Matthew 24
24
1Li Jesus lā‐wils, kās‐īd gēh‐īd lāḵā temple: gākī disciples as lāk kās zāzumq‐sīlīs qētla asa sa temple lāk.
2Aū mīs nānāḵmī nīk dāḵwuk, kīs dāḵwas doqilā nāwhāḵ gada tīsum‐ga? lin aul nīk yūtl, kīyos‐kl numskumā yāwī klisūḵ da tīsum lā‐kl muq‐samē kluḵ numī tīsuma, ḵā kīs kla klīyhāḵāāq‐kl.
3¶ Yiḵs lā ī qās‐kamī ḵā nagē sa Olives, gāḵī da disciples lāk hīgamā, nīkya, nītlāla gāḵunūh whās hīk dum klasū qīh‐īd klī? mās tā‐kl ḵā ī da māmātl‐tīkī kla kāsū gāḵ klū, hī mīs kā ḵo qilbā klūḵ da awīnāqīs‐īḵ?
4Lī Jesus nānāḵmī nīk dāḵwuk, yāklaula kā kīyosīs baqānum klī‐qitl tū dā mas‐ūtl.
5Kā īḵs kīnum‐ī klī da gāḵ kla lāḵun glīkum, nīkya, nūgwa‐um Christ; lā klī klīqitl tū dā mas kluḵ kīnum kla.
6Wudklilāk dāḵw um‐kl ḵa āsī ḵā hotlū kla, gla wī da wāwīnāḵs‐tāla kla: yāklaula qālā ḵwunḵwun tīkulas: kā oḵ da nāwhēḵs kīsā lasa īḵ īs hī qīh‐īdī, kīs um‐kl wīs glī da qilbē kla.
7Kā ī da līlqala‐klā yāḵs hēkaulī‐kl gla wa ogwila līlqala‐klāya, hīmī sa numskum‐āq gla wa ogwuḵ‐sumāq: lā‐kl ḵā ī da poskā kla, lā‐kl ḵā oḵ dumlī‐whā klūḵ da awīnāqīs‐īḵ.
8Gēstā mīs gāla bī‐kl tsa tlālā‐wotlila kla.
9Lāk dāḵw klī tlālā‐wotlilā mas klūtl, lā‐kl ḵā ī tlilā mas klūtl: lāk dāḵw‐kl ḵā ās klīzitl klisa nāwhā līlqalā‐klāya kā un glīkum.
10Lā‐kl ḵā ī kīnum klī da wānīkā kla, lā‐kl ḵā ī lāḵodāpa‐kl, lā‐kl ḵā ī klī‐klisāpa‐kl.
11Kīnum tā klī da glīḵsāla‐būtla kla gāḵ‐kl, lā klī klī‐qitl tū dā mas‐kl ḵā kīnum kla.
12Hī mīs kā wāḵā ās kla sa yāgā‐lazī, lāgītl klisā tlāwhilā‐lazī sa kīnum wudih‐īdi‐kl.
13Wa yiglā ḵī da lābundi kla kīs yāh‐īdikl, hī mīs qāqila‐āq klī.
14Lā tā‐kl gada ēk‐ig wātldum sa īkē awīnāqīs lā‐kl nīgim kla ḵwā nāwhāḵ awīnāqīsa, kā māmātl‐tīkī klis nāwhā līlqala‐klāya; wa gāḵ wīs glā klī da qilbē kla.
15Wa gilk dāḵw um‐kl wīsis doqilā‐kluḵ kyil‐kyiltī gīlā kēs aōzūtlilā, yāka‐gālum otlas Daniel ḵā prophet, glāḵw‐zaulītl lāḵā temple (wīga yhī da gāgaduq‐sīlē, āyūsila;)
16Wa wī gik dāḵw klilā‐ga yhī da hē lī Jūdæa hītl‐tsau‐kl lāḵā na‐ungē,
17Yiḵī da hī kla lī ogwē sa sa gūq, qālā yhī wūtl‐um gāḵā ḵā kās uḵa‐wilsī ḵīs māmīkyas lāḵīs gūq.
18Gla wī da hī kla līs awīnāqīs qālā yhī āīdaākā kās uḵīdī ḵīs qītl‐qēla.
