UMÁKI 4

Ita kú ɔ̄cɛ o nyi īkpɔ̄dā

(Umát 13.1; Ulúk 8.4-8)

1 # Ulúk 5.1-3 Igbɔhá kpɔ́ Ujísɔ̄si gbɔɔ́ ō nwū ɛlā Ɔwɔicō okónu óókpoó kú Ugálīli. Ɛwa kú ācɛ nēe jīla tū ɔ̄ le nwuné nɛ̄hi anɔ́ɔ ó le yɛ tá ipú ɔ́kɔ gaá cīce á. Ɔ́kɔ ā yɔ̄ ipú éŋkpɔ̄ anɔ́ɔ ɛwa kú ācɛ ā bá okónu éŋkpɔ̄ ā á. 2Ó bī ita le nwū uwā ɔdā alɛwa. Ó da ācɛ ā ka, 3“Aá jāhɔ̄ lɛ ɛlā nɛ̄ n yɔ̄ ī ka ā! Ɛ̄cī éyi, ɔglɛ́ji éyi le tɛ́ɛcɛ gáā nyi īkpɔ̄dā. 4Abɔ̄ ó yɔ̄ gē mi īkpɔ̄dā klá ɛhɔ̄ ā, ōhī kú īkpɔ̄dā ā le pɛ́ bá ɔwɛ, anɔ́ɔ aígbáanɔ le pɛ́ wā í lɛ uwá kpó tá lé ŋmá ajɛ á. 5Īkpɔ̄dā ōhī le pɛ́ tū ɛplá ápátɛ́cɔ̄, ɛga nɛ̄ ajɛ ɔlamu í nwuné ŋ́ mā ā. Īkpɔ̄dā le bū wɛ̄ɛcɛ fíyaa, abɔ̄ ajɛ ɔlamu í cɔkpɛ́nú ɛyí ápátɛ́cɔ̄ ŋ́ mā ā. 6Anɔ́ɔ eko nɛ̄ ɛnɔ lɛ ɔkɔ nwūla ā, ó lɛ ɔdɛ̄hɔ̄ nɛ̄ŋcɛ́ nyā kwú boolo anɔ́ɔ abɔ̄ ɛgba kú nū í lipú ga ipú ajɛ ŋ́ mā, ɔdɛ̄hɔ̄ nēe bá ā le kpó yɔlá tāajɛ. 7Ōhī kú īkpɔ̄dā ā le pɛ́ bá ɛplá ɔcí ujē. Ujē ā le jɛ̄ anɔ́ɔ e lɛ ɔdɛ̄hɔ̄ ā kpó ŋmó á. É gwá īkpō dúú ŋ́. 8Amáŋ īkpɔ̄dā ōhī le pɛ́ bá ajɛ olɔhi, īkpō ā le bū wɛ̄ɛcɛ, le jɛ̄, le cɛyí mla īkpɔ̄dā alɛwa. Ɛga ōhī lɛ īkpɔ̄dā ofucigwó, ɔhá ofɛtá, anɔ́ɔ aóhile ā lɛ īkpɔ̄dā ofɛhɔ̄. 9Anɔ́ɔ Ujísɔ̄si kahíníī, “Ɔ̄cɛ nōo lɛ ahɔ̄ ōpɛ́ɛ́lā, kóō pó ɛlā nyā!”

Ɛyí kú aíta ā

10Eko nɛ̄ Ujísɔ̄si yɔ̄ ōfōōfūnū ā, ācɛ ōhī nēe pó ɛlā nɛ̄ ó ka ā le cīgbīhi wā ɛgiyí nū mla ayíkpó igwɛ́ɛpa ā, anɔ́ɔ e da ɔ́ kóō lɛyí kú aíta ā ka lɛ uwá. 11Ujísɔ̄si tá uwa ohi kahíníī, “E lɛ yá kú aá lɛyí ɔdā otayínū kú ajɔ̄ɔ̄cɛ́ kú Ɔwɔicō ā jé. Amáŋ ācɛ o hile nēe bá iyɛ̄ɛcɛ ā, Ita nēé gē bī le jé ɛyí nū á.” 12#Ayis 6.9,10 “Cɛ́ɛ́,

É pla eyī klla pla eyī nááná,

é má ɔdā dúú ŋ́,

é lɔfú jāhɔ̄ klla jāhɔ̄ nááná,

é pó ŋ́, é kē jɛ́ɛ́yí ɛlā ā ŋ́.

