ỌMWỤ ỌDADA 30

1Ụka ká iRichẹlụ juwa mẹ irya u-uhye nyọlẹ kọ ma ọnyị ọhẹ-lọhẹ ha iJekọbụ kaka gbee lẹ, ọ ya ẹla ta iJekọbụ byoo yẹkẹẹ, “Ayịbam, ọ́-ri ká ya ọnyị ọhẹ-lọhẹ ham ma ịnyịnyị ka aalẹ, m ka gbu hang lẹ.” IRichẹlụ ya ịnyị, chajị ọwa ayịdang la ọkịlẹtụ ijiiji jahị da ụpwụmwụ iLiya ọnyịnamwụ ọlẹ kọ juwa ma anyị ha iJekọbụ ịnyịnyịịnyị hi iRichẹlụ. 2Ụka ká iJekọbụ wo ẹla ọọwa, ọ wọọ ẹjẹ lụmẹ. Ọ wẹ byi iRichẹlụ yẹkẹẹ, “Ọ-ya ọnyị ham ma ọọwa ká juwa ya tam ịnyịnyịịnyị lẹ, a ya kaam a ri Ohe Oluhye ọngọlẹ kọ tụ ori-ụma nyang ku, du ká ma ọnyị ọhẹ-lọhẹ ka wẹẹ?” 3Ọọwa lẹ, iRichẹlụ a byi iJekọbụ yẹkẹẹ, “IBiliha ọnyị ọlata nyam wẹ hang lẹ, kele ka ẹga nya iBiliha, kọọwa a ri ọngọ ma ọnyị ọlẹ kam ka ye hunọ a-ata mẹ. Chajị kam ka yẹ ri ọngọ ma anyị bwula iBiliha ẹ-ẹpwa nyang chẹẹ mẹ!” 4Ịịwẹ iRichẹlụ a bwu hu iBiliha ọnyị ọlata nyamwụ ha iJekọbụ kọ ka yẹ ri ahụ nyamwụ lẹlẹ. Ọọwa lẹ, iJekọbụ a kpa iBiliha ka ube ịnyịlẹhị lẹlẹ. 5Ịnyị lẹ, iBiliha a jẹnyị, ma ọnyị ọlẹng ha iJekọbụ lẹlẹ. 6Ụka ọọwa, iRichẹlụ yẹkẹẹ, “Ẹhẹẹ! Ohe Oluhye ayịdang kiji chị oku jum lẹlẹ. Ohe Oluhye wo omyi nya abwọ ọrịrị nyam, du kọ ya ọnyị ọlẹng ọlẹ ham ịnyịnyị lẹ.” Ịnyị a du kọ wụrụ ẹnyị nya ọnyị ọọwa ịDan#30:6 Etu nya ịDan ri Oku ọchịchị.. 7IBiliha ọnchẹ nya iRichẹlụ myịmyị jẹnyị. Ọ ma ọnyị ọlẹng oheeye ha iJekọbụ. 8Ụka ọọwa, iRichẹlụ myịmyị yẹkẹẹ, “Ang am alẹ kaka, ká iLiya bala am jam kpa ẹla ta awụlẹ lẹ. Ma, ugbẹnyị lẹ, m kụrụ lẹ. Ịnyị a du kọ wụrụ ẹnyị nya ọnyị ọọwa ịNafụtali lẹ. Etu nya ịNafụtali ri arụ ọrụrụ.”

