UMÁKI 2

Ujísɔ̄si hɛ́ ɔ̄cɛ nɛ̄ iyē kú nū le ŋmó ā tá

(Umát 9.1-8; Ulúk 5.17-26)

1Eko nɛ̄ ɛ̄cī le gla yɛɛ ā, Ujísɔ̄si kwúcē ga Ukapánɔm kpɔ́, anɔ́ɔ ācɛ le pó ka ó yɔ̄ ɔlɛ́. 2Eko kpií ācɛ alɛwa wā í le pɛ́ bá ipú inu ā nɛ̄hi nōo yá kú ɛga dúú kóō jɛ̄ ācɛ gɛ ŋ́, jāā klá iyɔ̄bū ɔwɛ kú inu ā. Ujísɔ̄si kē yɔ̄ ī tɔ́ɔna kú olɛhɔ̄ ā lɛ uwá. 3Anɔ́ɔ ācɛ ɛnɛ gā abɔ́ɔ, lɛ ɔ̄cɛ éyi nɛ̄ iyē kú nū le ŋmó ā tá ipú ákplata gé lɛ Ujísɔ̄si. 4É bī ɔ̄cɛnyīlɔ ā ga ɛgiyí Ujísɔ̄si glá ŋ́ ohígbū ɛwa kú ācɛ. Anɔ́ɔ é lɛ ɛyí inu ɛga nɛ̄ Ujísɔ̄si klá piíí ā hɛ́ bū. Eko nēé lɛ ɔ̄gɔ̄ hɛ́ jɛ̄ nɛ̄ ákplata nōo bī ɔ̄cɛ ā í bū ɔ̄ glá ā, é kwu ɔ̄cɛ ā ú bū ɔ̄gɔ̄ ā wāajɛ mla ákplata nɛ̄ ó gwutá anú ā. 5Ujísɔ̄si lɛ ɛ́gɛ́nɛ̄ ācɛ nēe bá nyā lɔtūce ɔ́ lɛ ā má ā, anɔ́ɔ ó da ɔ̄cɛ o ŋmííyē ā kahíníī, “Ɔyínɔ̄nyīlɔ kú um, é kwú íne nāa bīya ā í yá uwɔ ɛhi ɛɛ́.” 6Aítíca ōhī nēe bá abɔ́ɔ ā, gbɛlá ipú odo kú iyī uwā ka. 7“Ɔdíyá nɛ̄ ó bɔ́tū kɛlā ɛ́gɛ́nyā ā? Ɛ̄nyā wɛ atufú ō yá Ɔwɔicō. Anú ōfōōfūnū je íne nɛ̄ ācɛ bīya ā yá ɛhi glá á!” 8Ikpíikpó ɔ́ɔmā Ujísɔ̄si lɛ ɔdā nēé yɔ̄ ī gbɛlá ā jé, anɔ́ɔ ó da uwá kahíníī, “Ɔdíyá nɛ̄ aá í gbɛlá ɛdɔ kú ɔdā ɛ́gɛ́nyā ā. 9Ó tɔ́ɔtɛ kú n̄ ka lɛ ɔ̄cɛ o ŋmííyē nyā ka, ‘É kwú íne nāa bīya ā í yá uwɔ ɛhi ɛɛ́, fíyɛ́ o ka ka, kwu ipoto kú uwɔ ú, ká ā yāwu! 10N géē cābɔ̄ lɛ aá ka, ami, ɔyínɔ̄nyīl kú Ɔ̄cɛ lɛ íkwu ipú ɛcɛ ká n̄ je íne nɛ̄ ācɛ bīya ā yá uwa ɛhi.” Anɔ́ɔ ó ka lɛ ɔ̄cɛ o ŋmííyē ā ka, 11“N da uwɔ ka, nyāŋjɛ, kwú ipoto kú uwɔ ú, cɛ́ɛ́ ká ā ga ɔlɛ́!” 12Ipéeyi ɛjɛ̄ɛ̄jī uwā, ɔ̄cɛnyīlɔ ā cāŋjɛ háyicō, kwú ipoto kú nū ú, anɔ́ɔ ó nwúleyīkwū nyɛ̄ɛ̄ á. Ɛjɛ̄ɛ̄jī uwā le kpó hídáagó dúúdu, anɔ́ɔ é cɛ̄tra Ɔwɔicō yɔ̄ ī kahíníī, “Alɔ ī má ɔdā dúú bɛ̄ɛka ɛ̄nyā jééjéē ɛ́ɛ́ ŋ́!”

