John 10
10
1Aulī gin nīk yūkl, yiḵī da kīsa gāyā īkl lāḵā tihyilā lālākā ḵā lāmādū, au‐um klupūstau kās gāyā‐īglasa, hī um gilūklī, tlīnumā ḵād.
2Wa yīglā ḵī da gāyā īkl lāḵī da tihyilā hī um aāḵsīlā ḵā lāmādū.
3Hī mīs uḵstūd gītl tsī da tātāhyilāk sīla, wuglākuḵsdī sū um ḵa ā wī sī sā lāmādū: lā ḵa ā klīlāla ḵīs lāmādū yis glīglakumas, kāyūda ḵa ās.
4Gil mīs lāwilsā ḵīs husāk, lā gāgā lātl gīwīs, lī da lāmādū lāskum īk: kā īḵs mātl tīḵs dī ma āk.
5Kīs dāḵw tā klī lāskumēkl ḵā ūgwila, au umkl bo klis: kāk dāḵws kīsa ī mātl‐tīḵsdī ḵā ātl‐ūgwilā.
6Ga um nīk dum ā wātldums Jesus lāk dāḵwuk: kīs dāḵw tā ayūsilā māsī qayaus wātldum as lāk dāḵwuk.
7Lī Jesus nīk lāk dāḵwuk ītīdā, aulī gin nīk ūkl, nūgwa um tihyilā sa lāmādū.
8Nāhwā mī da gālā gīwāya un gilūkla tlīnumā ḵād: kīs gla tī da lāmādū hūklīlāk.
9Nūgwa um tihyilā, laīklītl lāḵ sa numūq bagwānum, kū laīkl lāḵo nūgwa um qāqila‐āqī klis, lā klī laīkl glū lāwils, la klī khā‐kl kās humēkl.
10Kīsa ī da gilūklīq gāga ḵītl nūqs ūgwilē lāḵ gilūklā, glū kīlākyā, hī mī sī mūmasīlā: hī tun gāga ḵītlī kā uḵnūgwāda mī lāḵ sīs qilā, glū kā uḵnūgwādī sīs kīnum a.
11Nūgwa um ek aāksīlāḵ lāmādū: yiḵī da ek aāḵsīla ḵā lāmādū zaw sīs bagwānum īnāyī kā ī da lāmādū.
12Yiḵī da hīlānum ī, kīsī aāḵsīla ḵā lāmādū, ḵā kīsī hus ḵā lāmādū, dūqilā ḵā āklānum gāḵā, la bo sa lāmādū, kās hītl tsa wī: lī da āklānum dāh īdik dākwuk, kās gwītl īda mas īk.
13Hī um hītl‐tsau gītl tsīḵs au ma ī hīlānum a, kīs a ī awīlā gīla ḵā lāmādū.
14Nūgwa um ek aāksīla ḵā lāmādū, mātltēla um ḵa ā wī sun klā ḵā nūsa, lā ḵa ī da nūsa un kauklila gāḵun.
15Lāḵ kauklila īnaya sa Umpa gāḵun, hī ḵād gāḵ qīx un kauklila īnayā ḵā Umpa: la mī sun gīgālīsas gin baqīnīg kā ī da lāmādū.
16Uḵnūgwāda um ḵa ā wīs‐un kla sa ūgwila lāmādau, kā kīs gāyūtl lāḵūḵ da kupīqīḵ; hī um ḵa ā wīs un ūgwākā klun gāḵā mātsū‐kl, lāk dākw mī sī wuglākuḵsdī‐kl gāḵun, lāk dākw klī nunumkū‐kl, numūqī aāḵsīlēk.
17Hī mīs lāgītl tsī da Umpa tlāhwila nūqun, kāḵ gin gīgālīsī gā sun baqīnāyī, kun ītūklīk.
18Kīyos bagwānum uḵ‐īduk gāḵun, qilīx mun gīgālīsas; uḵnūgwādun klas tlāhwāyī kun gīgālī‐sīs, uḵnūgwāda um ḵa ā wīs un klas tlāhwāyī kun ītūklīk: ga um wātldum sun Umpa gāḵun kun qīh‐īda āsa.
19¶ Lāḵa ā wāksuks ī da Jews kā lā wātldums.
20Wa kīnum ī da gāyūtl lāk dāḵwuk nīkyā, uknūgwāda dsū ḵwā sa demon, lā tūḵ nūtlumātla; mās dāḵw dsīs hūklīlā gītlāq?
