Mathliyu 19

Thlipər Yesu Ata Kəra Ndək Ka Mwala

(Mar 10:1-12)

1Sakatə Yesu ku kuri pəla suayeri ngəni, antə tsa zhar tsəɗi Galili ka mwari akwa tsəɗi Yahudiya aɓəla bwanda Thlyagha Jodan. 2Antə dlamar mji hang ku nutə ni, tə tsa ku mbantə ɗa anda.

3Antə mjir Farisi laga si adzə ni kamnyar ka da ngkərtə ni, tə da pəla, “Kalkal ka mdə ndəkə ka mwalankiɗa ata kəra kəlara su ya?”

4Antə Yesu shinau ka pəla, “Giri aɗi karatə wa ya abbər tsa na alaktə təng akwa baɗitari ni, namtə ɗa sal ka mwala ni?” 5Antə tsa pəla, “Kamnyar ngəni, antə sal ata zhar baba'ni ka mama'ni ka da paktədzi ka mwalankiɗa, antə da aɗi ata ndzi suɗə kəra wa, amma da ata ndzi apa mdə duku.” 6Apani da aɗi mji suɗə kəra wa, amma mdə duku. Antə su tə Hyel ku pakta, mda aɗiya ndəkəmta wa.

7Antə da pəla alari, “Kaha, kamnyar mi tə Musa pəla akwa tsawu ni abbər mda ata mzhi hamta kakaɗər tsi ngyika aka mwalankiɗa, ka kədləmta ni nə ri?” #Mat 5:31

8Antə Yesu pəla ala ɗa, “Kamnyar ɓəɓalkur ar ɗəffa giri antə Musa zhar giri ka giri ndək kəga mwankir giri ni, amma aɗi an su na akwa baɗitari wa. 9Tsuwa I akwa pəla ala giri, kəlara mdə na ku nggəlar mwalankiɗa, ma aɗi kamnyar ləkə wa, ka kəl mwala damwa, tsa akwa ləka.”

10Antə mjirthlipərni pəla alari, “Ma ndzəndziyir sal ka mwalankiɗa an apani, ai kuji mda aɗiya kəldzi hwatu wa.”

11Amma Yesu pəla ala ɗa, “Aɗi kəlara mda an ata mzhi dlu ndər ngəni wa, tar mji tə Hyel ku na ɗa dunar dluwari. 12Kamnyar mji aɗi natə təng tə mdə yaɓəla ɗa, da aɗi mjir mzhi kəl mwala wa. Mji aɗi tsuwa natə mda an namtə tə da amzhi kəl mwala wa ni. Tsuwa mji laga aɗi natə da ka kəra ɗa an carɓəla abbər da aɗi ata kəl mwala wa kamnyar bara ləkwa kuthlikur na amtazi. Antə kəlara mdə na ata mzhi dlu ndər ngəni, ka tsa dluwa.”

Yesu Ku Vədza Barka Aka Maɗankyar

(Mar 10:13-16; Luk 18:15-17)

13Vir laga mji laga ku səntə maɗankyar na raka raka aka Yesu kamnyar ka tsa vədza ala ɗa barka, ka tsa hara ala ɗa adduwa. Amma mjirthlipərni ku mpa aka mji na səntə maɗankyar ni. 14Amma Yesu pəla ala ɗa, “Zhar giri maɗankyar na raka raka ni ka da si adzə ra, giri aɗiya ngkatə ɗa wa, kamnyar kuthlikur na amtazi ni an kamnyar mji na apa maɗankyar nayeri ni.”

15Antə tsa vəngkər tsiyari ata kəra ɗa, ka vədza ala ɗa barka, kambəla tsa təra.

Ɓzər Dakwi Na Ka Gəna

(Mar 10:17-31; Luk 18:18-30)

16Antə mdə laga si adzə Yesu ka yu ni abbər, “Maləm, man kəthlər na ɓɗaku tə kəi hara kamnyar kəi wutə mpikə na akur wa ri?”

17Antə Yesu pəla alari, “Kamnyar mi tə ga akwa yu ra ata kəra su na ɓɗaku ri? Mdə duku shini an ɓɗaku. Tsuwa ma ga ata bara ka gə wutə mpikə na akur wa, ka gə ɓəlatə tsawayeri ni.”

18Antə tsa pəla aka Yesu, “Tsawayeri na madə ri?” Antə Yesu pəla, “Ga aɗiya tsi mdə wa, ga aɗiya ləkə wa, ga aɗiya həl wa, ga aɗiya thlandər ata kəra mdə wa, 19ka gə nar olkur aka baba'nga ka mama' nga, tsuwa ka gə hir ntəwulər nga apa kəra ga.”

20Antə ɓzərdakwi ni pəla alari, “Ai I ku ɓəlatə shanga tsawayeri ngəni, mə damwa an mbila tə kəi hara ri?”

21Antə Yesu pəla alari, “Ma ga ata bara ka gə ndzi caɗaɗa, mwari ka gə ɗələmta shanga su na akəla ga, ka gə nar kwabari aka mjir bwani, antə ga ata wutə watsəɓari amtazi. Aghəla nda ka gə si ka gə nu ra.”

22Sakatə ɓzərdakwi ni ku nggatə ndər ngəni, antə tsa təra ka ɗəffə ɓzəɓza, kamnyar tsa mdə na ka gəna hang.

23Antə Yesu pəla aka mjirthlipərni, “I akwa pəla ala giri jirkur, ata ndzi mwavər aka mdər gəna ka tsa ləkwa kuthlikur na amtazi. 24Tsuwa I akwa jaktə pəla ala giri, ata ndzi kasəla aka dləkəmau ka tsa ləɓəla akwa gular liɓəra, ta ka mdər gəna ləkwa kuthlikurər Hyel.”

25Sakatə mjirthlipərni ni ku nggatə ndər ngəni, antə da ndatədzi ka duna ka pəla, “Ma apani, wan ata mzhi wutə mbantədzi ri?”

26Amma Yesu wul ɗa, ka pəla ala ɗa “Ma mda, mda amzhi harari wa, amma ar Hyel su aɗi na mwavər alari wa.”

27Antə Bitrəs pəla, “Nggədza, yeru ku zhar shanga su ka nutə nga. Man tə yeru ata wutari ri?”

28Antə Yesu pəla ala ɗa, “I akwa pəla ala giri jirkur, akwa duniya na bilənari ni, sakatə Ɓzər mda ata sə ndzəndzi ata dəkəl kuthlikur na ka səli ni, giri na ku nu ra ni, giri ata ndzəndzi ata dəkəlayeri kumnya suɗa, ka giri hara shariya aka nyarmbwayeri na kumnya suɗa akwa Israila. #Mat 25:31; Luk 22:30 29Tsuwa kəlara mdə na ku zhar kəyayeri, wala maɗama'ni shili wala mwanki, wala baba'ni, wala mama'ni, wala maɗa'ni, wala fakayeri kamnyar haptə thləmi, tsa ata wutə su na təramta ngəni har ka bwa aru. Tsuwa tsa ata wutə mpikə na akur wa. 30Amma mji hang na ntangkəma kulini, ata sə ndzi akwa tsikərari, antə mji na akwa tsikərari kulini ata sə ndzi ntangkəma.” #Mat 20:16; Luk 13:30

Currently Selected:

Mathliyu 19: KNB

Highlight

Copy