UMÁKI 5

Ujísɔ̄si hɛ́ ɔ̄cɛnyīlɔ o lɛ alelékwū obɔ̄bí tá

(Umát 8.28-34; Ulúk 8.26-39)

1Ujísɔ̄si mla ayíkpó kú nū gāājɛ ogbeé kú óókpoó kú Ugálīli ipú ajɛ kú Ugerása. 2Abɔ̄ ó yɔ̄ ī bɛ̄cɛ ŋmá ipú ɔ́kɔ ā, ɔkwɔɔkwu ɔ́ɔmā, ɔ̄cɛ éyi ŋmá ipú únóji gā ɛgiyí nū. Ɔ̄cɛ ā lɛ alelékwū obɔ̄bí. 3Ó lá ɛgiyí únóji, ɔ̄cɛ dúú í ce ɔ́ odó glá ŋ́. 4Igbɛ alɛwa, é gē gbō ɔ̄ ikpó mla abɔ̄, amáŋ ó gē kpó agbá ā hɛ́ eko dóódu, cɛ́ɛ́ ó lɛ odó ā kpó ca ŋmá iyīnu ikpó. Ɔ̄cɛ dúú í lɔfú jɛ̄ nōo ī bī ɔ̄ bá ajɛ glá ŋ́. 5Ɔlɛ́ɛnɔ mla otú dóódu ó gē yɛ gicō gajɛ ɛplá aúnóji. Ó klla ī yɛ ga ɛfu, yɔ̄ gē dɛ̄gba, gē bī ɛcɔ̄ le hɛ́ iyīnu iyē. 6Ó yɔ̄ ɛga o ligbó ɛ́ɛ́ nɛ̄ ó má Ujísɔ̄si á, anɔ́ɔ ó le inya kwu wā í le okwúukwu kwajɛ iyɔ̄bū nū á. 7Anɔ́ɔ ó lɛ ɔkɔ cɛyí le ɛgba dɛ̄ kahíníī, “Ujísɔ̄si Ɔyínɔ̄nyīlɔ kú Ɔwɔicō nōo lɔfú fíyɛ́ dúú ā! Ɔdí nāa í dɔɔ̄kā ŋmá ɛgiyí um ā? N bī iyē kú Ɔwɔicō le gbɔ̄ɔkɔ ga awɔ, ā híī yá um itala ŋ́!” 8Ó ka ɛ̄nyā ohígbū ka Ujísɔ̄si yɔ̄ ī ka ka, alelékwū obɔ̄bí kóō le bɛ̄cɛ ŋmá ipú ɔ̄cɛnyīlɔ ā! 9Anɔ́ɔ Ujísɔ̄si le ɔ̄kā da ɔ́ kahíníī, “Ɔdí wɛ iyē kú uwɔ ā!” Ɔ̄cɛnyīlɔ ā cīla ka, iyē kú anúɔ wɛ Ulíjɔn, ka aá lɛwa nɛ̄hi íbí. 10Anɔ́ɔ ó yɔ̄ gē gbɔ̄ɔkɔ lɛ Ujísɔ̄si kóō híī nū alelékwū obɔ̄bí ā ŋmá ajɛ ɔ́ɔmā ŋ́. 11Ɔ́wá nɛ̄ɛ̄nɛ̄hi kú aókóome bá abɔ́ɔ, é bá gē lé ɔdolé ɛháajɛ ɛfu éyi abɔ́ɔ. 12Anɔ́ɔ alelékwū obɔ̄bí ā le ɔkɔ gbā lɛ Ujísɔ̄si kóō lɛ uwá nū ga ɛgiyí aókóome ā, cɛ́ɛ́ kú aá le pɛ́ tū ipú uwā. 13Ujísɔ̄si le ɛga je lɛ uwa kéē nyɔ̄, anɔ́ɔ aálelékwū obɔ̄bí ā le pɛ́ wɛ̄ɛcɛ ŋmá iyē kú ɔ̄cɛ ā, anɔ́ɔ é le pɛ́ tū ipú aókóome ā á. Abɔ̄ é le pɛ tū ipú aókóome ā, ɛjɛ̄ɛ̄jī ɔwá kú aókóome ā nēe lɛbɛ̄ɛka ulá igwó ā le kwu ga ɛháajɛ ɛfu gaá le pɛ́ tū ipú ísu.