19Kīkyālasū sī da bawīq kla, gla wī da zāmā mas kla ḵī da hīk dum klas qīh‐īd klī!
20Hawāḵ‐ulāk daḵw la kās kīsa ūs hī hītltsauk dumī da zawunḵ, qālā yhī ḵā ā hī dī da sabbath:
21Kā īḵs wālāsī klī da tlālā‐wotlilā‐kl, kīyōs numāyhis wut‐kl geḵ‐īd lāḵ gilgilīsa otlūḵ da awīnāqīs‐īḵ, kīyōs, kīyōs kla ḵād hī īnūḵ‐kl qīx klī.
22Gil mī lāḵs wotlasī da tlālā‐wotlilāk dum kīs wotl zaqāh‐īdā mazawa, kīyos lāḵs da tā qāqilā‐āqā: hīgā mīs kā ī da kūgla‐qā zaqāh‐īdā mas tsū gwītl klisī da tlālā‐wotlilāk dum kla.
23Lāḵī da hīk dum kla qīh‐īd klī gil um lāḵī da numūq baqānum nīk yūtl, dok, ga um Christ, glū hī um ḵā; qālā oqisuk.
24Kā īḵs gāḵī klī da kīnum kla Christ butla‐kl, gla wī da glīḵsāla būtla kla, lā klī doqā mas klisīs wunwun‐yhis kla qīgīlas‐kl ḵunḵunyā‐zīma kla; kās klīqitl tū dā masī, ko qīh‐īda ās nūq, lāḵo ḵī da kūgla‐qā.
25Doqātlā lāga, lamun qātlila um nīk yūtl.
26Wa gilk dāḵw mī lāḵās nīk yūtl, dok, hī dā lī da āklī; qālā lā lāk: dok, hī da lī da gūq; qālā oqisuk.
27Lāḵ qīxduma sa klinīqā gāyū kau lāḵ tīgwāsa sa klīsila, kās qakātlī lākyū dīs lāḵ linzā sa sa klīsila; hī um‐kl wīs gāḵ qīx klī gāḵ‐īnī kla sa Kwanūqa sa baqānum.
28Yiḵ uḵ‐āsa sa tlil zisī, hī mīs gāḵ kāpī‐kawā tsa qīq.
29¶ Wa nawhē‐gī um‐kl wīsī ḵā tlālāwotlilā‐unḵ klā lē klasa klīsila padik‐īdā mātsūkl, gla wa maqila kīs‐kl lā‐kl nāqātla‐kl, gla wī da tūtū tīkamā ḵā‐kl lāḵā īkī, lā‐kl ḵā ī da nāwhā uḵ sa īkī nutlim gilīs zuq‐kl:
30Wa lā‐kl wīs glī nītl‐īd klī da māmātl‐tīkī kla sa Kwanūqa sa baqānum lāḵā īkī: wa lā kluḵ da nāwhāḵ ātl‐ogwuḵ‐samāq līlqalā‐klī sa awīnāqīs‐īḵ qāsa‐kl, lāk dāḵw klī doqilā kluḵ Kwanūqa sa baqānum gāḵ qāsū‐tlila‐kl, lāḵ unwā‐ya sa īkī, gāḵ gla wīs tlā‐whāya hī mī sīs ēgālazī zī‐kyasa.
31Lā klī yālākā‐kl ḵīs angels hī‐kl wāwūlāqilā zī klisa hīgāla, lāk dāḵw klī kapē‐kl kāpīkau kluḵ kūglaqā sī lāḵwā mūk wīda īsīḵ yaula, ek um‐kl gyēbālī sa kluḵ nāla lāga‐ā‐kl lāḵ ups‐bālī sas.
32Wa kākoklāk dāḵw lā yhī glā ḵā parable lāḵā fig‐mis; gil mī sī klinākyas gālū‐kau, gla wī mamēmas qāḵ‐īda, la mī sis kauklilāk dāḵw kīḵs la mā ī ulāk hī‐unḵ‐īda:
33Hīk dāḵw um‐kl wīsis qīh‐īd klī, kāsū lāk dāḵw‐kl doqila‐kl ḵun nawhā qayau, kauklilakl kīḵs la mā ā īyhatla, gāḵ um lāḵā dī‐diyhilā.
