ỌMWỤ ỌDADA 43

Ị Kpa IBenjamịn Ka Ijipiti

1Imyi ọtụka ọwẹ juwa chị angịrị gụ olene-ene ọ-ọpyị nya iKenan. 2Ụka ká ang oriri nya ọgbanyẹ ọlẹ kị ra kpa nya myị, iJekọbụ byi anyị nyamwụ yẹkẹẹ, “Anụ kele kaka ra ang oriri myịmyị bwu Ijipiti warị chẹẹ mẹ.” 3Ụka ọọwa, iJuda wẹ byi adaa yẹkẹẹ, “Adada wo mẹ, olegbeju ọtụka nya alụwa dahị ehile la ọngịrị-ọngịrị ẹnụmwụ yẹkẹẹ, ‘Ó-ri kanụ kpa ọnyadanụ ochiche ọlẹ kanụ rụ́ wẹẹ warị kaka lẹ aalẹ, anụ ya ẹta nyanụ cheji ẹgẹlẹ kpong-kpong kokoo.’ 4Lẹ, ọ́-ri ká myị, ká iBenjamịn ọnyị nyang á baahị kele kẹnẹ-kẹnẹ lẹ aalẹ, ahị ka kele kaka ra ang oriri kpa wang lẹlẹ. 5Ọ́ tị ri ká pwa lẹ aalẹ, áhị ka kele kaka, chajị ọngọwẹ ya la ọngịrị-ọngịrị yẹkẹẹ, ọwa nyị́ tịtọ kọọwa nyị ka ya ẹhị nya ọọwa guhi kaka, kẹnẹ-kẹnẹ ọ́-ri kaahị nyị́ kpa iBenjamịn ba ịlọhị ene lẹ mẹ ịnyị.” 6Isirẹlụ wẹ byoo yẹkẹẹ, “Uguru nya ẹla ọlanyị, anụ họm ịnyị ene kọ du kanụ ya joo ya ịwa nyị la ọnyadịdịwa ọhẹ ẹ-ẹpwa mẹ?” 7Anyị nyamwụ wẹ byoo yẹkẹẹ, “Adada lẹ, aahị a dudu ka. Ọngọwẹ tọhị ịtọ chẹrị-chẹrị chajị nyahị, ahị ayịdang bala aanahị ịkịla wuu ịnyịnyị. Ọ tọhị ịtọ yẹkẹẹ, ‘Adanụ juwa la ọhịhị wẹẹ? Anụ la ọnyadịda ọkịla ọhẹ juwa ẹ-ẹpwa wẹẹ?’ Ịnyị a du kahị wẹ jaabwọ kọ tọhị lẹ. Ẹ-ẹpwụ nya ẹla ọlịịwẹ, a ya kahị ka jẹ-ẹ jẹ enyi ka ẹpwụ nya ere ya ọngọwẹ ayịdang ka jẹ-ẹ byihi nyị kpa iBenjamịn warị pyii mẹ?” 8Ụka ọọwa, iJuda byi Isirẹlụ adaa yẹkẹẹ, “Adada, tụụbwọ hi iBenjamịn jum ụ-ụbwọ, ká bahiihi kahị rụ kele mẹ, chajị kaahị ayịdang bala ahụ bala anjwo nyahị wuu á ka gbu igu-imyi kaka mẹ. 9Ẹ-ẹpwụtụbwọ nyam am iJuda ọlẹ, a ka tịtọ nya ọhịhị nya iBenjamịn ọnyị nyang wẹ lẹlẹ, chajị am ayịdang ye ụbwọ nya iBenjamịn alẹ lẹ. Ó-ri kam kpọọ nya wang lahị-lahị kaka lẹ aalẹ, abyị nyamwụ a ji uhye nyam gbe oyi myị oyi mẹ. 10A tị jẹ ọ́-ri kaahị mwọọgịlẹ kele ka Ijipiti lụka lẹẹ ịnọ, ahị ayịdang nyị ka nya bwu ụwa ugbabwọ oheeye gbalẹ-gbalẹ lẹ.”

11Isirẹlụ adaa wẹ byaa yẹkẹẹ, “Ó-ri kanụ ka kpa iBenjamịn pyii lẹ aalẹ, anụ wo mẹ. Anụ́-ụ kpa egbe nya ekeji ịnyịịla-ịnyịịla ụ-ụbwọ, kanụ ka kpa kaka da olegbeju ọtụka ọọwa ẹnmẹ mẹ.” Ọ myịmyị byaa yẹkẹẹ, “Anụ chị inwa ju ang, kanụ chị etiji ichoru kwọkwọ ịlala ọja bala etiji i-gu wụ́ ang ọ-họ ọngịnyị bala ịmaa bala egbe nya okoji ipisitacho bala amọndụ. 12Anụ kpa okpoko wọnụ nya uri onyogo ju mẹ. Ụka kanụ pwụ ụwa lẹ, anụ hu okpoko nya uri onyogo haa mẹ. Ọhẹka, eeri ị da wẹ lẹ. 13Anụ kpa iBenjamịn kanụ hu ang ẹdịyẹ kele mẹ. 14Ká Ohe Oluhye Agụgụ a kpanụ chị kele ka ẹga nya ọlẹng ọọwa lokpunyi ẹ-ẹpwụ nya ọnahị mẹ, chajị kọ ka tụụbwọ hi iBenjamịn bala iSimyọn hanụ kpa nya mẹ. Ọ́ tị ri kịịwa angị imimiiye á tị ka gbu lam lẹ aalẹ, ọ la ịnyị mẹ.”

