Luke 7
7
1Wa gil mīs qilbā mas nāhwā ḵīs wātldum lāḵ wuglitla sī da nāhwā bagwānum, la lāzaulīs lāḵ Capernaum.
2Wa lā tī da hīlūbātl‐zanāya sa lā‐lākindihsīla zihḵā, yiḵā tlāhwiles, la um wāwīpā.
3Wa gil mīs wuglāḵ‐āklilā ḵā qāqīxāl lāḵ Jesus, la yālākās lāk qilsqilyāqā sa Jews, uḵkiālāk kā gāḵīlāḵs kās qilā masīḵ hīlūbātl‐zana yas.
4Wa yih dāḵwuk, yiks gāḵ dāḵwa ī lāḵ Jesus, aula kiāl hawāḵulāk, nīḵiā, hītlū ās kās he us qīh‐īd ka ī.
5Kā īḵs tlāhwila nūqa ā sinūhw gūqilūt, glūḵs gūqīlah īda ā ḵunūhw kāpīkawāzī.
6Lī Jesus glūh dāḵwī: wa gil mīs kīs la qīsatl lāḵā gūq, la ā sī da lālākin‐dihsīla yālāke sa glīglaglaula lāk, nīk yik, Gīkumī, qātlas wūtlum hīnāqil: kāḵ gin kīsīg hītlū kās gāḵā būda ūsa ḵun sela:
7Hī mī sin īsītl da ḵā un gāḵ lūklāḵ gin kīsī hītlau, au um ā hyī glatl nīk sa wātldum ā, lā klin hīlūbātl‐zānāyī hītl‐īdikl.
8Kāḵ gin ūgwākig bagwānum tlāhwī nūqā, bībunākaula ḵā hīhīkawīnūḵ: wa lin nīk gada numūqig, hāga, la mīs: we ḵā numūq, kīla, gāḵ mīs: we lāḵ un hīlūbātl‐zanayī, uḵ‐īdas ga, la mīs uḵ‐īduk.
9We lī Jesus wuklila ḵīk, la ḵunyasas, la qīkumh‐īd kās nīkī ḵā kīkakaula laskum īk, nīk in klūkl, kīyos in khā sū he wālas‐ts ūqizālazī, kīyo, kīyos lāḵ Israel.
10Wa yihdāḵw ḵī da yālākum‐kdī aīdaākā qayūtlil lāḵā gūq, khā ḵā hīlūbātl‐zanayī hītl‐īda.
11¶ Gil mīs tlinsa gāḵī Jesus lāḵā gūqila glīkāds Nain; hī mī sa kīnum lāk kīkākūklāmatsawas lā gla wī, gla wa wālas kīkakaula.
12Wa gil mīs gāḵ īhyātl lāḵ tihyile sa gūqila, doḵ, dotlzaulīsilā yū wī da tlilī bagwānum, yiḵā hīgā mī ḵwanūq sīs abump, la mīs kakiausa, kīnum ī da bagwānum gāyūtl lāḵā gūqila waūq maulas.
13Wa gil mī sa Gīkumayī dūḵwāklilāk, la wos‐ts, la nīk yik, qātlas qās.
14Wa gāḵ nahwā‐ga āklilāk, kās pāhīdīḵ: lī da dāgil‐kulek glāḵwum‐ga ulsā: Wa la nīkiā, ātlūstū, nīk in klūkl, glāḵ‐wīd.
15Wa lī da tlil‐kdī qāga‐āklila, kās yākugātlī, la zaws lāḵīs abump.
16Wa lāhdāḵw zindih‐īdis nāhwā: lāhdāḵw hyāshyīla ḵā Ike Gīkumī, nīkia, wālas ūḵ prophet ūḵ da gāyūkauḵ gāḵunts; lā ḵa ī da Ike Gīkumī gāḵ baqā ḵūs sāsum īḵ.
17Wa ga mīs la zītl‐wāla lāk lāḵ wāzukāsas Judæa, gla wa nāhwā īwunḵīlīs.
