UJƆ́NI 18

Aótrɛ̄yí kú ācɛ Ujíyu le aícɔ́ɔja tɛ̄hɔ̄ kéē lɛ Ujísɔ̄si kwú

(Umát 26.47-56; Umák 14.43-50; Ulúk 22.47-53)

1Eko nɛ̄ Ujísɔ̄si lɛ ɛlā nēe bá āa ka kwɛyí ā, ó le yɛ mla ayíkpó kú nū le gla ɔgblɛga kú Ukídrɔn. Ɛhɔ̄ éyi yɔ̄ abɔ́ɔ, anɔ́ɔ Ujísɔ̄si mɛ́mla ayíkpó kú nū le tá abɔ́ɔ á. 2Ujúdasi, oyíbīyājɛ ā, kē jé abɔ́ɔ dúú, ohígbū ka Ujísɔ̄si mɛ́mla ayíkpó kú nū gē jīla abɔ́ɔ ojigógó. 3Anɔ́ɔ Ujúdasi kwú ɔ́wá kú aícɔ́ɔja kú Uróm mɛ́mla aídengéli nɛ̄ aótrɛ̄yí kú ācogwɛ́ɛya mɛ́mla ācɛ Ufárisīi tɛ̄hɔ̄ āa. É wā abɔ́ɔ mɛ́mla ulámpu mɛ́mla ɛmu mɛ́mla iyɔ́fú. 4Ɛ́gɛ́nɛ̄ Ujísɔ̄si jé ɔdā dóódu nōo géē yá ɔ̄ á, ó nyɛ̄ɛ̄ ga ɛcɛ gaá da uwá ɔ̄kā kahíníī, “Ɔ̄nyɛ nɛ̄ aá ī dɔɔ̄kā ā?” 5É tá ɔ̄ ohi kahíníī, “Ujísɔ̄si ɔ̄cɛ Unásārēti ā nɛ.” Ujísɔ̄si da uwá kahíníī, “Ami wɛ anú á.” Ujúdasi oyíbīyājɛ ā háyi mla uwá. 6Eko nɛ̄ ó da uwá kahíníī, “Ami wɛ anú a a, é kwúcē yɛ igbīīgbīhi gaá gwōnū bá ajɛ. 7Anɔ́ɔ ó klla da uwá ɔ̄kā igbɔhá kahíníī, “Ɔ̄nyɛ nɛ̄ aá ī dɔɔ̄kā ā?” Anɔ́ɔ é kahíníī, “Ujísɔ̄si ɔ̄cɛ Unásārēti ā.” 8Ujísɔ̄si tá ohi kahíníī, “N da aá ka ami wɛ ɔ̄cɛ nɛ̄ aá gē tíne á. Ɔ́dāŋ́ ka ó wɛ ami nɛ̄ aá yɔ̄ ī dɔɔ̄kā á nɛɛ, ayíka aá cɛ lɛ ācɛ nēe bá ā kéē nyɛ̄ɛ̄.” 9Ó ka ɛ̄nyā ká ɛlā nōó tɛtɛ ka ā kóō le yá jīla, “O ŋmá ipú ācɛ nāa kpó gā um ā, ɔ̄cɛ odúúmā kú uwā í héyībí ŋ́.” 10Anɔ́ɔ Usáyímɔ̄ni Upíta nōo bī ɔkpacaŋ́gelī ā, lɛ ɔ́ pi ŋmá apɛ́, lɛ ahɔ̄ abɔ̄lɔ́ná kú ɔ̄cocɛ̄hɔ̄ kú otrɛ̄yí kú ācogwɛ́ɛya ā hɛ́. Iyē kú ɔ̄cocɛ̄hɔ̄ ā lé ka Umálikɔ̄si. 11#Umát 26.39; Umák 14.36; Ulúk 22.42Anɔ́ɔ Ujísɔ̄si da Upíta kahíníī, “Kwú ɔkpacaŋ́gelī kú uwɔ ú wu apɛ́. A gbɛlá ka ń gáā mā ɛdɔ kú ōwē nɛ̄ Ádā um miya gā um ka n̄ má ā ŋ́ nɛɛ?”

12Abɔ̄ ó lɛ ā, ɔ́wá kú aícɔ́ɔja kú Uróm mɛ́mla aótrɛ̄yí kú uwā mɛ́mla aídengéli kú ācɛ Ujíyu lɛ Ujísɔ̄si kwú, lɛ ɔ́ abɔ̄ gbō. 13É lɛ ɔ́ bī gé lɛ Ánāsi aflɛ́yí. Anú wɛ ádā kú ɔnyā kú Ukayáfāsi, nōo wɛ otrɛ̄yí kú ācogwɛ́ɛya iháyí ɔ́ɔmā ā. 14#Ujɔ́n 11.49,50Ukayáfāsi wɛ ɔ̄cɛ nōo da ācɛ Ujíyu ka ó cɛgbá ká ɔ̄ce éyi kóō gekwú ohígbū ɛjɛ̄ɛ̄jī ācɛ ā á.

