ỤKỤRWỌ nya ALẸRỤ 15

Ọjịra-jịra Ọla IJerusalẹm

1Ma ụka ọọwa, alẹng ịhyẹ bwu iJudiya kele ka Antiyọkọ, juwa mẹ ang jẹ angịlẹ kị ri anyadịda nya awụlẹ ẹ-ẹpwụ nya ịKịrayịsị ịlụwa yẹkẹẹ, “Anụ wo mẹ! Ọng myị́ ọng lẹpwarịrị nyanụ ọlẹ kọ myị da ụwụwụ, jaabwọ ká ehile nya iMosisi ya kaka lẹ aalẹ, ọngọọwa á ka jẹ́-ẹ la ọchịda nya Ohe Oluhye kpong-kpong kaka.” 2Ịnyị lẹ, ịPọlụ bala ịBanabasị a juwa da ịwẹẹ ta ala iJuu ịịwa ịlẹ kị bwu iJudiya kele nya ịlẹhị-ịlẹhị u-uhye nya ẹla ọọwa lẹlẹ. Ụka ká ẹla ọọwa juwa nwa lụmẹ-lụmẹ lẹ, ala ịchọọchị nya Antiyọkọ a chụ ịPọlụ bala ịBanabasị bala ala ịchọọchị nya ala Antiyọkọ ịkịla ịhyẹ lẹ, ị daa ẹrụ kele ka ẹga nya alẹrụ ọnyịịla bala alegbeju ịgbahị nya ịchọọchị ụ-ụwa i-iJerusalẹm kaka taa ịtọ wo u-uhye nya ẹla ọọwa lẹlẹ.

3Ụka ká alẹrụ nya ala ịchọọchị nya Antiyọkọ ịịwa yegiri lẹ, ị jẹ chịpwụrụ bwu ọpyị nya iFonichiya bala ịSameriya lẹlẹ. Ịnyị, ụka ká angịịwa tịrọnụ ya je ala iFonichiya bala ala ịSameriya anyị wuu jaabwọ ká ala iJentayịlị anyị yẹ irya da ha Ohe Oluhye lẹ, alụwa wuu a juwa chị ọkẹkẹnị ọtụka-ọtụka nya ịlẹhị-ịlẹhị ọọ-la oja ọnyịịla ọọwa lẹlẹ. 4Ụka ká alogu ẹdịyẹ nya ịPọlụ anyị pwụ iJerusalẹm, ala ịchọọchị ọlụwa wuu bala alẹrụ ọnyịịla nya Ọngọlahị bala alegbeju ịgbahị nya ala ịchọọchị wuu daa ọwụraba hiigu-hiigu. Ịnyị, ịPọlụ anyị a tịrọnụ ya jaa wuu jaabwọ ká Ohe Oluhye bwu kpaa họ ụkụrwọ ẹ-ẹpwụ nya ẹdịyẹ nyaa kaka ba lẹlẹ. 5Ma, angịhyẹ lẹpwarịrị nya angịnyị nya Ohe Oluhye ịla iJerusalẹm ịlẹ kị ri alogu nya ala ịFarịsii, wuleji godayị kọkọ lẹ, ị yẹkẹẹ, “O ri ang ọchịla-chịla pyii, ká ala iJentayịlị wuu ka da ụwụwụ bala ọ-ka byaa, kị ka juwa kpa ehile nya iMosisi wuu jịra ịnyịnyị.”

