ỤKỤRWỌ nya ALẸRỤ 4

Ị Wụrụ IPita Bala ỊJọn Eje Ka Ẹga nya Alegbeju

1Ụka ká iPita bala ịJọn juwa kpa ẹla ọọwa ọ-ọnụ ya je angịnyị ụ-ụwa wẹẹ lẹ, angịkiliya nya Ohe Oluhye bala olegbeju ọgbahị nya alegbeju ịkpẹhị rịrị ube ịgọgọ ọtụka nya Ohe Oluhye nya ala iJuu bala ala iJuu ịkịla ịlẹ kị wụrụ ala ịSadusii anyị wuu a kele ka ẹga nya iPita anyị lẹlẹ. 2Angịịwa wuu juwa wụ ẹjẹ ta iPita bala ịJọn nya ịlẹhị-ịlẹhị, chajị nyọlẹ kị juwa mẹ ang jẹ iru nya angịnyị ịịwa bala o-juwa ya ẹla nya Ohe Oluhye dodehe yẹkẹẹ, owuleji bwula igu nyị ji ha angịnyị ehe myị́, bwula ọlẹ ká iJisọsị ayịdang nyị wuleji bwula igu lẹ. 3Ịnyị lẹ, angịịwa a wu iPita bala ịJọn kpa kele kaka ju agba gbee ká ahị pyẹ lẹlẹ. Chajị, odu juwa hi lụmẹ lụka ọlẹ kị waa ẹnụ ọọwa lẹ. 4Ma, iru nya angịnyị ịlẹ kị wo ẹla nya Ohe Oluhye oyaya nya iPita anyị ịịwa lẹ, ị myị la Ohe Oluhye ẹnụ ọọwa. Iru ojuju nya angị myịmyị ịlẹnụ ọọwa la angịnyị lala angị ụnọ iwo kụrụ imiiye da angịnyị angị ohu iwo chiriri myị́.

5Ụka ká ahị ọọnamwụ pyẹ lẹ, alegbeju nya ala iJuu wuu bala ịgabwọ nyaa wuu bala ala iticha ị-mẹ ehile nya iMosisi jẹ anyị wuu, a kaka jịra lawụlẹ i-iJerusalẹm lẹlẹ. 6Anasị ọlẹ kọ ri olegbeju ọgbahị nya angịkiliya nya Ohe Oluhye wuu bala ịKayafasị bala ịJọn bala Alẹkịsanda bala alẹng angị ịkịla ịlẹ wuu kị bwu imwawụ nya alegbeju nya angịkiliya nya Ohe Oluhye anyị wuu juwa ịnyịnyị. 7Ịnyị, ụka kị wụrụ iPita bala ịJọn kele kaka godayị rịrị ẹ-ẹpwarịrị nya ọjịra-jịra nyaa ọọwa lẹ, ị tọ iPita anyị ịtọ yẹkẹẹ, “Ọngịrị oyina bala ẹnyị nya owo, anụ tị́ kpa họ ụkụrwọ ẹbyẹbyị ọwẹ kpong-kpong?”

8Ịnyị, jaabwọ ká ọngịrị nya Olegu Ịgọgọ chị kụrụ iPita ụka ọọwa lẹ, ọ wẹ byaa yẹkẹẹ, “Anụ alegbeju bala ịgabwọ nya ala iJuu wuu, 9ọ hiigu, ó-ri ajị nya ụkụrwọ ọnyịịla nya uda ọhọhọ ọlẹ kahị họ ẹ-ẹga nya okuku ọlẹ, kọ du kanụ jam wụrụụhị kaka tịtọ wo u-uhye nyamwụ alẹ lẹ aalẹ, 10anụ alegbeju nyahị wuu bala ala iJuu ịkịla, anụ wo mẹ! Ọngịrị nya ẹnyị nya iJisọsị ịKịrayịsị ọla ịNasareti ọlẹ kanụ wu kpa kaka gu iloo ba okoji, ene ká Ohe Oluhye wuloo eji bwula igu kpangga, a ri ang ọlẹ kahị kpa họ ká okuku ọlẹ la gogo yẹẹyẹẹ godayị rịrị ị-ịlahị nyanụ wẹ lẹ. 11IJisọsị ọọwa kpakpakpa a ri Ẹjwọ ọlẹ kaanụ angị me ugulọ nya ube pwa, kanụ gbọọ ugu da ọ-ọka wẹ lẹlẹ. Ma, ọwa kpangga, Ohe Oluhye a tị hu nya olegbeju ọlẹ kọ ri Ẹjwọ o-wu itiwe nya ube nyamwụ ọọwa kpa gogo wẹ pyii lẹlẹ. 12Ọchịda nya Ohe Oluhye á tị juwa hahị ahị angịnyị ehe la ụgbẹyị ọkịla ọhẹ-lọhẹ dala o-bwula ẹnyị nya iJisọsị ịKịrayịsị ọwẹ kaka. Chajị, ẹnyị ọkịla ọhẹ-lọhẹ á juwa ọlẹ ká Ohe Oluhye hu ha ọngọngọhẹ e-ekpeleji nya ẹnụ ọlẹ, kahị ka jẹ́-ẹ bwu lọọ, chịda myị́ kpong-kpong kaka. Kẹnẹ-kẹnẹ, ọngịrị nya ẹnyị nya iJisọsị ụbwọọmwụ mẹ ịnyị!”

