ỊJỌN 13

IJisọsị Hụ́ Ata nya Angịjụgbẹyị nyamwụ

1Ụka ọọwa, ọ hi lala ụtụrụ ookpokpo ká ẹnụ ụtụrụ nya Ang Oriri Ọchịpwụrụ nya ala iJuu ka pwụ eji lẹ. Ụka ọwẹ, iJisọsị ayịdang tị jẹ́ yẹkẹẹ, ụka nya awa ọlẹ kọọwa nyị ka kpa rụ bwu ẹpwụ nya odehe ọlẹ, tịrẹkpẹ ka ẹga nya Ohe Oluhye Adịdọwa nyị juwa ju chwẹẹ lụmẹ lẹ. Angịlẹ kị ri angịnyị nyamwụ ẹ-ẹpwụ nya odehe ọlẹ lẹ, ị họ́ọ lụmẹ. Ọ la ọháha ọọwa ẹ-ẹga nyaa gbee ju ka ọbaba.

2Ụka ọọwa, iJisọsị bala angịjụgbẹyị nyamwụ juwa ri ang oriri la awụlẹ. Ụka ọwẹ, Ohe Onyobyi a hu irya nyọka pịrị iJisọsị ha ju ka ẹpwụ nya iJudasị Isikarọtụ ọnyị nya ịSayịmọn lẹlẹ. 3IJisọsị jẹ́ yẹkẹẹ, ọwa ayịdang kpangga, Ohe Oluhye Adịda nyaa tụụbwọ hi ang myị́ ang nyamwụ wuu ju ụ-ụbwọ lẹlẹ. Ọ myịmyị jẹ́ yẹkẹẹ, ẹ-ẹga nya Ohe Oluhye kpangga, ọwa ayịdang nyaa bwu warị lẹ. Ẹ-ẹga nya Ohe Oluhye pyii, ọwa nyaa tị juwa ka rụ tịrẹkpẹ ka ịnyịnyị lẹ. 4Ọọwa lẹ, iJisọsị a wuleji bwu uhye nya itebwuru nya ang oriri nyaa lẹ, ọ pwọ awụrụ oluhye nyamwụ neeji lẹ, ọ hu apwụ ọ-kpa hyo enyi chị ọhị nyamwụ lẹlẹ. 5Ịnyị, ọ chị́ enyi ju ẹja ọtabwọ lẹ, ọ juwa dọmwụ nya ọ-hụ́ angịjụgbẹyị nyamwụ ata, juwa kpa apwụ o-hyo enyi ọọwa yịlaa enyi ịnyịnyị lẹlẹ. 6Ụka ká iJisọsị pwụ ẹga nya ịSayịmọn iPita lẹ, iPita a byoo yẹkẹẹ, “Ọngọlahị, ahụ a dachichi ka hụ́m ata lẹlẹ?”

7IJisọsị wẹ byi iPita yẹkẹẹ, “Á jẹ́ ang ọlẹ kam wẹẹ họ lẹẹlẹẹ lẹka! Ma, a tị ka jẹ́ etu nyamwụ ị-ịlahị wẹẹ.”

8IPita wẹ byoo yẹkẹẹ, “Ọngọlahị, aḿ ka myị, aa hụ́m ata kpá ẹnẹnẹhẹ kaka.” IJisọsị wẹ byoo yẹkẹẹ, “Ọ́ tịtị ri ká myị, m hụ́ng ata ka aalẹ, á ka ri ọngọjụgbẹyị nyam kaka ịnyịnyị!”

9ỊSayịmọn iPita wẹ byoo yẹkẹẹ, “Ọngọlahị, ọ́ tị tị ri ịnyị lẹ aalẹ, á ka hụ́ ata nyam kem kaka. Hụ́ abwọ nyam bala egbeju nyam ịnyịnyị mẹ!”

