UMÁKI 11

Ujísɔ̄si gbogwú nyɔ̄ Ujerúsālɛm

(Umát 21.1-11; Ulúk 19.28-40; Ujɔ́n 12.12-19)

1Abɔ̄ é le bá lɛ Ujerúsālɛm, Ubɛ́tifáge mɛ́mla Ubɛ́tāni ā, é gā ɛfu nēé hī ka Ólīfu ā. Ujísɔ̄si lɛ ayíkpó kú nū ɛpa tɛ̄hɔ̄ ga iyɔ̄bū. 2Ó tū uwā ukɔ́ kahíníī, “Aá nyɔ̄ eyīpɔ́lɛ́ nōo yɔ̄ iyɔ̄bū kú aá ā. Ɔkwɔɔkwu nɛ̄ aá le tá abɔ́ɔ ā, aá géē má ijakī nēé lɛ ɔ́ŋgbá tū ɔ̄ wū ɔcí, ɛ̄nɛ̄ ɔ̄cɛ dúúmā í ce jejee ɛ́ɛ́ ŋ́. Aá lɛ ɔ́ wī wā amānyā. 3Ɔ́dāŋ́ ka ɔ̄cɛ dúúmā da aá ɔ̄kā ka, ɔdí nɛ̄ aá í yá abɔ́ɔ, aá da ɔ́ ka ɔkpani ā ī dɔɔ̄kā nū, ó kē í je ɔ́ lɛ aá wā bōōbū.” 4Anɔ́ɔ é le yɛ gaá lɛ ijakī éyi má, é lɛ ɔ́ŋgbá tū ɔ̄ wū ɔcí kú okómpīinu kú inu éyi kú úláyí ā. Abɔ̄ é gbɔɔ́ ō wī ijakī ā ŋmá ɔcí ā, 5ācɛ ōhī nēe háyi abɔ́ɔ ā da uwá ɔ̄kā kahíníī, “Ɔdí nɛ̄ aá ī yá yɔ̄, aá yɔ̄ í wī ijakī ā nɛɛ?” 6Ayíkpó ā lɛ ōhī nɛ̄ Ujísɔ̄si da uwá kéē tá ā tá uwā, anɔ́ɔ é habɔ̄ uwā tá kéē nyɔ̄ á. 7É lɛ ijakī ā bī gé lɛ Ujísɔ̄si. Anɔ́ɔ é lɛ úwé kú uwā kpó klá ijakī ā, anɔ́ɔ Ujísɔ̄si nyɔ̄ í ce ɛyí nū á. 8Ācɛ alɛwa le úwé kú uwā kpó klá ɔwɛ lɛ ɔ́ kóō yɛ ɛyí nū. Ācɛ ōhī lɛ abɔ̄ kú ɔcí hɛ́ anɔ́ɔ é lɛ ɔ́ kpɔ́ bá ɔwɛ lɛ ɔ́ kóō yɛ ɛyí nū dúú á. 9#Aíjē 118.25,26Ācɛ nēe bá iyɔ̄bū nū mla ācɛ nēe tū ɔ̄ ɔkwu igbīhi ā, gbɔɔ́ ō dɛ̄gba ka, “Aá wóófu Ɔwɔicō! Ɔwɔicō kóō hɔ́ɔhā ce ɔ̄cɛ nōo wā ŋmá iyē kú Óndú ā! 10Ɔwɔicō kóō hɔ́ɔhā cē ajɔ̄ɔ̄cɛ́ nɛ̄ ō yɔ̄ ī wā ā, ó géē lɛbɛ̄ɛka ajɔ̄ɔ̄cɛ́ kú ádā alɔ Udɛ́fīdi ā! Odúúdú ojīlīmā kóō ce Ɔwɔicō!”

11Ujísɔ̄si le bēhé tū ipú Ujerúsālɛm, le yɛ ga ipú Agblīihɔ-nɛ̄hi, ó yɛ bilíbilí ipú nū lɛ ɛjɛ̄ɛ̄jī ɔdā dóódu kpó má. Amáŋ abɔ̄ otú gbɔɔ́ ō bī ā, ó kwúcē wā í tá ayíkpó igwɛ́ɛpa ā, anɔ́ɔ é le pɛ́ ga Ubɛ́tani á.

