OHÚTU 13

Ébram mɛ́mla Ulɔ́tu le kɔ̄ hɔ̄hátá

1Anɔ́ɔ Ébram mɛ́mla ɔnyā nū mɛ́mla Ulɔ́tu mɛ́mla ɔdā dóódu nōó lɛ ā, le bɛ̄cɛ ŋmá Íjīpiti, le pɛ́ ga Unégēbu á. 2Ébram wɛ ɔ̄cɛ nōo lɛ agbénú nɛ̄hi. Ó lɛ aɛ́na mɛ́mla aálá mɛ́mla aɛ́wū mɛ́mla ije nɛ̄hɛ́ mɛ́mla ugóolu. 3Anɔ́ɔ ó nyɛ̄ɛ̄ ŋmá Unégēbu lɛyíkwu Ubɛ́tɛlu jāā ga ɛga nɛ̄ áklɔ̄kpɛ kú nū kwu aflɛ́yí ɔtāhɛ̄ kú Ubɛ́tɛlu mɛ́mla Áyi ā. 4Abɔ́ɔ nōó gwó ede lɛ Ɔwɔicō aflɛ́yí nōó gbā Óndú ɛ̄gbā āa.

5Ulɔ́tu nōó yɔ̄ mɛ́mla Ébram ā lɛ agbénú dúú. Ó lɛ aálá mɛ́mla aɛ́wū mɛ́mla aɛ́na mɛ́mla aáklɔ̄kpɛ alɛwa. 6Anɔ́ɔ ajɛ í jɛ̄ uwā nɛ̄ uwá ɛpɛlɛ́ɛpa gē lā tɔ̄há glá gɛ ŋ́ má. Ohígbū ka uwá ɛpɛlɛ́ɛpa lɛ agbénú kú ɔdāajɛ nɛ̄hi. 7Anɔ́ɔ ikpɛ́lā gbɔɔ́ ɔtāhɛ̄ kú ācogbāálá kú Ébram mɛ́mla ācogbāálá kú Ulɔ́tu á. Eko ɔ́ɔmā ā ācɛ Ukénan mɛ́mla ācɛ Upɛ́rīss lā ajɛ ā kpɔ́ ɛ́ɛ́.

8Anɔ́ɔ Ébram da Ulɔ́tu kahíníī, “Alɔ wɛ ɔmáapú, ikpɛ́lā í cíkā ō yɔ̄ otāhɛ̄ ācogbāálá kú um mɛ́mla ákú uwɔ ŋ́. 9Odúúdú ajɛ ā tá iyɔ̄bū uwɔ yɔ̄ á. Ó le lɛ ā kwú ābɔ̄ kú ajɛ ā dóódu nōo he uwɔ ɔtū ú. Cɛ́ɛ́ n kē kwú ābɔ̄ ɔhá ú, o yá ɛ́ɛ́ kú ālɔ̄ lɛ kɔ̄ hī iyī alɔ tá.” 10#Ohút 2.10Anɔ́ɔ Ulɔ́tu je eyī gicō, anɔ́ɔ ó le má ka ɔpɛ́ kú Ujɔ́dan ā, ɔ́ɔ lɛ éŋkpɔ̄ bɛ̄ɛka ɛhɔ̄ kú Óndú ā#13.10 ɛhɔ̄ kú Óndú ā. é kɛlā lɛyíkwu ɛhɔ̄ kú Ídɛn Ó klla lɛbɛ̄ɛka ajɛ kú Íjīpiti o lɛyíkwu Ussówa ā. Ɛ̄nyā wɛ o gbɔbū ɛ́ɛ́ nɛ̄ Óndú ā je Usɔ́dɔm mɛ́mla Ugomóra gblífi ā. 11Anɔ́ɔ Ulɔ́tu kwú ɔpɛ́ kú Ujɔ́dan nēe yɛ lɛyíkwu ɛnɔ̄ɔ̄cī ā ú á. Ɔwɛ ɛ́gɛ́nyā nɛ̄ uwá ɛpɛplɛ́ɛpa je kɔ̄ hī ūwā tá á. 12Ébram lā ajɛ kú Ukénan, anɔ́ɔ Ulɔ́tu kē lā ipú aígelī nēe bá ɔpɛ́ ā kwu Usɔ́dɔm ajaajɛ á. 13Ācɛ kú Usɔ́dɔm bɔ̄bíipú nɛ̄hi, klla wɛ ācɛ ō bīyíne kú Óndú ā nɛ̄hi.

Ébram yɛ ga Uhɛ́brɔn

14Igbīhāajɛ nɛ̄ Ulɔ́tu nyɛ̄ɛ̄ ā. Óndú ā da Ébram kahíníī, “Leyī yi ɛga dóódu o ŋmá ɛga nɛ̄ a háyi āa oŋmá ɛhícō mɛ́mla ɛháajɛ, ɛnɔ̄ɔ̄cī mɛ́mla ɛnɔ̄ɔ̄nɛ̄ āa. 15#Ācot 7.5Odúúdú ajɛ nɛ̄ a má ā, n géē je lɛ ipɔ́ɔma kú uwɔ̄ piyóó 16N géē yá kú ipɔ́ɔma kú uwɔ kóō nyīla bɛ̄ɛka áluka kú ɔjɛ ā. Ɔ́dāŋ ka ɔ̄cɛ dúúmā gbo ɔjɛ áluka glá, ayíka ó géē gbo ācɛ ipɔ́ɔma kú uwɔ áluka glá. 17Nyɔ̄ gaá lɛ odúúdú ajɛ ā jila, ohígbū ka n géē je ɔ́ gā uwɔ.” 18Anɔ́ɔ Ébram lɛ áklɔ̄kpɛ kú nū fu ga iyɔ̄bū, gaá lā ɛga aɔ́cí nēé hī ka óoku kú Umámre, nōo yɔ̄ ipú ajɛ kú Uhɛ́brɔn ā. Ó le ede gwó lɛ Óndú ā abɔ́ɔ.

Currently Selected:

OHÚTU 13: IFBCL

Highlight

Copy