Baɗitari 19

Mjir Sodom Ku Hara Biku

1Antə mjirthlentərhyel na suɗə ni ku mzhitə Sodom ka mnya tahaku, sakatə Lot andzəndzi anyarfur bərni Sodom. Sakatə Lot wutə ɗa, antə tsa thlatə kara thlakəma ɗa, ka zuzuri ka kəmari ata di akəma ɗa, 2ka pəla, “Mji ol'ola, pəra giri bu usa, akwa kəyir mafar giri. Sər giri ka giri kəcimta səla giri, ka giri pi. Ma viri ku kuri ɗəɗəpə mbing, giri ata mzhi thlatə ka ləkəma ka mwar giri.”

Amma da pəla, “Awa, yeru ata pi akwa bəbalər kuta di.”

3Amma tsa ndzangkir kiɗə kəra ɗa, antə da ku pəra ka ləvəi aharngkiɗa. Antə tsa ɗəmha ala ɗa susəmər kucali. Tsa ɓwata ala ɗa buradi kula yist, antə da kwasa.

4Amma akəmata da apəpəi ka heni, təng mji shilər kuta di Sodom ni, maɗadakwi kəga mji halhala shang, ku si ka kalaktə kəi ni. 5Antə da haptə kuraku ka pəla aka Lot, “Mji na səvi aharngkiri aviri ni ama ri? Səɓəla ka da ala yeru, ka yeru pi ka da!”

6Antə Lot ku səɓəla anyarfu, ka hartə nyarfu ni abwahilari, ka mwari adzə ɗa, 7ka pəla ala ɗa, “I akwa kiɗə kəra giri maɗama'na, giri aɗiya hir ka giri hara ɗimikur apani wa. 8Nggədza I ka maɗankwi suɗa na aɗi səndə sal wa, ndzi kəi səntə ɗa ala giri aɓəla, ka giri hara kəlara su tə giri hira ka da. Amma usa, giri aɗiya tsəkwar mji nayeri ni wa, kamnyar da mətəpiyirna, antə tar kəi ɓəlatə lapiyakurər ɗa.”

9Amma da pəla, “Sharardzi adzə!” Antə da pəla aka nvwa ɗa, “Mdə ngəni mətəpi, amma təkəma tsa akwa bara ndzi alkali! Diya yeru ata hara ala gə su na ɗimi ta su tə yeru ata hara ala ɗa ni.” Təng təkəma da ləkwa bukə Lot, akwa shahədzi adzə nyarfu ni ka da ɓələmta.

10Amma mətəpiyayeri na suɗə ni ku ha tsiya ɗa, ka ndəkərvi Lot, ka hartə nyarfu ni. 11Antə mətəpiyayeri ngəni suɗə ni ku tsa mji na akwa nyarfu ni ka mdlyangkur, antə shanga ɗa, ol ka ntsaha, ku ghərantə kərɗa gapani akwa tətəm bwa tə nyarfu ni ata.

Lot Ku Hwi Kazhar Sodom

12Antə mətəpiyayeri ni pəla aka Lot, “Gə ka mdə damwa na ar nga azi ya? Wala salngkwayeri, wala maɗashilər nga, wala maɗa'nga na maɗankwi, wala mdə laga ndzang na ar nga akwa kuta bərni ni. Ma aɗi ka gə fwaɓəla ɗa. 13Kamnyar yeru ata shamta bərni ngəni, kamnyar tuwar mji ata kəra ɗimikur bərni ngəni ku hara hang kamta akəma MTHLAKU. Antə MTHLAKU ku thlentə yeru ka yeru sə shamta bərni ngəni karkar.”

14Antə Lot ləɓəla ka ra pəla aka maɗadakwi na akwa bara kəl maɗa'ni ni abbər, “Thlatə giri, ka giri ləɓəla kazhar vəi ni, kamnyar MTHLAKU akwa bara shamta bərni ngəni.” Amma təng da kəta abbər tsa akwa gyali ala ɗa.

15Sakatə viri abaka kura, antə mjirthlentərhyel ndzangkir aka Lot akwa pəla alari, “Mwa kara kətə mwalankiri, ka maɗa' nga na maɗankwi suɗa azi ni, ta mda asə kurəmta giri akwa sakatə mda akwa shamta bərni ni.” 16Amma təng tsu Lot akwa hara su tihtihha, antə mjirthlentərhyel ni tamtə tsiyari, ka mwalarni, ka tsiya maɗa'ni na maɗankwi suɗə ni, ka ləɓəla ka da ata hildi, kamnyar tə MTHLAKU ku kətadzə ni. 17Sakatə da ku səɓəla ka da, antə da pəla ala ɗa, “Hwi giri ka giri msərantə mpika giri, tsuwa giri aɗiya wul bwahila giri wa, wala thləthlata akwa kəlara vəi akwa mular ni wa. Hwi giri ka giri ləkwa garayeri, ta mda asə shamta giri.”