6Ịnyị lẹ, alẹrụ ọnyịịla nya ịKịrayịsị bala alegbeju ịgbahị nya ịchọọchị ọla iJerusalẹm anyị, a la ọjịra-jịra kị ka ya ẹla ọọwa gu awụlẹ lẹlẹ. 7Ịnyị, ụka ọlẹ kị juwa kpa ẹla ọọwa da ịwẹẹ ju gbegbegbe lẹ, iPita a wuleji godayị kọkọ lẹ, ọ byaa yẹkẹẹ, “Anụ anyadam ẹ-ẹpwụ nya ịKịrayịsị, anụ ayịdang tị́ jẹ́ jaabwọ ká Ohe Oluhye bwu chụm bwu ẹpwarịrị nyanụ lụka ọlụrụ kẹkpẹ yẹkẹẹ, am nyị kele kaka kpa ọnụ nyam ya ẹrụ ọnyịịla ọlẹ pyẹ je ala iJentayịlị chajị kịị nyị ka jẹ́-ẹ wo ẹla ọọwa, kịị nyị ka la ọmyịmyị ịnyịnyị mẹ. 8Ịnyị, Ohe Oluhye ayịdang la ịlọmwụ Ọngọlẹ kọ jẹ́ ọkịlẹtụ nya angịnyị wuu a tịtị chị ibeenu oriri nya ịlọmwụ ehe ẹ-ẹpwarịrị nya ala iJentayịlị ịịwa lẹ, Ọ hu Olegu Ịgọgọ nyamwụ haa jaabwọ kọ hu hahị ahị ayịdang ịnyịnyị lẹlẹ. 9Ohe Oluhye ayịdang á hu ala iJentayịlị ịịwa datị hiihi ahị ala iJuu kpong-kpong ka. Ma, ọ hụ́ ọkịlẹtụ nyaa cheri-cheri bwu ẹpwụ nya ọhọbịrị ọhọhọ wuu bwula ọmyịmyị ọlala nyaa ịnyịnyị. 10Lẹ, ịtọ nyam ri yẹkẹẹ, ịịyẹ a tị́ du kanụ lẹẹ tịtọ kanụ ka ma Ohe Oluhye yẹ, bwula o-juwa ju olo ọtụka-ọtụka nya ehile ịkpakpa ịlẹ ká adahị igogo anyị lee ahị ayịdang, á ka jụ kpa myị́ kpong-kpong ka, juwa hu olo ọọwa chụ angịjụgbẹyị nya ịKịrayịsị ịwẹ mẹ? 11Ehe! Anụ ba! Chajị, ọmyịmyị ọlala nyahị u-uhye nya ẹla nya Ohe Oluhye a du kahị kpa la ọchịda bwula ọnahị nya Ọngọlahị iJisọsị, jaabwọ kọ tịtị la ha ala iJentayịlị lẹ.”

12Ịnyị, alọjịra-jịra ọọwa wuu a hụhụ kem, juwa ke ụrụ la ọnụ ẹdịyẹ ọlẹ ká ịBanabasị bala ịPọlụ, juwa tịrị ya jaa jaabwọ ká Ohe Oluhye bwu họ ang i-ju ẹjẹẹ ịlẹbyẹbyị bala ụkụrwọ ẹbyẹbyị la datị-datị bwulaa, ẹ-ẹpwarịrị nya ala iJentayịlị wuu lẹlẹ. 13Ụka kị tịrọnụ nya ẹla nyaa kpá lẹ, iJemsi a wẹ byi alọjịra-jịra ịịwa wuu yẹkẹẹ, “Anụ anyadam ẹ-ẹpwụ nya ịKịrayịsị, anụ ke ụrụ la ẹla nyam wẹẹ. 14Anụ tị́ wo jaabwọ ká ịSayịmọn iPita tịrọnụ ya jehi jaabwọ ká Ohe Oluhye la ịlọmwụ a jene-jene, chị ọnahị nyamwụ ehe ẹ-ẹga nya ala iJentayịlị bwula ọlẹ ká Ohe Oluhye chụ angịhyẹ bwu ẹpwarịrị nya ala iJentayịlị ịịwa kị ka ri angị myị la ẹnyị nyamwụ lẹ. 15Ẹla oyaya nya alọmwụ nya Ohe Oluhye inyogo wuu tị myị ju ẹlẹwẹ ịnyịnyị. Chajị, ị da kpehe ụ-Ụpwụ Ịgọgọ yẹkẹẹ,

16‘Ụka ká ụka ọlẹ á chịpwụrụ kpá,

Am Ọngọlahị ka myịmyị-ị̀ tịrẹkpẹ warị.

Ọọwa lẹ, m ka myịmyị-ị̀ ma ẹpwang

nya iDevidi ọlẹ kọ tụrụ ju eji wuu ene-ene, nwụ́ onyeewe lẹlẹ.