10IJisọsị wẹ byoo yẹkẹẹ, “Ọng myị́ ọng ọlẹ kọ hyo enyi lẹ aalẹ, ata ọhụ́hụ kem, a kaa baba họọ lẹlẹ. Chajị, ẹga myị́ ẹga nyamwụ wuu la cheri-cheri lẹ. Anụ angịjụgbẹyị nyam wuu la cheri-cheri lẹ. Kẹnẹ-kẹnẹ, ọngọ ookpokpo lẹpwarịrị nyanụ ụbwọọmwụ kem, a hi lẹlẹ.” 11IJisọsị jẹ́ ọngọlẹ kọ juwa ka pịrọọ ha wuu ene-ene lẹ. Ịnyị a du kọ yẹkẹẹ, “Anụ wuu la cheri-cheri kaka hi ọngọ ookpokpo lẹlẹ.”

12Ụka ká iJisọsị hụ́ angịjụgbẹyị nyamwụ ata kpá wuu lẹ, ọ hu awụrụ oluhye nyamwụ kụrụ lẹ, ọ kele kaka hụhụ taa i-itebwuru myịmyị lẹlẹ. Ọọwa lẹ, ọ byaa yẹkẹẹ, “Anụ jẹ́ etu nya ang ọlẹ kam họ wẹẹ kpong-kpong? 13Anụ ayịdang kaa wụrụm Ayịbahị ịtịcha bala Ọngọlahị. Ọlẹ kanụ kaa wụrụ ịnyị lẹ, anụ jẹ́ ya, chajị ịnyị, m ri ịnyịlẹhị lẹ. 14Ee lẹ, am kam ri Ọngọlanụ bala ịtịcha nyanụ, kam mwọọgịlẹ hụụnụ ata wẹẹ, ịnyịnyị-ịnyịnyị, ọ chịla kanụ ka juwa hụ́ awụlẹ ata lẹlẹ. 15Chajị am ayịdang hu ang o-ju ẹjẹẹ nọ hanụ, chajị kanụ ka juwa kpa họ ẹ-ẹga nya awụlẹ ịnyịnyịịnyị lẹ! 16Nya ịlẹhị-ịlẹhị, m byinu yẹkẹẹ, ọnchẹ á kaa gụ ayịbaba ka. Lee, ọngọ myị ẹrụ ọ-kaa gụ ọngọ doo ẹrụ ka ịnyịnyị. 17Jaabwọ kaanụ ayịdang jẹ́ ang ịwẹ kam mẹjẹẹnụ wẹ wuu lẹlẹ, ahị ọwawa ka ri ịnyanụ, ó ri kanụ ka myị juwa kpaa họ ụkụrwọ ẹ-ẹpwụ nya ọhịhị nyanụ.”

18“Ḿ jam ya ẹla ọlẹ rụ́ụnụ anụ aluche wuu ka. Am ayịdang jẹ́ ụma nya angịlẹ kam chụchụ. Ma, jaabwọ ká Ụpwụ Ịgọgọ tị ya ene-ene lẹ, ọ ka họ jịra ịnyị pyii lẹ. Ị da ụ-ụwa yẹkẹẹ, ọngọlẹ kọ kaa ju epwedii nya ang oriri tam, a mwọọgịlẹ wẹẹ wuleji tụm pyịpyị lẹlẹ. 19M jam ya ẹla ọlẹ jenu lẹẹlẹẹ, ene ká ẹla ọọwa ka họ jịra. Chajị ụka kọ họ jịra kpá lẹ, kanụ ka jẹ́-ẹ myị yẹkẹẹ, am kpakpakpa nyaa ri ọngọọwa ịnyịlẹhị lẹlẹ. 20nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ kpa ọkịlẹtụ ookpokpo ye ọngọlẹ kam du ẹrụ la okpunyi lẹ aalẹ, am ayịdang kpangga, ọngọọwa a wẹẹ ye ịnyịnyị lẹlẹ. Ọngọlẹ kọ tị yem am la ọkịlẹtụ ookpokpo lẹ aalẹ, Ohe Oluhye Adịda ọlẹ kọ dum ẹrụ warị wẹ odehe ọlẹ, ọngọọwa a tịtị wẹẹ pẹ ẹpwa ịnyịnyị lẹlẹ.”