15Anyị nya Isirẹlụ go okpoko ju olo lụmẹ-lụmẹ jaabwọ ká adaa byaa bala ang-abwọ ịkịla ịlẹ wuu kọ byaa ya nyị kpa. Ọọwa lẹ, ịwa bala iBenjamịn a rụ kele ka Ijipiti lẹ, ị kele ka ẹga nya iJosẹfụ lẹlẹ. 16Ụka ká iJosẹfụ chẹhị kaka yẹ iBenjamịn ẹ-ẹpwarịrị nya anyadamwụ, ọ wụrụ ọnchẹ nyamwụ. Ọ byoo yẹkẹẹ, “Kpa alẹng ịwẹ kele ka ẹpwa nyam ká wu iyo ọhẹ nwụ ká họ ang oriri wọnụ nyaa ịwa wuu ju mẹ, chajị kị ka ri ang nya ẹnụ tam alẹ.” 17Ọnchẹ ọlẹng nya iJosẹfụ ọwẹ họ jaabwọ ká ayịbamwụ byoo. Ọ kpa alẹng ịwẹ ka ẹpwa. Ọ họ ang oriri wọnụ nyaa ju jaabwọ ká iJosẹfụ ya ịnyịnyị. 18Anyadịda nya iJosẹfụ anyị ịwẹ juwa ju uhi ẹ-ẹpwa nya iJosẹfụ juwa byi awụlẹ yẹkẹẹ, “Anụ ya ká ajị nya okpoko ọlẹ kị tụụbwọ hi ju uhi olo ẹnụmwụ a du kị kpahị wẹ ẹpwa nyamwụ lẹẹ lẹka lee? Ọọwa ri ọlẹng ọlẹ jam tịtọ nya ụgbẹyị ọlẹ kọ ka bwu kpa wuhi chajị kahị ka yẹ ri anyịhị nyamwụ, kọ ka nuhi ibyiyó nyahị la ịnyịnyị.” 19Ịnyị lẹ, ị kele ka ẹga nya ọnchẹ ọgbahị nya iJosẹfụ ọọwa, juwa ya ẹla tọọ ọ-ọnụ ụgbẹyị nya ẹpwa nya iJosẹfụ lẹlẹ. 20Ị byi ọnchẹ nya iJosẹfụ ọọwa yẹkẹẹ, “Yẹ mẹ, ayịbahị, ahị warị lụka ọhẹ kẹkpẹ kaka ra ang oriri bwu ẹga nyanụ jẹ lẹ. 21Ụka kahị hiri olo nyahị ẹ-ẹga ọmwịịnyọ ụ-ụgbẹyị lụka ọrụrụ nyahị, ọngọngọọng nyahị yẹ okpoko nyamwụ wuu ọ-ọnụ nya awụtọọ nyamwụ jịra jaabwọ kahị ya nwụnụ uri kaka ba. Lẹ, ahị kpa okpoko ọọwa tịrẹkpẹ wanụ lẹẹ lẹ. 22Ahị myịmyị kpa okpoko ọlẹ kahị ka ya nwụ uri nya ihi onyeewe ọlẹ kahị ka ra la ogu ẹdịyẹ ọlẹ jam ịnyịnyị lẹ. Áhị́ jẹ ọngọlẹ kọ tụụbwọ hi okpoko nyahị ju uhi olo lẹka pyịyọọ daalẹ ọlẹ.” 23Ọnchẹ nya iJosẹfụ ọwẹ wẹ byaa yẹkẹẹ, “Anụ ju uhi ka, anụ chuko ka ịnyịnyị, chajị m ye okpoko bwu ụbwọ nyanụ jịra kpẹmkpẹm ẹnụmwụ. Ọhẹka, Ohe Oluhye ọlẹ kaanụ bala adanụ kaa raabwọ ha a ka tụ uhwa ọwẹ hanụ wẹ lẹ.” Ọọwa lẹ, ọ kele kaka gba iSimyọn kpehe haa lẹlẹ.