Ujísɔ̄si lɛ okónu tá lɛ ɔcí ufígi

(Umát 21.18,19)

12Oŋmɔ́ɔ̄cī nū, abɔ̄ é yɔ̄ gē pīyɛyí ŋmá Ubɛ́tani ga Ujerúsālɛm ā, ɛmiyɛ gbɔɔ́ ō ŋmó Ujísɔ̄si. 13Ó má ɔcí ufígi éyi kwu ɛgaligbó le lu mla ēpū jugwuu, anɔ́ɔ ó gbɔɔ́ ō nyɔ̄ ɛgiyí ɔcí ā, ɔ́dāŋ koó géē má īkpō ufígi dúúmā lé glá. Amáŋ abɔ̄ ó ga ɔkwu ɔcí ā, ēpēēpū nōó má icō á, ohígbū ka eko nɛ̄ ufígi ī gwíīkpō ā í yá ɛ́ɛ́ ŋ́. 14Ujísɔ̄si da ɔcí ufígi ā ka, “Ɔ̄cɛ dúú í gáā lé īkpō kú uwɔ ɛ́ɛ́ gɛ ŋ́.”

Ujísɔ̄si le ācɛ o tɔ́ɔ́hí nū bɛ̄cɛ ŋmá ipú Agblīihɔ-nɛ̄hi ā

(Umát 21.12-17; Ulúk 19.45-48; Ujɔ́n 2.13-22)

15Eko nēé gāājɛ Ujerúsālɛm ā, Ujísɔ̄si le yɛ tá ipú Agblīihɔ-nɛ̄hi ā, anɔ́ɔ ó gbɔɔ́ ō nū odúúdú ācɛ nēe bá gē lá ɔlá mɛ́mla ācɛ okpó ɔlá lá ā bɛ̄cɛ á. Ó lɛ itéblu kú ācɛ ofla ije abɔ̄ mɛ́mla ɔcí oyājɛ kú ācɛ o je ɔklɛ́bɛ́tɛ lá ā kpó pīyeyī kláajɛ. 16Anɔ́ɔ ó cɛ̄ lɛ ɔ̄cɛ dúúmā bī iyó wā í bū ipú Agblīihɔ-nɛ̄hi ā gɛ ŋ́. 17#Ayis 56.7; Ujer 7.11 Anɔ́ɔ ó gbɔɔ́ ō nwū ācɛ ā ɛlā kahíníī, “É tá ɔ̄ ipú ɔkpá kú ɛlɔ̄ɔwɔicō ka Ɔwɔicō ɔ́ɔ ka, ‘É géē hī Agblīihɔ-nɛ̄hi kú um ka inu ɛga nɛ̄ ācɛ kú ewo dúúdú géē gbɔ̄ɔkɔ ga um.’ Amáŋ aá lɛ ɔ́ pīya ɛga nɛ̄ aúwī gē tayínū ā!” 18Aótrɛ̄yí kú ācogwɛ́ɛya ā mla aítíca kú íne lɛ ɔdā nōó yá ā pó. Anɔ́ɔ é gbɔɔ́ ō dɔɔ̄kā ɔwɛ nēé géē ŋmó ɔ̄ á. 19Eko nɛ̄ ɔ̄nɛ̄ le gbo ā Ujísɔ̄si mla ayíkpó kú nū nyɛ̄ɛ̄ ŋmá igelī nɛ̄hi ā.

Aá lɔtūce Ɔwɔicō

(Umát 21.20-22)