Upíta le híhó ka anúɔ í jé Ujísɔ̄si ŋ́

(Umát 26.59-75; Umák 14.54-72; Ulúk 22.55-71)

15Usáyímɔ̄ni Upíta mɛ́mla ɔyíkpó ɔhá kwūce Ujísɔ̄si. Otrɛ̄yí kú ācogwɛ́ɛya ā jé ɔyíkpó ɔhá ā, anɔ́ɔ ó kwúce Ujísɔ̄si ga ipú agbla kú otrɛ̄yí kú ācogwɛ́ɛya ā. 16Anɔ́ɔ Upíta háyi ɛcɛ pī okómpīinu ā. Anɔ́ɔ ɔyíkpó ɔhá ā nɛ̄ otrɛ̄yí kú ācogwɛ́ɛya ā jé ā, nyɛ̄ɛ̄ tɛ́ɛcɛ gaá le ɛlā ka lɛ ɔnyā nōo ī gbɔ̄ɔwɛ ā, anɔ́ɔ ó lɛ Upíta bī wā inu á. 17Amáŋ ɔnyā nōo gē gbɔ̄ɔwɛ ā da Upíta kahíníī, “Á wɛ ɔ̄cɛ éyi kú ayíkpó kú ɔ̄cɛ ā ŋ́ nɛɛ?” Anɔ́ɔ ó kahíníī, “Ń wɛ nóó.” 18Ajɛ i hīlaŋdɔ́ anɔ́ɔ ācocɛ̄hɔ̄ mla aídengéli ā lɛ ɔlá gwó, anɔ́ɔ é bá gē jɛ̄ ɔlá á. Upíta háyi pī uwā dúú yɔ̄ gē jɛ̄ ɔlá.

19Anɔ́ɔ otrɛ̄yí kú ācogwɛ́ɛya ā da Ujísɔ̄si ɔ̄kā lɛyíkwu ayíkpó kú nū mɛ́mla ɔdā nōó nwū ā. 20Ujísɔ̄si tá ɔ̄ ohi kahíníī, “N gē kɛlā tɛ́ɛcɛ foóó ojigógó ipéeyī ɛjɛ̄ɛ̄jī ācɛ, n gē nwɛ̄lā ipú Agblīihɔ nɛ̄ŋ́cɛ́ mɛ́mla Agblīihɔ-nɛ̄hi eko dóódu, ɛga nɛ̄ ācɛ Ujíyu dóódu gē jīla ā, ń ka ɔdā dúúmā otayínū ŋ́. 21Ɔdí yá nāa da um ɔ̄kā ā? Da ācɛ nēe pó ɛlā kú um ā ɔ̄kā. Da uwá ɔ̄kā ɔdā nɛ̄ n da uwá ā, é jé ɔdā nɛ̄ n da uwá ā.” 22Eko nōó lɛ ɛ̄nyā ka ā, éyi kú aótrɛ̄yí kú aícɔ́ɔja ā lɛ abɔ̄ fīyɛ̄ ɔ̄ ábáa. Anɔ́ɔ ó kahíníī, “Ɔwɛ nēé gē tá otrɛ̄yí kú ācogwɛ́ɛya ohi ā yɔ̄ ā?” 23Anɔ́ɔ Ujísɔ̄si tóohi kahíníī, “Ɔ́dāŋ́ ka n le ɛlā obɔ̄bí dúúmā ka, lɛ ijáalí kú ɛlā obɔ̄bí ɔ́ɔmā cɛ̄ tū um. Amáŋ ɔ́dāŋ ka ɛlā ɔkwɛ̄yi nɛ̄ n ka á, ɔdíyā nāa lɛ abɔ̄ fīyɛ̄ um ā?” 24É lɛ ɔ́ abɔ̄ gbō kpɔ́, anɔ́ɔ Ánnāsi kwú ɔ̄ ú tɛ̄hɔ̄ gé lɛ Ukayáfāsi nōo wɛ otrɛ̄yí kú ācogwɛ́ɛya ā.

25Usáyímɔ̄ni Upíta háyi abɔ́ɔ gē jɔ̄lá. Anɔ́ɔ é da ɔ́ ɔ̄kā kahíníī, “Á wɛ éyi kú ayíkpó kú nū ŋ́ nɛɛ?” Anɔ́ɔ ó tóohi kahíníī, “Ń wɛ nóó.” 26Éyi kú ɔ̄cocɛ̄hɔ̄ kú otrɛ̄yí kú ācogwɛ́ɛya nōo wɛ ɔmáapú kú ɔ̄cɛ nɛ̄ Upíta hɛ́ ɔ̄ ahɔ̄ ā kahíníī, “Ń má uwɔ mla anú ipú ɛhɔ̄ ā ŋ́ nɛɛ?” 27Igbɔhá Upíta le híhó, anɔ́ɔ ɔkwɔɔkwu ɔ́ɔmā ɔbúgwū lɛ ogwú tū.