18¶ Lī kī‐kākūklā‐matsa wās John zikiātlilas wīla lāk.
19Lī John klīlālā lāḵā mālūq lāḵīs kīkākūklā‐matsa wī, yālāḵ‐īdis lāḵā Gīkumāyī, nīkia, sū ma ī da gāḵ kla ā, īsā unūhw dādūqātla‐umḵ ūgwile ā?
20Wa gil mī sī da bī‐bagwānum gāḵ lāk, lāh dāḵw nīkia, John ḵā Baptist yālākā gāḵunūhw lūkl, nīkia, sū ma ī da gāḵ kla ā, kīsa unūhw dādūqātlāḵ ūgwile ā?
21Wa hī mīs lāh dums hītlā ḵā kīnum i zīzihkūlum gla wa yegūlum hī mī sa yaīksāmī demons; gla wa kīnum pī‐papāsd duhīda matsūs.
22La nānāḵmī kās nīkī lāh dāḵwuk, hā gih dāḵw la lāḵīs gāya‐nāqilā sa ūs, nītlāḵ John sīs lāh dāḵwūs dūqitl glū wuglitlā; yiḵā papās la lokl ḵīs dūqilāyū, ḵā aūzagīla kāsā, yiḵā klīklukulātl‐un la ek‐īda, gla wī da gwī‐gwulqum wuklilā, ḵā tlilī la qilāhīda matsū, yiḵā wīwūsīlākā la wātldum sū sā ek zikiālum lāh dāḵwuk.
23Wa ek wīs tī, yiḵīda kīyos kla khā sū‐kl kās qagitl tsume sū‐kl gāḵun.
24¶ Wa gil mī sī da yālākum as John lāh dāḵwā, la ās nīk ḵā kīkakaula qāqīxāl lāḵ John, mās dāḵwīs le ūs dādūqā sū lāḵā lūbīs? kītumā ī hwānela matsū sa yaula?
25Wa mā zā wīs lāh dāḵwā ūs dūqā sa wa? bagwānuma ā kūḵzaulāḵ tulqā qītlqela ā? doḵ, yik dāḵw ḵī da aekiākīlāq, glū eks humāyī, hīh dāḵwa ī lī da gūqas gīgakumāyī.
26Mā zau tīs lāhdāḵwa ūs dūqāsū? prophet‐aī yā? kegl, nīkin klūklāḵs awīlā ī hayākātla‐kāwīs prophet.
27Ga mī da kiātāyā, doḵ, yālākun klāsin yālākum, kā lā gagalatl gīwā yūs, yiḵ qāqa‐tlīlākla ḵīs dihyila yūs qāqātlatl gīwā yūs.
28Nīkin klūkl, lāḵī da nāhwe māyūglum lāḵ zīdāk kīyos lāk wālasa kāwīs John: wa yiglā ḵī da hulīya lāḵ gīkāsa sa Ike Gīkumī wālasa kāwīs.
29We ḵā nāhwā bagwānum yiḵs lāh dāḵwā ī wuklilāk, gla wī da hī‐hātlākulilgis, aulāḵā ḵā Ike Gīkumī, kāḵs zūḵaqā ās zūḵwiles John.
30Lā glā tī da Pharisees gla wī da lawyers kīs dādālāḵ naukālāyau sa Ike Gīkumī, kāḵs kīs dāḵwā ī zūḵuqs.
31Wī zin munyas kla sūḵ da bībagwānum āḵ sūḵ da numhīda‐esīḵ, mā zī ḵa ī qīh‐zā sā sūḵ?
32Hīh dāḵwūḵ qīx ī da ginginānum quzis lākā klāsanauyī, nīkiāyā pā, yiḵā nīk, hwīpālī ganūh kās, lāh dāḵwus kīs yuḵwā; qāsī gānūh, lāh dāḵwus kīs wosā.
33Kā John yiḵs gāḵa ī kīs humāpuḵ qāquhw‐sumī, kīs ḵād nākāḵ wine; wa lāh dāḵwus nīkiā, uḵnūgwādūḵwā sa demon.