9Ụka ká iLiya jẹ yẹkẹẹ, anyị ọmama nya ọọwa nyị chiju lẹ, ọ hu iSilipa ọnyị ọlata nyamwụ ha iJekọbụ kọ ka yẹ ri ahụ nyamwụ ịnyịnyị lẹlẹ. 10Ịnyị lẹ, iSilipa ọwẹ a ma ọnyị ọlẹng ha iJekọbụ lẹlẹ. 11Ụka ọọwa, iLiya a yẹkẹẹ, “Ẹhẹẹ! M la ụrụrụ ọnyịịla wẹ lẹ.” Ịnyị a du kọ wụrụ ẹnyị nya ọnyị ọọwa ịGadị lẹ. Etu nya ịGadị ri “ụrụrụ ọháha.” 12ISilipa ọnyị ọlata nya iLiya ọwẹ myịmyị ma ọnyị ọlẹng oheeye ha iJekọbụ. 13Ụka ọọwa, iLiya yẹkẹẹ, “Ẹhẹẹ! M̀ myị la ọkẹkẹnị ugbẹnyị lẹ! Anyang ịkịla wuu ka wụrụ ẹnyị nyam ‘ọkẹkẹnị ọchịchị’ lẹ.” Ịnyị a du kọ wụrụ ẹnyị nya ọnyị ọọwa Achẹẹ lẹ.

14Lụka ọlẹ kịị kpa chị ịrayịsị ịwịtị lẹ, iRubẹn kele ka ẹpwamẹ kaka gba ang oriri ọhẹ ọlẹ ká ụtẹ nyamwụ lala ichiriku. Ị wụrụ ẹnyị nyamwụ ịmandireki. Ọọwa lẹ, ọ kpa nya kịla iLiya ịnamwụ lẹlẹ. Ụka ká iRichẹlụ yọọ, ọ byi iLiya yẹkẹẹ, “ILiya, chuchuu, chụ ịmandireki ịlẹ ká iRubẹn ọnyị nyang kpa nya ham chẹẹ mẹ!” 15Ụka ọọwa, iLiya wẹ byi iRichẹlụ yẹkẹẹ, “IRichẹlụ lẹ, anyanyị, m họng họ bẹhẹ ọlẹ mẹ, ịnam. Ọ ri a tụtụm myịmyị ka num ịmandireki ọlẹ ká ọnyị nyam hu ham kaka ba ọrụ nyam bala ahụ, ọlẹ ká num la ụbwọng-ụbwọng kpịlọ lẹ? Lee, a tị́ mẹ ká ẹla ochiche a wẹ ka họm?” IRichẹlụ wẹ byoo yẹkẹẹ, “IJekọbụ á họ lẹ, ọ nọ u-ube nyang ahụ alẹ kwiwa nya ịmandireki nyang mẹ.”

16Ụka ká iLiya chẹhị kaka yẹ iJekọbụ kọ juwa nya ẹrụ la obyi, ọ rụnyẹ kele kaka tọọ ụ-ụgbẹyị. Ọ byoo yẹkẹẹ, “U-ube nyam a ka nọ alẹ lẹ, chajị iRichẹlụ wụ ọnụ nya ọọwa ham chajị nyọlẹ kam ya ịmandireki nya iRubẹn ọnyị nyam ọlẹ kam ya họọ kwiwa nya ube ọlalẹ lẹ.” Ọọwa lẹ, iJekọbụ a kele kaka nọ u-ube nya iLiya ịnyịlẹhị lodu ọọwa lẹlẹ. 17Ụka ọọwa, Ohe Oluhye wo omyi nya abwọ ọrịrị nya iLiya, du kọ jẹnyị, ma ọnyị ọlẹng ọharụ ha iJekọbụ. 18Ụka ọọwa, iLiya yẹkẹẹ, “Ẹhẹẹ! Ohe Oluhye ayịdang bam olo oluhye nya ọnahị ọtụka ọlẹ kam họ ẹ-ẹga nya iJekọbụ ọrụm bwula o-hu ọnchẹ ọlata nyam họọ ye.” Ịnyị a du, ká iLiya wụrụ ẹnyị nya ọnyị ọọwa Ịsakaa lẹ. Etu nya Ịsakaa ri “uri oyeye.” 19ILiya myịmyị jẹnyị ọkịla. Ọ ma ọnyị ọlẹng ọharwọnyẹ ha iJekọbụ. 20Ụka ọọwa, iLiya yẹkẹẹ, “Ẹhẹẹ! Ohe Oluhye ayịdang hu ang ọnyịịla gam ahị ugbẹnyị du kọ họ kam ma anyị alẹng jịra ịịrwọnyẹ ha ọrụm lẹẹlẹẹ lẹ. Lẹ, iJekọbụ, ọrụm ka ya ihi ọhẹ bam chẹẹ ugbẹnyị pyii lẹ.” Ịnyị a du ká iLiya wụrụ ẹnyị nya ọnyị ọọwa iSebulọn lẹ. Etu nya iSebulọn ri “ihi ọlala.” 21ILiya ma ọnyị ọnyang hile iSebulọn ọwẹ. Ọ wụrụ ẹnyị nya ọnyị ọọwa ịDayịna.

