ỌMWỤ ỌDADA 29

IJekọbụ Pwụ Ẹpwa nya ILeban lẹ

1Ịnyị lẹ, iJekọbụ a juwa jẹdịyẹ nyamwụ ịnyịnyịịnyị gbee kọ pwụ ịpyị nya alọmwẹnụ-ụtụrụ lẹlẹ. 2Ụka kọ pwụ ụwa, ọ chẹhị kaka yẹ ịwẹẹlụ ọhẹ ẹ-ẹpwamẹ. Ọ myịmyị yẹ angịgbikpịlọ bala ịkpịlọ nyaa lala ebwo ịta kị kpa ịkpịlọ nyaa kaka gọdayị rịrị ọ-ọnụ nya ịwẹẹlụ ọọwa gbe ụka ọlẹ kị ka wụrwọọ, chajị, ị ya ẹjwọ ọtụka-ọtụka ọhẹ tụ ọnụ nya ịwẹẹlụ ọọwa ku. 3Ụka myị ụka ká angịgbikpịlọ ịịwa wuu á kele kaka jịra ụ-ụwa kpá lẹ, ene kịịwa wuu ka rị ẹjwọ ọọwa hi ọnụ nya ịwẹẹlụ ọọwa lawụlẹ, chajị kị ka jẹ-ẹ chị́ enyi ha ịkpịlọ nyaa nwa. Ahyaahị kị họ kpá, ị kaa hu ẹjwọ ọtụka ọọwa tụ ọnụ nyamwụ ku myịmyị lẹlẹ.

4Ụka ká iJekọbụ yẹ angịgbikpịlọ ịwẹ, ọ taa ịtọ yẹkẹẹ, “Anụ aligu nyam alẹng, anụ tị́ bwu ale?” Angịwẹ wẹ byoo yẹkẹẹ, “Epweji nya ịHaran, ahị bwu warị lẹ.” 5IJekọbụ myịmyị taa wo yẹkẹẹ, “Anụ jẹ ọlẹng ọlẹ kị wụrụ iLeban ọnyị nya ịNahọ?” Ị wẹ byi iJekọbụ yẹkẹẹ, “Ee, ahị jọ́ọ kaanyị!” 6IJekọbụ myịmyị taa wo yẹkẹẹ, “ILeban anyị há gbe alẹ mẹ.” Ị wẹ byoo yẹkẹẹ, “Ee, ị há wẹẹ. A yẹ ọnyị ọnyang ọlaanyị kọ wẹẹ kpa ịkpịlọ warị wẹẹ? IRichẹlụ ọnyị nya iLeban ayịdang lụbwọ-lẹta ịnyị!” 7Ụka ọọwa, iJekọbụ byaa yẹkẹẹ, “Anụ aligu nyam alẹng, ọ tị́ lanyị kanụ chị́ enyi ha ịkpịlọ nyanụ nwa ahyaahị anụ kpaa rụ kaka ri amẹ myịmyị kaka? Chajị ẹnụ lụmẹ nyọka kpa ịkpịlọ rụ ka ube wẹẹ.” 8Angịwẹ wẹ byi iJekọbụ yẹkẹẹ, “Ụka myị ụka kaahị ka kpa ịkpịlọ kaka nwa enyi, ahị kaa gọdayị gbe awụlẹ. Ụka kahị wuu á warị jịra lẹ, ahị kaa rị ẹjwọ ọtụka-ọtụka ọwẹ hi ọnụ nya ịwẹẹlụ la awụlẹ ene kahị ka jẹ-ẹ chị́ enyi lẹlẹ. Ịnyị a du kahị wẹẹ gọdayị gbe awụlẹ lẹ.”

9Ụka ọlẹ ká iJekọbụ juwa kpa ẹla ọọwa ya wẹẹ lẹ, iRichẹlụ a pwụ eji la ịkpịlọ nya iLeban adamwụ ịlẹ kọ kaa kpa ri amẹ ịnyịnyịịnyị lẹlẹ. 10Ahyaahị ká iJekọbụ yẹ iRichẹlụ la ịkpịlọ nya iLeban adamwụ, ọlẹ kọ ri ọnyịnịna ọlẹng nya iRibeka ịnịna nya iJekọbụ lẹ, iJekọbụ a kele kaka rị ẹjwọ ọwẹ hi ọnụ nya ịwẹẹlụ lẹ, ọ da iRichẹlụ ụbwọ chị́ enyi ha ịkpịlọ nya iLeban nwa wuu lẹlẹ. 11Ụka ká iJekọbụ chị́ enyi ọọwa kpá lẹ, ọ kele kaka ju iRichẹlụ ọnụ, juwa jida nya ọkẹkẹnị gboo lẹlẹ. 12Ụka ọọwa, iJekọbụ byi iRichẹlụ yẹkẹẹ, “Am ọọnịna nya adang ịnyị, chajị iRibeka ọnyịnamwụ ọnyang a mam lẹ.” Ahyaahị ká iRichẹlụ wo, ọ rụnyẹ kele ka ẹpwa kaka ya je iLeban adamwụ.

