ỤKỤRWỌ nya ALẸRỤ 23
23
1Ịnyị, ụka ká ịPọlụ juwa mwụụrụ yẹ alegbeju ileje nya ịkọtụ ọgbahị ọọwa wuu lẹ, ọ byaa yẹkẹẹ, “Anụ anyadam, anụ wo mẹ! Ọhịhị ọlẹ kam la ị-ịlahị nya Ohe Oluhye lẹ, m lọọ ẹ-ẹpwụ nya ọkịlẹtụ ọgbagbịlagba la irya nyam ọ-ya eje wum wu kpong-kpong ka pyịyọọ daalẹ ọlẹ.” 2Ụka ọọwa, Ananịyasị ọlẹ kọ ri olegbeju ọgbahị nya angịkiliya nya Ohe Oluhye wuu, da angịhyẹ ịlẹ kị godayị rịrị ju ịPọlụ chwẹẹ ehile yẹkẹẹ, “Anụ wa ịPọlụ ọwẹ abwọ ọ-ọnụ nyamwụ ọwẹ ham pyii!” 3Ịnyị, ịPọlụ a wẹ byi Ananịyasị yẹkẹẹ, “Ohe Oluhye tịtị ka wang ahụ ọngọwẹ abwọ ịnyịnyị, ahụ ọngọ há ụhị nya ọhọ olida kem ọwẹ. Ọ tị́ lanyị ká hụhụ, juwa kpa ehile nya Ohe Oluhye lam eje, ká tị mwọọgịlẹ juwa bịrị ehile ọọwa bwula o-byi angịkịla yẹkẹẹ, nyị wam abwọ mẹ?”
4Ọọwa lẹ, angịlẹ kị godayị rịrị ju ịPọlụ chwẹẹ a byoo yẹkẹẹ, “Ọọhọ! Ọ tị́ lanyị ká juwa yalibyi la olegbeju ọgbahị nya angịkiliya nya Ohe Oluhye ya ịnyị?”
5ỊPọlụ wẹ byaa yẹkẹẹ, “Anụ anyadam, anụ yẹ mẹ! Aḿ jéjé wẹẹ yẹkẹẹ, ọlẹng ọlẹ a ri olegbeju ọgbahị nya angịkiliya nya Ohe Oluhye lẹ, kpong-kpong ka! Chajị, ị da kpehe ụ-Ụpwụ Ịgọgọ yẹkẹẹ, ‘A ya ẹla onyobyi rụ́ olegbeju ọkpẹhị rịrị angịnyị nyanụ kpong-kpong ka.’ ”
6Ụka ọlẹ ká ịPọlụ jẹ́ yẹkẹẹ, angịhyẹ lẹpwarịrị nya alọjịra-jịra nya ịkọtụ ọgbahị ọọwa nyị ri alogu nya ịSadusii bala alebwo ọkịla nyaa o-ri ala ịFarisii lẹ, ọ ya ẹla dodehe gboo ẹ-ẹpwụ nya ọjịra-jịra ọọwa yẹkẹẹ, “Anụ anyadam, anụ wo mẹ! Am lẹ, ala ịFarisii, m ri lẹ. Chajị, ọnyị nya ala ịFarisii, m ri lẹ. Ang odudu kị kpa wụrụm eje ọlẹ warị wẹ ata nyanụ ri yẹkẹẹ, m la ẹhị ọrịrịị-rịrị u-uhye nya owuleji bwula igu nya angị gbugbu.”
7Ahyaahị ká ịPọlụ ya ẹla ọọwa ịnyị kpá lẹ, ebwo ọchịchị a juwa ẹ-ẹpwarịrị nya ala ịFarisii bala ala ịSadusii ịlọjịra-jịra ọọwa lẹ, ị gu ene ebwo imiiye lẹlẹ. 8Chajị, ala ịSadusii lẹ, ị́ myị yẹkẹẹ, ịngịngịhyẹ nyị ri eji owuleji bwula igu nya angị gbugbu kpong-kpong ka lee alegu-ẹrụ o-juwa ji lee Olegu nya Ohe Oluhye o-juwa ji ẹ-ẹgẹgẹhẹ ka ịnyịnyị. Ma, ala ịFarisii tị lẹ, ị myị ju ẹchẹ nya ang ịlịta ịwẹ wuu. 9Ịnyị lẹ, ọmọnyọ nya arụ ọrụrụ ọtụka-ọtụka a kpụ eji ụ-ụwa lẹlẹ. Ọọwa lẹ, angịhyẹ ịlẹ kị ri angị jẹ́ ehile nya iMosisi lụmẹ-lụmẹ bwu ẹpwarịrị nya ala ịFarisii a wuleji godayị kọkọ lẹ, ị juwa ya dodehe la ọngịrị-ọngịrị yẹkẹẹ, “Áhị́ yẹ ịngịngịhyẹ ọtịpyọ ẹ-ẹga nya ọlẹng ọlẹ kpong-kpong ka. Ma, ó ri kọ ri Olegu nya Ohe Oluhye, lee olegu-ẹrụ, kọ ya ẹla ta ọlẹng ọlẹ ịnyị, ịnyịlẹhị tụbwọ aalẹ, ó ri kahị jẹ́ họ kaka lẹ aalẹ, Ohe Oluhye ayịdang a wẹẹ kahị wẹẹ ka tụ pyịpyị lẹlẹ!”