Am Ọngọlahị ka warị kaka nwụla ang ịbịrị-bịrị nya ẹpwang ọọwa.

M ka wule ẹpwang ọọwa eji onyeewe myịmyị.

17M ka họ ịnyị, chajị ká angịnyị ehe ihihi ịkịla wuu ka

jẹ́-ẹ tịtọ nya Ọngọlahị nya ịlẹhị-ịlẹhị,

tụ ala iJentayịlị ịlẹ wuu, kị ka juwa kpa ọmyịmyị ọlala

nyaa be ẹkọ wụrụ ẹnyị nyam Am Ọngọlahị ịnyịnyị.

18Ala ịlẹ wuu, Ọngọlahị Ohe Oluhye Ọngọlẹ kọ jẹ́

ang myị́ ang wuu chajị nya ụkụrwọ nya ịlọmwụ bwu

ọmwụ ọdada nya odehe ọlẹ a ya lẹ.’ ”

19“Chajị nya ọọwa lẹ, eje ọchịchị nyam am ri yẹkẹẹ, ọ́ chịla kahị ka juwa hu akama ha ala iJentayịlị ịlẹ wuu kị yẹ irya da ha Ohe Oluhye, la ụgbẹyị ọhẹ-lọhẹ kpong-kpong ka. 20Ma, ọ tị chịla kahị ka da ileta kaka ya ẹchẹ nya ala ịlẹ jaa yẹẹyẹẹ. Ọhọhẹ ri, kị ka ri iyo nya ojiga ọhẹ-lọhẹ ka. Chajị, ihye ijiga wuu, ri ang ibyi ẹ-ẹga nya angịnyị nya Ohe Oluhye. Oheeye ri, kị ka cheji ba ụya ọhọhọ wuu. Ọhata ri, kị ka ri iyo ọlẹ kị pyị ọọ imyi, kpong-kpong ka. Ohene ri, kị ka kpa ịwọ nya iyo ọhẹ-lọhẹ kọnụ nyaa kpong-kpong ka ịnyịnyị. 21Chajị, bwu ụka nya aloyi nya iMosisi anyị pyịyọọ lẹ, iMosisi da ehile yẹkẹẹ, nyị juwa kpa ẹla nya Ohe Oluhye nya ọọwa ya je angịnyị ịnyịnyịịnyị. Chajị, ị kaa wa ụpwụ nya iMosisi dodehe ẹnụ myị́ ẹnụ ọlẹ kọ ri Ẹnụtụrụ Ọhịnyọ Lụkụrwọ nya ala iJuu e-ebe ị-mẹ ẹla nya Ohe Oluhye jẹ nya ala iJuu wuu jịra bwu oyi ọọwa pyịyọọ.”

Ileta O-bwu IJerusalẹm Kịla Ala IJentayịlị

22Ịnyị lẹ, ọ ri obyi omeme nya alẹrụ ọnyịịla nya ịKịrayịsị bala alegbeju ịgbahị nya ịchọọchị bala ala ịchọọchị ihihi wuu lẹ, ị chụ angịhyẹ bwu ẹpwarịrị nyaa, kị ka daa ẹrụ kele ka Antiyọkọ bala ịPọlụ bala ịBanabasị anyị lẹlẹ. Ọọwa lẹ, ị chụ iJudasị ọlẹ ká ẹnyị ọkịla nyamwụ ri ịBaasabasị bala ịSayịlasị ịlẹ kị ri alegbeju ịhyẹ bwu ẹpwarịrị nyaa ịwa anyadịda nya awụlẹ ẹ-ẹpwụ nya ịKịrayịsị ịla iJerusalẹm lẹlẹ. 23Ẹla ọlẹpwụ nya ileta ọlẹ kị ya daa ẹrụ a lẹẹ lẹ:

