Yahwana 9
9
Yesu Ku Mbantə Mdə Laga Tə Mdə Yaɓəla Ni Mdlyang
1Sakatə Yesu akwa təramta, antə tsa wutə mdə laga tə mdə yaɓəla ni mdlyang təng akwa yarni. 2Antə mjirthlipərni yu ni abbər, “Maləm, bikər wa an hara tə mdə yaɓəla mdə ngəni mdlyang nə ri? Bikər mdə ni ka kərari, nənga bikər mjir yarni ri?”
3Antə Yesu pəla ala ɗa, “Aɗi abbər mdə ngəni an hara biku laga wa, wala mjir yarni wa, amma kamnyar ka Hyel ncantə dunar kuthlikurərni atar ni. 4Tar ka mburu ləkəma ka hara kəthlərər mdə na thlentə ra təng tə pci tsu aɗi, kamnyar viri ata hara, tə mda aɗi ata sə mzhi hara kəthlər wa. 5Ma ku ndzi I akwa duniya, I an parakər duniya ni.” #Mat 5:14; Yah 8:12
6Aghəla ndər ngəni antə tsa tifə mtili ata di, ka hərtə həi ka mtili ni, ka fadza aka nca mdə ni, 7akwa pəla alari, “Mwari, ka gə ra kəcimta nca ga akwa kufar Silowam.” Karapur Silowam ni an Thlenta. Antə mdə ni mwari, ka kəcimta ncari, ka ngka akwa wutə su.
8Antə ntəwulayeri arni kəga mji na tsəli ka wutə ni akwa kiɗə ni, pəla, “Aɗi ngəni an mdə na ana kiɗa andzəndzi ni wa ya?” 9Antə mji laga pəla, “I, tsa.”
Amma mji laga pəla, “Awa, aɗi tsa wa, amma da dludzi.”
Amma mdə ni ka kərari surni pəla, “Tsu Iya diya.”
10Antə da yu ni abbər, “Apa madi tə nca gə kəlardzi nə ri?” 11Antə tsa pəla, “Mdə laga na ka thləmari Yesu an hərtə həi, ka fadza aka nci, ka pəla ‘Mwari ra kəcimta nca gə ni akwa kufar Silowam.’ Antə I mwari ka kəcimta nci ni, ka baɗitə wutə su.”
12Antə da yu ni, “Tsa ama ri?”
Antə tsa pəla, “I aɗi səndə wa.”
Mjir Farisi Ku Yu Su Ata Kəra Mbantədzər Mdə Ni
13Antə da səntə mdə na ɗar ndzi mdlyang ni aka mjir Farisi. 14Vir tə Yesu hərtə həi ka kəlar nca mdə na mdlyang ni an Vir Ghərəmtaghəra. 15Antə mjir Farisi ni jaktə yu mdə ni ata kəra laku tə tsa baɗitə jaktə wutə su ni. Antə tsa pəla ala ɗa, “Tsa fadzə həi aka nci ni, antə I kəcimta nci ni, antə I akwa mzhi wutə su kulini.”
16Antə mji laga akwa nca mjir Farisi ni pəla, “Mdə na hara su ngəni tsa aɗi thlata adzə Hyel wa, kamnyar tsa aɗi ana ɓəla Vir Ghərəmtaghəra wa.” Amma mji laga pəla, “Apa madi tə mdər biku ata mzhi hara surndatayeri apani ri?” Antə da ku ndəkəidzi ka bwa suɗa.
17Antə da jaktə yu mdə ni abbər, “Ar ngə man tə gə pəla ata kərari ri, təng tə ga antə tsa kəlar nca gə ni?”
Antə mdə ni pəla, “Tsa an naɓi.”
18Amma mji na ol'olər mjir Yahudi aɗi mbərsa abbər mdə ngəni ku ɗar ndzi mdlyang, kambəla ncari kəlardzi wa. Antə da thlentə ka mdə kəga ala ɗa mjir yar mdə na ɗar ndzi mdlyang ni. 19Antə da yu ɗa abbər, “Ngəni an ɓzər giri tə giri ana pəla mdə yaɓəla ni mdlyang ni ya? Ka, apa madi tə kulini tsa akwa mzhi wutə su nə ri?”