14Ācɛ o gbō ɔ́wá kú aókóome ā le kwu nyɔ̄ gaá le ɔ̄kā ā ca klɛ́ɛcɛ ipú igelī nɛ̄ŋcɛ́ mɛ́mla aɛ́ga nɛ̄ ācɛ o hɛ́hɔ̄ bá ā. 15Anɔ́ɔ eko nēé wā kéē má Ujísɔ̄si ā, é lɛ ɔ̄cɛ nōo tɛtɛ lɛ alelékwū obɔ̄bí alɛwa ipú nū ā má. O cīce abɔ́ɔ lɛ úwé wiyē, eyī klla le gbo ɔ́ gɔɔ. Anɔ́ɔ ācɛ ā le kpó hídáagó á. 16Ācɛ nēe má ɛ́gɛ́nɛ̄ Ujísɔ̄si nū aálelékwū obɔ̄bí bɛ̄cɛ ŋmá ipú iyē kú ɔ̄cɛ ā lɛ ā mla ɔdā nōo yá ɔwá kú aókóome ā, le ɔdā nōo yá ā kpó ka lɛ ācɛ ā. 17Anɔ́ɔ é da Ujísɔ̄si kóō nyɛ̄ɛ̄ ŋmá ajɛ ɔlɛ́ aá. 18Abɔ̄ Ujísɔ̄si yɔ̄ gē ga ipú ɔ́kɔ ā, ɔ̄cɛ nōo lɛ aálelékwū obɔ̄bí tɛtɛ ā gbɔ̄ɔkɔ lɛ ɔ́ kɔ́ɔ̄ cɛ̄ lɛ anúɔ nyɔ̄ mla anú. 19Amáŋ Ujísɔ̄si í cɛ̄ kóō nyɔ̄ mla anú ŋ́, ó da ɔ́ kɔ́ɔ̄ Kwúcē igbīhi ga ɔlɛ́ gá ɛgiyí ācɛ ɔlɛ́ nū, cɛ́ɛ́ kɔ́ɔ̄ ka lɛ uwá ɛ́gɛ́ ɔdā nɛ̄ Óndú ā yá lɛ ɔ́ mɛ́mla ɛ́gɛ́nɛ̄ ó ményinyi nū lɛ ā. 20Anɔ́ɔ ɔ̄cɛ ā nyɛ̄ɛ̄ ŋmá abɔ́ɔ anɔ́ɔ ó le yɛ tá igelī nɛ̄ŋcɛ́ igwó á, yɔ̄ gē da uwā ɔdā nɛ̄ Ujísɔ̄si yá lɛ ɔ́ ā. Anɔ́ɔ odúúdú ācɛ le kpó hídáagó á.

Ɔyínɔ̄nyā kú Ujáyīrɔsi, mla ɔnyā nōo lɛ abɔ̄ kwu Ujísɔ̄si úwé ā

21Ujísɔ̄si kwúcē igbīhi ga ogbeé ɔhá kú óókpoó ā. Ɛwa kú ācɛ le jīla tū ɔ̄ okónu óókpoó ā. 22Otrɛ̄yí kú ɛgogbɔ̄ɔkɔ nɛ̄ŋcɛ́ éyi, nɛ̄ iyī nū wɛ Ujáyīrɔsi ā gā, anɔ́ɔ eko nɛ̄ ó lɛ Ujísɔ̄si má ā, ó gaá gbo klá ajɛ le okwúukwu kwajɛ iyɔ̄bū nū. 23Anɔ́ɔ ó gbɔ̄ɔkɔ lɛ Ujísɔ̄si nɛ̄ɛ̄nɛ̄hi yɔ̄ í ka kahíníī, “kócōō wā í lɛ abɔ̄ ce ɔyínɔ̄nyā kú um ɛyí, cɛ́ɛ́ kú ōcē kú nū kóō mɛ, kú ō yēeyī.”

24Ujísɔ̄si le yɛ mla anú. Ācɛ alɛwa yɔ̄ ī nyɔ̄ mla Ujísɔ̄si. É le pɛ́ klá anú ŋmá ɔkíkā dóódu. 25Ɔ̄cɛnyā éyi yɔ̄ abɔ́ɔ nōo húmáyī hóóyī iháyí igwɛ́ɛpa.