É le Ujísɔ̄si bī nyɔ̄ iyɔ̄bū Upáyílēti igbómína kú Uróm

(Umát 27.1,2,11-14; Umák 15.1-5; Ulúk 23.1-5)

28Ofúlɔ̄cī é le Ujísɔ̄si bī ŋmá ɔlɛ́ Ukayáfāsi gā ipú agbla kú Upɔ́ntīyɔsi Upáyílēti. É tíne kéē bēhé ga ipú agbla ā ŋ́ ohígbū kéē tíne ō lɛ iyī uwā tīihɔ, ō yá ɛ́ɛ́ kéē lɔfú lé ɔdōlé kú ucɛ kú onyatá ā. 29Anɔ́ɔ Upáyílēti le tá ɛgiyí uwā ɛcɛ, anɔ́ɔ ó kahíníī, “Ɛlā nyá nɛ̄ aá kpó ce ɔ̄cɛ ā a?” 30É tóohi da ɔ́ kahíníī, “Ɔ́dāŋ́ ka ɔ̄cɛ ā í wɛ ɔ̄cɛ o yá obɔ̄bí ŋ́ nɛɛ, alɔ í gáā bī ɔ̄ wā ɛgiyí uwɔ ŋ́.” 31Anɔ́ɔ Upáyílēti da uwá kahíníī, “Aá kwú ɔ̄ ú abɔ̄ aá kú aá kɛpɔ̄ tū ɔ̄ ɛ́gɛ́nɛ̄ íne kú aá lɛ ā.” ācɛ Ujíyu ā tá ɔ̄ ohi kahíníī, “Alɔ í lɛ íkwu ō ŋmó ɔ̄cɛ dúúmā ŋ́.” 32#Ujɔ́n 3.14; 12.32Ɛ̄nyā le yá lɛ ā cɛ́ɛ́ ká ɛlā nɛ̄ Ujísɔ̄si ka lɛyíkwu ɛdɔ ikwū nōó géē kwú ā kóō le yá jīla.

33Upáyílēti le tá ipú agbla ā, anɔ́ɔ ó le Ujísɔ̄si hīgwú lɛ ɔ̄kā da ɔ́ kahíníī, “Awɔ wɛ ɔcɛ́ kú ācɛ Ujíyu ā nɛɛ?” 34Ujísɔ̄si tá ɔ̄ ohi kahíníī, “Awɔ da ɔ̄kā nyā abɔ̄yī uwɔ á kɛ̄ɛ ka ɔ̄cɛ éyi le odée da uwɔ lɛyíkwu um?” 35Upáyílēti tóohi kahíníī, “N wɛ ɔ̄cɛ Ujíyu nɛɛ? Ācɛ ɔlɛ́ uwɔ mɛ́mla aótrɛ̄yí kú ācogwɛ́ɛya bī uwɔ wā ɛgiyí um á. Ɔdí nāa yá ā?” 36Ujísɔ̄si tóohi kahíníī, “Ɔ́dāŋ ka ajɔ̄ɔ̄cɛ́ kú um yɔ̄ ipú ɛcɛ nyā nɛɛ, ayíkpó kú um géē yɛ í le unu nu, cɛ́ɛ́ ká ɔ̄cɛ dúúmā kóō híī je um tū ācɛ Ujíyu abɔ̄ glá ŋ́. Ehée ajɔ̄ɔ̄cɛ́ kú um í yɔ̄ ipú ɛcɛ nyā ŋ́!” 37Anɔ́ɔ Upáyílēti da ɔ́ ɔ̄kā kahíníī, “Ó lɛ ā a wɛ ɔcɛ́ kɛ̄ɛ?” Ujísɔ̄si tóohi kahíníī, “Awɔ ka ami ɔ́ɔ wɛ ɔcɛ́ á n. É ma n wā ipú ɛcɛ nyā ká n̄ yá ɔdā ékpó nyā, ká n̄ kɛlā lɛyíkwu ɔdā nōo wɛ ɔkwɛ̄yi ā. Ɔ̄cɛ dúúmā nōo cɛ̄ɛlā ɔkwɛ̄yi ā gē pó ɔkɔ kú um.” 38Anɔ́ɔ Upáyílēti da ɔ́ ɔ̄kā kahíníī, “Ɔdí wɛ ɔkwɛ̄yi ā?”

Eko nɛ̄ Upáyílēti lɛ ɛ̄nyā ka kwɛyí ā, ó le tɛ́ɛcɛ ɛgiyí ācɛ Ujíyu igbɔhá, anɔ́ɔ ó da uwá kahíníī, “Ń má ɔdā ō bī le ŋmó ɔ̄cɛ ā ɛpɔ̄bí nóó.

É le Ujísɔ̄si ŋmɛ́pɔ̄bí kéē lɛ ɔ́ ŋmó

39Ó wɛ uculo ká aá kéē lɛ ɔ̄cɛ éyi hɛ́tá lɛ aá eko kú ucɛ kú onyatá ā, aá tíne ká n̄ lɛ Ɔcɛ́ kú ācɛ Ujíyu hɛ́tá lɛ aá nɛɛ?” 40Anɔ́ɔ é dɛ̄gba ka, “Ó wɛ ɔ̄cɛ ā ŋ́, amáŋ Ubárābasi nɛ.” Ubárābasi wɛ ɔ̄coyíkpala.

Currently Selected:

UJƆ́NI 18: IFBCL

Highlight

Copy