ỤKỤRWỌ nya ALẸRỤ 14

ỊPọlụ Bala ỊBanabasị E-epweji nya Ayịkoniyọm

1Ụka ká ịPọlụ bala ịBanabasị pwụ epweji nya Ayịkoniyọm, ị kele ka ube ọ-mẹ ẹla nya Ohe Oluhye jẹ nya ala iJuu ọlụwa kaka ya ẹla nya Ohe Oluhye ju iru nya angịnyị la ọngịrị-ọngịrị ụ-ụwa. Ịnyị, iru nya ala iJuu bala ala iJentayịlị lụmẹ-lụmẹ a myị la Ohe Oluhye ụ-ụwa bwula ẹla ọọwa lẹlẹ. 2Ma, ala iJuu ịlụwa ịlẹ kị myị la Ohe Oluhye ka, kele kaka du ala iJentayịlị ju, bwula o-juwa ju irya nya ala iJentayịlị ịịwa ụhwa jahị da angịlẹ kị ri anyadịda nya awụlẹ ẹ-ẹpwụ nya ịKịrayịsị ịlụwa. 3Ịnyị, alẹrụ ọnyịịla nya ịKịrayịsị ịịwa a hụ e-epweji nya Ayịkoniyọm ọọwa lụka ọtata, juwa ya ẹla nya Ohe Oluhye rụ́ Ọngọlahị, la uhi ojuju-ka, je angịnyị ịnyịnyịịnyị lẹlẹ. Ọngọlahị la ayịdang tịtị juwa chẹkpẹ ju ẹrụ ọnyịịla nya ọnahị nyamwụ ọlẹ ká ịPọlụ bala ịBanabasị anyị juwa kpa ya pyẹ ụ-ụwa, bwula ọlẹ kọ juwa kpaa họ iru nya ang i-ju ẹjẹẹ ịlẹbyẹbyị bala ụma nya ụkụrwọ ẹbyẹbyị ịkịla la datị-datị ịnyịnyị. 4Ụka ọọwa, alepweji ọọwa chị ịlaa ebwo imiiye. Alebwo ọhẹ nyaa ji oye nya ala iJuu. Alebwo ọkịla nyaa tịtị ji oye nya alẹrụ ọnyịịla nya Ohe Oluhye ịnyịnyị.

5Ịnyị, ala iJentayịlị bala ala iJuu ilepweji ọọwa bala alegbeju nyaa wuu a me obyi gu awụlẹ nyọka chị oyoyi ju ịPọlụ bala ịBanabasị anyị bala ọ-ka da ajwọ mịlaa ịnyịnyị lẹlẹ. 6Ụka ká ịPọlụ anyị wo obyi omeme onyobyi nyaa ọọwa lẹ, ị rụ bwu Ayịkoniyọm kele ka iLisitịra bala ịDẹẹbi ịlẹ kị ri epweji ịlọpyị nya ịLayịkoniya bala epweji ịlịkịka nya ọpyị ọlẹ kị dagaga jwaa wuu lẹlẹ. 7ỊPọlụ anyị juwa kpa ẹrụ ọnyịịla ya pyẹ je angịnyị e-epweji ịịwa ịnyịnyịịnyị.