13Ụka ká iLeban wo yẹkẹẹ, iJekọbụ ọnyị ọlẹng nya ọọnịnọwa ọnyang iRibeka nyị warị, ọ rụnyẹ kele kaka tọọ ụ-ụgbẹyị. Ahyaahị ká iLeban pwụ ẹga nya iJekọbụ, ọ woo bajẹ juwa jwoo ọnụ. Ọọwa lẹ, ọ kpa iJekọbụ rụ kele ka ẹpwa lẹlẹ. Ụka ọọwa, iJekọbụ tịrọnụ ẹdịyẹ nyamwụ wuu je iLeban jaabwọ kọ la. 14Ụka ká iLeban wo ọnụ ẹdịyẹ nya iJekọbụ kpá, ọ byoo yẹkẹẹ, “Am bala ahụ ri aanịna ka oyiiye-oyiiye.” Ọọwa lẹ, iJekọbụ a hụ ẹ-ẹpwa nya iLeban lala ọya ookpokpo lẹpwụ-lẹpwụ lẹlẹ.

IJekọbụ bala iLeban Adamwụ Ẹpwa

15Ụka kọ nọ chẹẹ, iLeban wụrụ iJekọbụ. Ọ byoo yẹkẹẹ, “IJekọbụ wo mẹ. A ri ọọnam kpá odu ịnyị, á ka myị ẹrụ ham odu-odu koo. Lẹ, ya jem jaabwọ kam ka nwụng uri mẹ ẹnwa.”

16ILeban ma anjwo ịyẹẹnọ angị imiiye. Ị wụrụ ọlẹ kọ ri ọgbahị iLiya. Ị wụrụ ọlẹ kọ ri onjwo iRichẹlụ. 17Ẹgbahị nya iLiya la bwuru-bwuru. Ma, iRichẹlụ tị rụ ịyang nwurwo-nwurwo lụmẹ kaka kpoye. 18IRichẹlụ há iJekọbụ lụmẹ. Ịnyị lẹ, ọ byi iLeban yẹkẹẹ, “M̀ ka họ ụkụrwọ hang ẹka irwiye chajị ká ka ya iRichẹlụ ọnyị ọnyang ohyẹẹkpẹ nyang ham ye lẹ!” 19ILeban wẹ byi iJekọbụ yẹkẹẹ, “Ọ hiigu, adam. Ó-ri kọ háng lẹ aalẹ, ahụ o-yoo ye hám gụ ọngọkịla olodehe. Lẹ, hụ ám ẹgẹlẹ ham mẹ, ẹnwa.” 20Ịnyị lẹ, iJekọbụ a họ ụkụrwọ ẹka irwiye ha iLeban chajị kị ka ya iRichẹlụ họọ ye lẹlẹ. Ẹka irwiye ịịwa la iJekọbụ lala ụtụrụ ịmanyị-ịmanyị kem, chajị iRichẹlụ jwoo ẹ-ẹhị lụmẹ kaka kpoye ene.

21Ahyaahị ká ẹka irwiye ịịwa chị ọnụ, iJekọbụ byi iLeban yẹkẹẹ, “Tụụbwọ hi iRichẹlụ ahụ nyam ham kam kpọọ rụ kaka ye mẹ, chajị, m̀ họ ụkụrwọ nyọka yoo ye kpá alẹ lẹ.” 22Ụka ọọwa, iLeban wụrụ iru nya angịnyị ịlụwa wuu kele kaka chị ọkẹkẹnị nya ahụ oyeye ọọwa. Ọ họ ang oriri ọtụka-ọtụka ẹnụtụrụ ọọwa haa. 23Ụka ká odu hi, iLeban kpa iLiya kịla iJekọbụ nya ahụ ọkọkọ nya iRichẹlụ. Ọọwa lẹ, iJekọbụ a ka ẹga nya iLiya lẹlẹ. 24ILeban hu ọnchẹ ọnyọhị ọnyang nya ịlọmwụ ọlẹ kị wụrụ iSilipa ha iLiya ọnyị nyamwụ kọ ka ri ọnyị ọlata nya iLiya ụ-ụwa ẹ-ẹpwa nya ọrụmwụ. 25Ụka ká ahị pyẹ kpá, ká iJekọbụ jẹ yẹkẹẹ, iLiya nyaa wẹ ká iLeban nyị hu ha ọwa ye ọkọkọ nya iRichẹlụ lẹ, ọ wụ iJekọbụ ẹjẹ lụmẹ. Ọọwa lẹ, ọ kele kaka byi iLeban yẹkẹẹ, “Ịịyẹ a tị́ du ká họm ịnyị? Kam họ ụkụrwọ hang chajị nya iRichẹlụ wuu ká mwọọgịlẹ dam lụgbaa hu ọngọkịla ham ye hyoo da mẹ? Ọ́ hám kpong-kpong ka.” 26ILeban wẹ byi iJekọbụ yẹkẹẹ, “A wụ ẹjẹ ka ẹnwa. Ụụgbaa, m dang koo. Jaabwọ kahị kaa họ a wẹ lẹ. Áhị́ kaa hu ọnyị ochiche da ọrụ jene nya ọnyị ọgbahị ẹgẹlẹ ka. 27Lẹ, iJekọbụ ba odu mẹ. Ụka ká epwihi ọ-kpa chị ọkẹkẹnị nya ahụ onyeewe nyang ọlẹ á myị kpá, jaabwọ ká adahị anyị kaa họ lẹ aalẹ, m ka hu iRichẹlụ hang ye myịmyị, ká ka họ ụkụrwọ ham ẹ-ẹpwụ nya ẹka irwiye ọkịla jaabwọ ká họ ham u-uhye nya iLiya lẹlẹ.”