10Ịnyị, ụka ká o-wo lawụlẹ-ka ọọwa juwa chị ila nya ịlẹhị-ịlẹhị lẹ, olegbeju ọgbahị nya ịsọja ọọwa wuu a juwa juhi yẹkẹẹ, ọhẹka, iru nya angịnyị ịịwa nyị ka wọ ịPọlụ pẹtẹ pẹtẹ daarụ bwula agbama ojuju nyaa myị́. Ọọwa lẹ, ọ du ịsọja ilekpeleji nyamwụ ịhyẹ ẹrụ kele kaka kpa ịPọlụ rụ bwu ẹpwarịrị nya iru nya angịnyị ịịwa lagbụrụ kele ka ọbarike nyaa ịwa ịsọja lẹlẹ.
11Ụka ká odu hi ẹnụ ọọwa lẹ, Ọngọlahị la a kele kaka godayị rịrị ẹ-ẹga nya ịPọlụ a-arụrụ lẹ, ọ byoo yẹkẹẹ, “ỊPọlụ, la ẹjẹ ọkpụ́kpụ mẹ. Chajị, jaabwọ kaahụ ayịdang ri ibeenu nyam i-iJerusalẹm wẹẹ, ịnyịnyị, a ka kele kaka ri ibeenu nyam ụ-ụwa e-epweji nya iRom pyii lẹlẹ.”
Obyi nya Igu Ọlẹ Kị Me Ju ỊPọlụ
12Ịnyị, ụka ká ahị ọọnamwụ pyẹ lẹ, ala iJuu ịhyẹ a kele kaka me obyi nya igu, gu awụlẹ kpọng-kpọng la iro ọnwanwa yẹkẹẹ, ịwa nyị́ ka kpa ang oriri lee enyi ọnwanwa ọhẹ-lọhẹ ka ọnụ nyịwa kpong-kpong kaka, gbee pwụ ụka ọlẹ kịịwa nyị ka nwụ ịPọlụ kpá ene pyii lẹlẹ. 13Ala iJuu ịịwa ịlẹ kị me obyi nya igu ọọwa ju ịPọlụ la iro ọnwanwa lẹ, iru ojuju nyaa gụ angịnyị angị ohu-iye myị́. 14Ọọwa lẹ, angịịwa a kele ka ẹga nya alegbeju ịgbahị nya angịkiliya nya Ohe Oluhye wuu bala ịgabwọ nya ala iJuu lẹ, ị byaa yẹkẹẹ, “Ahị nwa iro nya ịlẹhị-ịlẹhị yẹkẹẹ, áhị́ ka kpa ang oriri ọhẹ-lọhẹ ka ọnụ nyahị kpong-kpong kaka, gbee pwụ ụka ọlẹ kahị ka nwụ ịPọlụ kpá ene pyii lẹ! 15Chajị nya ọọwa lẹ, anụ chuchuu, kaanụ bala alegbeju ileje nya ịkọtụ ọgbahị nyanụ ọlẹ a du ẹrụ kele kaka byi olegbeju ọgbahị nya ịsọja ọlaanyị kọ tụụbwọ hi ịPọlụ du wanụ chajị kanụ ka myịmyị-ị̀ dịrẹ ẹla nyamwụ yẹẹyẹẹ mẹ. Ụka kị ka kpa ịPọlụ warị lẹ, ahị ka kele kaka kụ ịnya gbe ịPọlụ kahị ka nwọọ ene kị ka kpọọ pwụ ẹ-ẹga nyanụ lẹlẹ.”
