Yahwana 10

Karapu Ata Kəra Mdər Ɓəla

1Antə Yesu pəla, “I akwa pəla ala giri jirkur, kəlara mdə na aɗi səkwa ciɓər təma ni atar nyarmbwa wa, amma tsa fəlwa ata vəi damwa, tsa an mdər həla ka mdər thla laku. 2Amma kəlara mdə na ata səkwa ciɓə ni atar nyarmbwa, tsa an mdər ɓəla təmayeri ni. 3Antə mdər gadi nyarmbwa ni ata kəlar alari nyarmbwa ni. Tsuwa təmayeri ana nggaɓəla kurakari, antə tsa ana kəgaɓəla təmayeri arni ka thləma ɗa, ka mwantə ɗa aɓəla. 4Ma sakatə tsa ku mwantə ɗa aɓəla, tsa ata pwa akəma ɗa, antə təmayeri ata nu ni, kamnyar da asəndə kurakari. 5Da aɗi ana nu mətəpi wa, tar ka da hwi ni, kamnyar da asəndə kuraka mətəpi wa.”

6Ngəni an karapu tə Yesu pəla ala ɗa, amma da aɗi nggaɓəla su tə tsa akwa pəlari ni wa.

Yesu An Mdər Ɓəla Na Ɓɗaku

7Antə Yesu jaktə pəla ala ɗa, “I akwa pəla ala giri jirkur, I an nyarmbwar təma ni. 8Shanga mji na si akəmata iya da an mjir həla ka mjir thla laku, antə təmayeri ni aɗi psi thləm ala ɗa wa. 9I an nyarmbwa ni. Antə kəlara mda na ata səkwa ciɓə ni atar na, tsa ata wutə mbantədzi. Antə tsa ata ləmbwa ka ləɓəla, ka wutə vəi ɓəla na ɓɗaku. 10Həla ana si kamnyar ka tsa həla, ka tsa tsi, ka tsa hilantə su daci. Arna I si kamnyar ka da wutə mpikə na jirari na ka daraja.

11 “I an mdər ɓəla na ɓɗaku. Mdər ɓəla na ɓɗaku ana hamta mpikari kamnyar təmayeri ni. 12Amma mdər kəthlər kamnyar watsəɓa, mdə na aɗi mdər ɓəla wa, natə təmayeri arni aɗi ar kərari wa, ma tsa wutə mwaɓəlu akwa si, tsa ata hwi ka zhar təmayeri ni. Antə mwaɓəlu ni ata ngkəi pal, ka titiləmta bwadukwa ɗa. 13Mdə ni hwi kamnyar tə tsa akwa kəthlər kamnyar watsəɓa, antə su aɗi damitə ata kəra təmayeri nə wa. 14I an mdər ɓəla na ɓɗaku. I asəndə təmayeri na arna, tsuwa da asəndə ra, 15tsu apatə Təddarna ku səndə ra, antə I ku səndə Tədda ni. Tsuwa I ku hir kəi mta kamnyar təma ni. #Mat 11:27; Luk 10:22 16I ka təmayeri damwa na aɗi akwa ciɓə ngəni wa, antə tar kəi səntə ɗa tsuwa, ka da sə psi thləm ali. Antə da ata sə ndzi ciɓa duku, ka mdər ɓəla duku.

17 “An su na hara tə Tədda ana hir ra ni, kamnyar I akwa hamta mpikəi, kəi sə jaktə kəta. 18Kamnyar mdər mzhi dlutsə mpikəi aɗi wa, amma I an ata hamtari ka hirər ɗəffi. I ka duna kəi hamta ni, tsuwa I ka duna kəi jaktə kəta. Ngəni an su tə Təddarna tsawa ali abbər kəi hara.”

19Ata kəra gari ngəni tə Yesu pəla ni, antə mjir Yahudi jaktə ndəkəmtadzi ata kəra dzamər ɗa. 20Mji hang akwa nca ɗa pəla, “Tsa ka shatan, antə tsa ka cicu, kamnyar mi tə giri akwa psi thləm alari ri?”

21Amma mji bwaduku pəla, “Mdə na ka shatan amzhi gari apani wa! Nənga shatan ata mzhi kəlar nca mdlyang ri?”

