ỌMWỤ ỌDADA 34

IChekem Wu ỊDayịna Chị Beji

1Ẹnụtụrụ ọhẹ juwa ká ịDayịna, ọnyị ọnyang ọlẹ ká iLiya ma ha iJekọbụ tụ aha kele ka ẹpwa nya anyang ịhyẹ nya ala iKenan ẹ-ẹga ọlẹ kị kụ. 2ỊHamọ ọlẹ kọ ri adịrahụ nya ọpyị nya alụwa ma ọnyị ọlẹng ọlẹ kị wụrụ iChekem. Ụka ká iChekem yẹ ịDayịna lẹ, ọ kele kaka wu ịDayịna chị beji lẹlẹ. 3Ịnyị, ịDayịna ọwẹ a há iChekem lụmẹ lẹ, ọ juwa ya ẹla la omyi ọgẹnẹ-gẹnẹ ta ịDayịna ịnyịnyịịnyị lẹlẹ. 4Ọọwa lẹ, iChekem a byi ịHamọ adamwụ yẹkẹẹ, “Adada, ịDayịna ọnyị nya iJekọbụ ọlẹ hám lụmẹ. Lẹ, yoo ham mẹ-ẹ̀.”

5Ụka ká iJekọbụ wo yẹkẹẹ, iChekem nyị bịrị ịDayịna ọnyị nyamwụ lẹ, iJekọbụ á ya abwaabwọhẹ u-uhye nya ẹla ọọwa kpong-kpong ka. Ọwa ayịdang tịtọ ká anyị nyamwụ ịlẹ kị juwa kpa ịmwụ bala ịna nyamwụ ri amẹ ka nya wẹ ẹpwa kpá ene kọ ka ya ẹla ọọwa. 6Ụka ọọwa, ịHamọ adịda nya iChekem hu ang bwu epweji nyaa kele ka ẹpwa nya iJekọbụ kọ ka ya ẹla ọọwa tọọ. 7Ụka ká anyị nya iJekọbụ nya bwu ẹpwamẹ, kị wo ẹla ọọwa, ọ waa ẹjẹ lụmẹ kaka kpoye, chajị ọlẹ ká iChekem ọwẹ wu ịDayịna chị beji ịịwẹ lẹ, oyoyi ọtụka a wẹ kọ chị ju ala Isirẹlụ wuu lẹ. Ehile nya ọhọhọ nya ọpyị nya ala Isirẹlụ wuu a wẹ kọ bịrị ịnyịnyị lẹlẹ.

8Ụka ọọwa, ịHamọ byaa yẹkẹẹ, “Ọnyị ọnyang nyanụ ọlẹ há iChekem ọnyị nyam lụmẹ lẹ, anụ chuchuu kanụ tụụbwọ hyoo hahị ye chẹẹ mẹ. 9Kaanụ ala Isirẹlụ ayịdang a juwa ya anyị anyang nyanụ hahị ye, kaahị a tịtị juwa ya ịnyahị hanụ ye ịnyịnyị mẹ. 10Kanụ kụ ám ọ-ọpyị nyahị pyịyọọ mẹ. Ọpyị nyahị dam pwọọ hanụ. Kanụ ka kụ ám juwa da ọhị bala ọ-la ang datị-datị bwu ụwa ịnyịnyịịnyị mẹ.” 11IChekem ayịdang ya ẹla ta iJekọbụ bala anyị nyamwụ yẹkẹẹ, “Anụ adam anyị, anụ chuchuu kanụ yẹm ahyẹẹrwẹrwa mẹ. Ang myị ang ọlẹ kanụ ya am nyị nwụ hanụ, m ka nwụnụ lẹ. Ká ẹla ọlẹ a myị mẹ, anụ adam anyị. 12Anụ ya jem jaabwọ kam ka họ ohiri nya ahụ hanụ kaka ba mẹ. Kanụ chịm ịnya nya ahụ ịnyịnyị mẹ. Jaabwọ myị abwọ kanụ ya am nyị họ mẹ, m ka họ ịnyị hanụ lẹ. Ọkẹnẹ-kẹnẹ ri m bịlẹnụ kanụ ka ya ọnyị ọlẹ ham ye pyii lẹ.”

13Ụka ọọwa, anyị nya iJekọbụ da iChekem bala ịHamọ adamwụ lụgbaa, chajị nyọlẹ ká iChekem bịrị ịDayịna ọnyịnaa. 14Ịnyị, ị byi ịHamọ anyị yẹkẹẹ, “Ịnọ, ahị ka ya ọnyị nyahị hanụ ye myị. Ma, ọ tị ka ri ang ọ-la oyoyi nya ọnyị nyahị ahị ala Isirẹlụ ọ-ka rụrwọ ọngọlẹ kọ da ụwụwụ kpong-kpong ka. 15Lẹ, kẹnẹ-kẹnẹ ọ́ ri kanụ ka myị-ị da anyị alẹng nyanụ wuu ụwụwụ lala ahị-ahị ala Isirẹlụ lẹ, ọọwa, ọ ka jẹ-ẹ chịkpẹẹ myị lẹlẹ. 16Ó-ri ká alịnyanụ á ka mị-ị họ ịnyị lẹ aalẹ, ahị ka ye anyị anyang nyanụ, anụ tị ka ye anyị anyang nyahị ịnyịnyị lẹ. Aalẹ, ahị bala anụ ka yẹ ri angịnyị ụma ookpokpo lẹ. Ahị ka kụ ám ọ-ọpyị nyanụ ọlẹ tanụ pyịyọọ ịnyịnyị lẹ. 17Ma, ọ́ tị ri kanụ ka myị-ị da anyị alẹng nyanụ ụwụwụ jaabwọ kahị ya wẹ kaka lẹ aalẹ, áhị ka ya ọnyị nyahị ọlẹ hanụ ye kaka. Aalẹ, ahị ayịdang ka mwụ rụ hiinu ịnyịnyị lẹ.”