34Aulā tin nīk yūtl, kīsī klūḵ da līlqalāklā yīḵ kīyok‐wī dikl‐ḵs, kīs mī klin nāwhā qayau hī qēla‐klī.
35Ḵā unwā‐yī lāḵā īkī gla wa awīnāqīs‐īḵ kīyok‐wī dikl, lā tin wātldamī‐lēla kīs‐kl kīyok‐wī da īnūḵ‐kl.
36¶ Yiglā ḵī da nālā‐kla glū wāḵā zā kīlas klasī kīyos kauklilā kī, kīsī da angels sa sa īkē awīnāqīs, lā tī hīgā mun Umpa.
37Lāḵ qīxda‐mas baqānumk dum otlas Noah, hī um‐kl wīsī qīx klī gāḵ dum kla sa Kwanūqa sa baqānum.
38Kā ī da yēḵwuk sāk dum otla hamāp dāḵwā otla glūḵs nākā otla, kagāda nāqila otla tlāwāda nāqila otla, gāḵ āklil lāḵ lāk dum otlas Noah lāḵs lāḵā ark,
39Kīs kauklila ātl‐umḵs gāḵa ī da yeḵwuk sōtla, wīwalā masuk, hī um‐kl wīsī qīx‐kl ko gāḵ klī da Kwanūqa sa baqānum.
40Wa lā klī mālū‐gwīs klī da uḵ kla lāḵā awīnāqīs; numūqī da uḵ‐īd tsū kla, numūq tī da uḵ‐īs āwī kla.
41Mālūq klī da zīdāk kla kwītla‐kl lāḵā mūla; namūqī da uḵ‐īd sū kla, namūq tī da uḵ‐īs āwī kla.
42¶ Kākā‐lāla lā kā‐īk: kāk dāḵwuḵs kīsa ā kūs kauklilāḵ nāla īnī klas gāḵ dum kla sīs Gīkumā yūs.
43Kātlā lā yhī glāḵ gada, gil mī lāḵs dī da gīkumā‐ya sa gūqī kauklilāḵ gāḵ dum lāḵā sa gilū‐klīq lāḵā kānūtl, kīs laḵs da tā hītl‐kāla ḵīs gūq la‐īglā sa.
44Kā īk ogwākāk dāḵw la qātlātlāḵ: kā ī da wāḵā‐zā kīlas kla sī yiḵīs kīs dāḵw kla ūs gīga‐īkutl‐kl, gāḵ dum klisa Kwanūqu sa baqānum.
45Ungwā tī da aulē ek glū naukād hīlūbātl zanā‐yā, yiḵī da lē aāḵsīlā mātsū sīs gīkumā‐ya lāḵīs numā‐ītl wut, kā zaw sa hamāyī lāk dāḵwuk lāḵā hītlau zawk dumk?
46Blessed wīs tī da hīlūbātl zanā‐yī, yiḵ khā sū kla sīs gīkumā‐yī hī qīgīlī, ko gāḵ klū.
47Aulā tin nīk yūtl, kla kīks wīlīs tin dī kla sīs māmī‐kyas lāk kā aāḵsīlī sīk.
48Gil um lāḵ wīs glī da yāksāmī hīlūbātl zanā‐yā nīk‐kl lāḵīs naukā‐yī, kīs klī kayū‐kl gāḵ klin gīkumā‐ya;
49Glū miyhā‐kl ḵīs īaā‐ḵalūtī glūḵs hamāpīkl glūḵs nākē klī gla wa nīnāḵ‐bis;
50Ḵā gīkumā‐ya sa hīlūbātl zanā‐yī gāḵ‐kl ḵā numḵ sā kla nāla‐kl, lāḵ kīs kla dādō‐qātlāk dum klisīk, hī mī sī wāḵā zā kīlas klasī yiḵ kīs kla kauglitl klis.
51Lā klī tūs‐zind kluk, lā klī qēstind klis lāḵā klīk‐klaqis, lāḵ lā kla qāqa‐saulas‐kl glū kinkyā‐taulas klāḵ gīgī.
Currently Selected:
Matthew 24: Kwak
Highlight
Share
Copy

Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.