ỤKỤRWỌ nya ALẸRỤ 5

Oja nya Ananịyasị Bala ỊSafayịra

1Ma, ọlẹng ọhẹ juwa ká ẹnyị nyamwụ ri Ananịyasị. Ẹnyị nya ahụ nyamwụ ri ịSafayịra. Ọ hu ọpyị ọlẹ kọ la ra ịnyịnyị. 2Ịnyị, Ananịyasị a gu okpoko nya ọpyị ọọwa ene lẹ, ọ hu ebwo nyamwụ ọhẹ nọ a-ang gbe ịlọmwụ ẹkpẹ lẹlẹ. ỊSafayịra ahụ nyamwụ tị jẹ́ ang chajị nya okpoko ọọwa yẹẹyẹẹ ịnyịnyị. Ọọwa lẹ, Ananịyasị a hu ebwo ohihi nya okpoko nya ọpyị ọọwa kpa kele ka ijata nya alẹrụ ọnyịịla lẹlẹ. 3Ma, iPita wẹ byoo yẹkẹẹ, “Ananịyasị ee, ịịyẹ a tị́ du ká myị ká Ohe Onyobyi jẹ́ kụrụng ẹ-ẹpwụ ọkịlẹtụ nyang, du ká juwa me ọnọọkịla ju Olegu Ịgọgọ bala ọ-chị okpoko nya ọpyị nyang ọlẹ ká ya ra ebwo, ká hu ebwo ọhẹ nọ a-ang gbe ịlọng ẹkpẹ ịnyị? 4Ụka ọlẹ ká hu ọpyị nyang ọọwa ra lẹka lẹ, aahụ a la ọpyị ọọwa ka? Ụka ọlẹ ká tị hwoo hu rara kpá lẹ, okpoko nyamwụ ọọwa, á ri nyang ahụ ayịdang ịnyịnyị ka? Ee lẹ, ịịyẹ a tị́ du ká jẹ́ byẹjẹ chị eje nya ang onyobyi ọhọhọ ọlịịwẹ ẹ-ẹpwụ ọkịlẹtụ nyang wẹ mẹ? Wo mẹ! A-ahị angịnyị ehe a me ọnọọkịla ọwẹ ju wẹ ka! Ma, Ohe Oluhye ayịdang, a me ọnọọkịla ju lẹ.” 5Ịnyị, ahyaahị ká Ananịyasị wo ẹla oyaya nya iPita ọọwa kpá bwaaa lẹ, ọ hịda keji kpịlagada lẹ, ọ gbu taa dụwa lẹlẹ. Ọọwa lẹ, uhi ọtụka-ọtụka a ju angịlẹ wuu kị wo ẹla ọọwa lẹlẹ. 6Ịnyị, ụka ká alikolobya ịhyẹ ịlụwa wuleji kaka hu ogu nya Ananịyasị kpa kpehe lẹ, ị rọọ apwụ o-ju ogu eji wuu lẹ, ị hwoo kpa rụ kaka ju eji lẹlẹ.

7Ịnyị, ụka ká ang lala awa ịta chịpwụrụ kam kpá lẹ, ahụ nya Ananịyasị a kele ka ẹga nya iPita anyị lẹlẹ. Ma, ọ́ tị jẹ́ ịngịngịhyẹ chajị nya ang ọlẹ kọ họ ẹ-ẹga nya Ananịyasị kpong-kpong lẹka. 8Ịnyị, iPita a byoo yẹkẹẹ, “Ya jem wẹẹ. Ịịlẹ, okpoko nya ọpyị ọlẹ kanụ hu ra a la wuu kem lẹlẹ?” Ọ wẹ byi iPita yẹkẹẹ, “Ee, ịnyị, ọ la kem ị-ịlẹhị lẹ.”