Ujísɔ̄si da Ulífāyi kóō tá ɔ ɔkwū

(Umát 9.9-13; Ulúk 5.27-32)

13Ujísɔ̄si klla kwúcē ga okónu óókpoó kú Ugálīli ā kpɔ́. Ācɛ alɛwa nɛ̄hi le pɛ́ wā í tá ɔ̄ abɔ́ɔ, anɔ́ɔ ó gbɔɔ́ ō nwū uwā ɛlā Ɔwɔicō á. 14Abɔ̄ ó yɔ̄ gē yɛ nyɔ̄ ā, ó lɛ ɔ̄cɛ o dɔlɛ́ éyi má, Ulífāyi ɔyí kú Álfīyɔsi cicee inúklɔ́ kú nū. Ujísɔ̄si da ɔ́ kahíníī, “Yɛce um.” Anɔ́ɔ Ulífāyi nyāŋjɛ gbɔɔ́ ō yɛce ɔ́ á.

15Eko kpiíí le gla, Ujísɔ̄si yɔ̄ í lé ɔdōlé ɔlɛ́ kú Ulífāyi. Ācodɔlɛ́ mɛ́mla ācɛ nēé leyī gwu uwā bónū dúú ā bá gē tū Ujísɔ̄si ɔkwu, anɔ́ɔ ācɛ alɛwa kú uwā wā í lé ɔdōlé tɔhā mla anú mɛ́mla ayíkpó kú nū. 16Amáŋ eko nɛ̄ aítíca kú íne nēe wɛ Ufárīsisi ā, le má ka Ujísɔ̄si yɔ̄ gē lé ɔdōlé mla ācodɔlɛ́ mɛ́mla ācɛ nēé leyi gwū uwā bónū ā, anɔ́ɔ é da ayíkpó kú nū kahíníī, “Ɔdíyá nɛ̄ ó ī lé ɔdōlé mla ɛdɔ ācɛ nēe bá abɔ́ɔ ā?” 17Ujísɔ̄si lɛ ɛlā nēé ka ā pó anɔ́ɔ ó tū uwa ohi kahíníī, “Ācɛ nēe lɛ ɔbɔ́lā í cɛgbá olobócí ŋ́, amáŋ odoōcē ā ī cɛgbá olobócí á. Ń wā gaá hī ācɛ olɔhi igwú ŋ́, amáŋ ācɛ nēé leyī gwu uwā bónū ā nɛ̄ n.”

Ɔkā nēé da lɛyíkwu okónu ō gwū

(Umát 9.14-17; Ulúk 5.33-39)