13Ịnyị, ụka ká iru nya alọjịra-jịra ịịwa yẹ jaabwọ ká iPita bala ịJọn kpa uhi ojuju-ka ya ẹla ọọwa dodehe ị-ịlahị nyaa ịnyị myị́, kị tị jẹ́ ịnyịnyị yẹkẹẹ, iPita anyị nyị ri angịnyị angị ichiche ịlẹ kịị nyị́ jẹ́ ụpwụ gbuu kpong-kpong kaka lẹ, ọ laa ịwa wuu ahịbwuu lụmẹ lẹlẹ. Ịnyị, ịwa wuu a ri ibeenu nya ịlẹhị-ịlẹhị yẹkẹẹ, iPita bala ịJọn anyị ịwẹ nyị ri angị hụ ta iJisọsị ẹnẹhẹ lẹ ịnyịlẹhị lẹlẹ. 14Ma, jaabwọ ká angịịwa juwa kpẹhị nya ịlaa yẹ okuku ọlẹ ká iPita anyị họ uda godayị rịrị chahị jwaa ụ-ụwa lẹ, ịwa ayịdang á yé ịngịngịhyẹ ka ya tụ iPita anyị pyịpyị o-oluhye nya ọọwa myị́ kpong-kpong kaka. 15Ịnyị, ụka kị ku iPita bala ịJọn kpehe bwu ẹpwụ nya ọjịra-jịra nya ịkọtụ ọgbahị nyaa kele ka ọka lẹ, ị juwa hu ẹkpẹ ta awụlẹ yẹkẹẹ, 16“Anyanyị, ahị tị́ ka họ ẹ-ẹga nya alẹng ịlẹ kpá lẹẹ mẹ? Chajị, ọ la gbadaa yẹkẹẹ, ang o-ju ẹjẹẹ nya ụkụrwọ ẹbyẹbyị ọwẹ ká iPita anyị họ wẹ lẹ, ọ ru ohi pwụ ụrụ nya ọng myị́ ọng ọla iJerusalẹm ene lẹlẹ, ahị́ ka jẹ́-ẹ pwa ọọwa rwarụ myị́ kpong-kpong kaka. 17Lẹ, jaabwọ kahị ka bwu họ kị ka juwa kpa ẹla ọọwa ru ohi kele kịlahị-ịlahị kaka a lẹẹ lẹlẹ: Anụ kẹwẹ kahị wụrụ angịịwa warị kahị daa ọna nya ịlẹhị-ịlẹhị chajị kị ka hu abwọ la o-juwa kpa ẹnyị nya iJisọsị ya ẹla je angịnyị bwu alẹ kịlahị mẹ.”

