ROM 9
9
Pathian hnam thlan Israel
1Kristaah chuan thu tak tak ka sawi a ni, ka daw lo ve, Thlarau Thianghlim zârah chuan ka chhia leh ṭha hriatna pawh hian mi hriatpui a. 2Ka thinlungah hian hrehawmna nasa tak leh lungngaihna reh thei lo ka pai asin. 3Ka unaute, tisa lama ka chipuite aiah hian, kei hi Krista hnên ata tihhran khawpin ânchhe dawngin awm hial ila ka ti si a; 4Israel mi an ni si a; fa nihna te, ropuina te, thuthlung zawng zawng te, Dân pêkna te, Pathian rawngbâwlna te, thutiam zawng zawng te an ta a ni a; #Ex 9.4 5pute chu an ta a ni bawk a, tisa lam thûah Krista chu anmahni zîng ata lo chhuak a ni bawk a; ani chu thil zawng zawng chunga awm, chatuana fak tlâk Pathian a ni. Amen.
6Nimahsela, Pathian thu chu eng mah lo anga awm ta a ni lo ve. Israela thlahte chu Israel mi an ni vek lo ve; 7Abrahama thlahte an nih avângin an zain a fate an ni vek hek lo; “Isaaka-ah hian i thlahte an ti ang,” tih a ni zâwk. #Gen 21.12 8Chu chu, tisa fate chu Pathian fate an ni lo va, thutiam fate chu Abrahama thlaha ruat an ni zâwk tihna a ni. 9Thutiam chu hei hi a ni: “Tûn ang hun hian ka lo kal ang a, Sari chuan fapa a hring ang,” tih hi. #Gen 18.10 10Chu chang a ni lo ve, Rebeki pawhin mi pakhat (kan pu Isaaka) laka phîr a pai lai khân - 11nautê chu an la pian hmaa, chhia leh ṭha an la tih hmain, thiltih vâng ni lovin, a kotu duh vâng ni zâwkin, thlan lam thûah Pathian thuruat chu a ngheh theih nân - 12a hnênah chuan, “A upa zâwkin a naupang zâwk rawng a bâwl ang,” Pathianin a tih kha. #Gen 25.23 13“Jakoba ka hmangaih a, Esauva erawh chu ka hua,” tih ziak ang khân. #Mal 1.2-3
14Eng nge kan sawi tâk ang le? Pathianah chuan fel lohna a awm em ni?
Hnai lo ve. 15Ani chuan, “Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” tiin Mosia hnêna a sawi si kha. #Ex 33.19 16Chuvângin, a duhtu vâng a ni lo va, a tlântu vâng a ni hek lo, a khawngaihtu Pathian vâng a ni zawk e. 17Pathian Lehkha Thuin Pharaoa hnênah chuan, “Hemi avâng ngawt hian ka tungding chia, nangmahah chuan ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a. #Ex 9.16 18Chutichuan, Pathianin a duh apiang a khawngaih ṭhîn a, a duh apiang pawh a tiluhlul ṭhîn a ni.
Pathian thinurna leh a khawngaihna
19Nang chuan ka hnênah, “Engati nge a la dem cheu ni? A duh zâwng tuin nge dodâl ni?” i ti dâwn a ni âwm e.
20A ni; nimahsela, aw mihring, Pathian hnial veitu chu tu nge maw i nih le? Thil siam chuan a siamtu hnênah, “Engati nge hetianga mi siam?” a ti ang em ni? #Is 29.16; 45.9 21Bellei tlang khatin bêl pakhat hlu tak leh, bêl dang pakhat hlu lo taka siam tûrin bêlvawtu chuan bellei chungah thu a nei lo vem ni? 22,23Khawngaihna bêl, ropui tûra a lo buatsaih lâwkate chungah chuan, a khawngaihna ngahzia a entîr theih nan, thinurna bêl boral tlâkte chungah chuan Pathianin a thinur leh a thiltihtheihna lantîr duh mah sela, a dawh hrâm hrâm chuan eng nge pawi ang? 24(Chu khawngaihna bêlte chu Juda-te zîng ata chauh ni lovin, Jentail-te zîng ata pawh kohte kan ni.) 25Hosea lehkhabuah chuan:
“Ka mite ni ngai lo chu
‘Ka mite’ ka ti ang;
Tin, hmangaih ngai lohvi chu,
‘Hmangaihi’ ka ti ang. #Hos 2.23
26Tin, heti hi a lo ni ang a,
an hnênah,
‘Ka mite in ni lo ve,’
a tihna hmunah ngei chuan
Pathian nung fate vuahin
an awm ang,”
tia ziak ang bawk khân. #Hos 1.10
27Isaia pawhin Israel mite thu aupuiin, “Israel mite chu tuifinriata ṭiau zâtin tam mah sela, a hrem bâk chauh chu chhandamin an awm ang. #Is 10.22-23 28Lalpa chuan rang taka ti zo diamin lei chungah a hrem tûr thu a hlen dâwn si a,” a tih kha.
29Isaia vêkin,
“Mipuite Lalpa chuan
chi thlahtu min lo zuahsak
suh sela chu,
Sodom khua angin kan awm
tawh ang a,
Gomorra khua anga siamin
kan awm tawh bawk ang,”
tia a lo sawi lâwk ang bawk khân. #Is 1.9
Israel-te leh Chanchin Ṭha
30Eng nge kan sawi tâk ang le? Jentail, felna ûm lote chuan felna an lo phâk tawh a ni - rinna avânga felna chu. 31Israel, felna dan ûmte erawh chuan felna dân chu an phâk zo ta lo. 32Eng vâng nge ni? Rinnain an ûm lohva, thiltiha hmuh theih angin an ûm vâng a ni. Tlûkna lungah chuan an tlu si a;
33“Ngai teh, Zion-ah chuan
tlûkna lung leh
Dâlna lungpui ka dah a,
Tu pawh amah ring apiang chu
a mualpho lo vang,”
tih ziak ang khân. #Is 28.16
Currently Selected:
ROM 9: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
