HEBRAI 13
13
Pathian lâwm zawng rawngbâwlna
1Unau inhmangaihna hi awm zêl rawh se. 2Mikhualte chungah hmangaih chhuah theihnghilh suh u; chutiang tiin ṭhenkhatten hre lovin vântirhkohte an thleng si a. #Gen 18.1-8; 19.1-3 3Phuara awmte chu phuar ni ve angin hre reng ula; hrehawm tuarte chu taksaa awm ve bawk in nih avângin hre reng rawh u. 4Mi zawng zawng zîngah inneih hi chawimawiin awm sela, khum pawh tihbawlhhlawh lohvin awm rawh se; inngaite leh uirête chu Pathianin a ngaihtuah dâwn si a. 5In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, “Eng tikah mah ka thlahthlam tawp lo vang chia, kal pawh ka kalsan tawp lo vang che,” a ti si a. #Deut 31.6,8; Jos 1.5 6Chutichuan, huai takin,
“Lalpa chu mi ṭanpuitu a ni,
Ka hlau lo vang;
Mihringin eng nge
mi tih theih ang?”
kan ti ṭhîn a ni. #Sam 118.6
7In hotu, Pathian thu lo hrilhtute che u chu hre reng ula, an awm dâna thil chhuak chu ngaihtuahin an rin dân zir rawh u.
8Isua Krista chu niminah nên, vawiinah nên, kumkhua pawhin a pângngaiin a awm fo vang. 9Zirtîrna tinrêng leh zirtîrna mak tak len bovin awm suh u; thinlung hi khawngaihnaa tihngheha a awm chu a ṭha si a, ei tûrtea tihngheha awm lovin; chutiang kawng lungkhamte chuan chûngah chuan sâwtna an hmu chuang lo. 10Keini zawngin maichâm kan nei a, chumiah chuan biak bûk rawngbâwltute chuan an ei tûr a ni lo. 11Ran, a thisen puithiam lalberin Hmun Thianghlima sual tâna hlana a luhpui ṭhina ruangte chu, dai pâwnah an hâl ṭhîn si a. #Lev 16.27 12Chutichuan, Isua pawhin, ama thisen ngeia mite chu a tihthianghlim theihna tûrin, kulh kawngkhâr pâwn lamah chuan a lo tuar ta a. 13Chutichuan, amah an hmuhsitna chu phurin dai pâwnah a hnên lamah i kal chhuak ang u. 14Hetah hian khaw hmun nghet kan nei si lo va, khaw lo la awm tûr chu kan zawng zâwk a ni. 15Tichuan, ama zârah chuan faka inthawina hi Pathian hnênah i hlân fo vang u, chu chu a hming ṭanna hmuite rah chu a ni. 16Nimahsela, thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a.
17In hotute thuawih ula, an thû thûin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a.
18Min ṭawngṭaisak rawh u; engkimah fel taka awm tumin, chhia leh ṭha hriatna thiang tak kan nei tih dik takin kan inhre si a. 19Tin, rang deuhva in hnêna tirh lehin ka awm theih nân, chu chu ti tûrin ka ngên lehzual sauh che u a ni.
Malsâwmna leh chibai bûkna
20Tin, remna Pathian, berâm Vêngtu ropui tak, kan Lalpa Isua chatuana thuthlunna thisen zâra mitthi zîng ata hruai chhuak lehtu khân, 21a mit hmuha a lawmzâwng ang apiang Isua Krista zârah keimahniah thawkin, a duh zâwng ti tûrin thil ṭha tinrêng kawngah tifamkim che u rawh se; Isua Krista hnênah chuan ropuina chatuanin awm rawh se. Amen.
22Nimahsela, unaute u, ka ngên a che u, fuihna thu hi ngaithei hrâm hrâm rawh u; in hnênah thu tlêm tê ka ziak si a. 23Kan unaupa Timothea kha an chhuahtîr ta tih lo hre ve rawh u; a lo kal hma deuh chuan amah nên kan rawn hmu ang che u.
24In hotu zawng zawngte leh mi thianghlim zawng zawngte kha chibai mi bûksak ang che u. Itali rama mite hian chibai an bûk a che u.
25In zaa hnênah khawngaihna awm rawh se. Amen.
Currently Selected:
HEBRAI 13: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