18Ẹla oyaya nyaa ọọwa kpụ ịHamọ ayịdang ịpyọ lụmẹ bala iChekem ọnyị nyamwụ. 19IChekem á bịrị ụka nya ọ-họ jaabwọ kị byoo ka, chajị ịDayịna ọnyị nya iJekọbụ ọwẹ jwoo ẹ-ẹhị lụmẹ. IChekem ọwẹ a ri ọngọlẹ kọ la ihi gụ ẹ-ẹpwa nyaa wuu lẹlẹ. 20Ụka ká ịHamọ bala iChekem ọnyị nyamwụ rụ bwu ẹpwa nya iJekọbụ, ị kele ka ẹga nya alịnyaa ụ-ụwa ọ-ọnụ ogirigba nya epweji nyaa, ẹ-ẹga ọlẹ kị kaa hụ mẹ obyi nya ẹla. ỊHamọ anyị dọmwụ nya ẹla oyaya ta alịnyaa wuu ụ-ụwa yẹkẹẹ, 21“Anụ alịnyahị, anụ yẹ ẹla ọlẹ tahị wẹẹ. Ala Isirẹlụ ịlẹ kị ju uhi ụga lẹẹ lẹ, ị ri angịnyị nya okpunyi lụmẹ, chajị nya ọọwa lẹ, ahị bahyaa kị kụ ám tahị, kị juwa họ ụkụrwọ nya ọhị ọdada nyaa ám ọ-ọpyị nyahị mẹ! Ọpyị nyahị lụmẹ ka nwahị bala ịwa lẹ, anụ ba kọ la ịnyị mẹ! Kahị juwa ye anyị nyaa, kịịwa a tịtị juwa ye anyị nyahị ịnyịnyị mẹ! 22Ma, ang ookpokpo ọhẹ tị juwa kọ ka ku iwe. Ang ọọwa ri ịwa ayịdang ya nyị́ ri kaahị alẹng wuu nyị da ụwụwụ lala ịwa-ịwa ayịdang ka aalẹ, ịwa nyị́ ka jẹ-ẹ yẹ ri angịnyị ụma ookpokpo lee ọ-ka kụ ám tahị ọ-ọpyị ọlẹ kpong-kpong kaka. 23Lẹ, anụ alịnyahị, ahị họ ịịwẹ lẹ, ang myị ang nyaa ịkịla ịlẹ wuu kị la ka yẹ ri ịnyahị ịnyịnyị lẹ.” 24Ịnyị lẹ, alịnyaa wuu a myị ju ịHamọ bala iChekem lẹ, alẹng nyaa wuu a da ụwụwụ ịnyịlẹhị lẹlẹ.

25Ụka ká ụwụwụ nya angịwẹ ri ụtụrụ ịta kọ juwa jwaa lụmẹ-lụmẹ lẹ, iSimyọn bala iLivayị anyịnịna nya ịDayịna alẹng a kele kaka go ang-abwọ nya ẹwụ nyaa lẹ. Ị wuleji yoyi-yoyi kele kaka nwụ anyị alẹng nya alepweji ọwẹ wuu lẹlẹ. 26Ị kele ka ẹpwa nya ịHamọ. Ị nwọọ bala iChekem ọnyị nyamwụ. Ị kpa ịDayịna ọnyịnaa rụnyẹ rụ ka ẹpwa nyaa. 27Ọọwa lẹ, anyị nya iJekọbụ ịkịla wuu a kele kaka wụ ang-abwọ nya alepweji ọwẹ wụ wuu kpa rụ kwiwa nyọlẹ kị bịrị ịDayịna ọọnaa lẹlẹ. 28Anyị nya iJekọbụ ịwẹ wu ịmwụ nya alepweji ịwẹ wuu kpa rụ bala ịna nyaa wuu tụ anyịrẹ. Ị go ang myị ang ọlẹ ká angịwẹ la wuu ẹ-ẹpwa nyaa kpa rụ tụ ang myị ang ọlẹrụ nyaa wuu ịnyịnyị. 29Ị go ụdụ nya alụwa wuu bala ịhụ nya alụwa wuu bala anyị nyaa bala ang myị ang ọlẹ kị la ẹ-ẹpwa nyaa wuu kpa rụ wuu kwengkweng.

30Ẹla nyaa ọọwa kị họ wụ iJekọbụ ẹjẹ lụmẹ. Ọ byi iSimyọn bala iLivayị yẹkẹẹ, “Anụ kpa ẹla ọtụka wam lẹ. Anụ hum ọnụ rịrị u-uche lẹ, ala iKenan bala ala ịPẹrisi tụ angịkịla wuu ka hum lala oluji lẹẹlẹẹ lẹ. Ahị a tị la gbuu ka wẹ lẹ. Ó-ri ká angịwẹ wuu á mẹ obyi juhi, kị dahị ẹwụ lẹ aalẹ, ị ka tahị ahị wuu ayịreji gbanggbang tụm am ayịdang bala alẹpwa nyam wuu lẹlẹ.” 31Ọọwa lẹ, ị wẹ byi iJekọbụ yẹkẹẹ, “Ọ ka hu ọnahị lala ọlakpara, āhị ka yọọ chịng-n̄gńg?”

Currently Selected:

ỌMWỤ ỌDADA 34: IBNO

Highlight

Copy