18Ɛ̄cī éyi ayíkpó kú Ujɔ́ni Oyúbatísīm mɛ́mla ācɛ Ufárisīsi bá gē gwōkónu. Anɔ́ɔ ācɛ ōhī wā i da Ujísɔ̄si kahíníī, “Ɔ́díyá nɛ̄ ayíkpó kú Ujɔ́ni mɛ́mla ayíkpó kú ācɛ Ufárisīsi ge gwōkónu ā. Amáŋ ayíkpó kú uwɔ í gē gwū ŋ́ mā ā? 19Ujísɔ̄si tóohi kahíníī, “Aá cíkā ō leyīce ka aúgbɔga kú ɔ̄cɛ olɔnyā ɛ̄yīpɛ̄ í gwōkónu eko nɛ̄ ɔ̄cɛ olɔnyā ɛ̄yīpɛ̄ ā yɔ̄ mla uwá ŋ́.” 20Eko géē wā nēé géē je ɔ̄cɛ olɔnyā ɛ̄yīpɛ̄ ā ŋmá ɛgiyí uwā, cɛ́ɛ́ é géē gwōkónu. 21Ɔ̄cɛ dúúmā í gē bī īlī ɛ̄yīpɛ̄ le gɔ́ bá ɛga o híla kú īlī nɛ̄ncɛ̄ ā ŋ́, ohígbū ka īlī ɛ̄yīpɛ̄ ā í wutū í je īlī nɛ̄ncɛ̄ ā híla cɛ́ɛ́ ó le ɔ̄gɔ̄ o lɔwá fíyɛ́ hɛ́ tá ipú nū. 22Ɔ̄cɛ dúúmā í gē pīya ejé ɛ̄yīpɛ̄ tū ipú óhi kú ɛbɛ́ nɛ̄ncɛ̄ ŋ́, ohígbū ka ejé ā géē je óhi kú ɛbɛ́ ā ca, anɔ́ɔ ejé ā mɛ́mla óhi kú ɛbɛ́ ā í kpó yíífi. Ikɔkɔ ɔ́ɔmā, óhi kú ɛbɛ́ ɛ̄yīpɛ̄ nēé gē pīya ejé ɛ̄yīpɛ̄ tū ɔ̄ á.

Ujísɔ̄si mla Ācɛ Ufárisīsi táafu ohígbū Usábāti

(Umát 12.1-8; Ulúk 6.1-5)

23 # Obla 23.25 Ɛ̄cī Usábāti éyi, Ujísɔ̄si yɔ̄ ī yɛ ɔwɛ nōo bū ipú ɛhɔ̄ kú īkpɔ̄dā. Abɔ̄ ayíkpó kú nū bá gē yɛ mla anú ā, é gbɔɔ́ ō cē īkpɔ̄dā ā lé. 24Anɔ́ɔ ācɛ Ufárisīsi da Ujísɔ̄si kahíníī, “Má ɔ̄, ɔdíyá nɛ̄ ayíkpó kú uwɔ bá yɔ̄ ī bīya íne kú ɛ̄cī Usábāti kú alɔ, o ŋmá lɛ ɔdā nēé bá yɔ̄ ī yá nyā ā?” 25Ujísɔ̄si tá uwa ohi kahíníī, “Aá jé ŋmá ɔkpá ɔdā nɛ̄ Udéfīdi yá eko nɛ̄ ó cɛgbá ɔdōlé ā ŋ́ nɛɛ? Ɛmiyɛ yɔ̄ í ŋmó anú mla ācɛ ɔlɛ́ nū, 26#Ulīf 24.9#1 Usám 21.1-6anɔ́ɔ ó le bēhé tá ipú inu ɔlɛ́ Ɔwɔicō. Eko nɛ̄ Abíyāta wɛ otrɛ̄yí kú ācogwɛ́ɛya ā, anɔ́ɔ ó kwú igbō nēé je lɛ Ɔwɔicō ā ú lé klla lɛ ōhī kú nū je lɛ aɔ́mpānū á. Ɛ́gɛ́nɛ̄ íne kú alɔ lɛ ā, ɔ̄cogwɛ́ɛya ā ōfōōfūnū lɔfú lé igbō ā glá á. 27Anɔ́ɔ Ujísɔ̄si kahíníī, “É yá Usábāti kóō tīile lɛ ɔ̄cɛ. É yá ɔ̄cɛ kóō tīile lɛ Usábāti ŋ́. 28Ohígbū ɔ́ɔmā, Ɔyínɔ̄nyīlɔ kú Ɔ̄cɛ wɛ Óndú kú Usábāti á.”

Currently Selected:

UMÁKI 2: IFBCL

Highlight

Copy