Mjir Yahudi Ku Nggəlar Yesu

22Ngəni an sakar tsaptədzər Kucalər Ɗangtə Hamta Mbwar Vəngkər Səli aka Hyel akwa Urushalima tə mda ana hara sakar shambar. 23Sakatə Yesu akwa mwa akwa galahər Solaman, 24antə mjir Yahudi kalaktə ni ka pəla alari, “Nawa antə ga ata hara ka yeru ndzi kula nuhum ata kəra gə ri? Ma ga an Kristi ni, pəlaɓəla ala yeru ata bəbal.”

25Antə Yesu pəla ala ɗa, “I ku pəla ala giri, amma giri aɗi akwa hamta jiri wa. Tsuwa kəthlərayeri tə I akwa harari akwa thləma Təddarna ni akwa hamta seɗa ata kəri. 26Amma giri aɗi akwa hamta jiri wa, kamnyar giri aɗi təmarna wa. 27Təmayeri arna ana nggatə kurakəi, tsuwa I asəndə ɗa, antə da ana nu ra. 28I ana na ala ɗa mpikə na akur wa, antə ba saka madi da aɗi ata sha wa, tsuwa mda aɗi na amzhi dlutsə ɗa akwa tsi wa. 29Kamnyar Təddarna na hamta ɗa ali ni an olta shang, antə mda aɗi na amzhi dlutsə ɗa akwa tsiya Təddarna ni wa. 30Tsuwa Iya ka Tədda ni, yeru duku.”

31Antə mjir Yahudi jaktə fatə pela ka damwa abbər ka da ndzəndzəhtə ni. 32Amma Yesu shinau ala ɗa ka pəla, “I ku hara kəthlərayeri hang na ɓɗakɓɗaku akəma giri, kəthlərayeri na thlata akəla Təddarna. Kamnyar na madi akwa nca ɗa ni antə giri akwa bara ndzəndzəh ra nə ri?”

33Antə mjir Yahudi pəla alari, “Aɗi kamnyar kəthlər na ɓɗaku antə yeru akwa bara ndzəndzəh ngə ni wa, amma kamnyar mnyar ruta tə ga akwa harari ata kəra Hyel ni. Kamnyar gə mdə ndzang, amma ga akwa bara namtə kər nga apa gə Hyel!”

34Antə Yesu shinau ala ɗa ka pəla, “Mda aɗi rəbuta akwa Tsawur giri abbər, ‘I pəla giri an hyelayeri’ wa ya? 35Tsuwa giri ku sənda abbər mda amzhi shari su tə mdə rəbuta akwa kakaɗər Hyel wa. Antə ma Hyel akwa pəla aka mji na akwa ngga ndərərni abbər da hyelayeri, 36kamnyar mi tə giri akwa pəla aka mdə Tədda an carɓəla ni ka thlentə ni akwa duniya, abbər tsa akwa rutə Hyel ri? Kamnyar tə I pəla, ‘I an Ɓzər Hyel’ ni ya? 37Ma I an aɗi akwa hara kəthlərayeri Təddarna ana hara wa, giri aɗiya hamta jiri ali wa, 38amma I ata hara kəthlərayeri tə Təddarna ana hara. Antə wala giri an ata hamta jiri ali wa, ai kalkal ka giri hamta jiri aka kəthlərayeri tə I akwa harari ni, kamnyar ka giri səndə ka nggaɓəla abbər Tədda akwa iya, tsuwa I akwa Tədda.”

39Da jaktə ngkərtə ngka ni ka damwa, amma tsa msər akwa tsiya ɗa.

40Antə Yesu jaktə mwari aɓəla bwanda Thlyagha Jodan, ata vəi tə Yahwana hara baptizma aka mji akwa ntangkəma ni, ka ndzəndzi anda. #Yah 1:28 41Antə mji hang si adzə ni ka pəla, “Yahwana aɗi hara surndatayeri wa, amma shanga su tə Yahwana pəla ata kəra mdə ngəni ni an jiri.” 42Antə mji hang ku hamta jiri alari anda.

Currently Selected:

Yahwana 10: KNB

Highlight

Copy