IJisọsị Ya Ẹla Dodehe Jaabwọ Kị Ka Bwu Pịrọọ Ha

(ỊMatiyu 26:20-25; ỊMakị 14:17-21; ILuku 22:21-23)

21Ụka ká iJisọsị ya ẹlẹwẹ kpá bwaaa lẹ, olegu nyamwụ a myị la imahị nya ang ọjụjụ lụmẹ-lụmẹ lẹ, ọ ya ẹla dodehe yẹkẹẹ, “Nya ịlẹhị-ịlẹhị, m byinu yẹkẹẹ, ọngọhẹ lẹpwarịrị nyanụ angịjụgbẹyị nyam juwa ka pịrịm ha lẹ!”

22Ụka ọọwa, angịjụgbẹyị nyamwụ juwa chẹhị-ẹhị yẹ awụlẹ. Chajị, ị́ jẹ́ ọngọlẹ kọ juwa ka pịrọọ ha bwu ẹpwụ nyaa datị ka. 23Ụka ọọwa, ọngọjụgbẹyị nya iJisọsị ọhẹ ọlẹ kọ há iJisọsị lụmẹ, juwa ọlẹ kọ kaa hụhụ ba iJisọsị ba, juwa kpụ nịrọọ ịnyịnyịịnyị. 24Ọọwa lẹ, ịSayịmọn iPita a kpa abwabwọ ya ẹla ta ọngọjụgbẹyị ọọwa, chajị kọ ka tọ iJisọsị wo, ọngọlẹ ká iJisọsị ya ẹla rụ́ nya o-juwa ka pịrọọ ha lẹlẹ.

25Ịnyị, ọngọjụgbẹyị ọọwa a ya egbeju nyamwụ nịrọ iJisọsị ẹ-ẹchẹmẹ lẹ, ọ byi iJisọsị yẹkẹẹ, “Ọngọlahị ee, o-owo a tị́ ri ọngọọwa?”

26IJisọsị wẹ byoo yẹkẹẹ, “Ọngọlẹ kam wẹẹ ka ya ịkaa hi ọhọ ene kam ka ya dọọ ukpe ịnyị!” Ọọwa lẹ, iJisọsị a ya ịkaa hi ọhọ lẹ, ọ ya ha iJudasị, ọnyị nya ịSayịmọn Isikarọtụ lẹlẹ. 27Ịnyị, ụka ká iJudasị ye ịkaa ọọwa kpá lẹ, Ohe Onyobyi a jụ ka ẹpwụ nyamwụ lẹlẹ. Ọọwa lẹ, iJisọsị a byi iJudasị yẹkẹẹ, “Ang ọlẹ ká wẹẹ ka họ lẹ, kele kaka họọ ahyaahị mẹ!” 28Ụka ọọwa lẹ, ọngọngọhẹ nya angịjụgbẹyị nya iJisọsị ịlẹ kị hụ i-itebwuru tọọ, á jẹ́ etu nya ẹlẹwẹ kọ ya ta iJudasị kpong-kpong ka. 29Angịhyẹ nyaa me irya yẹkẹẹ, jaabwọ ká iJudasị nyaa ri ọngọ kpa akpa nya okpoko nyaa lẹ, iJisọsị nyị byoo ịnyị, chajị ká iJudasị nyị ka kele kaka ra ang-abwọ ọlẹ kịị nyị ka kpa họ Ang Oriri ọtụka nya ala iJuu ọlụka ọọwa. Lee, iJudasị o-juwa ka hu okpoko kpa kaka ga ha ikpehika. 30Ụka ká iJudasị ye ịkaa ọọwa ri kpá lẹ, ọ wuleji ahyaahị gba kpehe hyaa lẹlẹ. Ụka ọọwa ri alodu lẹ.