26Ó móōwē nɛ̄ɛ̄nɛhi ipú abɔ̄ kú aólobócí. Ɛ̄nyā cɛ̄ lɛ ɔ́ kwú ɛjɛ̄ɛ̄jī ije kú nū ú ŋmó tū ōcē ā, amáŋ ikɔkɔ nɛ̄ ōcē kú nū ā í tētēyi ā, ó yɔ̄ ī bɔ̄bí tōōtɔ̄ɔ̄. 27Ó lɛ ɔ̄kā pó ka Ujísɔ̄si ɔ́ɔ gē hɛ́ ācɛ tá ŋmá ōcē. Anɔ́ɔ ó wā ŋmá igbīhi nū ŋmá ipú ɛwa gaá lɛ abɔ̄ kwu úwé kú nū á. 28Ó le ka lɛ iyinū ka, “Ɔ́dāŋ nɛ̄ n kōō lɛ abɔ̄ kwu úwé kú nū kénékēē n géē lɛ ɔbɔ́lā.” 29Anɔ́ɔ ikpííkpo ɔ́ɔma oyī nɛ̄ ō yɔ̄ ī hɛ́ ā mɛ. Ó kē le jé ɛ́gɛ́nɛ̄ iyē kú nū mɛɛ lɛ ā, ka anúɔ le hɛ́tá ŋmá unwalu kú anúɔ ɛɛ́. 30Ɔkwɔɔkwu ɔ́ɔmā Ujísɔ̄si le jé ka ɔfú ɔ́ɔ nyɛ̄ɛ̄ ŋmá iyē kú anúɔ ɛɛ́. Anɔ́ɔ ó pīyeyī má ójila ā, anɔ́ɔ ó dɔɔ̄kā kahíníī, “Ɔ̄nyɛ le abɔ̄ kwu úwé kú um ā?” 31Anɔ́ɔ ayíkpó kú nū tóohi kahíníī, “A má ɛ́gɛ́nɛ̄ ācɛ yɔ̄ ī jīla tū uwɔ lɛ ā, ɔdíyá nāa ī dɔɔ̄kā ɔ̄cɛ nōo lɛ abɔ̄ kwu uwɔ ā?” 32Nááná ā ó yɔ̄ ge leyī táajɛ kóō lɛ ɔ̄cɛ nōo lɛ abɔ̄ kwu ɔ́ ā jé. 33Amáŋ abɔ̄ ɔnyā ā le jé ka anúɔ le hɛ́tá ā, anɔ́ɔ ó le bɛ̄cɛ, yɔ̄ ge yúufi ī fīyégbúlú. Ó kwú okwúukwu ú kwajɛ iyɔ̄bū Ujísɔ̄si, anɔ́ɔ ó lɛ ɛjɛ̄ɛ̄jī ɔkwɛ̄yi kú ɔdā nōo yá a kpó ka lɛ ɔ́ á. 34Ujísɔ̄si da ɔ́ kahíníī, “Adá um, ɔtū nāa le ce Ɔwɔicō ā cɛ̄ lɛ ōcē kú uwɔ mɛ ɛɛ́. Nyɔ̄ ɛbɔ́, kú aa lɛ ɔbɔ́lā lɛ ŋmá ōcē kú uwɔ mɛ́ɛnɛ.”

35Ɛpleko nɛ̄ Ujísɔ̄si yɔ̄ gē kɛlā nyā ā, olɛhɔ éyi ŋmá ɔlɛ́ Ujáríyɔ̄si wā í da ɔ́ kahíníī, “Ɔyí uwɔ nɔ̄nyā ā gekwú ɛɛ́. Ɔdíyá nāa í junwalu lɛ Itíla ā kpɔ́ ɛ́ɛ́ mā ā?” 36Ujísɔ̄si lɛ ahɔ̄ gwō ɛlā nēé ka ā bónū, amáŋ ó da Ujáríyɔ̄si kahíníī, “A híī yúufi ŋ́, cɛ̄ ɛlā Ɔwɔicō kénékēē.” 37Anɔ́ɔ ó cɛ̄ lɛ ācɛ ɔhá dóódu nyɔ̄ mla anú gɛ ŋ́, ń táafú ŋ́ ayíka Upíta mla Ujémīsi mɛ́mla ɔyínɛ́ nū nɔ̄nyīlɔ Ujɔ́ni. 38Eko nēé gāājɛ ɔlɛ́ kú otrɛ̄yí kú ɛgogbɔ̄ɔkɔ ā, ó má útú nɛ̄ ō hɛ́ abɔ́ɔ ā. Ó pó ɛ́gɛ́nɛ̄ ācɛ bá gē tɛ̄gíkwū, klla bá gē jikwū gbōmgbōm lɛ ā. 39Ó le bēé ga ipú inu, anɔ́ɔ ó da uwá kahíníī, “Ɔdíyá nɛ̄ aá í wu iyī aá ɔtū klíicō ī jikwū ā? Ɔyí ā í kwú ŋ́, ó yɔ̄ ī gbyɔ̄lā nɛ̄!” 40É gbɔɔ́ ō yɛhɛ tū ɔ̄, anɔ́ɔ ó lɛ ɛjɛ̄ɛ̄jī uwā kpó nū gɛcɛ, kwú ádā mla ɛ́nɛ́ ɔyí mɛ́mla ayíkpó kú nū ɛtá á ú, anɔ́ɔ é le pɛ́ tá ipú inu ɛga nɛ̄ ɔyí ā gwutá ā. 41Ó kwú ɔyí ā abɔ̄ ú, anɔ́ɔ ó ka “Talita kúmi” nɛ̄ ɛyí nū wɛ, ‘Ɔyínɔ̄nyā nɛ̄ŋcɛ́, n da uwɔ ka, nyāŋjɛ.’” 42Anɔ́ɔ ɔkwɔɔkwu ɔ́ɔmā ɔyí ā nyāŋjɛ, anɔ́ɔ ó gbɔɔ́ ō yāwu í yɛ bilíbilí ipú inu á. (Ó wɛ iháyí igwɛ́ɛpa.) 43Amáŋ Ujísɔ̄si pi uwá ɔhā lɔfú lɔfú kéē híī da ɔ̄cɛ dúúmā ɔdā nōo yá ā ŋ́. Anɔ́ɔ ó da uwá kéē lɛ odée je lɛ ɔ́ kóō lé.

Currently Selected:

UMÁKI 5: IFBCL

Highlight

Copy