9Ma, iPita wẹ byoo yẹkẹẹ, “Ahyu! Ịịyẹ a tị́ du kaahụ bala Ananịyasị ọrụ nyang jẹ́ byẹjẹ chị eje lawụlẹ, juwa ma Olegu Ịgọgọ nya Ọngọlahị Ohe Oluhye yẹ ịnyị kpong-kpong? Wo mẹ! Ọgụ-ẹpẹtẹ nya angịlẹ kị hu ọrụ nyang kaka ju eji chụwẹ warị ọ-ọnang nya ube, kị ka warị kaka hung ahụ kpa kaka ju eji ịnyịnyị lẹ!” 10Ịnyị lẹ, ọ hịda keji kpịlagada i-ijata nya iPita lẹ, ọ gbu taa ụ-ụwa ịnyịnyị lẹlẹ. Ịnyị, ụka ká ikolobya ịịwa jụ kele ka ẹpwang kaka yẹ ogu nyamwụ dụwa lẹ, ị hu ogu nyamwụ kpa rụ kele kaka ju eji ụ-ụwa ịkịka nya iworu nya Ananịyasị ọrụmwụ ịnyịnyị lẹlẹ. 11Ịnyị lẹ, uhi ọtụka-ọtụka a ju ala ịchọọchị nya Ohe Oluhye wuu bala angịkịla ịlẹ kị wo oja nya ẹla ọọwa wuu lẹlẹ.

Ụkụrwọ Ẹbyẹbyị La Datị-datị

12Ụka ọọwa, iru nya ang i-ju ẹjẹẹ ịlẹbyẹbyị bala ụkụrwọ ẹbyẹbyị la datị-datị juwa họ ẹ-ẹpwarịrị nya iru nya angịnyị bwu ẹpwụtụbwọ nya alẹrụ ọnyịịla nya ịKịrayịsị. Ịwa angịnyị nya Ohe Oluhye wuu hụ lawụlẹ e-ebwo nya ẹga ọlẹ kị wụrụ ọnụụkpa nya iSolomọn u-ube ịgọgọ ọtụka nya Ohe Oluhye. 13Ụka ọọwa lẹ, ọngọngọhẹ lẹpwụ nya iru nya angịnyị ịlẹ kị ri angịnyị nya Ohe Oluhye ka lẹ, ị́ myị yẹjula alogu nya angịnyị nya Ohe Oluhye ịịwa kpong-kpong ka. Ma, iru nya angịnyị ịịwa tị juwa kaa ya ẹla ọnyịịla nya angịnyị nya Ohe Oluhye ịịwa la ihi-ihi lụmẹ. 14Ịnyị lẹ, iru ịtụka-ịtụka nya alẹng bala anyang lụmẹ-lụmẹ a juwa myị la Ohe Oluhye gụ olene-ene ịnyịnyịịnyị ụka ọọwa lẹlẹ. 15Ụka ká alẹrụ ọnyịịla nya ịKịrayịsị juwa họ ụkụrwọ ẹbyẹbyị nya uda ọhọhọ ịnyịnyị lẹ, iru nya angịnyị a juwa kpa alẹdụrụ u-uhye nya ang ị-da nọnọ bala ịba nyaa kaka hụhụ ọ-ọnụ ụgbẹyị chajị ká ụrụrụ nya iPita á chịpwụrụ bwu uhye nya alẹdụrụ ịịwa lẹ, kị ka la gogo lẹlẹ. 16Ịnyị lẹ, iru nya angịnyị lụmẹ-lụmẹ a juwa bwu epweji ịlẹ kị dagaga ju iJerusalẹm kele ka ẹga nya alẹrụ ọnyịịla nya ịKịrayịsị lẹlẹ. Angịịwa kpa alẹdụrụ la datị-datị bala angịlẹ ká alegu inyibyi juwa wu kele ka ụwa ịnyịnyị. Ọọwa lẹ, alẹrụ ọnyịịla ịịwa a haa uda nya ẹdụrụ nyaa ịịwa wuu lẹlẹ.

Ị Tụ Alẹrụ Ọnyịịla nya ỊKịrayịsị Pyịpyị

17Ịnyị lẹ, olegbeju ọgbahị nya angịkiliya nya Ohe Oluhye bala alogu nyamwụ ịlẹ kị ri ala ịSadusii anyị wuu, a chị eje kị ka wu alẹrụ ọnyịịla nya ịKịrayịsị lẹlẹ. Chajị, ịwa wuu juwa la ijiiji onyobyi nya ịlẹhị-ịlẹhị tụ alẹrụ ọnyịịla ịịwa pyịpyị. 18Ọọwa lẹ, angịwẹ a kele kaka wu alẹrụ ọnyịịla nya ịKịrayịsị lẹ, ị kpaa rụ kele kaka ju agba u-ube nya agba nya aluche ọlụwa lẹlẹ. 19Ma, olegu-ẹrụ nya Ọngọlahị Ohe Oluhye ọhẹ a kele kaka wụrụ agbayị nya ube nya agba ọọwa, kaka gba alẹrụ ọnyịịla nya ịKịrayịsị kpehe bwu ụwa lẹ, ọ byaa yẹkẹẹ, 20“Anụ kele kanụ kaka godayị rịrị u-ube ịgọgọ ọtụka nya Ohe Oluhye nya ala iJuu kanụ ya ẹla nya Ohe Oluhye je angịnyị wuu chajị nya ọhịhị onyeewe nya Ọngọlahị la mẹ.” 21Ịnyị, ụka ká alẹrụ ọnyịịla nya ịKịrayịsị wo ẹla oyaya nya olegu-ẹrụ ọọwa lẹ, ị hu ang kele ka ube ịgọgọ ọtụka nya Ohe Oluhye ọọwa juwa mẹ ang jẹ angịnyị ụ-ụwa la ahị ọpyẹpyẹ jaabwọ kị wo lẹlẹ.