Ehile Onyeewe Ọlẹ Ká IJisọsị Da

31Ịnyị, ụka ká iJudasị rụ gba kpehe kpá lẹ, iJisọsị a byi angịjụgbẹyị nyamwụ ihihi yẹkẹẹ, “Ọlẹẹlẹẹ a ri ụka ọlẹ ká ẹbyẹbyị nya Ọnyị nya ọngịnyị ehe ọlẹ ka chị ehe a-ahịgboo lẹlẹ. Ọlẹẹlẹẹ a tị ri ụka ọlẹ ká ẹbyẹbyị nya Ohe Oluhye ayịdang tị ka chị ehe a-ahịgboo bwula Ọnyị nyamwụ ịnyịnyị lẹlẹ. 32Ó ri ká ẹbyẹbyị nya Ohe Oluhye á chị ehe a-ahịgboo bwula Ọnyẹwẹ nyamwụ aalẹ, Ohe Oluhye ayịdang ka chị ẹbyẹbyị nya ịlọmwụ ehe u-uhye nya Ọnyẹwẹ nyamwụ ọọwa ịnyịnyị. Ohe Oluhye dọmwụ wẹẹ ka chị ẹbyẹbyị nyamwụ ọọwa u-uhye nya Ọnyẹwẹ nyamwụ ehe ahyaahị lẹẹlẹẹ lẹ. 33Anụ anjwo ichiche nyam, m juwa ka hụ tanụ chẹẹ lụka o-kpii wẹẹ. Ma, ụka kam rụ hiinu kpá, anụ juwa ka tịtọ nyam. Ma, jaabwọ kaam ayịdang byi ala iJuu ene-ene lẹ, m jam byinu ịnyịnyị yẹkẹẹ, ẹga ọlẹ kam wẹẹ ka rụ ka lẹ, ánụ ka bam ka ụwa myị́ kpong-kpong ka. 34Ehile onyeewe a lẹẹ kam lẹẹ danụ lẹ. Anụ la ọháha ẹ-ẹga nya awụlẹ nya ịlẹhị-ịlẹhị, jaabwọ kaam ayịdang la ọháha ẹ-ẹga nyanụ wẹ mẹ. 35Ó ri kaanụ ayịdang á juwa la ọháha ẹ-ẹga nya awụlẹ nya ịlẹhị-ịlẹhị ịnyị lẹ aalẹ, angịnyị wuu a ka jẹ́ yẹkẹẹ, anụ nyị ri angịjụgbẹyị nyam ịnyịlẹhị lẹlẹ.”

IJisọsị Yẹ Ọmwụ Rụ́ IPita Ọ-pwọọ Pwa Rwarụ

(ịMatiyu 26:31-35; ịMakị 14:27-31; iLuku 22:31-34)

36ỊSayịmọn iPita tọ iJisọsị wo yẹkẹẹ, “Ọngọlahị ee, ale, a tị́ juwa jẹ ka ene?” IJisọsị wẹ byoo yẹkẹẹ, “Ẹga ọlẹ kam wẹẹ ka rụ ka lẹ, á ka bam kele ka ụwa lẹẹlẹẹ myị́ lẹka. Ma, ụka tị juwa warị ká ka bam ka ụwa kpá ị-ịlahị wẹẹ.”

37IPita myịmyị wẹ byoo yẹkẹẹ, “Ọngọlahị, ịịyẹ a tị́ du kam ka bang ka ụwa lẹẹlẹẹ myị́ ka? M nwụlanọ nyọka tụụbwọ hi ọhịhị nyam ga ha igu, chajị nyang lẹ!”

38IJisọsị wẹ byoo yẹkẹẹ, “IPita, a ya ká nwụlanọ nyọka tụụbwọ hi ọhịhị nyang ga ha igu chajị nyam myị́ ịnyịlẹhị lẹ? Nya ịlẹhị-ịlẹhị, m bying yẹkẹẹ, ọwọọwọọ́ ka da ịgbụ kpong-kpong ene kaahụ iPita ọwẹ ka pwam rwarụ ugbabwọ ịta lodu ọlalẹ kaka.”

Currently Selected:

ỊJỌN 13: IBNO

Highlight

Copy