“Ụpwụ ọlẹ jam bwu ẹga nyahị ahị anyadanụ ẹ-ẹpwụ nya ịKịrayịsị tụ alẹrụ ọnyịịla nya ịKịrayịsị bala alegbeju ịgbahị nya ịchọọchị nya ala iJerusalẹm warị wẹ ẹga nyanụ anụ anyadahị ẹ-ẹpwụ nya ịKịrayịsị ịlẹ kanụ ri ala iJentayịlị wuu ọ-ọpyị nya Antiyọkọ bala iSiriya bala iSilisiya. Anụ ye ọnụ ọdachị nyahị mẹ! 24Ahị jam da ileta ọlẹ du wanụ, chajị nyọlẹ kahị wo oja yẹkẹẹ, angịhyẹ nyị bwu ẹpwarịrị nyahị warị kaka yiinu yi bwuru-bwuru bwula ẹla ọ-jẹ́ yaya-ka nyaa. Ma, a-ahị a tị daa ẹrụ ọọwa tọnụ ịnyị kpong-kpong ka. 25Chajị nya ẹla ọọwa a du kaahị ayịdang tụguru me obyi, myị ju awụlẹ lẹ, kahị lẹẹ chụ angịhyẹ, daa ẹrụ tọnụ bala ịBanabasị bala ịPọlụ anyadahị anyị ịlẹ kị háahị lụmẹ warị lẹlẹ. 26ỊBanabasị bala ịPọlụ anyị ịlẹ, a ri angịlẹ kị tụụbwọ hi ọhịhị nya ịlaa ga ha igu chajị nya ẹrụ ọnyịịla ọmyịmyị nya Ọngọlahị iJisọsị ịKịrayịsị lẹ. 27Chajị nya ọọwa lẹ, ahị jam du iJudasị bala ịSayịlasị anyị ẹrụ warị, chajị kị ka myịmyị-ị̀ kpa ọnụ nya ịlaa, ma ẹla ọlẹ kahị lẹẹ ya ẹ-ẹpwụ nya ileta wuu, ya jenu ịnyịnyị lẹlẹ. 28Chajị, ọ ri ang ohiigu ha irya nya Olegu Ịgọgọ bala irya nya obyi omeme nyahị ahị ayịdang yẹkẹẹ, ọ́ chịla kahị ka juwa hu olo ọtụka ọkịlaanụ kịla ọhẹ-lọhẹ chụ́ụnụ bwula iru nya ehile ọ-danụ da, dala ụma nya ang ịbaba lụmẹ ịlẹ kahị lẹẹ ka ya jenu ẹ-ẹgẹlẹ kaka. 29Ọhọhẹ nyaa ri yẹkẹẹ, anụ ri iyo ịlẹ kị ya kịla iya ha ijiga kpong-kpong ka. Oheeye ri, anụ kpa ịwọ nya iyo ọhẹ-lọhẹ ka ọnụ nyanụ ka. Ọhata ri, anụ ri iyo ọhẹ-lọhẹ ọlẹ kị pyị imyi kpong-kpong ka. Ohene ri, anụ cheji ba ụya ọhọhọ wuu ịnyịnyị mẹ. Ọ́ ri kanụ myị juwa cheji ba ẹchẹ nya ang ịwẹ wuu lẹ aalẹ, anụ juwa họ hiigu yẹẹyẹẹ lẹ. Anụ kpahị mẹ.”

30Ịnyị, ụka ká alẹrụ ịịwa yegiri bwu iJerusalẹm lẹ, ị rụ kele ka Antiyọkọ lẹlẹ. Ụka kị pwụ ụwa kị tụ ala ịchọọchị ịlụwa guru wuu lẹ, ị myị ẹrụ ọlẹ kị daa bwu iJerusalẹm ya jaa bala ileta ọọwa lẹlẹ. 31Ụka ká ala ịchọọchị nya Antiyọkọ wa ileta nyaa ọọwa kpá lẹ, ị juwa chị ọkẹkẹnị ọtụka-ọtụka ju ẹla ọ-kpụ́ ẹjẹ ọlẹ kị wa bwu ụwa lẹlẹ. 32Ịnyị, iJudasị bala ịSayịlasị anyị ịịwa ịlẹ kịịwa ayịdang ri alọmwụ nya Ohe Oluhye ị-kaa ya ẹla nya Ohe Oluhye dodehe ene-ene, a juwa ju anyadaa ẹ-ẹpwụ nya ịKịrayịsị ịla Antiyọkọ ọhụ, la ẹla nya Ohe Oluhye oyaya, juwa họ kị ka la ogogo gụ olene-ene ẹ-ẹpwụ nya ọmyịmyị ọlala nyaa lẹlẹ. 33Ịnyị, ụka ká iJudasị bala alogu ẹdịyẹ nyamwụ anyị hụ ta ala ịchọọchị ọla Antiyọkọ lụka ọtata chẹẹ lẹ, anyadaa ẹ-ẹpwụ nya ịKịrayịsị ịla Antiyọkọ a tụụbwọ hyaa rụ la okpunyi tịrẹkpẹ kele kaka tọ ala ịchọọchị nya iJerusalẹm angịlẹ kị daa ẹrụ ọọwa lẹlẹ. [34Ma, ịSayịlasị tị lẹ, ọwa chị eje nyọka hi hụ ụ-ụwa Antiyọkọ.]