Ịnyị lẹ, olegbeju ọgbahị nya angịkiliya nya Ohe Oluhye bala alogu nyamwụ a be ẹkọ wụrụ alegbeju ileje nya ịkọtụ ọgbahị nya ala iJuu wuu lẹ, ị du angịhyẹ ẹrụ kele ka ube nya agba kị ka gba alẹrụ ọnyịịla kpehe bwu ụwa kịlaa lẹlẹ. 22Ma, ụka ká angịlẹ kị du ẹrụ kele pwụ ụwa, kị yẹ alẹrụ ọnyịịla ịịwa u-ube nya agba kaka lẹ, ị nya kaka tịrọnụ ya je alọjịra-jịra nyaa wuu lẹlẹ. 23I byaa yẹkẹẹ, “Ụka kahị pwụ ube nya agba lẹ, ahị yẹ jaabwọ kị tụ ukpileku nya agbayị ịlụwa ku kpọng-kpọng hiigu-hiigu. Ahị tị myịmyị yẹ jaabwọ ká angị gbe alagba juwa godayị rịrị ọ-ọnụ nya agbayị ịịwa giri-giri ịnyịnyị. Ma, ụka kahị tị wụrụ ụgbẹyị nya ube nya agba, kahị jụ kele lẹ, ahị-ị́ tị yẹ ọngọngọhẹ ụ-ụwa kpong-kpong kaka.” 24Ịnyị, ụka ká olegbeju ọgbahị nya angị kpẹhị rịrị ube ịgọgọ ọtụka nya Ohe Oluhye nya ala iJuu bala alegbeju nya angịkiliya nya Ohe Oluhye anyị wuu wo ẹla ọọwa lẹ, ọ hu ahịbwuu ojigi-jigi haa lụmẹ kaka kpoye. Ọọwa lẹ, ị juwa me irya yẹkẹẹ, ịịyẹ nyaa tị́ ka jẹ́-ẹ ri etu nya ẹla ọlịịwẹ kpá wẹ mẹ? 25Ọọwa lẹ, ọngọhẹ a kele kaka ya jaa ịwa wuu yẹkẹẹ, “Anụ wo mẹ! Angịlẹ kanụ wu kpa kaka ju agba lẹ, m yaa kị godayị rịrị lalẹẹ u-ube ịgọgọ ọtụka nya Ohe Oluhye nya ala iJuu, juwa mẹ ang jẹ angịnyị lẹ!” 26Ịnyị lẹ, olegbeju ọgbahị nya angị kpẹhị rịrị ube ịgọgọ ọtụka nya Ohe Oluhye bala alekpeleji nyamwụ a wuleji kele kaka kpa alẹrụ ọnyịịla nya ịKịrayịsị kele ka ẹpwụ nya ọjịra-jịra nyaa ọọwa lẹlẹ. Ma, ị́ tị họ alẹrụ ọnyịịla ịịwa ịngịngịhyẹ nya ọngịrị kpong-kpong ka. Chajị, ị chị uko yẹkẹẹ, ori kịịwa nyị́ họ alẹrụ ọnyịịla ịịwa abwọhẹ, ọhẹka, iru nya angịnyị ịlụwa nyị ka da ajwọ mịla ịwa kwiwa.