16Ma, ụka ọọwa, ọnyị ọlẹng nya ọnyịnịna ọnyang nya ịPọlụ wo ang chajị nya obyi omeme nyọka kụ ịnya gbe ịPọlụ ọọwa. Ịnyị lẹ, ọ ba ịPọlụ kele ka ọbarike nya ịsọja ọọwa kaka ya joo lẹlẹ. 17Ọọwa lẹ, ịPọlụ a be ẹkọ wụrụ olegbeju ọkpẹhị rịrị ịsọja ohu ịrụ ọhẹ lẹ, ọ byoo yẹkẹẹ, “Kpa ọnyị ọlẹng ọlẹ kele ka ẹga nya olegbeju ọgbahị ọgụgụ nyanụ wuu wẹẹ. Chajị, ọ la ẹlẹhẹ ka ye ya joo.” 18Ịnyị, olegbeju ọkpẹhị rịrị ịsọja ohu ịrụ ọọwa, a kpa ọnyị ọlẹng ọọwa kele ka ẹga nya olegbeju ọgbahị ọgụgụ nyaa ịwa ịsọja wuu lẹ, ọ byoo yẹkẹẹ, “ỊPọlụ ọlẹng olube nya agba ọlaanyị, a byim yẹkẹẹ, am nyị kpa onjwo ọlẹng ọlẹ warị wẹ ẹga nyang mẹ lẹ. Chajị, ịPọlụ ya, ọngọlẹ nyị la ẹlẹhẹ ka ya jeng.”
19Ịnyị, olegbeju ọgbahị nya ịsọja ọọwa a yụbwọ chị ọnyị ọlẹng ọọwa kpa kele kaka godayị rịrị ẹ-ẹgẹhẹ ụbwaa-ụbwaa lẹ, ọ tọọ wo yẹkẹẹ, “Ẹla ịyẹ, a tị́ tịtọ ká ka ya jem?”
20Ọlẹng okolobya ọọwa wẹ byoo yẹkẹẹ, “Ala iJuu wuu me obyi gu awụlẹ kpọng-kpọng yẹkẹẹ, ịwa nyị juwa ka warị kaka bying kaahụ nyị ka kpa ịPọlụ warị wẹ ẹpwụ nya ọjịra-jịra nya ịkọtụ ọgbahị nyịwa ijuju, lala o-ri yẹkẹẹ, ị juwa tịtọ kị ka myịmyị dịrẹ ẹla nya ịPọlụ ọwẹ myịmyị yẹẹyẹẹ. 21Ma, ọbịlẹ bịlẹ nyam ri yẹkẹẹ, a myị jwaa kpong-kpong ka. Ang odudu kam ya ịnyị ri yẹkẹẹ, iru nya angịnyị lẹpwarịrị nyaa, gụ angịnyị angị ohu-iye juwa ka kụ ịnya ụ-ụgbẹyị gbe ịPọlụ kị ka nwọọ. Chajị, angịịwa nwa iro yẹkẹẹ, ịwa nyị́ ka kpa ang oriri ọhẹ-lọhẹ lee enyi ọnwanwa ka ọnụ nyịwa kpong-kpong kaka, gbee pwụ ụka ọlẹ kịịwa nyị ka nwụ ịPọlụ kpá ene. Lẹ, ang ọlẹ kị laa godayị gbe ụbwọọmwụ, a ri ọnụ ọmyịmyị o-bwu ẹga nyang lẹlẹ.”
22Ịnyị lẹ, olegbeju ọgbahị nya ịsọja ọọwa, a byi ọlẹng okolobya ọwẹ yẹkẹẹ, ahụ nyị rụ mẹ lẹ, ọ byoo yẹkẹẹ, “A ya je ọngọngọhẹ yẹkẹẹ, ahụ nyaa kpa ẹla ọlẹ warị kaka ya jem lẹ, kpong-kpong kokoo!”
Ị Ya ỊPọlụ Du Ẹrụ Kele Ka Ẹga nya Adịrahụ ỊFẹlikisi
23Ọọwa lẹ, olegbeju ọgbahị nya ịsọja ọọwa a be ẹkọ wụrụ alegbeju imiiye ịkpẹhị rịrị ịsọja ohu ịrụ ilekpeleji nyamwụ lẹ, ọ byaa yẹkẹẹ, “Anụ kele kaka chụ ịsọja ịlam-ịlam angị ohu iwo chiriri ba ịlọnụ bala ịsọja ị-kụ anyịrẹ angị ohu ịta kụrụ iwo bala ịsọja ị-kpa oje ọkpachị dẹwụ angịnyị angị ohu iwo chiriri ịnyịnyị mẹ. Ụka ká oje ihikichu nya odu á họ bwaaa lẹ, kanụ ka kpa ịPọlụ chị gbee pwụ ọpyị nya iSisarịya mẹ. 24Anụ́-ụ kpa anyịrẹ ịhyẹ ịlẹ ká ịPọlụ ka kụ ịnyịnyị, kanụ kpọọ kele la okpunyi kịla ịFẹlikisi Adịrahụ nya ọpyị ọlụwa mẹ.”
