ỤKỤRWỌ nya ALẸRỤ 24

Ala IJuu Chị Ala Ba ỊPọlụ Ị-ịlahị nya Adịrahụ

1Ịnyị, ụka ká ẹnụtụrụ ịrụ chịpwụrụ lẹ, Ananịyasị olegbeju ọgbahị nya angịkiliya nya Ohe Oluhye bala ịgabwọ nya ala iJuu bala ọngọ kpa omyi ẹla nyaa ọlẹ kị wụrụ ịTẹẹtụlọsị a pwụ eji kele lẹlẹ. Ọọwa lẹ, ị kele kịlahị nya ịFẹlikisi Adịrahụ nya ọpyị ụ-ụwa i-iSisarịya, juwa chị ala ba ịPọlụ lẹlẹ. 2Ịnyị, ụka kị be ẹkọ wụrụ ịTẹẹtụlọsị, kọ ka ya ẹla lẹ, ọ juwa dọmwụ nya ala ọ-chị ba ịPọlụ lẹlẹ. Ọ yẹkẹẹ:

“Agaba idu olihi ọtụka, bwula ọpyị ọ-jẹ́ kpakpa hiigu lụmẹ nyang, a du kahị la okpunyi nya ịlẹhị-ịlẹhị ọ-ọpyị ọlẹ lẹ. Bwula ụkụrwọ ọhọhọ nyang ahụ ọngọ olihi ọtụka ịFẹlikisi, a du kahị la ang la datị-datị ọ-nwụ rịrị ọ-ọpyị nyahị lẹẹ ịnyịnyị lẹ. 3Lẹ, ahị kpa ọkẹkẹnị ye ọhọhọ nyang ọọwa ẹ-ẹpwụ nya ang myị́ ang wuu ju ka ẹga myị́ ẹga wuu ịnyịnyị ẹ-ẹpwụ nya obe ojiji. 4Ma, chajị nyọka myịmyị bịrịng ụka tata kaka lẹlẹ, Agaba idu, m jam bịlẹng ká ka ke ụrụ lomyi nya ẹla nyahị ọlẹ kahị lẹẹ ka ya lụka o-kpii wẹẹ. 5Ang onyobyi ọhọhọ nya ọlẹng ọlẹ ri ẹdụrụ hahị ọ-ọpyị ọlẹ lẹ. Ọwa-à ri ọlẹng ọlẹ kọ kaa du ala iJuu nyahị ju kị ka tụ Adịrahụ nya ọpyị pyịpyị ẹ-ẹga myị́ ẹga nya odehe ọlẹ wuu lẹ. Ọwa-à myịmyị ri olegbeju nya alebwo nya ogu ọlẹ kị wụrụ ịNasarin wuu lẹ. 6Ọ dọmwụ maga kọ ka kele kaka chị ịgọgọ ọlala ọlẹpwụ nya ube ịgọgọ ọtụka nya Ohe Oluhye nyahị ahị ala iJuu ịrị ịnọ ịnyịnyị. Ọọwa lẹ, ahị kele kaka woo ụ-ụwa lẹlẹ. [Ịnọ, irya nyahị ri ọ-ka la ịPọlụ eje jaabwọ ká ehile nyahị la, la ịlọhị. 7Ma, ịLayịsịyọsị ọlẹ kọ ri olegbeju ọgbahị ọgụgụ nya ịsọja nya ala iRom ịlụwa, a warị la ọngịrị-ọngịrị kaka kpa ịPọlụ rụ bwu ẹga nyahị lagbụrụ lẹlẹ. 8Ọọwa lẹ, ịLayịsịyọsị ọọwa a da alẹla nya ịPọlụ ehile yẹkẹẹ, nyị kpọọ warị wẹ ata nyang mẹ lẹlẹ.] ịPọlụ ayịdang tị-ị wẹ lẹ, ụka ká tọọ wo lẹ, a ka wo bwu ọnụ nyamwụ u-uhye nya ẹla myị́ ẹla ọlẹ wuu kahị lẹẹ chị bọọ lẹlẹ.” 9Ọọwa lẹ, ala iJuu ịkịla wuu a myị ju ala ịlẹ wuu ká ịTẹẹtụlọsị chị ba ịPọlụ yẹkẹẹ, ịnyị nyaa la ịnyịlẹhị lẹlẹ.

