Yahwana 21

Yesu Ku Ncantə Kərni Aka Mjirthlipa Murfa

1Aghəla ngəni antə Yesu jaktə ncantə kərni aka mjirthlipərni ata mnya Mandar Tiberiya. Tsuwa nggədza laku tə tsa ncantə kərni ala ɗa akwa ni. 2Saka nda Siman Bitrəs, ka Thlomas natə mda ana kəga ni Ɓuli ni, ka Nathlaniyel na thlata ahar Kana akwa Galili, ka maɗa' Zabadi, ka mjirthlipərni damwa suɗa, shang ata vəi duku.

3Antə Siman Bitrəs pəla ala ɗa, “I ata təra mwari akwa tamwa.”

Antə da pəla alari, “Mburu ata mwari kəga ga.” Antə da ləɓəla, ka ləkwa shar, amma vir nda da aɗi ngkəi su wa. #Luk 5:5

4Amma sakatə viri akwa kura, təng da wutə Yesu athləthlata adzə ɗa ata wuyakər mnya yimi ni. Amma mjirthlipərni aɗi nggaɓəla abbər tsa an Yesu nə wa. 5Antə Yesu pəla ala ɗa, “Maɗadakwi, giri ka kəlfa ya?”

Antə da shinau alari ka pəla, “Awa.”

6Antə tsa pəla ala ɗa, “Ndzəh giri banggamar giri ni abwa mazəma shar ni, antə giri ata wutari.” Antə da ndzəh banggama ni apatə tsa pəla ni, ka ngkəi kəlfa hang har tə da amzhi ndəkərɓəla banggamar ngka kəlfa ni ka shinaɓəla akwa shar nə wa. #Luk 5:6

7Antə mdərthlipə natə Yesu hir ni ni pəla aka Bitrəs abbər, “Ngəni Mthlaku diya!” Sakatə Siman Bitrəs nggata abbər ngəni Mthlaku ni, antə tsa hatə ləptərni, kamnyar hwatu tsa fəi ləptu ni kamnyar kəthlər ni, antə tsa fəlwa yimi ni. 8Amma mambila mjirthlipə na akwa shar ni ləkwa ndəkər banggama na nghyinghyari ka kəlfa ni, akwa mwantari ata wuyakər mnya yimi, kamnyar da aɗi ciju ta mnya yimi ni wa, daɓwa ɗa apa yadə aru pal daci.

9Sakatə da ku səɓəla ata mnya yimi ni, antə da wutə u'ur vina laga ka kəlfa ata, ka buradi adza. 10Antə Yesu pəla ala ɗa, “Səntə giri bwadukwa kəlfa natə giri haɗa ngkəyari ni.”

11Antə Siman Bitrəs ləkwa shar ni ka ndəkərɓəla banggama ni ka sənta ata mnya yimi. Tsuwa banggama ni nghyinghyari ka kəlfayeri na ol'ola aru pal ka ntəfkumari ka makər, amma wala tə da hang apani, banggama ni aɗi thləhu wa. 12Antə Yesu pəla ala ɗa, “Asər giri, ka giri səm susəma.” Amma wala mdə duku aɗi akwa nca mjirthlipərni na nggitə yu ni abbər tsa an wa ri wa. Kamnyar da sənda abbər tsa an Mthlaku. 13Antə Yesu si ka kətə buradi ni, ka hamta ala ɗa, ka hamta ala ɗa kəlfa ni tsuwa.

14Ngəni an saka na makərkurari tə Yesu ncantə kərni aka mjirthlipərni, aghəla tə tsa thlata akwa mtəmta.

Yesu Ka Bitrəs

15Sakatə da ku kuri səm susəmər ɗəɗəpa, antə Yesu pəla aka Siman Bitrəs abbər, “Siman ɓzər Yahwana, gə hir ra təramta mji nayeri ni ya?”

Antə Bitrəs pəla alari, “I, Mthlaku, ai ga sənda abbər I hir nga.”

Antə Yesu pəla alari, “Ma apani, ka gə nar susəma aka maɗa təmar na.”

16Antə Yesu jaktə pəla alari na suɗkur, “Siman ɓzər Yahwana, gə hir ra ya?”

Antə Bitrəs pəla alari, “I, Mthlaku, ai ga sənda abbər I hir nga.”

Antə Yesu pəla alari, “Ma apani, ka gə ɓəla təmarna.”

17Antə Yesu pəla alari na makərkur, “Siman ɓzər Yahwana, gə hir ra ya?”

Antə ɗəffa Bitrəs ɓzə kamnyar tə Yesu yu ni har na makərkur abbər, “Gə hir ra ya?” Antə tsa pəla alari, “Mthlaku, ai ga səndə shanga su, ga asənda abbər I hir nga.”

Yesu pəla alari, “Ma apani, ka gə nar susəma aka təmarna. 18I akwa pəla ala gə jirkur, sakatə gə ɓzərdakwi, ga ana hatə kariyir nga gə sur nga, ka mwari akwa vəi tə gə hira. Amma ma sakatə ga ku hali, ga ata sə ndərar tsiya ga, ka mdə damwa an hata ala gə kari, ka mwantə nga akwa vəi tə kəra ga aɗi hir wa.” 19Yesu pəla ngəni, kamnyar ka tsa ncantə jili mtə na ata sə wutə Bitrəs kamnyar haptə səliyir Hyel. Aghəla ngəni antə Yesu pəla aka Bitrəs, “Nu ra.”

Yesu Ka Mdərthlipə Natə Yesu Hira

20Antə Bitrəs ku shinardzi, ka wutə mdərthlipə natə Yesu hirhir ni ni akwa nu ɗa. Tsa an ndzəndzi kudzəhə ka Yesu akwa sakar səm susəmər tahaku, ka yu ni abbər, “Mthlaku, wa an akwa bara ɓəli ngə nə ri?” 21Sakatə Bitrəs wutə ni, antə tsa pəla aka Yesu, “Mthlaku, mdə ngəni fa, man ata wutə nə ri?”

22Antə Yesu shinau alari ka pəla, “Ma I pəla I ata bara ka tsa ndzi ka mpika har tar ma I ku si, man ata damitə nga akwa ri? Ar nga, nu ra!”

23Antə ndər ni ku titiləmtadzi akwa nca mjir nu Yesu abbər mdərthlipə ngəni aɗi ata mtə wa. Amma Yesu aɗi pəla alari abbər arni tsa aɗi ata mtə wa wa. Tsa pəla, “Ma I pəla I ata bara ka tsa ndzi ka mpika har tar ma I ku si, man ata damitə nga akwa ri?”

24Ngəni an mdərthlipə na akwa hamta seɗa ata kəra suayeri ngəni ni, tsa an rəbutə suayeri ngəni ni. Tsuwa yeru ku sənda abbər su tə tsa akwa pəlari ni an jiri.

25Suayeri damwa aɗi hang natə Yesu ku hara Amma ma mdə pəla abbər ka mdə rəbuta kəlara pal akwa nca ɗa, I tamata wala duniya ni ka kərni aɗi ata mzhi kəsi kakaɗayeri tə mda ata rəbutari wa.

Currently Selected:

Yahwana 21: KNB

Highlight

Copy