21Lī da wa‐ūq nīkyā, kīs a āḵs wātldums uḵnūgwādē sa demon: dih‐īdā mas um lāḵā ī da demon ā ḵā pupās ā?
22¶ Lā tā hī dī da qītl lāḵa hītl‐īdik dum lāḵ Jerusalem, lā tā zawunḵā.
23La āsī Jesus gīgīlītlila lāḵā temple lāḵ gūq as Solomon.
24Gāḵ ī da Jews qēstālāk, kās nīk īk, wī lāq zau klas nītlā‐kl gāḵunūh? gil mī lāḵā kūs sū mī da Christ ā, wīgā zau ēk um nītlā gāḵunūh.
25Lī Jesus nānāḵmī lāk dāḵwuk, la mīk da gin nītlūkl, las kīs dāḵw ūqis a: yiḵī da qīgīlas un lāḵ glīkum a sun Umpa, hī ma as zikyātlilun.
26Lāk dāḵw glā tas kīs ūqis a, kā īs kī zīnīk dāḵwūs gāyūtl lāḵ un lāmādau, lāḵ un wātldum ūkl.
27Wuglākuḵs diyā un lāmādū gāḵun, lāḵa un kauklilāk dāḵw kī, lāk dāḵw ḵā ī lāskum ī gāḵun.
28La mī sun zaw lāk dāḵw kī sa hīmunīs qilā, lāk dāḵw klī kīs tlilā īnūḵ‐kl, kīyos‐kl ḵād numūq dāḵ‐kliyā‐kl kī gāḵun.
29Kā un Umpa, ḵī da lē zaws gāḵun, awīlā‐kāwāya ā sa nāhwā; kīyos ḵād numūq hītl‐āzaul tlīnumḵ klayāk lāḵ ayāsau sī da Umpa.
30Yun, gla wī da Umpa numūq munūh.
31Lī da Jews dumgils ītīd ḵā tīsum kās nupulāk.
32Lī Jesus nānāḵmī lāk dāḵwuk, kīnum a un ēk qīgīlas nīlum ūkl gāyūtl lāḵā Umpa; wī dī lāk ḵīs nupā gītl dāḵw klā ūs gākūn?
33Lāk dāḵwī da Jews nānāḵmīk, kā ekya qaīnī kīs unūh nupūkl; hī glatl kā īs yākpāḵstā īnā yūs; hī mīs kāḵs au ma ā kūs bagwānum a, las God tā mas ḵūs baqīnayā kūs.
34Lī Jesus nānāḵmī lāk dāḵwuk, kīsa ī kyāduq um lāḵīs law yūs ā, nīkīk dī gin, god dāḵwa ā kūs?
35Gil ma ās god ḵulāk, yiḵ gāḵ ās wūtlas wātldum as God, lā ḵa ā īda kyāduq kīyos qīqixa ā sa;
36Nīk dāḵw ta sīk, yiḵ lā ekya matsū sa Ump, la yālā īdā‐yūs lāḵwa awīnāgwīs īḵ, yākpāḵstās; kā īḵ gin nīk īg, Nūgwa um Ḵwanūqs God?
37Gil mī lāḵ gin kīs lāḵ hī qīgīlī qīgīlasa sun Umpa, qāla wūtl um ūqis gāḵun.
38Wa gil mī gin hī qīgīlī, wāk um a hyī glātl wayūqis gāḵun, ūqis lā hyī glā ḵā qīgīlas: kāk dāḵws kau‐klila mī lā ḵūs, ayūsilā ḵā ā ḵī da Ump‐āḵs kupētla ā gla wun, glūk gin kupētlīg gla wa Umpa.
39Lāk dāḵw ḵa ā ītīd dāh‐īda īḵs‐dik, au mīs bo’s ayāsūh dāḵwas.
40La ītīd lā lāḵ qīsāyas Jordan, lāḵ gālūtlī baptize dsāts John; hīk sē ma wīs glamīs lī.
41Wa kīnum tī da gāḵī lāk, nīk dāḵw tā, kīyos wūtl glātl māmātltīkī qīgīlats John: wa lā glā tī nāhwūtla wātldāmī‐lēlas John qāqīx‐ul lāḵ gāda bagwānumg la um aula.
42Wa lā kīnum ī da ūqis‐āk lāk.
Currently Selected:
John 10: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
