ỌMWỤ ỌDADA 44

Ẹla Kpụ ỊBenjamịn I-Ijipiti

1Ụka ọọwa, iJosẹfụ be ẹkọ wụrụ ọnchẹ ọgbahị ọlẹpwa nyamwụ kaka byoo yẹkẹẹ, “Kele kaka mẹ ambakpa myị awụtọọ nya alẹng ịwẹ wuu kpọngkpọng jaabwọ kị ka kpa kaka ba myị ká tụụbwọ hi okpoko nya ọngọngọọng nyaa juwa ẹ-ẹpwụ nya ọnụ nya awụtọọ nyaa wuu ịnyịnyị mẹ. 2Ká hu ukoku ọ-nwa enyi nya okpoko onyoowuru nyam ọlaanyị ju olo nya ọngọlẹ kọ ri onjwo nyaa wuu bala okpoko nyamwụ ịnyịnyị mẹ.” Ọọwa lẹ, ọnchẹ ọgbahị ọwẹ a họ jaabwọ ká iJosẹfụ ayịbamwụ byoo ya nyị họ wuu lẹlẹ. 3Ịnyị, lụka nya ewu-ụtụrụ kwiri-kwiri, ká alẹpwa nya iJosẹfụ da anyadamwụ ọkpahị kpá lẹ, ị yegiri nya ẹdịyẹ nya iKenan bala ibyiyó nyaa lẹlẹ. 4Ụka kị jẹdịyẹ nyaa jẹjẹ pwụ ẹgẹgẹhẹ hi epweji ọwẹ lẹka, iJosẹfụ wụrụ ọnchẹ nyamwụ byoo yẹkẹẹ, “Wuleji, ká hu ang lụnyẹ-lụnyẹ ba alẹng ịwẹ kele ka ụgbẹyị. Ụka ká waa ọyị, a waa dayị ká byaa yẹkẹẹ, ‘Ịịyẹ a tị́ du kanụ họhị ang onyobyi kwiwa nya ang ọnyịịla ọlẹ kahị họ hanụ ịnyị? Ịyẹ a tị́ du kanụ huuhi ukoku ọ-nwa enyi nya okpoko onyoowuru yi oyi juwa kpa rụ? 5Anụ họ ẹla tịpyọ lụmẹ. Ánụ́ jẹ ká ukoku ọwẹ iJosẹfụ ayịbam a kaa kpa nwa enyi bala ọ-kpa yọyị a-arụrụ ịnyịnyị ka?’ ”

6Ịnyị lẹ, ọnchẹ nya iJosẹfụ ọwẹ a wuleji lụnyẹ-lụnyẹ juwa ku anyadịda nya iJosẹfụ ịwẹ gbee kọ waa ọyị lẹlẹ. Ọọwa lẹ, ọ ya ẹlẹwẹ taa jaabwọ ká iJosẹfụ byoo wẹ wuu lẹlẹ. 7Ụka ọọwa, anyadịda nya iJosẹfụ ịwẹ wẹ byoo yẹkẹẹ, “Ahyu Ayịbahị, ẹla ọlanyị a tị́-ị yaya tahị ịnyị? Eheehe! Áhị́ họ ẹlẹlẹhẹ ọlịnyị kpong-kpong ka, adam. 8Á kpịtịya kaka? Okpoko ọlẹ kahị ye ẹ-ẹpwụ nya olo nyahị lụka nya ẹdịyẹ ọlaanyị lẹ, áhị kpa tịrẹkpẹ wang myịmyị bwu ọpyị nya iKenan ka? Ee lẹ, anyanyị ahị tị́ ka jẹ-ẹ byẹjẹ hu okpoko onyoowuru lee ang nya okpoko ịgọm ọhẹ-lọhẹ yi oyi bwu ẹpwa nya ayịbang kpa rụ mẹ, ayịbahị? 9Kẹwẹ kaka wụla olo nyahị wuu yẹ mẹ. Ọng myị ọng ọlẹ ká yọọ ụ-ụbwọ nyamwụ lẹ aalẹ, aa nwụ ọngọọwa mẹ. Aalẹ, ahị angị hihi ka ri anyịhị nyang ịnyịnyị lẹ.” 10Ọnchẹ nya iJosẹfụ ọọwa wẹ byaa yẹkẹẹ, “Ọ hiigu. Jaabwọ ká ya lẹ, am myị jung ịnyịnyị. Ọng myị ọng ọlẹ kam ka wu la ukoku nya ayịbam, ọwẹ lẹ aalẹ, ọngọọwa ụbwọọmwụ a ka ri ọnyọhị nyahị lẹlẹ. Am ka tụụbwọ hiinu anụ angịkịla wuu, kanụ ka rụ ka ẹpwa, chajị ọngọ kpa ụbwọ ka ẹpwụ nya ụjẹ, ọngọọwa ọgbịjị a kaa chị kem lẹ.” 11Ịnyị lẹ, ọng myị ọng nyaa a hiri olo nyamwụ ahyaahị lẹ, ọ yoo ori ịnyịnyị juwa gọdayị kị ka wụla olo nyamwụ yẹ lẹlẹ. 12Ọọwa lẹ, ọnchẹ nya iJosẹfụ ọwẹ a juwa dọmwụ nya ọwụla olo nyaa yẹ, ọgbahị-ọgbahị gbee kọ pwụ ẹga nya iBenjamịn onjwo nyaa wuu lẹlẹ. Ọọwa lẹ, ọ yẹ ukoku ọọwa ẹ-ẹpwụ nya olo nya iBenjamịn lẹlẹ. 13Ụka kịịwa wuu yẹ kọ la ịnyị lẹ, ọ waa ẹjẹ lụmẹ. Ị gu ịwụrụ ịlịnyịrọ nyaa ene ẹ-ẹpwụ nya agbama. Ị chị olo nyaa ori kpịra-kpịra-kpịra ba anyịrẹ nyaa ahyaahị lẹ, ị hu ang tịrẹkpẹ rụ kele ka Ijipiti lẹlẹ.