Ohígbū ka ɔ́dāŋ ka é lɛyí nū jé,

é géē pīya ga ɛgiyí Ɔwɔicō,

cɛ́ɛ́ ó géē je íne nēé bīya ā yá uwa ɛhi!”

Ujísɔ̄si ka ɛyí kú ita kú ɔgílɛjí ō nyi īkpɔ̄dā ā

(Umát 13.18-23; Ulúk 8.11-15)

13Anɔ́ɔ Ujísɔ̄si le ɔ̄kā da uwá kahíníī, “Aá jɛyí ita nya ŋ́ nɛɛ? Ɔwɛ nyá, nɛ̄ aá géē jɛ́ɛyí ita dóódu gílá ā gɛ?” 14Ɛlā Ɔwɔicō ā lɛbɛ̄ɛka īkpɔ̄dɛ̄hɔ̄ nɛ̄ ɔgílɛjí gē nyi ā. 15Ācɛ ōhī, ɛ́gɛ́nɛ̄ ɔ̄cɛ ī kɛlā ā lɛbɛ̄ɛka īkpɔ̄dā nēe pɛ́ bá ɔtāhɛ̄ ɔwɛ ā, ɔkwɔɔkwu nēé lɛ ɛlɔ̄ɔwɔicō pó ā, usétan gaá le ɛlā ā kpó ŋmá ipú kú uwā. 16Ācɛ ɔhá lɛbɛ̄ɛka īkpɔ̄dā nēe pɛ́ bá ɛplá ápátɛ́cɔ̄ ā. Ɔkwɔɔkwu nēé lɛ ɛlɔ̄ɔwɔicō pó ā, é mīyɛ ɛlā ā mla ɔtū ékpó. 17Amáŋ ɛlā ā í ga ipú odo kú uwā lipú ŋ́, ɛlā ā í klla yɔ̄ ipú odo kú uwa gbojī ŋ́. Anɔ́ɔ eko nɛ̄ unwalu mla oyáŋmó gā ohígbū ɛlā ā, é kwúcē igbīhi bōōbū. 18Ācɛ ɔhá ā lɛbɛ̄ɛka īkpɔ̄dā nēe pɛ́ bá ɛplá ácí ujē ā. Ācɛ nēe bá nyā wɛ ācɛ nēe lɛ ɛlɔ̄ɔwɔicō ā pó, 19amáŋ ohígbū ɔtunwulanwula kú oyēeyī, é gē piyɔtū kú agbénú kú ɛcɛ, mla ɛdɔ kú únwū ɛyɛ́ɛyɛ́yí le mu ipú ɔtū kú uwā, anɔ́ɔ é cɛ̄ lɛ ɛlɔ̄ɔwɔicō ā jɛ̄ ipú odo kú uwā ŋ́ má. Anɔ́ɔ é gwá īkpō ŋ́ má. 20Amáŋ ācɛ ɔhá ā lɛbɛ̄ɛka īkpɔ̄dā nēé nyi tū ipú ajɛ olɔhi ā. É lɛ ɛlɔ̄ɔwɔicō ā pó, é mīyɛ ɛlā ā, anɔ́ɔ é le īkpō gwá, ōhī gwá īkpō ofucigwó, aɔ́há gwá ofɛtá, ōhī klla gwá īkpō ofɛhɔ̄.