25Olegbeju ọgbahị nya ịsọja ọọwa da ileta u-uhye nya ẹla ọọwa daa ẹrụ kele. Ọ ya ẹ-ẹpwụ nya ileta ọọwa yẹkẹẹ:
26“Ileta ọlẹ jam bwu ẹga nyam am iKilodiyọsị ịLayịsịyọsị warị wẹ ẹga nyang ahụ ịFẹlikisi olihi ọtụka, Adịrahụ nya ọpyị. Ye ọnụ ọdachị nyam mẹ. 27Adịrahụ wo mẹ! Ọlẹng ọlẹ kị wụrụ ịPọlụ lẹ, ala iJuu kele kaka woo lẹ, ị juwa tịtọ kị nwọọ lẹlẹ. Ịnyị lẹ, m kpa ịsọja ịhyẹ ba ịlọm kele kaka chị ịPọlụ da bwu ẹpwụtụbwọ nyaa lẹlẹ. Chajị, m wo oja yẹkẹẹ, ịPọlụ ọlẹ ri ọnyị oleji nya ala iRom. 28Ịnyị, ụka kam juwa tịtọ kam ka wo ọnụ-ẹla nya alịlẹ kị juwa chị bọọ lẹ, m kpa ịPọlụ kele ka ẹpwụ nya ọjịra-jịra nya ịkọtụ ọgbahị ọgụgụ nyaa wuu lẹlẹ. 29Ụka kam pwụ ụwa lẹ, ang ọlẹ kam wo bwu ẹga nyaa ri ala ọ-chị ba ịPọlụ u-uhye nya ang chajị nya ehile nyaa ịwa ala iJuu. Ma, ị́ tị yé ịngịngịhyẹ ya ọlẹ kọ ka kpụ igu lee ọ-kpụ agba ojuju ha ịPọlụ kpong-kpong ka. 30Ịnyị, ụka ọlẹ kam wo oja yẹkẹẹ, angịhyẹ lẹpwarịrị nyaa nyị me obyi nya igu ju ịPọlụ lẹ, ịnyị a du kam lẹẹ doo warị wẹ ẹga nyang ahyaahị-ahyaahị lẹlẹ. M jam ka byi alẹla nya ịPọlụ kịịwa ayịdang ka warị kaka tịrọnụ nya ala ịlẹ kị la ka chị ba ịPọlụ ị-ịlahị nyang ịnyịnyị lẹ.”
31Ịnyị, ịsọja ịịwa a kpa ịPọlụ hu ang ẹdịyẹ ịnyịlẹhị jaabwọ ká olegbeju ọgbahị nyaa byaa lẹ, ị kpa ịPọlụ jẹ lodu ọọwa gbee kị pwụ epweji nya Antipatirisi lẹlẹ. 32Ịnyị, ụka ká ahị ọọnamwụ pyẹ lẹ, ịsọja ịlẹ kị kpa ẹta, a tịrẹkpẹ bwu epweji nya Antipatirisi lẹ, ị nya kele ka ọbarike nyaa ịwa ịsọja lẹlẹ. Ọọwa lẹ, ịsọja ihihi ịlẹ kị ri angị kụ anyịrẹ, a kpa ịPọlụ chị kele ka iSisarịya lẹlẹ. 33Ụka kị jẹ pwụ iSisarịya lẹ, ịsọja ịịwa a kpa ileta kele kịla ịFẹlikisi Adịrahụ nya ọpyị lẹ, ị kpa ịPọlụ kaka godayị rịrị ị-ịlahị nyamwụ ịnyịnyị lẹlẹ. 34Ụka ká ịFẹlikisi wa ileta ọọwa kpá lẹ, ọ tịtọ wo yẹkẹẹ, oye nya ịkịka nya ọpyị oyina kpangga, ịPọlụ nyaa tị́ bwu ene? Ụka kị ya joo yẹkẹẹ, ịPọlụ nyị bwu ọpyị nya iSilisiya lẹ, 35ịFẹlikisi a yẹkẹẹ, “ỊPọlụ, ụka ká alẹla nyang anyị, á pwụ eji kpá lẹ, m ka wo ọnụ-ẹla nyang lẹlẹ.” Ọọwa lẹ, adịrahụ ịFẹlikisi a da angịnyị nyamwụ ehile yẹkẹẹ, nyị juwa gbe ịPọlụ ụ-ụwa ọdọdẹpwa nya adịrahụ iHerọdụ mẹ lẹlẹ.
Currently Selected:
ỤKỤRWỌ nya ALẸRỤ 23: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