14Ụka ká iJuda bala ịwa angịkịla wuu pwụ ẹpwa, ị kele kpụrụrụ ka ẹpwa nya iJosẹfụ. Ụka ọọwa, iJosẹfụ juwa ẹ-ẹpwa wẹẹ. Ịwa wuu kele kaka gọdayị rịrị ị-ịlahị nya iJosẹfụ lẹ, ị hiri egbeju nyaa ịwa wuu kpẹẹ weji, juwa họ Ịjachi-Ịjachi họ lẹlẹ. 15IJosẹfụ ya ẹla taa yẹkẹẹ, “Uguru nya ẹla ọlanyị, anụ tị́ họm ịnyị ene? Ọ ri anụ ayịdang á jẹ kpá wẹẹ ya ọngịnyị-ọngịnyị ọ-hụ i-iwe ahụrụ ọ-lala ịnyam nyị ka jẹ-ẹ yọyị a-arụrụ kpong-kpong myị kaka?” 16Ụka ọọwa, iJuda wẹ byi iJosẹfụ yẹkẹẹ, “Agaba Idu, áhị la ọnụ ọlẹ kahị ka kpa ya ẹlẹlẹhẹ myị kaka. Ká ẹla wuhi wẹ cheri-cheri lẹ. Abwẹla onyobyi nyahị a du ká Ohe Oluhye lẹẹ wuhi uri lẹlẹ. Lẹ, Agaba Idu, anyịhị nyang, ahị ka ri lẹlẹ. Ọnyị ọlẹ kị wu la ang nyang ụ-ụbwọ bala ahị angị hihi wuu, ahị ri anyịhị nyang alẹ lẹ.” 17IJosẹfụ wẹ byaa yẹkẹẹ, “Anụ wo mẹ. Ohe Oluhye a pwapwa kam ka họnụ ịnyị. Ọngọlẹ kem kọ hu ukoku nyam ọlẹ yi oyi ụbwọọmwụ a ka ri ọnyọhị nyam lẹ. Anụ angị hihi wuu ka rụ la okpunyi kele kaka tọ adanụ.”

18Ụka ọọwa, iJuda myịmyị tụ ba iJosẹfụ kele kaka gọdayị jwoo chwẹẹ gụ olene-ene. Ọ byi iJosẹfụ yẹkẹẹ, “Agaba Idu, a wụ ẹjẹ tam am ọnchẹ nyang kaka, chuchuu, ke ụrụ la ẹla nyam wẹẹ. M̀ jẹ kaahụ ayịdang bala iFero Adịrahụ á gụ awụlẹ i-Ijipiti ọlẹ kaka.” 19IJuda myịmyị yẹkẹẹ, “Agaba Idu, ahụ ayịdang a tọhị ịtọ ẹnụmwụ jene yẹkẹẹ, ‘Ahị nyị la adịda juwa la ọhịhị wẹẹ? Ahị nyị la ọnyadịda ọkịla ọhẹ-lọhẹ juwa ẹ-ẹpwa wẹẹ?’ 20Agaba Idu, ọọwa lẹ, ahị wẹ ịtọ nyang ọọwa yẹkẹẹ, ‘Ee, adahị juwa wẹẹ. Ọ tị ri ọngọgbahị lẹ.’ Ahị myịmyị ya jeng yẹkẹẹ, ‘Ahị la ọnyadịda ọhẹ juwa ẹ-ẹpwa ịnyịlẹhị. Ọwa-à ri ọnyị ohyẹẹkpẹ nyahị wuu lẹ. Ịnaa maa ịwa alẹng angị imiiye. Ma, ọgbahị nyamwụ tị gbu lẹ. Lẹ, jaabwọ kọọwa ụbwọọmwụ a hi bwu ẹpwụ nya anyịnamwụ bala ọwa o-ri ọnyị ọlẹ ká adahị ma la ụchẹ nyamwụ lẹ, ọ há adahị lụmẹ kaka kpoye.’ 21Ọọwa lẹ, a tị wẹ byihi ahị anchẹ nyang yẹkẹẹ, ahị nyị kpa ọnyadahị ohyẹẹkpẹ ọọwa warị kọọwa nyị ka yọọ ẹ-ẹhị pyii mẹ lẹlẹ. 22Agaba Idu, ụka ọọwa, ahị myịmyị wẹ bying yẹkẹẹ, ‘Ọ́ ka jẹ-ẹ chịkpẹẹ myị ka, chajị, ọ́-ri kahị kpọọ rụ hi adahị lẹ aalẹ, ahị́ ka nya bwu ẹgẹlẹ kele kaka tọ adahị la ọhịhị kpong-kpong kaka.’ 23Ụka ọọwa, a wẹẹhị byihi ahị anchẹ nyang yẹkẹẹ, ‘Ó-ri kaahị nyị́ kpọọ warị pyii kaka lẹ aalẹ, ahị nyị tịtị ya ẹta nyahị chị ọpyị nya Ijipiti ọlẹ kpa ẹnẹnẹhẹ kokoo.’ ”

