ỤKỤRWỌ nya ALẸRỤ 22

1“Anụ anyadam bala adam anyị, anụ ke ụrụ la ọnụ-ẹla nyam ọlẹ kam wẹẹ ka tịrị ya jenu mẹ.” 2Ịnyị, ụka ká angịịwa wo jaabwọ ká ịPọlụ juwa kpa oja nya ala iHiburu ya ẹla taa lẹ, ị myịmyị juwa ba la ọmọnyọ kem gụ olene-ene lẹlẹ. Ọọwa lẹ, ịPọlụ a yẹkẹẹ:

3“Anụ wo mẹ! Am ri ala iJuu ọlẹ kị ma e-epweji nya ịTaasọsị ọ-ọpyị nya iSilisiya. Ma, e-epweji nya iJerusalẹm ọlẹ kpangga a tị ri ẹga ọlẹ kam ka ube nya ụpwụ nyam a-ata nya ịGamalẹlụ lẹ. ỊGamalẹlụ mẹ ang okpori-kpori jẹ́m chajị nya ehile nya ọhọhọ nya adahị igogo anyị hiigu-hiigu. Am ayịdang la ila ọchịchị ẹ-ẹga nya ehile nya Ohe Oluhye ọkpakpa jịra, jaabwọ kaanụ ayịdang tịtị la ila ọchịchị ọọwa ẹ-ẹpwụ nyanụ wẹ alẹ. 4Ụka ọọwa lẹ, m kaa juwa tụ angịlẹ wuu kị ri angị kaa dịrẹ ụgbẹyị nya ọhịhị onyeewe nya Ọngọlahị iJisọsị ịKịrayịsị ọlẹ, pyịpyị lụmẹ dọmwụ gbee pwụ igu ọ-nwaa nwụ. M kaa wu alẹng bala anyang nya angị ịlịnyị kpa kaka ju agba. 5Olegbeju ọgbahị nya angịkiliya nya Ohe Oluhye bala ịgabwọ ịgbahị nya ịkọtụ oleje ọgụgụ nyahị wuu ịlụka ọọwa dọmwụ ka ri ibeenu nyam ẹ-ẹpwụ nya ọọwa yẹkẹẹ, ẹla nya ịlẹhị, am nyaa wẹẹ ya lẹ. Chajị, ịwa ayịdang a ri angịlẹ kị dọmwụ da ileta jum ụ-ụbwọ yẹkẹẹ, am nyị kpa kele kịla ala iJuu anyadahị ịlẹ kị juwa e-epweji nya ịDamasịkọsị lụka ọlẹ kam juwa ka kele nyọka juwa kaka wu angịịwa wuu kam ka kpaa kaka ju agba e-epweji nya iJerusalẹm ọlẹ, chajị kị ka yaa akama lẹ.”

