-ẹlẹlẹ nyamwụ a yi da iijata-ijata lẹ, ọ juwa gwogbo ha Ohe Oluhye lẹlẹ. 65Ụka ọọwa, ejiri ọtụka-ọtụka wu alọyawụ ẹpwa nyaa wuu. Ọọwa lẹ, ị juwa kpa ẹla ọọwa ru ohi ju ka epweji myị́ epweji iluhye Ọgbọdọ nya iJudiya wuu lẹlẹ. 66Ụka ọọwa, angịlẹ kị wo oja ọọwa wuu juwa tọ awụlẹ ịtọ yẹkẹẹ, “Ụma nya ọngịnyị ọlanyị, ọnyị ọlẹ a tị́ ka nwa kaka ri?” Chajị ọng myị́ ọng nyaa wuu jẹ́ yẹkẹẹ, Ohe Oluhye Ọngọlahị nyị juwa ta ọnyị ọwẹ bwu eji-eji.

ỊSẹkaraya Yẹ Ọmwụ Dodehe

67Ịnyị, ịSẹkaraya adịda nya ịJọn ọwẹ a myị la ọngịrị nya Olegu Ịgọgọ nya Ohe Oluhye lẹ, ọ juwa yẹ ọmwụ, juwa ya ẹla dodehe ụ-ụwa lẹlẹ. Ọ yẹkẹẹ,

68“Anụ gwogbo ha Ọngọlahị Ohe Oluhye nya ala Isirẹlụ.

Chajị ọwa ayịdang hireji warị nyọka chị angịnyị nyamwụ da lẹ.

69Chajị Ohe Oluhye họ ká Ọngọchịda ọnyọọngịrị nyahị gba kpehe bwu ụtẹ nya iDevidi ọnchẹ nyamwụ lẹ.

70Jaabwọ kọọwa ayịdang ya ẹla ọọwa dodehe bwu ọnụ nya alọmwụ ịgọgọ nyamwụ inyogo ene-ene yẹkẹẹ,

71ọwa ayịdang nyị ka warị kaka chịhị da bwu ẹpwụtụbwọ nya ọ-tụ pyịpyị nya aluji nyahị wuu,

bala ẹpwụtụbwọ nya angịlẹ wuu kahị waa ẹjẹ lụmẹ.

72Ohe Oluhye yẹhị ahyẹẹrwẹrwa jaabwọ kọ myị

ọnụ ha adahị igogo anyị ene-ene yẹkẹẹ, ọwa nyị ka họ.

Chajị, ọ kpịtịya nya iro ịgọgọ

73ọlẹ kọ nwa ta Ebiraham adahị ogogo lụka nyamwụ ene-ene.

74Ohe Oluhye gbahị kpehe bwu ẹpwụtụbwọ nya aluji nyahị,

chajị kọ ka dahị ụbwọ kahị ka juwa myị ẹrụ họọ la uhi ojuju kpong-kpong kaka.

75Chajị kahị ka kpa ịgọgọ ọlala bala abwẹla ọnyịịla ọhọhọ

myị ẹrụ ị-ịlahị nyamwụ pyịyọọ gbee pwụ ẹnụtụrụ nya ọhịhị nyahị wuu.

76Ahụ ọnyị onjwo ochiche ọlẹ,

ị ka wụrụng ọlọmwụ nya Ohe Oluhye Agụgụ.

Chajị ahụ, Ohe Oluhye a du ẹrụ ji ịlahị

nya Ọngọlahị la kaka nwụla iwe-ahụrụ nọ gbọọ lẹ.

77Chajị ká ka mẹjẹ angịnyị nya Ohe Oluhye yẹkẹẹ,

ụka ká Ohe Oluhye nyị́ hịnyọhi ịhọbịrị nyaa kpá lẹ,

ịwa ayịdang nyaa ka jẹ́-ẹ wu ọchịda nya Ohe Oluhye ọyị myị,

78bwula ọnahị ahyẹẹrwẹrwa nya Ohe Oluhye lẹlẹ.

Ụka ọlẹ ká ẹnụ ọtụka nya ọchịda nya Ohe Oluhye ka chị kụrụụhị bwu epwoohe,

79Ohe Oluhye ka họ ká ahịgboo nya ẹnụ ọtụka ọọwa

ka chị ha angịlẹ wuu kị juwa ẹ-ẹpwụ nya ukpowu okpem-kpem

nya ọhọbịrị ọhọhọ bala o-juwa ẹ-ẹpwụ nya ikpokpo nya arụrụ nya igu.

Ahịgboo nya ẹnụ nya ọchịda ọọwa,

ka ri otinika ọ-hu ahịgboo ha ẹpẹtẹ nyahị ụ-ụgbẹyị nya okpunyi ọlala nya Ohe Oluhye.”

80Ịnyị, ịJọn ọọwa a nwa kaka ri adam ọlẹng ẹ-ẹpwụ nya olegu bala ugbinyịrọ lẹlẹ. Ụka kọ nwa ọngịnyị, ọ kele kaka nọ ẹpwa nyamwụ u-ugbileji gbee pwụ ẹnụtụrụ ọlẹ kọ chị ịlọmwụ ehe ha aluche nya Isirẹlụ wuu.

Currently Selected:

ILUKU 1: IBNO

Highlight

Copy