34Yiḵ Ḵwanūqa sa bagwānum gāḵa ī humāp tā glūḵs nāka ī; wa lāh dāḵwus nīkīā, doḵwā kekākisīḵ bagwānum nāḵ bus ḵād, glaula sa hī‐hātlakulilgis gla wa yaīksamī!
35La mī sī naukādālazī aulāḵā sū sīs ginginānum.
36¶ Wa numūq tī da gāyūtlī lāḵā Pharisees klīlālāk kā les humāp gla wī: wa la laīkl lāḵ gūqa sa Pharisee, la qāgalītl lāḵā humāyī.
37Wa doḵā zidāk yiḵā yāksā‐mūtlī lāḵā gūqila; wa gil mīs kautlāklilā kīḵs he ī qaītl lāḵā humāyī lāḵ gūqa sa Pharisee, gāḵ sa alabaster skum klādum zaula.
38La glāwīgā‐lītlāk lāḵ gūgwayaus, qāzatauya, la qunkāḵ gūgwayaus yisīs gwāsdī, la dek ysīs sayā, mīzāḵ gūgwayaus, la kulsīduk yisa klādum.
39Wa gil mī sī da Pharisee yiḵā klīlānumek dūqila ḵīk, la nīnkīkula, nīkia, ḵwā bagwānum īḵ, gil mī lāḵāḵs prophet lāḵ, lā lāḵs dūḵ kauklilā ḵūḵ zidāk īnāyāḵ sa glaubā leq yiḵs yāksama īḵ.
40Lī Jesus nānāḵmī nīk yik, Simon, nīkī gin kun watldum nūqa ūkl.
41La nīkia, Ade, nīk la tsī: mālūq wūtlī da getla āq wūtla sa glāglīkiū‐matsā; yiḵā numūq getla āq sa sikia pun yāgī dālā, lī da numūq sikiā skum gūs tawī uḵās.
42Wa gilh dāḵw mīs kīyos qunayā, la wākmūta umḵ kīs qunā wīlāḵs mālūqa ī: wa wī klī lākīḵs mālūqa ī klūmākl tlāhwila nūqs?
43Lī Simon nānāḵmī nīkiā, hī gānums tī da kīnumk des glīkiaunum; la nīk yik, la ums nukā.
44Wa la qestā lāḵā zidāk, la nīk yiḵ Simon, dūqila mas īḵ gada zidāḵ ga? gāḵīklī gin lāḵūs gūqa kūs, las kīs zaw gāḵun klas wāpā kā gin gūgwayūg, lā glā tāg la qunkāḵ gin gūgwayūg yis gās gwāsdig, lāg dekug yis gas sayāk.
45Kīsa ā kūs yāqā gāḵun klas mīzuh īde; lā glā tāg ḵun la wāwāsdum gāḵ īklā, kīs qātl ālītl mīzāḵ gin gūgwayūg.
46Yiḵ gin hyūmsig kīsa ā kūs klātīd kug yis klādum ā; lā glā tāg kuls īdiḵ gin gūgwayūg yisa klādum.
47Hī mī sin nīk‐ītlūkl, yiḵ kīnum ā yekīnī sik la mī dīgiklilāqā; kāḵs awīla īḵ tlāhwila nūqā: we lā glā ḵī da hūlātlas dīgiklilūd tsū lāk, hī mīs kīs aula um tlāhwila nūqā.
48La nīk ḵā zidāk, ḵīs yekīnāyūs la mī dīgiklilāqā.
49Wa yih dāḵw ḵī da quzītl lāḵā humāpī gla wī, la nīnkīkulā‐h‐dāḵwa, ungwā zūḵ da dīgiklilūde ḵa āḵ yekīnāyī?
50Wa la nīk ḵā zidāk, la ums qāqila‐āq sūs ūqizālaze kūs, hāga nīnākakulāḵ.
Currently Selected:
Luke 7: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
