Baɗitari 20

Ibrahim Ku Pwaktəmta Kuthli Abimelek

1Vir laga Ibrahim ku thlata ahar Mamre ka ləkwa lakur mwari abwar tsəɗi Negev, ka ndzəndzi akwa daɓwa Kadesh ka Shur. Tsuwa aghəla nda tsa ku mwari ahar Gerar ka ɗar ndzi anda raka. 2Anda antə Ibrahim pəla abbər Saratu na mwalankiɗa ni ngkwarma'ni. Antə Abimelek na kuthlir Gerar ku thlentə ka mdə səntə alari Saratu. 3Amma Hyel ku mwari adzə Abimelek akwa suni aviri ka pəla alari, “Ga ata mta kamnyar mwala tə gə kətə ni, kamnyar tə tsa mwalar mda.”

4Hwatu Abimelek aɗi pi ka tsa katagu wa, antə tsa pəla, “Mthlaku, ga ata kurəmta mji na kula biku ya? 5Aɗi Ibrahim ka kərari surni an pəla abbər mwala ni ngkwarma'ni wa ya? Tsuwa aɗi mwala ni ka kərari surni an pəla ali abbər sal ni ɓzərma'ni wa ya? Antə apani tsi ka ɗəffi shang kəcəkəcari ka jirkur.”

6Antə Hyel pəla alari akwa suni ni, “I, I ka səndari abbər gə hara ngəni ka nufi na ɓɗakari akwa ɗəffa ga. Tsuwa I an ngkatə nga ta ga ahara biku ali. An su na hara tə I aɗi hir tə gə tsəkwar ni wa ni. 7Antə kulini, ngka ka mwala ni aka salngkiɗa, kamnyar sal ni naɓi, antə ma tsa ku hara ala ga adduwa ga ata ndzi ka mpika. Amma ma ga aɗi ngka alari ka mwala ni, ka gə sənda abbər jiri ga ata mta, ga ka shanga mjir nga.”

8Antə Abimelək dli thlatə ɗəɗəpə mbing, ka kəga shanga kwakunayeri arni, ka pəla ala ɗa shanga suayeri ngəni, antə mji ni ku thlivər ka duna. 9Antə Abimelek kəga Ibrahim ka pəla alari, “Man su tə gə hara ala yeru nə ri? Man su tə I ɓzamta ala gə ri har tə gə ndəkərəngkər biku na ola apani ata kəri ka kuthlikur arna ni? Ga ku hara ali su tə aɗi kalkal ka mdə hara wa. 10Man tə ga akwa dzamari ri tə gə hara su ngəni ni?”

11Antə Ibrahim pəla, “I ku hara apani kamnyar I akwa dzama abbər mji aɗi ana thlivər Hyel aɗi akwa vəi ngəni wala raka wa, antə I kəta abbər da ata sə tsi ra kamnyar mwalankiya. 12Tsuwa ata kəra ngəni ma, jiri tsa ngkwarma'na, tsa ngkwar baba'na, amma mama' yeru aɗi duku wa. Antə I ku kəl ni. 13Antə akwa sakatə Hyel ku ndəkəmta ra ka kəyir baba'na, ka vu ra akwa kadla, antə I ku pəla alari, ‘Dlar tə ga ata hara ali akwa kəlara vəi tə mwa ata sə mwari akwa, an ka gə ləkəma ka pəla abbər I ɓzərma' nga.’ ”

14Antə Abimelek kətə Saratu ka ngka ka tsa aka Ibrahim, ka fatə təmayeri, ka thlayeri, ka mafayeri shili ka mwanki, ka na aka Ibrahim. 15Antə Abimelek pəla aka Ibrahim, “Nggədza tsəɗiyirna akəma ga, ga ata mzhi ndzi akwa kəlara bwa tə gə hira.”

16Antə tsa pəla aka Saratu tsuwa abbər, “Nggədza I ata hamta aka ɓzərda' nga adzərfa dəpu pal. Ngəni an seɗa kamnyar ncanta akəma shanga mji na adzə nga abbər ga aɗi ka biku wala raka wa.”

17Antə Ibrahim ku hara adduwa aka Hyel, antə Hyel ku mbantə Abimelek, ka mbantə mwalankiɗa, ka mafayeri ni na mwanki, antə da ku ya maɗankyar. 18Kamnyar hwatu MTHLAKU ku hartə shanga vəi ya ar mwanki na akwa kəyir Abimelek ni, kamnyar Saratu na mwalar Ibrahim.

Currently Selected:

Baɗitari 20: KNB

Highlight

Copy