27Ụka kị pwụ ụwa lẹ, ị kpa alẹrụ ọnyịịla ịịwa kele kaka godayị rịrị ị-ịlahị nya alọjịra-jịra nya ịkọtụ ọgbahị nyaa ọọwa lẹlẹ. Ịnyị, olegbeju ọgbahị nya angịkiliya nya Ohe Oluhye a juwa taa ịtọ lẹlẹ. 28Ọ taa wo yẹkẹẹ, “Ịịyẹ a tị́ du kahị gbileenu ụbwọ ụ-ụrụ nya ịlẹhị-ịlẹhị yẹkẹẹ, anụ mẹ ịngịngịhyẹ jẹ la ẹnyị nya iJisọsị ọwẹ kpong-kpong kaka, kanụ tị mwọọgịlẹ họ la ang ọmẹjẹ nyanụ ọọwa yịrị epweji nya iJerusalẹm yịrị wuu lẹẹ mẹ? Lee, anụ tị́ juwa tịtọ ká eje owuwu u-uhye nya ịwọ nya iJisọsị ọọwa ka ji uhye egbeju nyahị ahị lẹ?”

29Ma, iPita bala alẹrụ ọnyịịla ihihi ịkịla wuu wẹ byaa yẹkẹẹ, “Anụ wo mẹ! Ahị lẹ, ihi nya Ohe Oluhye, ahị ka ju pyii gụ ihi nya angịnyị ehe ojuju lẹlẹ. 30Chajị, Ohe Oluhye nya adahị igogo anyị ọọwa a ri Ọngọlẹ kọ wule iJisọsị ọlẹ kanụ wu kpa kaka gu iloo ba okoji eji bwula igu lẹ. 31Ohe Oluhye tị hu iJisọsị ọọwa kele ka iwe-ahụrụ oluhye kaka hụhụ u-upwuriri nya ịlọmwụ ịnyịnyị lẹ. Ohe Oluhye kpa iJisọsị ọọwa kele ka iwe-ahụrụ nya olegbeju oriri bala Ọngọchịda, ọlẹ kọ ka kpa ala Isirẹlụ kaka jẹ́ ang ọlẹ ká irya ọyẹda ri bala ọ-ka họ kị ka jẹ́-ẹ ye ọhịnyọhi nya ịhọbịrị ịhọhọ nyaa wuu bwu ẹga nya Ohe Oluhye myị́ lẹ. 32Lẹ, ahị angịlẹ kpakpakpa a ri alibeenu nya ẹrụ ọnyịịla nya ịKịrayịsị ọọwa lẹlẹ. Olegu Ịgọgọ nya Ohe Oluhye ọlẹ ká Ohe Oluhye kaa hu ha angịlẹ kị myị kaa ju Ohe Oluhye ihi, tịtị ri ibeenu nya ẹrụ ọnyịịla nya ịKịrayịsị ọọwa tahị ịnyịnyị!”