22Ụka kọ nụwa ịnyịnyịịnyị lẹ, Ohe Oluhye a kpịtịya nya iRichẹlụ lẹ, ọ wo omyi nya abwọ ọrịrị nya iRichẹlụ ịnyịnyị lẹlẹ. Ịnyị a du ká Ohe Oluhye wụrụ ori-ụma nya iRichẹlụ lụka ohyẹẹkpẹ lẹ. 23Ụka ọọwa, iRichẹlụ jẹnyị. Ọ ma ọnyị ọlẹng. Ịnyị, iRichẹlụ a yẹkẹẹ, “Ẹhẹẹ! Ohe Oluhye ayịdang kiji wụm ido ododo bala oyoyi ugbẹnyị bwula ọnyị ọlẹng ọlẹ kọ ya ham ma lẹẹ lẹ.” 24Ịnyị a du ká iRichẹlụ wụrụ ẹnyị nya ọnyị ọọwa iJosẹfụ lẹ. Etu nya iJosẹfụ ri “Ohe Oluhye dam uhye lẹ.” IRichẹlụ myịmyị yẹkẹẹ, “Amkpaa cheri ká myịmyị ya ọnyị ọlẹng ọkịla dam uhye chẹẹ mẹ, Adam!”

IJekọbụ Ri Ọlụdụ

25Ụka ká iRichẹlụ ma iJosẹfụ kpá, iJekọbụ byi iLeban yẹkẹẹ, “Adam ẹpwa, chuchuu tụụbwọ him kam rụ ka ọpyị nya adam ugbẹnyị chẹẹ mẹ. 26M tịtọ ká ka tụụbwọ hi ịhụ nyam wuu ham bala anyị nyaa wuu kam ka kpaa rụ ịnyịnyị, chajị, m myị ẹrụ hang wẹ ọnụ nyaa wuu ju kpa jaabwọ kaam bala ahụ myị ọnụ ha awụlẹ lẹ. Ahị ayịdang myịmyị ri ibeenu yẹkẹẹ, am ayịdang nyị myị ẹrụ ha ọwa hiigu-hiigu pyịyọọ daalẹ ọlẹ. Lee, m tị mẹ ọnụ?” 27Ụka ọọwa, iLeban wẹ byoo yẹkẹẹ, “IJekọbụ ba kam ya jeng ká wo mẹ. Ọlọmwụ ọhẹ ya jem ya ajị nyang ahụ nyaa du ká Amkpaa nyị lẹẹ wahị kụrụm lụmẹ-lụmẹ lẹ. 28Lẹ, m tịtọ ká ka hụ ám tam ẹgẹlẹ wẹẹ. Ya jem jaabwọ kam ka nwụng uri kaka ba bwu alẹ kele kịlahị, chajị kam ka họ ịnyị mẹ adam.” 29IJekọbụ wẹ byi iLeban yẹkẹẹ, “Ahụ ayịdang tị́ wẹẹ yẹ jaabwọ kam họ ụkụrwọ hang lụmẹ kaka ba lẹ. A tị́ wẹẹ yẹ jaabwọ ká ịmwụ bala ịna nyang wuu wẹẹ pyẹ kele kịlahị-ịlahị ẹ-ẹpwụtụbwọ nyam ịnyịnyị lẹ. 30Kpịtịya ịnyịnyị mẹ, ụka kaam iJekọbụ ọlẹ warị wẹ ẹpwa nyang lẹka lẹ, iyo ịlẹpwa nyang wuu la wure-wure. Ma, bwu ụka nya ọwẹwẹ nyam, ị pyẹ myị ẹga myị ẹga wuu lẹẹlẹẹ lẹ. Ẹga myị ẹga ọlẹ wuu kam kpaa ri amẹ ka, ị juwa pyẹ kele kịlahị-ịlahị. Lẹ, ụka oyina, am ayịdang a tị́ ka jẹ-ẹ hi ụbwọ họ ụkụrwọ ọ-kpa da ọdọdẹpwa nya ịlọm ụbwọ mẹ?” 