18Antə Lot pəla ala ɗa, “Awa, mji ol'ola, aɗi apani wa! 19Nggədza I na mafar nga ku kurtə wutə mdəkur ata nca ga, tsuwa ga ku ncanta ali hirkur na ola tə ga ku mbantə mpikəi ni. Amma I amzhi mwari akwa garayeri na ciju ni wa, kamnyar asar ngəni ata sə kəli ra, kəi mta. 20Ai nggədza di na kudzəhari tə I ata mzhi hwi ka mwari akwa, tsuwa di na raka. Ndzi kəi hwi mwari anda kəi msərantə mpikəi. Ai ga akwa wulari tsa di na raka, antə mpikəi ata msəra.”

21Antə tsa pəla alari, “To daci, I ku zhar nga ka gə mwari anda, tsuwa I aɗi ata shamta di ngəni tə gə pəla ni wa. 22Hangkər ja! Hwihwi, kara hwi mwari anda! Kamnyar sai ma sakatə ga ku mzhitə vəi ni, kambəla I baɗitə hara su.” Apani antə thləma di ngəni ku ndzi Zowar, watau raka.

Mdə Ku Mbamta Sodom Ka Gomora

23Akəmata Lot amzhətə Zowar, pci ku kurtə səɓəla. 24Antə MTHLAKU ləkwa pungkər aka Sodom ka Gomora, u'u ka u'u na mwapu na akwa thlata amtazi. 25Antə tsa mbamta bərniyayeri ni japu, ka shanga mji na akwa, ka shanga kuta mular ni, ka shanga su ptsəptsa. 26Amma mwalar Lot na abwahilari ku wul bwahili, antə tsa ku ndzi pelar una.

27Ar Ibrahim tsa təra təng ɗəɗəpə mbing, ka mwari akwa vəi tə tsa thləthlatə tə da gari ka MTHLAKU ni. 28Antə tsa wul abwar Sodom ka Gomora, ka abwar shanga bəbalər tsəɗi ni, ka wutə ɗerər tsəɗi ni akwa ləmta aharhyel apa ɗerər u'ur mtaku.

29Apani antə su ni ku hara, abbər sakatə Hyel akwa mbamta shanga bərniyayeri na akwa mular, akwa vəi tə Lot ka ndzəndzi akwa, antə tsa ɗangtə Ibrahim, ka kəɓəla Lot kazhar asar ni tsuwa, hwatu.

Laku Tə Dur Mjir Mowab Ka Ammon Wutədzi

30Antə Lot ka maɗa'ni na maɗankwi suɗə ni ku ləɓəla kazhar Zowar, ka mwari ra ndzəndzi akwa garayeri, kamnyar tsa akwa thlivər ndzəndzi akwa Zowar ni. Antə tsa ka maɗa'ni na maɗankwi suɗə ni ku ndzəndzi akwa ku laga. 31Antə ngkwarni na yarakəma ni pəla aka na ntsahari, “Baba mwa ku hali, tsuwa mdə sal aɗi na ata si kəl mwa apatə mji ana hara akwa duniya ni wa. 32Antə sər ka mwa vu baba' mwa akwa sa yimər anap, ka mwa pi ka tsa, kamnyar ka mwa mzhi yaɓəla alari kəkayeri.” 33Antə da vu baba' ɗa tə tsa sa yimər anap tsu vir nda aviri. Antə ngkwa na yarakəma ni ku ləmbwa adzə baba'ni ka pi ka tsa. Amma baba'ni aɗi sənda abbər ngkwarni ni ku pəpəi adzə ni ka thlatə wa. 34Səɓəla ɗəpari, ngkwa na yarakəma ni pəla aka na ntsahari ni, “Diya naha aviri I ku pi ka baba'na. Antə ndzi ka mwa vu ni ka tsa sa yimər anap ni ashina aviri ka damwa, ka gə mwari adzə ni aviri ka ra pi ka tsa, kamnyar ka mwa mzhi yaɓəla kəkayeri.” 35Apani antə da ku vu baba' ɗa tə tsa ku sa yimər anap ni vir nda aviri ka damwa. Antə ngkwa na ntsahari ni ku ləmbwa adzə ni ka pi ka tsa. Amma baba'ni aɗi sənda abbər ngkwarni ku pəpəi adzə ni ka thlatə wa. 36Apani antə maɗa' Lot na maɗankwi japu ku kətə hur ka baba' ɗa. 37Ngkwa na yarakəma ni ku yaɓəla ɓzər sal ka vəta alari thləm Mowab. Tsa an ndzi kəkar shanga mjir Mowab har ba ashina. 38Ngkwa na ntsahari tsuwa ku yaɓəla ɓzər sal ka vəta alari thləm Benammi. Tsa an ndzi kəkar shanga mjir Ammon har ba ashina.

Currently Selected:

Baɗitari 19: KNB

Highlight

Copy