33Ụka ká alọjịra-jịra nya ịkọtụ ọgbahị nya ala iJuu ịịwa wo ẹla oyaya nya alẹrụ ọnyịịla ọọwa kọ waa ẹjẹ lụmẹ kaka kpoye lẹ, ị juwa charịnya nyọka nwụ alẹrụ ọnyịịla ịịwa pyii lẹlẹ. 34Ma, ọla ịFarịsii ọhẹ ọlẹ kọ kaa mẹ ehile nya iMosisi jẹ yẹẹyẹẹ juwa, ká ẹnyị nyamwụ ri ịGamalẹlụ. Ọ ri ọngọ la ihi-ihi lụmẹ ẹ-ẹpwarịrị nyaa ịwa wuu. Ụka ká ịGamalẹlụ wuleji godayị kọkọ ẹ-ẹpwarịrị nya alọjịra-jịra ọọwa wuu lẹ, ọ byaa yẹkẹẹ, anụ nyị ku alẹrụ ọnyịịla ịịwa kpehe bwu ẹpwụ nyịwa wẹẹ mẹ lẹlẹ. 35Ọọwa lẹ, ọ byi alọjịra-jịra ịịwa wuu yẹkẹẹ, “Anụ ala Isirẹlụ wuu, anụ wo mẹ! Anụ kpahị ju ịlọnụ u-uhye nya ang ọlẹ kanụ wẹẹ tịtọ nyọka họhọ ẹ-ẹga nya alẹng ịwẹ mẹ. 36Anụ tị́ ka kpịtịya nya ọngọhẹ ọlẹ kị wụrụ iTiyudasị lụka onyogo kọ wụrụ ịlọmwụ ọngọ ọtụka lụmẹ. Ọọwa lẹ, iru nya angịnyị lala angị ụnọ chiriri a juwa bọọ jẹ lala angịnyị nyamwụ lẹlẹ. Ma, ụka kị tị nwụ iTiyudasị olegbeju nyaa lẹ, angị bọọ jẹ ịịwa wuu rụnyẹ rụ, nyi epepe hi awụlẹ ugbeene. Ọọwa lẹ, imiti nyaa ọọwa a ta ayịreji pyịyọọ lẹlẹ. 37Ụka ká ọọwa chịpwụrụ kpá, ọngọkịla ọlẹ kọ bwu ọpyị nya ịGalili, ká ẹnyị nyamwụ ri iJudasị hu ụmwụ nya ịnyamwụ ọwa ịnyịnyị lụka ọlẹ ká ịgọmenti nya ọpyị ọlụwa juwa wa angịnyị ehe wuu. IJudasị ọọwa gbile iru nya angịnyị lụmẹ-lụmẹ kaka ji oye nya ịlọmwụ lụka ọọwa. Ma, ụka kị tị wu iJudasị olegbeju nyaa kpa kaka nwụ lẹ, angị bọọ jẹ wuu rụnyẹ rụ, nyi epepe hi awụlẹ pyịyọọ ịnyịnyị.” 38Ọọwa lẹ, ịGamalẹlụ a myịmyị byaa yẹkẹẹ, “Chajị nya ọọwa lẹ, anụ wo mẹ! Ẹ-ẹpwụ nya ẹla ọlẹ kọ pyeji lẹẹ ẹ-ẹpwarịrị nyahị lẹẹlẹẹ lẹ, anụ họ alẹng ịwẹ abwaabwọhẹ kpong-kpong kaka. Anụ bahyaa chịng mẹ. Chajị, ọ́ ri ká obyi omeme nyaa ọwẹ bala ụkụrwọ ọhọhọ nyaa ịwẹ wuu á bwu ẹpwụtụbwọ nya ọngịnyị ehe kpehe aalẹ, ụkụrwọ ọọwa á juwa ka godayị rịrị tata myị́ pyịyọọ kpong-kpong ka. 39Ma, ọ́ tị ri ká ụkụrwọ nyaa ọọwa á bwu ẹpwụtụbwọ nya Ohe Oluhye ayịdang la ịlọmwụ aalẹ, ánụ juwa ka jwaa kụrụ myị́ kpong-kpong ka. Aalẹ, anụ dọmwụ ka mwọọgịlẹ ri angị juwa tụ Ohe Oluhye ọọwa pyịpyị ịnyịnyị lẹ!”

40Ịnyị, ụka ká aluche ịịwa ye ọna ọdada nya ịGamalẹlụ ọọwa lẹ, ị wụrụ alẹrụ ọnyịịla nya ịKịrayịsị kele ka ẹpwụ nyaa lẹ, ị nyi alẹrụ ọnyịịla ịịwa enyiri yẹẹyẹẹ lẹ, ị gbilaa ụbwọ ụ-ụrụ nya ịlẹhị-ịlẹhị yẹkẹẹ, nyị kpa ẹnyị nya iJisọsị ya ẹlẹlẹhẹ je ọngọngọhẹ gụ olene kpong-kpong kaka lẹlẹ. Ọọwa lẹ, ị tụụbwọ hi alẹrụ ọnyịịla ịịwa rụ lẹlẹ. 41Ịnyị lẹ, alẹrụ ọnyịịla nya ịKịrayịsị ịịwa a rụ bwu ijata nya alọjịra-jịra nya ịkọtụ ọgbahị ọọwa, juwa chị ọkẹkẹnị ọtụka-ọtụka lẹlẹ. Chajị, ị yẹkẹẹ, Ohe Oluhye nyị kiji wa ịwa lala angị chịla ọ-ka yẹ akama bala ọ-chị oyoyi ju o-oluhye nya ẹnyị nya iJisọsị lẹ. 42Ụka ọọwa, alẹrụ ọnyịịla nya ịKịrayịsị ịịwa juwa kaa kele ka ube ịgọgọ ọtụka nya Ohe Oluhye nya ala iJuu bala ẹpwa nya angịnyị ẹnẹnẹẹnụ la ịnyọ ọmwụmwụ ka, juwa mẹ ang jẹ angịnyị ehe bala o-juwa ya ẹla nya Ohe Oluhye jaa yẹkẹẹ, iJisọsị kpakpakpa nyaa ri ịKịrayịsị ọọwa ọlẹ ká Ohe Oluhye nyị du ẹrụ warị wẹ odehe ọlẹ lẹ.

Currently Selected:

ỤKỤRWỌ nya ALẸRỤ 5: IBNO

Highlight

Copy