ỊPọlụ Anyị E-epweji nya ILisitira Bala ỊDẹẹbi

8Ọlẹng ọhẹ juwa e-epweji nya iLisitịra, kọ chị okuku bwu ẹpwụ-ẹpwụ nya ịnamwụ. Ọlẹng ọọwa kaa hụhụ hụ kem. Chajị, ọ́ jẹ́ kpa ata nyamwụ jẹdịyẹ ẹnẹnẹhẹ kpong-kpong lẹka. 9Okuku ọọwa juwa ke ụrụ la ẹla nya Ohe Oluhye oyaya nya ịPọlụ. Ịnyị, ụka ká ịPọlụ tịtị juwa mwụụrụ yẹ okuku ọọwa chịng, kọ jẹ́ yẹkẹẹ, nyị la ọmyịmyị juwa, chajị nya uda ọ-ka họọ họ myị́ lẹ, 10ịPọlụ a byi okuku ọọwa yẹkẹẹ, “Wuleji, ká godayị kọkọ a-ata nyang lẹẹlẹẹ mẹ!” Ịnyị, okuku ọọwa a wuleji godayị kọkọ la gogo juwa jẹdịyẹ ịnyịlẹhị lẹlẹ. 11Ịnyị, ụka ká iru nya angịnyị ịlụwa yẹ jaabwọ ká ịPọlụ họ okuku ọọwa uda lẹ, angịịwa a juwa kpa omyi o-gboo ya ẹla dodehe la oja nya ala ịLayịkoniya yẹkẹẹ, “Ihye ijiga nyahị hireji warị wẹ ẹga nyahị la abwụma nya angịnyị ehe lẹ!” 12Ịnyị, ị jwaa ẹnyị inyeewe lẹlẹ. Ị wụrụ ịBanabasị ịSẹyọsị. Ị wụrụ ịPọlụ ịHẹẹmẹsị, chajị nyọlẹ ká ịPọlụ a ri olegbeju ọ-kpa ẹla ọ-ọnụ. 13Alụwa nwụ́ ube nya ohe ojiga ịSẹyọsị nyaa ọọwa rịrị ọ-ọnụ nya ogirigba nya epweji nyaa. Ịnyị lẹ, ọngọkiliya nya ohe ojiga ịSẹyọsị ọọwa, a kele kaka wu ịna ịhyẹ bala o-go ikoko nya ekeji ịhyẹ lẹ, ọwa bala angịnyị nyamwụ a juwa kpa kele nyọka ya kịla iya ha ohe ojiga ịSẹyọsị ọọwa ọ-ọnụ ogirigba nya epweji nyaa lẹlẹ. 14Ma, ụka ká ịPọlụ bala ịBanabasị ịlẹ kị ri alẹrụ ọnyịịla nya Ohe Oluhye wo ẹla ọọwa lẹ, ọ wáa ẹjẹ lụmẹ. Ịnyị, ị gu ịwụrụ nyaa ene wuu hwang hwang lẹ, ị juwa rụnyẹ bwu ẹpwarịrị nya iru nya angịnyị ịịwa kele ka ẹga nya angịwẹ, juwa ya ẹla lomyi o-gboo taa yẹkẹẹ, 15“Ẹnwa alẹng anyị, ịịyẹ a tị́ du kanụ juwa họ ịnyị? Anụ ba! Ahị ayịdang ri angịnyị ehe i-ju abwụma ookpokpo lala anụ-anụ. Ẹrụ ọnyịịla nya Ohe Oluhye, ahị kpa warị kaka ya jenu, chajị kanụ ka yẹ irya da bwu ẹpwụ nya ijiga ịkpụ́kpụ ịwẹ wuu kị ju apyobwuna ọhẹ-lọhẹ ka, kanụ ka yẹ irya da ha Ohe Oluhye ọlẹ kọ juwa hịhị lẹlẹ. Chajị, Ohe Oluhye ọọwa a ri Ọngọlẹ kọ họ epwoohe bala odehe ọlẹ bala ihu ịtụka-ịtụka wuu bala ang myị́ ang ịlẹpwụ nyaa ịnyịnyị lẹ. 16Ohe Oluhye ọọwa a ri Ọngọlẹ kọ hu angịnyị iloyi inyogo wuu nya alẹpwụma ọnyị myị ọnyị olodehe ọlẹ wuu ujiji, ẹ-ẹpwụ nya ụgbẹyị nya ahị ọhụhụ nyaa lụka ọọwa lẹ. 17Ma, Ohe Oluhye ayịdang tị juwa kaa chị ibeenu oriri nya ịlọmwụ ehe ụka wuu bwula ọlẹ kọ kaa họ ang ọnyịịla ha angịnyị ehe ịnyịnyịịnyị. Ohe Oluhye ọọwa a kaa do enyi hanụ bwu epwoohe lẹ. Ọwa-à tị kaa họ ká ang ịlẹrụ nyanụ kaa nwụ́ egbe lụka nyaa wuu ịnyịnyịịnyị lẹ. Ọwa-à tị kaa họ kanụ ka ye ang oriri ri wu ẹpwụ bala ọ-kaa hu ọkẹkẹnị ọchịchị myị ẹpwụ ọkịlẹtụ nyanụ ịnyịnyị lẹ.” 18Bwula ala iyaya ịlịịwẹ, ịPọlụ anyị a kpa hu angịịwa abwọ kiji myị́, du ká angịịwa á kịla iya ha alẹrụ ọnyịịla ịịwa lala ihye ijiga nyaa kaka lẹlẹ.

19Ma, ụka ká ala iJuu ịhyẹ ịlẹ kị bwu epweji nya Antiyọkọ ọlịpyị nya iPisidiya bala epweji nya Ayịkoniyọm kele ka iLisitịra lẹ, ị du iru nya angịnyị ịlụwa ju ịPọlụ anyị lẹlẹ. Ọọwa lẹ, angịịwa a da ajwọ mịla ịPọlụ nya ịlẹhị-ịlẹhị lẹ, ị gbile ịPọlụ rụ kpehe hi epweji nyaa kaka dụwa u-ugumẹ ẹpwa lẹlẹ. Chajị, ị me irya yẹkẹẹ, ịPọlụ nyị gbu lẹ. 20Ma, ụka ká angịjụgbẹyị nya Ọngọlahị la, ịlụwa tụ ịlaa kaka godayị kọkọ dagaga ju ịPọlụ la abwọ ọrịrị lẹ, ịPọlụ a wuleji myị́, rụ kele ka epweji myịmyị lẹlẹ. Ọọwa lẹ, ịPọlụ bala ịBanabasị a rụ kele ka epweji nya ịDẹẹbi la ahị ọpyẹpyẹ nyamwụ lẹlẹ.