35Ma, ịPọlụ bala ịBanabasị bala iru nya angịnyị nya Ohe Oluhye ịkịla ịhyẹ hi hụ ụ-ụwa Antiyọkọ, juwa mẹ ẹla nya Ohe Oluhye jẹ bala o-juwa ya ẹrụ ọnyịịla nya Ọngọlahị la je alụwa ịnyịnyịịnyị.

ỊPọlụ Bala ỊBanabasị Chị Ebwo Hi Awụlẹ

36Ịnyị, ụka ká ẹnụtụrụ ịmanyị-ịmanyị chịpwụrụ lẹ, ịPọlụ a byi ịBanabasị yẹkẹẹ, “ỊBanabasị ee, anyadahị ẹ-ẹpwụ nya ịKịrayịsị ilepweji ọnyị myị ọnyị ịlẹ wuu kahị kpa ẹrụ ọnyịịla nya Ọngọlahị la kele kaka ya je wuu lẹ, kẹwẹ kahị kele kaka wụlaa yẹ, chajị kahị ka jẹ́ jaabwọ ká iwe-ahụrụ nyaa la mẹ!” 37Ịnyị, ụka ká ịBanabasị myị lẹ, ọ juwa tịtọ kọ ka kpa ịJọn ọlẹ kị wụrụ ịMakị ba ịlaa kele ịnyịnyị lẹlẹ. 38Ma, irya nya ịPọlụ tị ri yẹkẹẹ, nyị ka ri ang ohiigu ha ịwa gụ kọ ri kịịwa nyị́ kpa ịJọn ịMakị ba ịlịwa kele kpong-kpong ka. ỊPọlụ ya ịnyị chajị nyọlẹ ká ịJọn ịMakị á myị kele kaka họ ụkụrwọ taa lụka nya ọgbanyẹ ka, ọọ-la ọlẹ kọ tịrẹkpẹ rụ hyaa bwu epweji nya ịPamfiliya. 39Ịnyị lẹ, arụ ọrụrụ a kpeji ẹ-ẹpwarịrị nya ịPọlụ bala ịBanabasị o-oluhye nya ịJọn ịMakị nya ịlẹhị-ịlẹhị gbee kị chị ebwo hi awụlẹ lẹlẹ. Ọọwa lẹ, ịBanabasị a kpa ịJọn ịMakị ba ịlọmwụ lẹ, ị ju ụgbọ nya enyi rụ kele ka ọpyị nya ịSayịpịrọsị lẹlẹ. 40Ma, ịPọlụ lẹ, ọ chụ ịSayịlasị ba ịlọmwụ. Ịnyị, ụka ká anyadịda nya awụlẹ ẹ-ẹpwụ nya ịKịrayịsị ịlụwa raabwọ, hwaa ju ọnahị nya Ọngọlahị la ụ-ụbwọ kpá lẹ, ịPọlụ bala ịSayịlasị a yegiri rụ lẹlẹ. 41Ịnyị, ịPọlụ anyị a jẹ bwu ịpyị nya iSiriya bala iSilisiya, juwa ju angịnyị nya Ohe Oluhye ịlịchọọchị ịlụwa anyị, ọhụ ịnyịnyịịnyị lẹlẹ.

Currently Selected:

ỤKỤRWỌ nya ALẸRỤ 15: IBNO

Highlight

Copy