20Ɔcɔ̄ɔ̄ci blibli ɛ̄cī ɔhá, abɔ̄ é bá í yɛ ɔwɛ ā, é má abɔ̄ ɔcí ufígi ā le ŋmó ŋmá icō jāā kwu ɛgba. 21Upíta le blakwu ɔdā nōo yá ā, anɔ́ɔ ó da Ujísɔ̄si kahíníī, “Má ɔ̄ Itíca, ɔcí ufígi nāa tokónu lɛ ɔ́ ā gekwú ɛɛ́!” 22Ujísɔ̄si tá uwā ohi kahíníī, “Aá lɔtūce Ɔwɔicō. 23#Umát 17.20; 1 Ukɔ́r 13.2 N dɔɔ̄kā kú aá lɛ ɛ̄nyā jé lɔɔlɔhi ka ɔ̄cɛ dúúmā nōo da ɛfu nyā, kóō lɛ iyī nū fu ŋmá ajɛ, cɛ́ɛ́ kóō kwú iyī nū ú tɛ́ɛcɔ̄ í kwu ipú ísu, anɔ́ɔ ɔ̄cɛ ā í lɛ ɔtū kú nū bɛ́ɛpa ŋ́, amáŋ nōó cɛ̄ ka ɛlā nɛ̄ anúɔ ka ā í yá, ó kē í yá lɛ ā lɛ ɔ́. 24Ohígbū ɔ́ɔmā, eko dúú nɛ̄ aá lɛ ɔkɔ gbā lɛ Ɔwɔicō, lɛ ɛ̄ba kú ɔdā dúú ba ɔ́, aá cɛ̄ ka aá mīyɛ odée ā ɛɛ́. Ɔ́dāŋ́ nɛ̄ aá cɛ̄ lɛ ā, Ɔwɔicō géē je ɔ́ lɛ aá. 25#Umát 6.14,15Anɔ́ɔ eko nɛ̄ aá háyicō lɛ ɔkɔ gbā, kwú ɔdā dúú nɛ̄ ɔ̄cɛ dúúmā yá aá ā í yá ɔ̄ ɛhi, cɛ́ɛ́ Ɔwɔicō nōo wɛ Ádā aá nōo yɔ̄ ɔkpáncō ā, géē je ɔdōbɔ̄bí nɛ̄ aá yá ā yá aá ɛhi dúú.” 26Ɔ́dāŋ́ nɛ̄ aá je ɔdā nɛ̄ ācɛ ɔhá yá aá ā yá uwa ɛhi ŋ́, Ɔwɔicō Ádā aá nōo yɔ̄ ɔkpáncō ā, í gáā je ɔdōbɔ̄bí nɛ̄ aá yá ā yá aá ɛhi ŋ́ dúú.

É da Ujísɔ̄si ɔ̄kā ɛga nɛ̄ íkwu kú nū ŋmá ā

27Ujísɔ̄si mla ayíkpó kú nū klla gā Ujerúsālɛm kpɔ́. Abɔ̄ Ujísɔ̄si yɔ̄ ī yɛ ipú Agblīihɔ-nɛ̄hi ā blibli ā, otrɛ̄yí kú ācogwɛ́ɛya, aítíca kú íne ā, mɛ́mla anyākwɔ́cɛ le pɛ́ wā ɛgiyí Ujísɔ̄si. 28Anɔ́ɔ é da ɔ́ ɔ̄kā kahíníī, “Ikwu nyá nāa bī le yá ɔdā nāa yá ā?” 29Ujísɔ̄si tá uwā ohi ka, “N géē da aá ɔ̄kā ékpónú, ɔ́dāŋ nɛ̄ aá lɛ ɔ̄kā ā cīla, n géē da aá ɛga nɛ̄ íkwu nɛ̄ n bī le yá ɔdā nēe bá ā ŋmá ā. 30Aá da um ɛ́ɛ́, iní nɛ̄ Ujɔ́ni bī íkwu nōo gē bī le yá ācɛ ubatísim ā ŋmá ā? Ikwu ā ŋmá ɛgiyí Ɔwɔicō kɛ̄ɛ ka ɛgiyí ɔ̄cɛ ɔlamu?” 31É gbɔɔ́ ō táafú mla iyī uwā, bá gē ka, ɔdí nɛ̄ aá í ka āā? Ɔ́dāŋ́ nɛ̄ aá ká íkwu ā ŋmá ɛgiyí Ɔwɔicō, ó géē da aá ka ɔdíyá nɛ̄ aá cɛ̄lā kú Ujɔ́ni ŋ́ māā? 32É ka aá í ka ka íkwu kú Ujɔ́ni ŋmá ɛgiyí ācɛ glá ŋ́. É ka ɛ̄nyā ohígbū ka é gē yúufi ācɛ ā. Ohígbū ka ɛjɛ̄ɛ̄jī ācɛ cɛ̄ ka Ujɔ́ni wɛ ɔ̄comɛ́ɛbɛ ɔkwɔ̄ɔ̄kwɛ̄yi. 33Anɔ́ɔ é tá Ujísɔ̄si ohi ka, aá í jé ɔ̄cɛ nōo je íkwu lɛ Ujɔ́ni kóō yá ācɛ ubatísim ā ŋ́. Anɔ́ɔ Ujísɔ̄si tá uwā ohi kahíníī, “Ń kē gáā da aá ɔ̄cɛ nōo je íkwu gā um nɛ̄ n bī yá aɔ́dā nēe bá mbáa ŋ́.”

Currently Selected:

UMÁKI 11: IFBCL

Highlight

Copy