ỊPọlụ Tịrị Ọnụ Ẹla nyamwụ Ị-ịlahị nya Adịrahụ ỊFẹlikisi

10Ịnyị, ụka ká ịFẹlikisi Adịrahụ nya ọpyị, da ụbwọ ka ẹga nya ịPọlụ chajị kọ ka tịrị ọnụ-ẹla nyamwụ lẹ, ịPọlụ a wẹ yẹkẹẹ, “Agaba idu, jaabwọ kam jẹ́ yẹkẹẹ, ahụ ayịdang ri Agaba ọ-la eje nya ụpwọma nyahị ọlẹ la iru nya ẹka lụmẹ-lụmẹ lẹlẹ, ọ ri ang ọ-kpụm ịpyọ lụmẹ nyọka tịrị ọnụ-ẹla nyam ya jeng. 11Ahụ ayịdang ka la ọngịrị tịtọ wo myị́ nyọka jẹ́ myịmyị yẹkẹẹ, bwu ụka ọlẹ kaam ịPọlụ ọlẹ kele ka iJerusalẹm kaka gbịgba ha Ohe Oluhye ụ-ụwa lẹ, ọ́ lụrụ gụ ẹnụtụrụ iwo kụrụ imiiye myị́ kpong-kpong lẹka. 12Ẹ-ẹpwụ nya ẹnụtụrụ ịịwa wuu tị lẹ, ala iJuu ịwẹ wuu ọhẹ-lọhẹ á tị wo kaam ịPọlụ ọlẹ juwa rwarụ ta ọngọngọhẹ kpong-kpong ka lee o-juwa yí iru nya angịnyị ọhẹ-lọhẹ uyawụ ẹ-ẹgẹhẹ kpong-kpong ka. Ó ri ẹpwụ nya ube ịgọgọ ọtụka nya Ohe Oluhye nya ala iJuu riri lee ẹ-ẹpwụ nya ebe ị-mẹ ẹla nya Ohe Oluhye jẹ wuu lee ẹ-ẹpwụ nya epweji ayịdang wẹwẹ ka ịnyịnyị. 13Ala ị-chị ba nya ọnọọkịla nyaa ịwẹ kị ya rụ́m wuu tị lẹ, ị́ tị ka jẹ́-ẹ yé ọhẹ-lọhẹ gbe jum myị́ kpụ, eje nyaa ka wum myị́ kpong-kpong ka ịnyịnyị. 14Ma, ẹla ọlẹ kam ka jẹ́-ẹ ya dodehe jeng kẹnẹ-kẹnẹ ri yẹkẹẹ, m kaa raabwọ ha Ohe Oluhye la ụgbẹyị onyeewe nya Ọngọlahị iJisọsị ịKịrayịsị ịnyịlẹhị. Ọọwa lẹ, ị wẹẹ yẹkẹẹ, am nyị ri alebwo ọhẹ datị hi ịwa lẹlẹ. Ma, Ohe Oluhye ọlẹ ká adahị igogo anyị tị kaa gbịgba ha, Ọwa-à tị ri Ohe ọlẹ kam myị la ịnyịnyị, juwa họ ehile ọnyị myị ọnyị wuu ọlẹ kị da bala ala ịlẹ wuu ká alọmwụ inyogo nya Ohe Oluhye da ju ụ-ụpwụ ịnyịnyị lẹ. 15Ẹhị ọrịrịị-rịrị ọnyịịla ọlẹ kam la ẹ-ẹga nya Ohe Oluhye lẹ, ọ́ tị datị hi ọlẹ kịịwa ayịdang tịtị myị ju ịnyịnyị ka. Chajị, ẹhị ọrịrịị-rịrị nyahị ọọwa ri yẹkẹẹ, owuleji bwula igu ka juwa ha angịnyị wuu tụ alabwẹla ọnyịịla bala alabwẹla onyobyi ịnyịnyị wuu. 16Ọlịnyị kpangga, a du kaam ayịdang kaa maga ụka wuu nyọka họ kam ka họ ịngịngịhyẹ ọlẹ ká irya ọ-la ọngịnyị eje ọlẹpwụ nyam ka ya eje wum ị-ịlahị nya Ohe Oluhye ka lee ị-ịlahị nya ọngọngọhẹ kpong-kpong kaka lẹlẹ.”

17“Ụka ọlẹ kam rụ bwu epweji nya iJerusalẹm la iru nya ẹka lụmẹ-lụmẹ chịpwụrụ lẹ, m hu ang tịrẹkpẹ kele kpa okpoko nya ọgahị ọnahị ọlẹ kị ya dum ẹrụ kịla alẹpwụma nyam ịla iJerusalẹm bala ọ-ka gbịgba ha Ohe Oluhye ụ-ụwa bwula iya ọkịlaakịla ha Ohe Oluhye ịnyịnyị lẹlẹ. 18Ịnyị, ụka ọlẹ kam juwa kpa ịgba ọọwa gba ha Ohe Oluhye lẹ, ala iJuu ịlẹ kị bwu ọpyị nya Echiya a warị kaka yẹm ụ-ụwa lụka ọlẹ kam juwa kpa ehile nya odo nya ocheri-cheri ọlala nyahị ahị ala iJuu họ u-ube ịgọgọ ọtụka nya Ohe Oluhye nya ala iJuu lẹlẹ. Ụka ọọwa tị lẹ, iru nya angịnyị ịhyẹ á juwa tam ụ-ụwa kpong-kpong ka. Lee, ojigi-jigi ọhẹ-lọhẹ ọ-kpụ eji ụ-ụwa kpong-kpong ka ịnyịnyị. 19Ịnọ, ọ chịla ká ala iJuu ịịwa ayịdang la ịlaa ka jam i-ijata lẹẹlẹẹ, kị ka kpa eje nya ụma nya ang ọlẹ kam họ kpehe, kọ ri kị ka ye ịngịngịhyẹ gbe jum. 20Jaabwọ kịịwa á tị jam kaka lẹlẹ, ọ́ tị ri ká angịlẹ kị jam i-ijata lẹẹlẹẹ á ka yé ịngịngịhyẹ onyobyi ọlẹ kị ya eje nyamwụ wum lụka ọlẹ kị wụrụ eje ka ata nya ala ịkọtụ ọgụgụ nyaa wuu lẹ aalẹ, ị ya mẹ. 21Ẹla ọlẹ kẹnẹ-kẹnẹ kị ye yụbwọ chị ri ẹchẹ nya ẹla ookpokpo ọlẹ kam ya dodehe gboo lụka ọlẹ kam godayị rịrị ị-ịlahị nyaa wuu. Chajị, m yẹkẹẹ, ‘Ajị nyọlẹ kam la ẹhị ọrịrịị-rịrị gbe owuleji bwula igu nya angị gbugbu a du kị wụrụm eje lẹẹ warị wẹ ata nyanụ wuu alẹ lẹlẹ.’ ”