ỊPọlụ Tịrị Ọnụ nya Irya Ọyẹda nyamwụ

6“Ịnyị, ụka kaam ịPọlụ ọlẹ hu ang ẹdịyẹ ọọwa, kam jẹdịyẹ gbee kaka ju epweji nya ịDamasịkọsị chwẹẹ lụka nya ẹnụ ọrịrị ẹ-ẹpwayịrẹtẹ lẹ, ahịgboo ọtụka-ọtụka ọhẹ a chị hwoo lala apya dagaga jum ụ-ụgbẹyị ọọwa lụka ọ-mwaa lẹlẹ. 7Ịnyị lẹ, m chị keji kpịlagada dụwa ị-ịpyị lẹ, m wo ká omyi ọhẹ juwa ya ẹla tam yẹkẹẹ, ‘ịSọlụ, ịSọlụ, ịịyẹ a tị́ du ká juwa tụm pyịpyị lụmẹ ịnyị?’ 8Ụka ọọwa, am ịPọlụ tọ omyi ọọwa wo yẹkẹẹ, ‘Ahụ, owo a tị́ wẹẹ ya ẹla tam ene, Ọngọlam la?’ Omyi ọọwa wẹ byim yẹkẹẹ, ‘Am kpakpakpa a ri iJisọsị ọla ịNasareti ọngọlẹ ká wẹẹ tụ pyịpyị lẹ.’ 9Ụka ọọwa angịlẹ kị juwa tam, yẹ ahịgboo ọtụka ọọwa ọlẹ kọ chị jum. Ma, ị́ tị wo omyi ẹla nya ọngọlẹ kọ juwa ya ẹla ọọwa tam kpong-kpong ka. 10Ọọwa lẹ, m wẹ byi omyi ọọwa yẹkẹẹ, ‘Ịịyẹ a tị́ tịtọ kam ka họ hang, Ọngọlahị la?’ Ọọwa lẹ, Ọngọlahị a wẹ byim yẹkẹẹ, ‘ỊSọlụ, wuleji ká rụ kele ka epweji nya ịDamasịkọsị mẹ. Ụ-ụwa, m ka ya jeng ụma nya ang myị́ ang ịlẹ wuu kam me obyi yẹkẹẹ, ahụ ịSọlụ, ka họ ham lẹlẹ.’ 11Ịnyị, ụka ọlẹ kam jẹ́ yọyị kaka, chajị nyọlẹ ká ahịgboo ọtụka ọọwa kpụm idu chwiichwii lẹ, alogu ẹdịyẹ nyam a yụbwọ chịm, juwa kpam ụgbẹyị kele ka epweji nya ịDamasịkọsị lẹlẹ.”

12“Ụka ọọwa, ọlẹng ọhẹ ká ẹnyị nyamwụ ri Ananịyasị ọlẹ kọ ri ọngọ myị la Ohe Oluhye nya ịlẹhị-ịlẹhị, juwa e-epweji nya ịDamasịkọsị ọọwa. Ananịyasị ọọwa, ri ọngọ kaa kpa ehile nya iMosisi yẹẹyẹẹ lụmẹ. Ala iJuu ịlụwa wuu kaa ya ẹla ọnyịịla nyamwụ lụmẹ ịnyịnyị. 13Ịnyị, Ananịyasị ọọwa a warị kaka godayị rịrị ẹ-ẹga nyam lẹ, ọ byim yẹkẹẹ, ‘ỊSọlụ, ọnyadam ẹ-ẹpwụ nya ịKịrayịsị, ye ọyị ọyẹyẹ nyang lẹẹlẹẹ mẹ!’ Ọọwa lẹ, m ye ọyị ọyẹyẹ nyam iijata-ijata lẹ, m jẹ́ yẹ Ananịyasị ayịdang yẹẹyẹẹ lẹlẹ. 14Ịnyị, Ananịyasị a byim yẹkẹẹ, ‘ịSọlụ, wo mẹ! Ohe Oluhye nya adahị igogo anyị a chụng wẹ, chajị ká ka jẹ́-ẹ jẹ́ ang ọlẹ ká irya nya Ohe Oluhye ri kpangga lẹ. Ohe Oluhye a tị myịmyị họ du ká yẹ Ọnchẹ Ọlabwẹla Ọnyịịla nyamwụ bala o-wo omyi ẹla o-bwu ọnụ nya ọngọọwa wẹ ịnyịnyị lẹ. 15Ohe Oluhye họ ịnyị, chajị kaahụ ịSọlụ ọwẹ ka jẹ́-ẹ juwa ri ibeenu nya ang ọlẹ ká kpẹhị nya ịlọng yẹyẹ wuu bala ọlẹ ká kpa ụrụ nya ịlọng wowo ịnyịnyị je angịnyị ehe wuu chajị nya Ọnchẹ Ọlabwẹla Ọnyịịla nya Ohe Oluhye ọọwa. 16Chajị nya ọọwa lẹ, a bịrị ụka myịmyị kaka ịSọlụ, wuleji ká kẹwẹ kaka hụ enyi Ohe nya ibeenu yẹkẹẹ, ị hụ́ ịhọbịrị nyang wuu hụrụ hing lẹ mẹ, ká juwa be ẹkọ wụrụ ẹnyị nya Ọngọlahị la kịlahị-ịlahị ẹ-ẹpwụ nya ịgba ọgbagba họọ mẹ.’ ”

