ROM 10
10
1Unaute u, ka thinlung duh zâwng leh anni tâna Pathian hnêna ka ṭawngṭaina chhan ber hi, chhandama an lo awm theihna tûr a ni. 2Pathian lamah ṭhahnem an ngai tih ka hriatpui a ni, hre famkim ang erawh chuan an ngai lo. 3Pathian felna hre lovin, anmahni felna tihngheh tumin Pathian felnaah an intulût si lo.
4Krista chu a ring apiangte tân felna an hmuh theihna tûra Dân tibângtu a ni si a.
Chhandamna - mi zawng zawng tân
5Mosia chuan, “Dâna felna zâwm chu, chu felna avâng chuan a nung ang,” tiin a ziak a. #Lev 18.5 6Rinnaa felna erawh chuan heti hian a sawi: “In rilruin, ‘Tu nge vânah lâwn ang?’ emaw (chu chu chung lam ata Krista hruai chhuk tûr tihna a ni); #Deut 30.12-14 7‘Tu nge leilâwtah chhuk ang?’ emaw (chu chu mitthi zîng ata Krista hruai chhoh leh tûr tihna a ni) ti suh u,” tiin. 8A nih leh eng nge a sawi? “Thu chuan a hnaih a che, i kâ leh i thinlungah pawh a awm,” tiin a sawi a ni; chu chu rinna thu kan hril ṭhin hi a ni; 9“I kain Isua chu Lalpa a ni tih i ṭana, mitthi zîng ata Pathianin a kai tho tih i thinlunga i rin chuan, chhandamin i awm ang,” tih hi. 10Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn a ni. 11Pathian Lehkha Thuin, “Tu pawh amah ring apiang an mualpho lo vang,” a ti a ni. #Is 28.16 12Juda leh Grik mite chu engah mah an danglam chuang si lo va. Lalpa pakhat, an zaa chunga Lalpa a ni a, a lamtu apiangte chungah chuan ṭhatna a ngah si ṭhîn a. 13“Tu pawh Lalpa hming lam apiangte chu chhandamin an awm ang,” tih a ni a. #Joel 2.32
14A nih leh, an rin lohva chu engtin nge an lam ang? A thu an hriat lohva chu engtin nge an rin ang? Thuhriltu awm lovin engtin nge an hriat ang? 15Tirh an nih loh chuan engtin nge thu an hril ang? “Thil ṭha chanchin lâwmawm thlentute ke chu a va mawi êm!” tih ziak ang khân. #Is 52.7 16Nimahsela, Chanchin Ṭha chu an za chuan an âwih vek lo. Isaian, “Lalpa, kan thusawi tuin nge ring?” a ti si a. #Is 53.1 17Chutichuan, rinna chu hriatna avângin a lo awm ṭhîn a; tin, hriatna chu Krista thu avângin a lo awm.
18A nih leh, an bengin an hre lo vem ni? Hria e le,
“An thâwm chu ram tinah
a thang a,
An thu chu kâwlkil thlengin
a thang chhuak ta.” #Sam 19.4
19A nih leh, Israel miten an hre lo vem ni?
“Chia sawi tham lohte chu
hmangin ka thîktîr ang che u a;
Chi fing lote chu hmangin
Ka tithinur ang che u,”
tiin, Mosian a sawi hmasa ber. #Deut 32.21
20Tin, Isaian huai takin,
“Mi zawng lote hmuhin
ka awm a,
Mi lam lote hnênah
hriattîrin ka awm,”
a ti a. #Is 65.1
21Amaherawhchu, Israel mite thûah chuan,
“Mi tihmawh leh hnialhrâtte tân
Nilêngin ka bânte ka phar
ṭhin kha,”
a ti a. #Is 65.2
Currently Selected:
ROM 10: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