ỊPọlụ Bala ỊBanabasị Tịrị Ẹkpẹ Ka Epweji nya Antiyọkọ

21Ụka ká ịPọlụ anyị ya ẹla nya Ohe Oluhye e-epweji nya ịDẹẹbi kpá, ká iru nya angịnyị lụmẹ-lụmẹ ri angịjụgbẹyị nya Ọngọlahị la bwula ẹla ọọwa lẹ, ịPọlụ bala ịBanabasị a rụ tịrẹkpẹ kele ka epweji nya iLisitịra bala epweji nya Ayịkoniyọm bala epweji nya Antiyọkọ ọlọpyị nya iPisidiya lẹlẹ. 22Ịnyị lẹ, ịPọlụ anyị a juwa ju angịnyị nya Ohe Oluhye ịlụwa ọhụ nya ịlẹhị-ịlẹhị, juwa byaa yẹkẹẹ, nyị godayị rịrị kpakpakpa ẹ-ẹpwụ nya ẹla nya ịlẹhị ọhọhọ bala ọmyịmyị ọlala nyaa mẹ lẹlẹ. ỊPọlụ anyị myịmyị mẹjaa yẹkẹẹ, bwula akama ọyẹyẹ la datị-datị, ahị angị myị la Ohe Oluhye nyaa ka bwu jụ ka ẹpwụ nya ịpyị Adịrahụ nya Ohe Oluhye myị́ pyii lẹlẹ. 23Ụka ọọwa, ịPọlụ bala ịBanabasị anyị chụ angịlẹ kị ka ri alegbeju ịkpẹhị rịrị ịchọọchị nya Ohe Oluhye ọnyị myị ọnyị ọlụwa wuu. Ọọwa lẹ, ịPọlụ anyị a kpa alegbeju ịịwa nọ limyi ha Ohe Oluhye, juwa hwaa ju Ọngọlahị ọlẹ kị myị la ụ-ụbwọ ẹ-ẹpwụ nya abwọ ọrịrị kọ ka kpẹhị rịraa kịlahị-ịlahị lẹlẹ.

24Ịnyị, ịPọlụ anyị a chịpwụrụ bwu ọpyị nya ala iPisidiya rụ kele ka epweji nya ịPamfiliya lẹlẹ. 25Ịnyị, ụka kị ya ẹla nya Ohe Oluhye ju angịnyị e-epweji nya ịPẹẹga kpá wuu lẹ, ị rụ kele ka ọpyị nya Ataliya lẹlẹ. 26Ịnyị, ịPọlụ anyị a rụ bwu epweji nya Ataliya ọọwa ju ụmwụ nya enyi kele ka epweji nya Antiyọkọ lẹlẹ. Antiyọkọ ọọwa a ri ẹga ọlẹ ká angịnyị nya Ohe Oluhye hu ịPọlụ anyị ju Ohe Oluhye ụ-ụbwọ ẹ-ẹpwụ nya abwọ ọrịrị, kọ ka kpa ọnahị nyamwụ kpaa chị kaka họ ụkụrwọ nya ẹrụ ọnyịịla nyamwụ ọ-kpa ya pyẹ ene ká ịPọlụ anyị hu ang kele kaka họ ụkụrwọ ọọwa lẹ.

27Ịnyị, ụka ká ịPọlụ anyị nya pwụ epweji nya Antiyọkọ kpá lẹ, ị wụrụ ala ịchọọchị nya Ohe Oluhye wuu kaka jịra lẹ, ịPọlụ anyị a ya dodehe je aluche nya ịchọọchị ịịwa wuu, jaabwọ ká Ohe Oluhye bwu họ ụkụrwọ taa kaka ba lẹlẹ. I ya jaabwọ ká Ohe Oluhye bwu wụrụ ụgbẹyị nya ọmyịmyị ọlala ẹ-ẹga nya Ohe Oluhye da ha ala iJentayịlị ịlẹga ọlẹ kị ka wuu. 28Ịnyị, ịPọlụ anyị a hụ ta angịjụgbẹyị nya Ọngọlahị ịla Antiyọkọ lụka ọtata lẹlẹ.

Currently Selected:

ỤKỤRWỌ nya ALẸRỤ 14: IBNO

Highlight

Copy