ỊJỌN 14
14
iJisọsị A Ri Ụgbẹyị O-bwu Ka Ẹga nya Adịda Lẹ
1IJisọsị byi angịjụgbẹyị nyamwụ yẹkẹẹ, “Ọkịlẹtụ, a kpụnụ enyi kpong-kpong ka. Anụ myị la Ohe Oluhye la ọkịlẹtụ ookpokpo. Kanụ myị lam ịnyịnyị mẹ. 2Ụ-ụwa, ẹ-ẹpwa nya Adam lẹ, ebe ịkụkụ juwa lụmẹ-lụmẹ gbenu. Ó ri kọ la ịnyị ka, ịnọ, ḿ tụtụm ka ya jenu ịnyị kaka. M juwa ka kele ka nwụla iwe-ahụrụ nọ gbenu. 3Ụka kam rụ kele kaka nwụla iwe-ahụrụ ọọwa nọ gbenu kpá, m juwa ka mwẹẹkpẹ warị kaka yenu kpa rụ ba ịlọm, chajị, ẹga ọlẹ kaam ayịdang ji ụ-ụwa pyii, anụ ka ji tam ịnyịnyị lẹ. 4Ẹga ọlẹ kam wẹẹ jẹ ka lẹ, anụ jẹ́ ẹga ọọwa. Anụ tị jẹ́ ụgbẹyị o-bwu kele ka ụwa ịnyịnyị lẹ.”
5ỊTọmasị wẹ byi iJisọsị yẹkẹẹ, “Ọngọlahị ee, áhị́ jẹ́ ẹga ọlẹ ká juwa jẹ ka datị ka. Ee lẹ, anyanyị, ahị tị́ ka họ kahị ka jẹ́-ẹ jẹ́ ụgbẹyị o-bwu kele ka ụwa datị myị́ mẹ?”
6IJisọsị wẹ byoo yẹkẹẹ, “Am kpakpakpa a ri Ụgbẹyị ọọwa lẹ. Am kpakpakpa a ri Ẹla nya Ịlẹhị lẹ. Am kpakpakpa a tị ri Ọhịhị ayịdang ịnyịnyị lẹlẹ. Ọngọngọhẹ á juwa ọlẹ kọ ka jẹ́-ẹ pwụ ẹga nya Ohe Oluhye Adịda myị́ kaka. Kẹnẹ-kẹnẹ, ó ri ká ọngọọwa á bwu ẹga nyam ene lẹ mẹ ịnyị. 7Ó ri kaanụ ayịdang á jẹ́ ụma nya ọngọlẹ kam ri yẹẹyẹẹ lẹ, ịnọ, anụ ka jẹ́ ọngọlẹ ká Ohe Oluhye Adam ri ịnyịnyị lẹ. Bwu ọlẹẹlẹẹ lẹ, anụ dọmwụ jẹ́ Adịda ọọwa lẹ. Anụ tị yọọ ịnyịnyị lẹ.”
8IFilipu wẹ byoo yẹkẹẹ, “Ọngọlahị, mẹ ọngọlẹ ká Adịda ọọwa ri kpangga jẹẹhị mẹ. Aalẹ, ọ ka wuhi ẹpwụ lẹ.”
9IJisọsị wẹ byoo yẹkẹẹ, “IFilipu, ọ ri ọlẹ kam hwẹẹ tanụ, ang amalẹ kaka lẹ, ọ ri á mịla jẹ́ ọngọlẹ kam ri lẹka pyịyọọ daalẹ? Ọng myị́ ọng ọlẹ kọ yẹm lẹ aalẹ, ọngọọwa yẹ Ohe Oluhye Adịda lẹ. Ee lẹ, ịịyẹ a tị́ du ká myịmyị juwa yẹkẹẹ, ‘Mẹ ọngọlẹ ká Ohe Oluhye Adịda ri jẹẹhị mẹ,’ tị tị? 10IFilipu, ọ ri ahụ ayịdang á myị yẹkẹẹ, am nyị juwa ẹ-ẹpwụ nya Ohe Oluhye Adịda, Ohe Oluhye Adịda ayịdang nyị tịtị jam ẹ-ẹpwụ nyam am ịnyịnyị ka? Ala ịlẹ wuu kam kaa ya jenu lẹ, í bwu ẹga nyam am ayịdang ka. Ma, Ohe Oluhye Adịda ọlẹ kọ jam ẹ-ẹpwụ nyam a kaa kpam họ ụkụrwọ ịlẹbyẹbyị nya ịlọmwụ ịwẹ wuu lẹ. 11Chajị nya ọọwa lẹ, anụ juwa myị la ọkịlẹtụ ookpokpo yẹkẹẹ, am nyị juwa ẹ-ẹpwụ nya Ohe Oluhye Adịda, Ohe Oluhye Adịda nyị tị tịtị jam ẹ-ẹpwụ nyam ịnyịnyị mẹ. Ọ́ tị ri ịnyị kaka lẹ aalẹ, a myị lam la ọkịlẹtụ ookpokpo chajị nya ụkụrwọ ẹbyẹbyị ịlẹ wuu kam kaa họ mẹ. 12Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ myị lam nya ịlẹhị-ịlẹhị lẹ aalẹ, ụkụrwọ ẹbyẹbyị ịlẹ kam kaa họ lẹ, ọngọọwa ka haa ịnyịnyị myị́. Ee, ịnyịlẹhị ịnyị, ọngọọwa dọmwụ ka họ ụkụrwọ ẹbyẹbyị ị-gụ ịlẹ kam kaa họ wẹẹ. Chajị, am ayịdang jam ka rụ ka ẹga nya Ohe Oluhye Adam lẹ. 13Ang myị́ ang ọlẹ kanụ ka bịlẹ Ohe Oluhye la ẹnyị nyam, m ka họ ang ọọwa hanụ, chajị ká angịnyị ka jẹ́-ẹ gwogbo ha Ohe Oluhye Adịda bwula Ọnyẹwẹ nyamwụ. 14Ang myị́ ang ọlẹ kọ baanụ, kanụ bịlẹ la ẹnyị nyam lẹ aalẹ, m ka họ ang ọọwa hanụ ịnyịlẹhị pyii lẹ.”