24“Agaba Idu, ụka kahị rụ pwụ ẹpwa lẹ, ahị ya je adahị ọnchẹ nyang jaabwọ ká byihi ịnyịnyị. 25Ụka ká ang oriri ọlẹ kahị kpa rụ ụka ọọwa myị, adahị byihi ya ahị nyị nwụlanọ kaahị nyị tịrẹkpẹ warị ẹpẹtẹ oheeye kaka ra ang oriri warị chẹẹ mẹ. 26Ụka ọọwa, ahị wẹ byoo yẹkẹẹ, ‘Áhị́ ka kele myị ka, kẹnẹ-kẹnẹ á ka myị-ị tụụbwọ hi iBenjamịn ọnyị nyang kọ ka baahị kele lẹ mẹ ịnyị, chajị ọ́-ri kahị kpọọ ba ịlọhị kaka lẹ aalẹ, ahị́ ka jẹ-ẹ kele ka ẹga nya olegbeju ọtụka nya alụwa ọlaanyị myị kaka.’ 27Ụka ọọwa, adahị byihi yẹkẹẹ, ‘Anụ anyị nyam, anụ ba! chajị anụ ayịdang jẹ yẹkẹẹ, anyị imiiye kẹnẹ-kẹnẹ ịnaa nyaa ma ham lẹ. 28Ọgbahị nyaa tị byi him lẹ, chajị, m jẹ ká iyo ọnyọọngịrị ọhẹ a ka hụlọọ hwẹẹhwẹẹ wẹ du kam yọọ kaka pyịyọọ lẹ. 29Ó-ri kanụ myịmyị hum ọnyị olookpokpo ọlẹ kpa rụ kele ká ịngịngịhyẹ á họọ ụ-ugbẹnyị lẹ aalẹ, ọjụjụ nya ẹlẹwẹ ka kpam am okwirichi ọkụnyẹ-kụnyẹ ọlẹ rụ ka ejegu ugbẹnyị pyii lẹ.’ 30Lẹ, Agaba Idu, ọ́-ri kahị rụ la abwabwọ kele kaka tọ adahị ọnchẹ nyang kọ ri kahị kpa iBenjamịn kaka lẹ aalẹ, ọ́ ka há kaka, chajị u-uhye nya iBenjamịn, ọhịhị nya adahị a da kụ lẹẹlẹẹ lẹlẹ. 31Ẹla nya ịlẹhị-ịlẹhị, m wẹẹ ya jeng lẹlẹ. Agaba Idu, ọ́-ri ká adahị á ya ẹhị nyamwụ guhi ahị, kọ tị yẹ iBenjamịn kaka lẹ aalẹ, ọjụjụ nya ọọwa a ka kpọọ kaka gbu lụchẹ nyamwụ lẹlẹ. 32Am ayịdang a ye ụbwọ nya iBenjamịn ị-ịlahị nya adahị ẹnụmwụ ene kọọ tụụbwọ hyoo hahị lẹ. Ụka ọọwa, m byi adahị yẹkẹẹ, ‘Ó-ri kam kpọọ ba ịlọm nya wang lahị-lahị kaka lẹ aalẹ, am a ri ọngọ la abyị nyang pyịyọọ ẹ-ẹpwụ nya ọhịhị nyam wuu mẹ.’ 33Chajị nya ọọwa lẹ, Agaba Idu, m ka ye ụbwọ nyamwụ lẹ, am a hi ri ọnyọhị nyang mẹ, ká iBenjamịn bala anyadamwụ ihihi ịkịla wuu a rụ mẹ, adam. 34Lẹ, anyanyị m tị́ ka jẹ-ẹ rụ la abwabwọ hi iBenjamịn kele ka ẹga nya adam ịịwẹ myị? Ḿ ka kpẹhị nyam yẹ ụma nya ang ọlẹ ká adahị ka họ ịlọmwụ u-uhye nya iBenjamịn myị ka.”

Currently Selected:

ỌMWỤ ỌDADA 44: IBNO

Highlight

Copy