20Antə mji na ya ni ni shinau ka pəla, “Ar yeru su tə yeru sənda an abbər ngəni ɓzər yeru, tsuwa mdə yaɓəla ni mdlyang. 21Amma laku tə tsa akwa mzhi wutə su kulini, yeru aɗi ka səndə su ata kər wa. Tsuwa yeru aɗi səndə mdə na kəlar ncari ni wa. Yu giri ni, ai tsa ku mzhi mda, tsa ata mzhi gari ka kərari.” 22Mjir yarni pəla apani ni kamnyar da akwa thlivər mjir Yahudi. Kamnyar mjir Yahudi ku kurtə ɗəmha abbər kəlara mdə na ku pəla abbər Yesu an Kristi, to mda ata kədləɓəla ni akwa mbwar vəngkər səli ni. 23An su na hara tə mjir yarni ni pəla, “Tsa ku mzhi mda, yu giri ni” ni.
24Antə da jaktə kəga mdə na yaɓəladzi mdlyang ni, ka pəla alari, “Kahyel abbər ga ata ngkər ala yeru jirkur! Ar yeru, yeru asənda abbər mdə ngəni mbantə ngə ni tsa mdər biku.”
25Antə mdə ni pəla, “Wala tsa mdər biku, wala tsa aɗi mdər biku wa, arna I aɗi səndə wa. Su duku tə I sənda an abbər hwatu I mdlyang, amma kulini I akwa wutə su.”
26Antə da yu ni, “Man tə tsa hara ala gə ri? Tsa kəlar nca ga ni məmə ri?”
27Antə tsa pəla ala ɗa, “I ku kurtə pəla ala giri hwatu, amma giri aɗi psi thləm wa. Kamnyar mi tə giri akwa bara jaktə nggatari ri? Nənga giri akwa bara ndzi mjirthlipərni tsu ri?”
28Antə da nggəl ni ka pəla, “Tar gə ja an mdərthlipərni ni! Ar yeru, yeru mjirthlipər Musa diya! 29Yeru ku sənda abbər Hyel ku gari aka Musa, amma ar mdə ngəni ni, yeru aɗi səndə vəi tə tsa thlata akwa wa.”
30Antə mdə ni shinau ala ɗa ka pəla, “Məi, nggə sur ndatə ja mara! Ka mdə ngəni kəlar nci, amma har giri asəndə vəi tə tsa thlata akwa wa! 31Mburu asənda abbər Hyel aɗi ana psi thləm aka mjir biku wa, tar mji na ana vəngkər səli alari, ka hara su tə tsa hira. 32Təng akwa baɗitər duniya, mda aɗi ɗar nggata abbər mdə laga ku kəlar nca mdə na yaɓəladzi mdlyang wa. 33Antə ma mdə ngəni aɗi thlata adzə Hyel wa, tsa aɗi ata mzhi hara su ngəni wa.”
34Antə da shinau ka pəla alari, “Gə na kəlkəla akwa biku bwakəma ka bwahili! Antə ga an ata thlipa ala yeru su tsu ya?” Antə da kədləɓəla ni akwa mbwar vəngkər səli ni.
Mdlyangkur Na Abwar Mambəl
35Yesu ku nggata abbər da ku kədləɓəla mdə ni. Apani sakatə tsa wutə ni, antə tsa yu ni abbər, “Ga ku hamta jiri aka Ɓzər Mdə ya?”
36Antə mdə ni shinau alari ka pəla, “Tsan wa ri, zanuwa? Pəla ali mdari kamnyar kəi hamta jiri alari.”
37Antə Yesu pəla alari, “Ga ku wutə ni, kamnyar tsa an akwa gari ka gə ni.”
38Antə mdə ni pəla, “Mthlaku, I ku hamta jiri!” Antə tsa vəngkər səli alari.
39Antə Yesu pəla, “I si akwa duniya ni kamnyar hara shariya, abbər ka mji na mdlyang wutə su, ka mji na akwa wutə su ndzi mdlyang tsuwa.”
40Sakatə mjir Farisi laga adzə ni nggatə gari ngəni, antə da yu ni abbər, “Wala yeru ma, yeru mdlyang ya?”
41Antə Yesu pəla ala ɗa, “Ma giri an mdlyang, sakani giri aɗi ka biku wa. Amma təng tə giri pəla abbər giri akwa wutə su ni, bikər giri ni tsu aɗi.”
Currently Selected:
Yahwana 9: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