Ọnụ Ọmyịmyị Chajị nya Olegu Ịgọgọ
15IJisọsị myịmyị byaa yẹkẹẹ, “Ó ri kam háanụ nya ịlẹhị-ịlẹhị aalẹ, anụ ka juwa kpa ehile nyam họ ụkụrwọ yẹẹyẹẹ pyii lẹ! 16Aalẹ, am ka raabwọ bịlẹ Ohe Oluhye Adịda, kọ ka ya Ọngọ kpụ́ ẹjẹ ọkịla du wanụ, chajị kọ ka kụ tanụ pyịyọọ gbe oyi myị́ oyi lẹ. 17Ọngọ kpụ́ ẹjẹ ọọwa a ri Olegu Ịgọgọ ọngọlẹ kọ kaa ya ẹla nya ịlẹhị dodehe lẹ. Alodehe ịlẹ kị jẹ́ Ohe Oluhye ka lẹ, á ka jẹ́-ẹ ye Olegu Ịgọgọ ọọwa myị́ ka. Chajị, ị́ jẹ́-ẹ yẹ Olegu Ịgọgọ ọọwa lee ọ-jẹ́ ụma nya ọngọlẹ kọ ri datị kpong-kpong ka. Ma, anụ ayịdang tị jẹ́ Olegu Ịgọgọ ọọwa, chajị ọ kụ tanụ. Ọ tị ka juwa ẹ-ẹpwụ nyanụ ịnyịnyị pyịyọọ. 18Ḿ ka tụụbwọ hiinu chụwa ụbwọọnụ ụbwọọnụ lala anyị-egu ka. M ka warị wẹ ẹga nyanụ. 19Ụka kọ nọ chẹẹ wẹẹ lẹ aalẹ, angịkịla ilodehe á ka yẹm kaka. Ma, anụ tị ka juwa kpẹhị nya olegu nyanụ yẹm ụka wuu. Chajị, jaabwọ kaam ayịdang ka juwa hịhị pyịyọọ lẹ, ịnyịnyị, anụ ka juwa hịhị tam lẹlẹ. 20Ụka ká ẹnụtụrụ ọọwa á pwụ eji lẹ aalẹ, anụ ka jẹ́ yẹkẹẹ, am ayịdang nyị juwa ẹ-ẹpwụ nya Ohe Oluhye Adam. Anụ nyị tị tịtị juwa ẹ-ẹpwụ nyam am, am nyị tị tịtị juwa ẹ-ẹpwụ nyanụ anụ ayịdang ịnyịnyị lẹlẹ.”
21“Ọng myị́ ọng ọlẹ kọ wo ehile nyam, kọ juwa kpa họ ụkụrwọ lẹ aalẹ, ọngọọwa, m há nya ịlẹhị-ịlẹhị lẹ. Ọng myị́ ọng ọlẹ kam tị há nya ịlẹhị-ịlẹhị lẹ aalẹ, ọngọọwa ka há Ohe Oluhye Adam ịnyịnyị lẹ! Aalẹ, am ayịdang tị ka la ọháha ẹ-ẹga nya ọngọọwa nya ịlẹhị-ịlẹhị ịnyịnyị bala ọ-ka juwa chị ịlọm ehe mẹjẹ ọngọọwa ịnyịnyịịnyị lẹ.”
22IJudasị ọkịla ọlẹ kọ ri iJudas Isikarọtụ ka, wẹ byi iJisọsị yẹkẹẹ, “Ọngọlahị, ọ tị́ lanyị ká ka chị ịlọng ehe mẹjẹẹhị ahị dachichi hi alodehe ịkịla da?”