31ILeban wẹ byi iJekọbụ yẹkẹẹ, “Anyị, a tị́ tịtọ kam ka nwụng uri kaka ba? Ya jem mẹ!” IJekọbụ wẹ byoo yẹkẹẹ, “Ḿ tịtọ ká ka nwụng uri lokpoko ọlam-ọlam ka. Ọkẹnẹ-kẹnẹ ri ó-ri kaahụ ayịdang á ka myị ọnụ nya ẹlẹwẹ, kam wẹẹ ka ya lẹ aalẹ, m̄ ka juwa gbe ịkpịlọ bala iyo ịlẹpwa nyang ịkịla hang kele kịlahị-ịlahị lẹlẹ. 32M̀ tịtọ ká ka myị kaam a ka la ịmwụ embiri ịlẹ wuu kị chị ịna owule-wule, tụ ịlẹ kị chị ịna ịkpọyị-kpọyị bala anyị ịkpịlọ ịlẹ wuu kị la ibiri lẹ. Ịịwa wuu a ka ri uri ọlẹ ká ka nwụm lẹlẹ. Ó-ri ká myị lẹ aalẹ, m ka kele kaka gba ịmwụ bala ịkpịlọ ịlẹ wuu kị chị ịna ịlịnyị wuu kpehe ha ịlọm lẹ. 33ILeban, wo mẹ! Ó-ri kaam ayịdang á ka chịla o-hu ọkịlẹtụ ha ka, ẹ-ẹpwụ nya ọọwa, ahụ ayịdang ka jẹ ụ-ụwa ị-ịlahị pyii lẹ. Ụka myị ụka ká ka warị kaka wụla uri oyeye nyam ọọwa yẹ, ọ́-ri ká yẹ ẹmwụ embiri ọnyị myị ọnyị ọlẹ kọ chị ịna owule-wule lee ọlẹ kọ chị ịna ọkpọyị-kpọyị kem kaka lẹ, tụ ọnyị ọkpịlọ ọhẹ-lọhẹ ọlẹ kọ la obiri kaka ịnyịnyị lẹ aalẹ, ịlịnyị ịịwa wuu ri ịlẹ kaam iJekọbụ wuwu yoyi lẹ.” 34ILeban myị byoo yẹkẹẹ, “Ọ hiigu, iJekọbụ. Aa họ ịnyị mẹ.” 35ILeban myị ọnụ ha iJekọbụ ịnyị. Ma, iLeban tị kele kaka wu ịmwụ anyang bala iyichi ịlẹ wuu kị chị ịna iwule-wule bala ịlẹ kị chị ịna ịkpọyị-kpọyị kpa rụ bala ịmwụ embiri ịlẹ wuu kị chị ịna ịkịlẹlẹ bala ịlẹ kị chị ịna ịkpọyị-kpọyị lee ịlẹ wuu kị chị ịna onyoowuru. ILeban myịmyị wu anyị ịkpịlọ ịlẹ wuu kị la ibiri kpa rụ ịnyịnyị. Ọọwa lẹ, iLeban a go ịmwụ bala ịkpịlọ ị-chị ịna ịịwa ịlẹ wuu kọ wu, kpa rụ kele kịla anyị alẹng nyamwụ kịịwa a ka kpaa ri amẹ họọ lẹlẹ. 36ILeban byi anyị nyamwụ, ịwa nyị jẹ lụrụ hi iJekọbụ lala ịmaalị iwo ịrụ ọlẹ kọ ri ẹdịyẹ ụtụrụ ịta nya ọlẹpẹtẹ nya alụwa mẹ. Ụka kị jẹ pwụ ẹga ọọwa lẹ, ị hụhụ ụ-ụwa juwa kpa ịmwụ nyaa ịịwa ri amẹ ụ-ụwa lẹlẹ. Ọọwa lẹ, iJekọbụ a juwa gbe ịmwụ nya iLeban ịlẹ kị hi họọ ẹ-ẹga ọkịla lẹlẹ.