18Ịnyị, ụka kị wụrụ iPita bala ịJọn tịrẹkpẹ wẹ ẹga nyaa lẹ, ị daa ehile nya ịlẹhị-ịlẹhị yẹkẹẹ, anụ nyị ya ẹla rụ́ ẹnyị nya iJisọsị lee ọ-kpa ẹnyị nyamwụ mẹ ịngịngịhyẹ jẹ ọngọngọhẹ gụ ọwẹ kpong-kpong kaka. 19Ma, iPita bala ịJọn wẹ byaa yẹkẹẹ, “Anụ wụla ẹla ọlẹ yẹ la ịlọnụ wẹẹ. Ihi nyanụ anụ ojuju bala ihi nya Ohe Oluhye ojuju lẹ, oyina, a tị́ chịla gụ ị-ịlahị nya Ohe Oluhye kanụ jẹ́? 20Chajị, ahị ayịdang lẹ, áhị́ ka jẹ́-ẹ tụ ọnụ nyahị pịrị myị́, hi ọ-ka juwa kpa ya ẹla dodehe rụ́ iJisọsị je angịnyị u-uhye nya ang ịlẹ kahị yẹ lẹhị nya ịlọhị bala ọ-kpa ụrụ nyahị wo pyii kaka.” 21Ịnyị, ụka ká alọjịra-jịra ịịwa myịmyị da iPita bala ịJọn ọna la ọngịrị ọngịrị u-uhye nya ẹla ọọwa kpá lẹ, ị tụụbwọ hyaa rụ lẹlẹ. Chajị, ị́ yé ẹgẹgẹhẹ ka jẹ́-ẹ yụbwọ chị, kpa yẹ iPita anyị akama kpong-kpong ka, o-oluhye nya uhi nya iru nya angịnyị ịlẹ kị juwa. Chajị, angịnyị wuu juwa gwogbo ha Ohe Oluhye u-uhye nyọlẹ ká okuku ọọwa la gogo. 22Chajị, okuku ọọwa ọlẹ ká ụkụrwọ ẹbyẹbyị nya uda ọhọhọ họ chị ehe u-uhye nyamwụ lẹ, ọ gu ẹka gụ ẹka ohu-iye myị́ lẹ.

Angịnyị nya Ohe Oluhye Raabwọ Chajị nya Ọngịrị nya Ẹla Oyaya Myị́

23Ahyaahị ká alọjịra-jịra ịịwa tụụbwọ hi iPita bala ịJọn lẹ, ị rụ kele ka ẹga nya angịnyị nya Ohe Oluhye ịkịla aanaa lẹlẹ. Ọọwa lẹ, ị tịrọnụ ya jaa jaabwọ ká alegbeju nya angịkiliya nya Ohe Oluhye bala ịgabwọ nya ala iJuu wuu ya ẹla taa kaka ba lẹlẹ. 24Ịnyị, ụka ká angịnyị nya Ohe Oluhye aanaa ịịwa wo ọnụ-ẹla ọtịrị-tịrị nya iPita anyị kpá lẹ, ịwa wuu a hu omyi nyaa hwaa lawụlẹ, juwa raabwọ ha Ohe Oluhye ụ-ụwa lẹlẹ. Ị yẹkẹẹ, “Ahụ Ọngọlahị Ohe Oluhye Adịrahụ Ọtụka ọlẹ ká họ epwoohe bala odehe bala ihu ịtụka-ịtụka wuu bala ang myị́ ang ịlẹ kị ji ẹpwụ nyaa. 25Ahụ Ohe Oluhye Ọngọ kpa ọnụ nya adahị ogogo iDevidi ya ẹla lụka nyamwụ bwula ọngịrị nya Olegu Ịgọgọ dodehe ene-ene yẹkẹẹ,

‘Ịịyẹ a tị́ du ká ala iJentayịlị ịwẹ juwa ju agbama ọtụka ịnyị?

Ịịyẹ a tị́ du ká alodehe mwọọgịlẹ juwa me obyi onyobyi otimajẹ ododu ịnyịnyị?

26Ịdịrịhụ nya alodehe ọlẹ wuu nwụla ịlaa nọ nya ẹwụ ọdada lẹ,

alegbeju igbeji nya alodehe ịlẹ wuu tị tụ ịlaa kaka guru nyọka juwa tụ Ọngọlahị Ohe Oluhye pyịpyị

bala ịKịrayịsị ọlẹ ká Ohe Oluhye du ẹrụ warị wẹ odehe ọlẹ ịnyịnyị lẹ.’

27Oo! Ahụ Ohe Oluhye, chajị ịnyịlẹhị ịnyị, e-epweji ọlẹ kpangga, alegbeju igbeji anyị wuu a tụ jịra nya ọ-jahị da iJisọsị Ọnchẹ nyang Ọlịgọgọ ọlẹ ká chụ, du ẹrụ warị wẹ odehe ọlẹ lẹ. Alegbeju ịịwa ri iHerọdụ bala ịPọntịyọsị ịPayịleti bala ala iJentayịlị ịkịla wuu bala angịnyị nya ala Isirẹlụ wuu. 28Ma, ọhọhọ nyaa ọọwa tị ri ọ-họ jịra ọlẹ kọ pwoku ang myị́ ang ọlẹ kaahụ Ohe Oluhye kpa ụbwọ nya ịlọng nwụlanọ bwula obyi omeme nyang ene-ene, ya ụma nya ang ịịwa nyị ka họ jịra pyii. 29Lẹ, Ahụ Ohe Oluhye Ọngọlahị, a tị́ wẹẹ wo jaabwọ ká angịwẹ wẹẹ juhi uhi-uhi kaka ba lẹ. Lẹ, chuchuu, ká ya ọngịrị ọ-kpa ya ẹla myị́ la uhi ojuju-ka, hahị ahị anchẹ nyang mẹ. 30Ká juwa nịra ụbwọ nyang kpaaa, juwa kpa họ ụkụrwọ ẹbyẹbyị nya uda ọhọhọ bala ang i-ju ẹjẹẹ ịlẹbyẹbyị bala ụkụrwọ ẹbyẹbyị ịkịla la datị-datị ọhọhọ ẹ-ẹpwarịrị nyahị bwula ẹnyị nya iJisọsị Ọnchẹ nyang Ọlịgọgọ ịnyịnyị mẹ.”