23IJisọsị wẹ byoo yẹkẹẹ, “Ọng myị́ ọng ọlẹ kam há nya ịlẹhị-ịlẹhị aalẹ, ọngọọwa ka juwa kpa ẹla nyam họ ụkụrwọ ẹ-ẹpwụ nya ọhịhị nyamwụ jịra. Ọọwa lẹ, ọngọọwa a ka há Ohe Oluhye Adam lẹlẹ. Ọọwa lẹ, am bala Ohe Oluhye a ka kele ka ẹga nya ọngọọwa kaka nọ ẹpwa ẹ-ẹpwụ ọkịlẹtụ nyamwụ lẹlẹ. 24Ọng myị́ ọng ọlẹ kọ tị la ọháha ẹ-ẹga nyam nya ịlẹhị-ịlẹhị ka aalẹ, ọngọọwa á ka myị-ị kpa ẹla nyam họ ụkụrwọ ẹ-ẹpwụ nya ọhịhị nyamwụ jịra ka. Ẹla ọlẹ kam tị kaa ya dodehe je angịnyị wuu lẹ, ẹẹlanya ịlọm am ayịdang kpong-kpong ka. Ma, ẹla nya Ohe Oluhye Adịda Ọngọlẹ kọ dum ẹrụ warị ịnyị!”
25IJisọsị myịmyị byaa yẹkẹẹ, “Am jam ya ala ịlẹ wuu jenu lẹẹlẹẹ, chajị nyọlẹ kam jam tanụ alẹ wẹẹ. 26Ma, Ọngọ kpụ́ ẹjẹ ọlẹ kọ ri Olegu Ịgọgọ ọlẹ ká Ohe Oluhye Adịda wẹẹ ka du warị wanụ la ẹnyị nyam wẹẹ, Olegu Ịgọgọ ọọwa a ka mẹ ang myị́ ang wuu jẹẹnụ lẹlẹ. Ọ ka kpụnụ ịtịya nya ang myị́ ang ịlẹ wuu kam ya jenu ene-ene ịnyịnyị.”
27“M jam ya okpunyi danụ eji lẹ! Okpunyi nyam am ayịdang kpangga, a wẹ kam ka ya hanụ lẹ. Ma, jaabwọ ká odehe ọlẹ tị kaa hu okpunyi ọmwẹẹrịị ha angịnyị ehe, am a wẹẹ ka hu okpunyi nyam ọọwa hanụ kpong-kpong ka! Ịnyam ri okpunyi ọ-pyịyọọ. Lẹ, ọkịlẹtụ a kpụnụ enyi ka, anụ tị juwa juhi kaka ịnyịnyị. 28Chajị, anụ wo jaabwọ kam byinu ene-ene yẹkẹẹ, m juwa rụ hiinu lẹ. Ma, m tị juwa ka tịrẹkpẹ warị wẹ ẹga nyanụ myịmyị wẹẹ. Lẹ, ó ri kam háanụ nya ịlẹhị-ịlẹhị lẹ aalẹ, anụ ka juwa chị ọkẹkẹnị nya ịlẹhị-ịlẹhị, chajị nyọlẹ kam yẹkẹẹ, m juwa ka rụ kele ka ẹga nya Ohe Oluhye Adịda lẹ. Chajị Ohe Oluhye Adịda ọọwa a gụm am ayịdang lẹ. 29M tị jam ya ala ịlẹ jenu lẹẹlẹẹ ene kị ka họ jịra, chajị ká ụka ká ala ịịwa á họ chịpwụrụ ịnyịlẹhị lẹ, kanụ ka jẹ́-ẹ myị lam nya ịlẹhị-ịlẹhị bwulaa. 30M ka myịmyị-ị̀ juwa ya ala ịkịla tanụ gu ọlẹ lẹẹlẹẹ kaka. Chajị, ọngọ ri adịrahụ o-juwa gbe odehe ọlẹ wuu lẹẹlẹẹ wẹẹ warị wẹ ẹga nyam lẹ. Ma, ọ́ tị la ọngịrị ka jụm họ abwaabwọhẹ myị́ kpong-kpong ka. 31Ma, ọkẹnẹ-kẹnẹ ri, m ka họ ká alodehe wuu ka jẹ́ yẹkẹẹ, jaabwọ ká Ohe Oluhye Adịda nyị hám nya ịlẹhị-ịlẹhị lẹ, jaabwọ ká Adịda ọọwa ayịdang nyị dam ehile kpangga lẹ, ịnyịnyị-ịnyịnyị, am nyaa kaa họ ịnyịlẹhị pyii lẹlẹ. Anụ wuleji kahị rụ bwu ẹgẹlẹ mẹ.”
Currently Selected:
ỊJỌN 14: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