Ohe Oluhye Chụ ỊPọlụ Kọ Ka Ya Ẹla nyamwụ Je Ala IJentayịlị

17“Ịnyị, ụka ọlẹ kaam ịPọlụ nya tịrẹkpẹ ka epweji nya iJerusalẹm, kam juwa raabwọ ha Ohe Oluhye u-ube ịgọgọ ọtụka nya Ohe Oluhye nyahị ahị ala iJuu lẹ, une nya ọyị ọyẹyẹ a-arụrụ a juwa chụm lẹlẹ. 18Ọọwa lẹ, m chẹhị kaka yẹ Ọngọlahị la a-arụrụ kọ juwa byim yẹkẹẹ, ‘ỊPọlụ, wuleji ká rụ kpehe bwu epweji nya iJerusalẹm ọlẹ ahyaahị mẹ. Chajị, angịnyị ịlẹgẹlẹ á ka myị-ị myị ju ibeenu oriri nyang chajị nyam kaka.’ 19Ọọwa lẹ, m wẹ byi Ọngọlahị la yẹkẹẹ, ‘Ala iJuu wuu jẹ́ yẹkẹẹ, am ịPọlụ ọlẹ a ri ọngọlẹ kam kaa juwa ga tụ ebe ị-mẹ ẹla nya Ohe Oluhye jẹ ịnyị myị́ ịnyị nya ala iJuu wuu, juwa kaa wu angịlẹ wuu kị myị lang, nyaa enyiri bala o-juwa kaa kpaa kaka ju agba ịnyịnyị lẹ. 20Ọngọlahị, ụka ọlẹ ká ala iJuu juwa da ajwọ nwụ iSitivin olibeenu nyang ugbeene lẹ, am ịPọlụ ọlẹ juwa ụka ọọwa ịnyịnyị! Am kpakpakpa a dọmwụ ri ọngọ ye ịwụrụ nya angịlẹ wuu kị nwụ iSitivin kpa haa lụka ọọwa lẹ.’ 21Ọọwa lẹ, Ọngọlahị la a byim yẹkẹẹ, ‘Yegiri ká rụ lẹẹlẹẹ mẹ. Chajị, M juwa ka dung ẹrụ rụ kele ka ẹga ọlụrụ pyii-pyii ka ẹga nya ala iJentayịlị lẹ.’ ”

22Ịnọ, alọjịra-jịra ịịwa wuu juwa ke ụrụ la ẹla oyaya nya ịPọlụ ịnyịnyịịnyị gbee pwụ ụka ọlẹ kọ gu ẹnyị nya ala iJentayịlị. Ọọwa lẹ, ịwa wuu a hụ omyi nyaa hwaa kele ka uhye, juwa ya dodehe yẹkẹẹ, “Anụ woo kpa kele kanụ nwọọ daarụ pyii! Ọngọ ọlịịwẹ á chịla kọ ka jam odehe ọlẹ la ọhịhị kaka!” 23Ịnyị, ụka kị juwa kpa ẹla ọọwa ya dodehe gbogbogbo lẹ, ị juwa hụ́ ịwụrụ ịlịnyịrọ nyaa jigi-jigi, juwa chụ ekuruwa chị kele ka uhye-ọgba ẹ-ẹpwụ nya agbama ojuju lẹlẹ. 24Ịnyị lẹ, olegbeju ọgbahị nya ịsọja wuu ọlụwa a du angịnyị nyamwụ ẹrụ kele kaka kpa ịPọlụ rụ kele ka ọbarike nya ịsọja lẹlẹ. Ịnyị lẹ, ọ da angịnyị nyamwụ ehile yẹkẹẹ, anụ nyị nyi ịPọlụ enyiri chajị kịị nyị ka jẹ́-ẹ bwula ọọwa jẹ́ ang odudu ká ala iJuu ịịwa wuu, nyị juwa chaga gbogbogbo jahị da ịPọlụ ẹ-ẹpwụ nya ikẹjẹ ahụrụ ọlịnyị mẹ lẹlẹ. 25Ma, ụka ọlẹ ká ịsọja ịịwa kpa ichiri chị ịPọlụ ori mẹnẹ-mẹnẹ, kị juwa ka nyoo enyiri lẹ, ịPọlụ a byi olegbeju nya angị dẹwụ ọkpẹhị rịrị ịsọja ohu ịrụ ọlẹ kọ godayị rịrị ụ-ụwa yẹkẹẹ, “Ehile myị ọnụ hanụ yẹkẹẹ, anụ nyị nyi ọngọlẹ kọ ri ọnyị oleji nya ala iRom lụka ọlẹ ká eje á wu ọngọọwa wu ene kpong-kpong kaka lẹ?”