24Ụka ká ọnchẹ ọwẹ kpa angga nya iJosẹfụ ayịbamwụ kele ka ẹpwa, ọ chị́ enyi haa hụ́ ata. Ọ hu ang oriri ha ibyiyó nyaa ri ịnyịnyị. 25Ụka ọọwa, anyadịda nya iJosẹfụ nwụla ang ịlẹ kị kpa warị nyọka ya họ iJosẹfụ ụga nọ gbe ụka ọlẹ ká iJosẹfụ ayịdang ka warị lụka nya ẹnụ, chajị ị wo ya, ịwa bala iJosẹfụ nyaa ka ba ri ang nya ẹnụ ọlẹnụtụrụ ọọwa lẹlẹ.

26Ụka ká iJosẹfụ nya warị wẹ ẹpwa lẹ, ị kele kaka go ang ịlẹ kị kpa warị nyọka ya dọọ ẹnmẹ kele kịla iJosẹfụ lẹ, ị hiri egbeju nyaa ịwa wuu kpẹẹ weji, juwa họ Ịjachi-Ịjachi ha iJosẹfụ lẹlẹ. 27Ụka ọọwa, ọ jaa obe, da ọnụ chaa juwa taa ịtọ nya ẹpwa yẹkẹẹ, “Adanụ bẹ? Anụ ya nyị ri ọngọgbahị lẹlẹ, ọ tị juwa la ọhịhị pyịyọọ daalẹ wẹẹ?” 28Ị wẹ byi iJosẹfụ yẹkẹẹ, “Ee, adahị ọnchẹ nyang juwa la ọhịhị wẹẹ, Agaba Idu. Ọ há wẹẹ.” Ụka ọọwa, ịwa wuu hiri egbeju nyaa kpẹẹ weji juwa họ Ịjachi-Ịjachi ha iJosẹfụ myịmyị.

29Ụka ọọwa, iJosẹfụ juwa mwụụrụ yẹ iBenjamịn ọnyịnamwụ chịng lẹ, ọ taa wo yẹkẹẹ, “Ọngọlẹ a ri okolobya ọlẹ kanụ ya nyị hi juwa ẹ-ẹpwa lụka ọlaanyị lẹ?” Ọ byi iBenjamịn yẹkẹẹ, “Ohe Oluhye a wahị kụrụng ahụ okolobya ọnyị nyam.” 30Ahyaahị ká iJosẹfụ ya ẹla ta iBenjamịn ọnyịnamwụ kpá, olujwo tọọ ẹ-ẹpwụ nyamwụ lụmẹ gbee ká ida ojeje juwa nyoo oru lẹ, ọ chagaga kele ka ube ọlẹpwụ nyamwụ kaka jida ụ-ụwa lẹlẹ. 31Ụka kọ họ kpá lẹ, ọ chị́ enyi hụ́ ahị yẹẹyẹẹ lẹ, ọ gba kpehe warị wẹ ube olodehe myịmyị lẹlẹ. Ụka ọọwa, iJosẹfụ tụ ahị bwọbwọ nya ọngọgbahị lẹ, ọ byi anchẹ nyamwụ yẹkẹẹ, “Anụ kpa ang oriri warị mẹ.” 32Ụka ọọwa, ọnchẹ ọọwa kpa ang oriri nyaa kpehe waa. IJosẹfụ la ẹja nya ang oriri nya ịlọmwụ ẹ-ẹga ọlẹ kọ hụ datị hi angịkịla. Anyadịda nya iJosẹfụ anyị ịwẹ hụ ẹ-ẹga ookpokpo la awụlẹ datị hi iJosẹfụ. Ala Ijipiti ịlẹ kị juwa la ẹja nya ang oriri nyaa ẹ-ẹga ookpokpo datị ịnyịnyị, chajị ala Ijipiti bala ala iHiburu-ú kaa ju abwọ ang ẹja ookpokpo ka. Ọọwa rigọgọ nya ala Ijipiti. 33Ị kpa anyadịda nya iJosẹfụ ịịwa kaka hụhụ ọgbahị-ọgbahị jaabwọ kị maa hile awụlẹ wuu kaka ba. Ụka kịịwa ayịdang yẹ ọhụhụ ọọwa, ọ laa ịwa wuu ahịbwuu lụmẹ. Ị juwa chẹhị ẹhị kaka yẹ awụlẹ. 34Ị juwa ga ang oriri nya ọngọngọọng nyaa wuu haa bwu itebwuru nya iJosẹfụ ayịdang. Ụka ọọwa, ị ga ang oriri nya iBenjamịn mwụ aba ba ụka ịrụ lụmẹ gụ ịnya angịkịla nyaa wuu. Ịịwẹ iJosẹfụ bala ịwa a bába ri ang, juwa nwa ang ọnwanwa ịnyịnyị lọkẹkẹnị lẹlẹ.

Currently Selected:

ỌMWỤ ỌDADA 43: IBNO

Highlight

Copy