22Ma, ụka ọlẹ ká ịFẹlikisi wo ọnụ-ẹla nyaa kpá wuu lẹ, jaabwọ kọọwa ayịdang jẹ́ ang chajị nya ụgbẹyị onyeewe nya ọmyịmyị nya Ọngọlahị yẹẹyẹẹ lẹlẹ, ọ wẹ byaa ịwa wuu yẹkẹẹ, “Ụka ọlẹ ká ịLayịsịyọsị olegbeju ọgbahị nya ịsọja ayịdang á warị lẹ aalẹ, m ka jẹ́-ẹ chị eje nya ẹla nyanụ ọwẹ wẹẹ lẹ!” 23Ọọwa lẹ, adịrahụ ịFẹlikisi ọwẹ a byi olegbeju ọkpẹhị rịrị ịsọja ohu iru ọọwa yẹkẹẹ, ahụ nyị kpa ịPọlụ rụ kele ka ijalo mẹ lẹlẹ. Ma, ahụ nyị́ tị-ị ya ẹga da ha ịPọlụ pwọọ ụ-ụwa! Ahụ nyị ku aligu nya ịPọlụ ọhẹ-lọhẹ iwe nyọka kele ka ụwa kaka myị ẹrụ ha ịPọlụ ka lẹ koo!

ỊPọlụ Ị-ịlahị nya ỊFẹlikisi Bala IDurusila

24Ụka ká ẹnụtụrụ ịmanyị ịmanyị chịpwụrụ, ịFẹlikisi bala iDurusila ahụ nyamwụ ọlẹ kọ ri ala iJuu, pwụ eji lẹ, ọ du ẹrụ ta ịPọlụ chajị kọ ka wo ẹla Ohe oyaya u-uhye nya ọmyịmyị ọlala ẹ-ẹga nya ịKịrayịsị iJisọsị joo lẹlẹ. 25Ịnyị, ụka ọlẹ ká ịPọlụ juwa ya ẹla dodehe rụ́ abwẹla ọnyịịla ọhọhọ bala ang ọ-họ ba o-oyi bala eje ọtụka nya Ohe Oluhye ọlịlahị lẹ, ọ la adịrahụ ịFẹlikisi uhi-uhi lụmẹ lẹ, ọ byi ịPọlụ yẹkẹẹ, “Rụ hi ẹga nyam lẹẹlẹẹ wẹẹ! Ụka kam hi ụbwọ lẹ aalẹ, m ka be ẹkọ wụrụng warị lẹlẹ.” 26Ụka ọọwa, ịFẹlikisi ọwẹ la ẹhị ọrịrịị-rịrị gbe okpoko ochikiriju ọlẹ kọ ka ye bwu ẹpwụtụbwọ nya ịPọlụ ịnyịnyị. Ịnyị a du kọ juwa kaa be ẹkọ wụrụ ịPọlụ hyaahyaa, juwa ja oja tọọ ịnyịnyịịnyị lẹ.

27Ma, ụka ọlẹ ká ẹka imiiye chịpwụrụ kam kpá lẹ, ị kpa ọlẹng ọlẹ kị wụrụ ịPọsịyọsị ịFẹsịtọsị kaka ku ọmwakpa nya ịFẹlikisi lẹlẹ. Jaabwọ ká ịFẹlikisi tịtọ nyọka họ ang ọlẹ kọ ka kpụ ala iJuu wuu ịpyọ lụka nyamwụ lẹ, ọ tụụbwọ hi ịPọlụ juwa u-ube nya agba pyịyọọ lẹlẹ.

Currently Selected:

ỤKỤRWỌ nya ALẸRỤ 24: IBNO

Highlight

Copy