26Ịnyị, ụka ká olegbeju ọkpẹhị rịrị ịsọja ohu ịrụ ọọwa wo ẹla oyaya nya ịPọlụ lẹ, ọ kele ka ẹga nya olegbeju ọgbahị nyaa wuu kaka byoo yẹkẹẹ, “Ayịbahị, ụma nya ẹla ọlanyị, a tị́ wẹẹ họ ịnyị? Chajị, ọlẹng ọwẹ lẹ, ọnyị oleji nya ala iRom, ọ ri lẹ!”

27Ịnyị lẹ, olegbeju ọgbahị nya ịsọja ọọwa a kele kaka tọ ịPọlụ ayịdang wo yẹkẹẹ, “Ẹnwa ọlẹng ya jem wẹẹ, a ri ọnyị oleji nya ala iRom ịnyịlẹhị?” Ọọwa lẹ, ịPọlụ a wẹ byoo yẹkẹẹ, “Ee, ọnyị oleji nya ala iRom, m ri lẹ!”

28Ịnyị lẹ, olegbeju ọgbahị nya ịsọja ọọwa a byi ịPọlụ yẹkẹẹ, “Am lẹ, am kpa iru nya okpoko ra ihi nya o-ri ọnyị oleji nya ala iRom ra nya ịlẹhị-ịlẹhị ene ká ịnyam chịkpẹẹ!” ỊPọlụ wẹ byoo yẹkẹẹ, “Ma, am tị lẹ, ị mam ma nya ọnyị oleji nya ala iRom!”

29Ịnyị lẹ, angịlẹ, ịnọ, kị juwa tịtọ kị ka kpa enyiri onyinyi yalibyi la ịPọlụ, a rụ hi ẹga nyamwụ ahyaahị ahyaahị lẹlẹ. Ọọwa lẹ, olegbeju ọgbahị nya ịsọja ọọwa a juwa juhi, chajị nyọlẹ ká ịPọlụ ri ọnyị oleji nya ala iRom, ká ọngọọwa a tị họ du kị chị ịPọlụ ichiri lẹlẹ.

Ị Kpa ỊPọlụ Kele Ka Ịlahị nya Ala Ịkọtụ Ọgbahị Ọgụgụ nya Ala IJuu Wuu

30Ma, ụka ká ahị ọọnamwụ pyẹ lẹ, jaabwọ ká olegbeju ọgbahị nya ịsọja ọọwa juwa tịtọ kọ ka jẹ́ ang odudu ká ala iJuu ịịwa juwa chị ala ba ịPọlụ ịnyị lẹ, ọ ya, nyị yi ori hi ịPọlụ mẹ lẹlẹ. Ịnyị, olegbeju nya ịsọja ọọwa a du ẹrụ kaka wụrụ alegbeju ikịla iya nya Ohe Oluhye wuu bala alegbeju ileje ịla ịkọtụ ọgbahị ọgụgụ nyaa wuu kaka jịra lẹ, ọ kpa ịPọlụ kele kaka godayị rịrị ị-ịlahị nyaa ịwa wuu kị ka wo ẹla ọọwa lẹlẹ.

Currently Selected:

ỤKỤRWỌ nya ALẸRỤ 22: IBNO

Highlight

Copy