Agege yɔ̄ kóō fíyajɛ

21 # Umát 5.15; Ulúk 11.33 Ujísɔ̄si yɔ̄ gē kɛlā kpɔ́ kahíníī, “Ó lɛ ɔ̄cɛ dúú nōo le ɔlá hɛ́ kwu agege kwú ɔ̄ ú nyɔ̄ í háyi ipú ɔgālā ámāŋ ka útāŋgōdō ŋ́. Ɔdā ō lɛ agege ce ɔ́ nɛ̄ ó gē lɛ ɔ́ ce ɛyí nū á. 22#Umát 10.26; Ulúk 12.2Ɔdā dúúmā nōo tayínū, é géē je ɔ́ tɛ́ɛcɛ ɛga ogēdēē. Ó lɛ ɔdā dúúmā nēé lɛ ácí ŋmó klá anú nēé gáā pīyɛ̄ ɔ̄ wɛ̄ɛcɛ ŋ́ nɛ̄ ŋ́. 23Ɔ̄cɛ nōo lɛ ahɔ̄ opɛ́ɛla, kóō pó ɛlā nyā!” 24#Umát 7.2; Ulúk 6.38Ó klla da uwá kahíníī, “Aá jāhɔ̄ lɛ ɛlā nɛ̄ n gáā ka nyā, ‘Ɛdɔ kú íne ékpó nāa bī le kɛpɔ̄ tū ācɛ ā, nɛ̄ Ɔwɔicō géē bī le kɛpɔ̄ tū uwɔ dúú á. Ɛpɔ̄ kú uwɔ kōō í lɔnɔ fíyɛ́. 25#Umát 13.12; 25.29; Ulúk 19.26Ɔ̄cɛ nōo lɛ odée ā Ɔwɔicō géē je lɛ ɔ́ fíyɛ́, anɔ́ɔ ɔ̄cɛ nɛ̄ ó lɛ ɔdā dúúmā ŋ́ mā, ó kōō wɛ oligíi nɛ̄ ó lɛ ā, é géē mīyɛ ɔ́ ŋmá ɛgiyí nū.”

Ita kú īkpō nōo yɔ̄ gē jɛ̄ ā

26Ujísɔ̄si yɔ̄ ī kɛlā gɔbū kahíníī, “Ajɔ̄ɔ̄cɛ́ kú Ɔwɔicō lɛbɛ̄ɛka ɔ̄cɛ nōo nyī īkpō tū ipú ɛhɔ̄ ā. 27Ó le iyɔ̄lā gbo ɔtú, ó le héyī. Anɔ́ɔ ó yɔ̄ ī yɛ gicō gaajɛ ɔlɛ́ɛnɔ, ɛplá eko nyā īkpō ā le bū yɔ̄ gē jɛ̄ ɛɛ́. Nááná o jé ɛ́gɛ́nɛ̄ īkpō ā yá ɛ́ɛ́ nɛ̄ ó bū klla yɔ̄ gē jɛ̄ ā ŋ́. 28Ajɛ ī yá kú īkpō kóō bū klla jɛ̄ á. Ó lɛ ɔpílɔ́ tá wɛ̄ɛcɛ aflɛ́yí, cɛ́ɛ́ ɛyí īkpɔ̄dā ā le bɛ̄cɛ ámōōmɛ. Cɛ́ɛ́, ámōōmɛ ā, ɔdɛ̄hɔ̄ ā le cɛyí mla īkpō nɛ̄ɛ̄nɛ̄hi. 29#Ujów 3.13Eko nɛ̄ īkpō ā le jé, ɔgílɛjí ā bī ɛwa gbɔɔ́ ō hɛ́ ɔ̄, ohígbū ka eko o cē ɔdɛ̄hɔ̄ le yá ɛɛ́.”

Ita kú īkpō kú Umɔ́stadi

(Umát 13.31,32,34; Ulúk 13.18,19)

30Ujísɔ̄si dɔɔ̄kā kahíníī, “Ɔdí nɛ̄ alɔ géē lɛ ajɔ̄ɔ̄cɛ́ kú Ɔwɔicō gbla anú ā?” Ita nyá nɛ̄ alɔ í kwu o yá ɛ́ɛ́ kú ācɛ kéē jɛ́ɛyí nū ā? 31“Ajɔ̄ɔ̄cɛ́ kú Ɔwɔicō lɛ ɛ́gɛ́nyā. Ɔ̄cɛnyīlɔ éyi kwú īkpō kú ɔcí nēe hī ka umɔ́sitáadi, īkpō nōo nyɛ́ fíyɛ́ dúú ipú ɛcɛ ā, anɔ́ɔ ó lɛ ɔ́ nyi ipú ajɛ á. 32Eko kpií le gla, ó le jɛ kwú pīya ɔcínɔ̄kwū. Ó kwu abɔ̄ nɛ̄ɛ̄nɛ̄hi nɛ̄ aígbáanɔ gē wā í gwó ɔlɛ́ uwā ce ābɔ̄ nū.”