28Ụka ká ẹla ọọwa há iJekọbụ, kọ ju ugbodu gbegbegbe ká epwihi nya ọkẹkẹnị ọchịchị nya ahụ onyeewe nyamwụ ọọwa chịpwụrụ lẹ, iLeban a hu iRichẹlụ họọ ye ịnyịlẹhị lẹlẹ. 29Ụka ọọwa, iLeban hu ọnchẹ ọnyọhị ọnyang nya ịlọmwụ ọlẹ kị wụrụ iBiliha ha iRichẹlụ kọ ka ri ọnyị ọlata nya iRichẹlụ ụ-ụwa ẹ-ẹpwa nya ọrụmwụ. 30Ụka kị tụ iRichẹlụ da kịla iJekọbụ, ọ kpa iRichẹlụ ka ube. Ọọwa lẹ, iRichẹlụ a há iJekọbụ lụmẹ gụ iLiya lẹlẹ. IJekọbụ họ ụkụrwọ ẹka irwiye ha iLeban adamwụ ẹpwa chajị nya iRichẹlụ jaabwọ kọ myị ọnụ ene-ene.

31Ụka ká Amkpaa yẹ jaabwọ ká iJekọbụ hu iRichẹlụ ọnụ-ahụ, kọ hu iLiya ụchị-ahụ lẹ, Ohe Oluhye ayịdang a hu ọnyị ọmama ha iLiya lẹ, ọ họ ká iRichẹlụ ma ọnyị ọhẹ-lọhẹ kpong-kpong kaka lẹlẹ. 32Ụka ọọwa, iLiya jẹnyị ahyaahị. Ọ ma ọnyị ọlẹng. Ọ wụrụ ẹnyị nyamwụ iRubẹn#29:32 Etu nya ẹnyị ọlẹ ri “yẹ-ẹ̀ wẹ mẹ, ọnyị ọlẹng ịnyị.” chajị iLiya yẹkẹẹ, “Amkpaa chẹhị kaka yẹ akama ọyẹyẹ nyam du kọ hu ọnyị ọlẹ ham lẹ. Lẹ, m jẹ ká iJekọbụ ayịbam ka la ọháha ẹ-ẹga nyam ugbẹnyị lẹ.” 33ILiya myịmyị jẹnyị ụka oheeye. Ọ myịmyị ma ọnyị ọlẹng ọkịla. Ọọwa lẹ, iLiya yẹkẹẹ, “Chajị nyọlẹ ká Amkpaa jẹ yẹkẹẹ, am nyị wụ ayịbam ẹjẹ lụmẹ a du kọ myịmyị hu ọnyị ọlẹng ọlẹ ham lẹẹ lẹlẹ.” Ịnyị lẹ, ọ wụrụ ẹnyị nyamwụ iSimyọn lẹlẹ. Etu nya iSimyọn ri “Ohe Oluhye wo lẹ.” 34ILiya myịmyị jẹnyị ọkịla hile iSimyọn. Ọ ma ọnyị ọlẹng ọkịla myịmyị. Ụka ọọwa, ọ yẹkẹẹ, “Lẹẹlẹẹ, am jẹ kaam bala ayịbam ka yẹjula awụlẹ ụgbẹyị pyii lẹ, chajị m̀ ma anyị alẹng angịnyị angị ịta họọ lẹ.” Ọ wụrụ ẹnyị nya ọnyị ọọwa iLivayị. Etu nya iLivayị ri “ọtụchawụlẹ.” 35ILiya myịmyị jẹnyị ugbabwọ ohene. Ọ ma ọnyị ọlẹng myịmyị. Ụka ọọwa, ọ yẹkẹẹ, “Ugbẹnyị lẹ, m̀ ka ji Amkpaa obe lẹ.” Ịnyị a du kọ wụrụ ẹnyị nya ọnyị ọọwa iJuda lẹ, chajị etu nya iJuda ri “ogbo ogwogwo ha Ohe Oluhye.” Ọọwa lẹ, ọnyị ọmama a myị hi ẹpwụ nya iLiya lẹlẹ.

Currently Selected:

ỌMWỤ ỌDADA 29: IBNO

Highlight

Copy