31Ịnyị, ụka kị raabwọ ọọwa kpá lẹ, ẹga ọọwa ọlẹ kị ji a juwa hụ́ jigi-jigi lẹlẹ. Ọọwa lẹ, ịwa wuu a myị la ọngịrị nya Olegu Ịgọgọ nya ịlẹhị-ịlẹhị lẹ, ị juwa ya ẹla nya Ohe Oluhye dodehe myị́ la ọngịrị-ọngịrị la uhi ojuju-kaka lẹlẹ.

Ọngọngọhẹ-ẹ́ La Ịngịngịhyẹ nya Ịlọmwụ Datị Kaka

32Ụka ọọwa, alogu nya ọjịra-jịra nya angịnyị nya Ohe Oluhye wuu ri angị la ọkịlẹtụ ookpokpo bala irya ookpokpo ẹ-ẹpwụ nya ang myị́ ang wuu. Chajị, ọngọngọhẹ nyaa á la ịngịngịhyẹ nya ụbwọ nya ịlọmwụ datị kpong-kpong kaka. Ma, ị tụụbwọ hi ang myị́ ang nyaa wuu guru ẹga ookpokpo, chajị ká ọng myị́ ọng lẹpwarịrị nyaa ịwa aluche ka jẹ́-ẹ juwa kpa họ ang myị́ ang ọlẹ kọ taa ịnyịnyịịnyị. 33Ụka ọọwa, alẹrụ ọnyịịla nya ịKịrayịsị juwa kpa ọngịrị ọtụka-ọtụka nya Ohe Oluhye ri ibeenu ẹ-ẹpwụ nya ẹla nya Ohe Oluhye oyaya pyẹ nyaa, chajị nya owuleji bwula igu nya Ọngọlahị iJisọsị. Ọọwa lẹ, ahị ọwawa ọtụka-ọtụka nya Ohe Oluhye a juwa u-uhye nyaa ịwa wuu lẹlẹ. 34Ụka ọọwa lẹ, ịngịngịhyẹ á ga ọngọngọhẹ lẹpwarịrị nyaa ịwa angịnyị nya Ohe Oluhye ịlụka ọọwa amwụ kpong-kpong ka. Chajị, angịlẹ kị la ang myị́ ang wuu, lala ọpyị lee ebe ịlẹ kị nwụ́, ị juwa gaa ra wuu. 35Ọọwa lẹ, ị kpa okpoko nya ang ịịwa kele ka ijata nya alẹrụ ọnyịịla nya ịKịrayịsị wuu lẹ, ị hu okpoko ọọwa nụwa a-ang chajị ká ọng myị́ ọng lẹpwarịrị nyaa ịwa wuu ka jẹ́-ẹ juwa kpa họ ang ọlẹ kọ bọ́ọ lawụlẹ lẹlẹ.

36Ụka ọọwa, ọlẹng ọhẹ juwa ọlẹ ká ẹnyị nyamwụ ri iJosẹfụ bwu imwawụ nya ala iLivayị. Alẹrụ ọnyịịla jwoo ẹnyị ọkịla ọlẹ kị wụrụ ịBanabasị. Etu nya ịBanabasị ri ọngọlẹ kọ kaa ju ọngịnyị ọọnamwụ ọhụ myị́. 37IJosẹfụ ọọwa hu ebwo nya ọpyị ọlẹ kọ la ra lẹ, ọ hu okpoko nya ọpyị ọọwa kpa kele ka ata nya alẹrụ ọnyịịla lẹlẹ.

Currently Selected:

ỤKỤRWỌ nya ALẸRỤ 4: IBNO

Highlight

Copy