37Ụka ọọwa, iJekọbụ kele kaka chị abwọ nya ekeji ilekpo-lekpo ịhyẹ lẹ, ọ kaa lala ọgọdọ ọ-kpa ụ-ụbwọ lẹlẹ. Ọ chaa ịna inyiiwuru iwule-wule bwula jaabwọ kọọwa ayịdang hị ego nya ekeji ịịwa lẹlẹ. Ị wụrụ ẹnyị nya ekeji ịịwa, ịpọpụla bala amọndụ bala ipilen. 38Ụka ọọwa, iJekọbụ go ịgọdọ ịwẹ kọ chị ịna kele kaka guru ụ-ụwa ẹ-ẹga ọlẹ kọ ya enyi ọnwanwa ju ha ịmwụ nya iLeban. Chajị ụka myị ụka ká ịmwụ ịwẹ á ka nwa enyi, ị kaa che awụlẹ ụ-ụwa ịnyịnyị. 39Chajị ụka myị ụka ká ẹmwụ bala ọkpịlọ ọnyị myị ọnyị ịwẹ á che awụlẹ ị-ịlahị nya ọkụta ọ-chị ịna ọnyị myị ọnyị ịwẹ lẹ, aalẹ ẹmwụ ọlịnyị wuu á kaa dayi la ọ-ma anyị ịlẹ kị chị ịna lala ọkụta ọọwa kaka.

40IJekọbụ chị iyichi bala imilodo nya iLeban ịlẹ wuu kị chị ịna lee kị la obiri ebwo datị. Ịnyị lẹ, ọ go ịmwụ embiri bala ịkpịlọ anyang kpa kele kaka gọdayị rịrị ị-ịlahị nya ịmwụ alẹng ịwẹ chajị kị ka jẹ-ẹ chaa lẹlẹ. Ọọwa lẹ, iJekọbụ a chị ịmwụ ịlẹ wuu kị ri nya ịlọmwụ ebwo hi ịlẹ kị ri nya iLeban lẹ, ọ myị ịmwụ nyamwụ bala ịmwụ nya iLeban yẹjula awụlẹ kpong-kpong kaka lẹlẹ. 41Ụka myị ụka ká ịmwụ ịlẹ kị la gogo á juwa che awụlẹ, iJekọbụ kaa kele kaka go ịgọdọ ị-chị ịna nyamwụ ịwẹ kpa kele kaka guru ẹ-ẹga ọ-nwa enyi nyaa chajị kị che awụlẹ ụ-ụwa lẹ, ká anyị nyaa ka chị ịna lala ịgọdọ nyamwụ ịịwa. 42Ụka myị ụka ká ịmwụ ịlẹ kị la dẹwụ-dẹwụ á juwa ka che awụlẹ, iJekọbụ á kaa go ịgọdọ ị-chị ịna ịwẹ guru ụ-ụwa kpong-kpong ka. Bwula ọọwa, iLeban la ịmwụ ịdẹwụ-dẹwụ. Ma, iJekọbụ la ịlẹ kị la gogo. 43Ịịwẹ iJekọbụ a bwu yẹ ri ọlụdụ ọtụka lẹ. Ọ la iru nya ịmwụ lụmẹ-lụmẹ, iru nya anchẹ anyang bala alẹng lụmẹ-lụmẹ, anyịrẹ ịkamẹlụ bala anyịrẹ ịlam-ịlam lụmẹ-lụmẹ ịnyịnyị.

Currently Selected:

ỌMWỤ ỌDADA 30: IBNO

Highlight

Copy