33Ujísɔ̄si bī ita ɛ́gɛ́nyā alɛwa ɔhá, áluka nɛ̄ ācɛ pó í jɛ́yí nū glá ā le tɔ́ɔna kú ajɔ̄ɔ̄cɛ́ kú Ɔwɔicō lɛ uwá. 34Ó gē bī ita eko dúú nɛ̄ ó ī kɛlā lɛ ɛwa, amáŋ eko dúú nɛ̄ anú mla ayíkpó kú nū gaá bá ōfōōfūwā, ó gē ka ɛyí kú ɛjɛ̄ɛ̄jī ɔdā dóódu lɛ uwá.

Ujísɔ̄si trá owu nɛ̄hi

(Umát 8.23-27; Ulúk 8.22-25)

35Ɔnɔ̄ɔ̄nɛ̄ kú ɛci ɔ́ɔmā piíí ā, Ujísɔ̄si da ayíkpó kú nū kahíníī, “Ālɔ̄ le hɛ́ enyi bēhé ga ogbeé ɔhá kú óókpoó ā.” 36Anɔ́ɔ é nyɛ̄ɛ̄ ŋmá ipú ɛwa ā. Ayíkpó ā le pɛ́ tū ipú ɔ́kɔ nɛ̄ Ujísɔ̄si húmáyī cīce ipú nū ā, anɔ́ɔ é kwú ɔ̄ ú le yɛ á. Aɔ́kɔ ɔhá nyɔ̄ mla uwá dúú. 37Anɔ́ɔ igbeékpónú owu nɛ̄hi gbɔɔ́ ō tá, anɔ́ɔ úgbagwú nɛ̄hi gbɔɔ́ ō tá éŋkpɔ̄ ga ipú ɔ́kɔ ā á. Ó hile ligií kú éŋkpɔ̄ kóō le mu ipú ɔ́kɔ ā. 38Ujísɔ̄si gwutá ipú igbīhi ɔ́kɔ ā lɛ ɛyí ce upílo yɔ̄ ī gbiyɔ̄lā. Ayíkpó ā lɛ ɔ́ héyī, Anɔ́ɔ é kahíníī, “Itíca, Ɔ̄conwɔ̄kpá, ó wɛ unwalu kú uwɔ ka alɔ gáā bī ipú éŋkpɔ̄ ŋ́ nɛɛ?” 39Ujísɔ̄si cāŋjɛ háyicō anɔ́ɔ ó lɛ ɔ́da je lɛ owu kahíníī, “Mā uya.” Anɔ́ɔ ó da úgbagwú kahíníī, “Yɔ̄ cíí!” Owu ā mā biyoo, ó klla tá gɛ ŋ́. Anɔ́ɔ ɛga dóódu yɔ̄ hímm á. 40Anɔ́ɔ Ujísɔ̄si da ayíkpó kú nū kahíníī, “Aá cíkā ō yúufi ŋ́. Aá lɛ ɔtūce Ɔwɔicō ŋ́ kpɔ́ nɛɛ?” 41Amáŋ ufí yá ayíkpó ā nɛ̄hi, anɔ́ɔ é gbɔɔ́ ō ka lɛ ɔ́mpa uwā kahíníī, “Ɔnyɛ yɔ̄ ā mɛ́ɛ̄? Owu mɛ́mla úgbagwú kōō ī lɛyítáajɛ lɛ ɔ́!”

Currently Selected:

UMÁKI 4: IFBCL

Highlight

Copy