HEBRAI 12

Lalpa thununna

1-2Chutichuan, chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlânsiakna tûr awmah hian chhel takin i tlân zêl ang u. Ani chuan a hmaa hlimna awm avâng chuan, mualphona chu ngainêpin kraws chu a tuar a, Pathian lalṭhutphah ding lamah khian a han ṭhu ta a. 3In thlarau lamah in inthlahdaha, in lo hah loh nân, anmahni chunga ṭha lo tûrin mi sualte chutianga hnialkalhna tuartu chu ngaihtuah teh u khai. 4Sual dovin thisen chhuak khawpin in la ṭang lo va, 5fuihna thu, fate zilh anga zilhna che u kha, in lo theihnghilh ta e.

“Ka fa, Lalpa thununna chu

ngainêp suh la,

A zilhhauva i awmin

inthlahdah hek suh; #Job 5.17; Thuf 3.11-12

6Lalpa chuan a hmangaih chu

a thunun ṭhîn a,

Fa a lawm apiang chu

a vaw ṭhîn asin ni,”

tih hi.

7In tuar hi nangmahni thunun nân a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le? 8Fa zawng zawng hlawh ṭhin thununna chu hlawh lova in awm erawh chuan, fa tak ni lovin, sâwn in ni a ni ang asin.

9Chu lo pawh chu min thunun tûrin kan tisa pate kan neih kha, chûngte chu kan zah si a; chumi aia nasa zâwkin, kan nunna tûrin thlaraute Pa thû thûin kan awm dâwn lâwm ni? 10Anni chuan ni rei lo tê, ṭha an tih ang zêlin min thunun ngei tak a, ani erawh chuan a thianghlimna chu kan chan ve theih nân, kan ṭhatna tûrin min thunun zâwk ṭhîn a ni.

11Tin, thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn; tuar hnuah erawh chuan, chumia sawizawia awmte tân chuan rah thlamuanawm tak, felna chu a chhuahsak ṭhîn.

12Chutichuan, kut uai thlate chu char rawh u, khûp zâwite nên; #Is 35.3 13tin, kebai chu tihpelhsawlh lohva, tihdamin a awm zâwk nân, in kete tân kawng ngîlte siam rawh u. #Thuf 4.26

Pathian khawngaihna hnar loh tûr

14Mi zawng zawng nêna inremna leh thianghlimna ûm rawh u, chumi thianghlimna lovin tu mân Lalpa an hmu lo vang: 15Fîmkhur rawh u; chuti lo chuan, Pathian khawngaihna ata in bo dah ang e, khâkna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a, #Deut 29.18 16inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tîr nihna chu chaw vawi khat eiah a hralh a. #Gen 25.29-34 17Chumi hnuah chuan malsâwmna chu rochun a duh pawhin, mittui tla chungin ṭhahnemngai takin zawng mah sela, rilru inlamlêtna remchâng a hmuh loh avângin paihin a awm ta tih in hre si a. #Gen 27.30-40

18,19Nangni zawng tlâng khawih theih, meia kâng te, chhûm dum te, thim te, thlipui te, tawtawrâwt rîkna te, thusawi thâwm awmna te kha thleng in ni si lo va (chu thâwm hretute chuan thu dang rêng an hnêna sawi tawh lo tûrin an ngên a, #Ex 19.16-22; 20.18-21; Deut 4.11-12; 5.22-27 20“Sa lam pawhin tlâng chu khawih sela, lunga den hlumin a awm tûr a ni,” tih thupêk kha an tuar thei ta si lo va. #Ex 19.12-13 21An thil hmuh pawh chu a hlauhawm êm êm a; chutichuan, Mosian, “Ka hlauvin ka khûr nasa êm êm a,” a tih hial kha). #Deut 9.19 22Zion tlâng te, Pathian nung khua, vân Jerusalem te, chhiar sên lohho vântirhkoh inkhâwmpui te, 23fa tîr vâna hming chuang kohhranho hnên te, Pathian, mi zawng zawng ngaihtuahtu hnên te, mi fel tihṭhat famkimho thlarau hnên te, 24Isua, thuthlung thar palai hnên te, thisen theh, Abela thisen aia thu ṭha zâwk sawitu hnên te thleng in ni zâwk. #Gen 4.10

25Thusawitu chu in lo duh lo dah ang e, fîmkhur rawh u. Leia anmahni zilh lâwktu kha an duh loh maha hremna an pumpelh si loh chuan, keini, vân aṭanga min zilh lâwktu hawisantute hian kan pumpelh lo lehzual ang. #Ex 20.22 26Chumi lai chuan a aw khân lei hi a tinghîng a; nimahsela, tûnah hian, “Vawi khat chu lei chang ni lovin, vân pawh ka la tinghîng leh ang,” tiin a tiam ta zâwk a.#Hag 2.6 27Tin, “Vawi khat chu ka la tinghîng leh ang,” tih hian, thil nghîng lote chu a awm reng theihna tûrin, thil lo nghîngte chu thilsiamte ang maiin sawn bovin a awm dâwn tih a hriattîr a ni. 28Chutichuan, ram tihnghîn rual loh kan chan avâng hian khawngaihna i nei ang u, chumi zârah chuan zah leh ṭih dêk chungin Pathian lawm zâwng rawng kan bâwl thei dâwn zuk nia; 29kan Pathian hi mi kan ral hmang mei a ni si a. #Deut 4.24

Currently Selected:

HEBRAI 12: MIZOVBSI

Highlight

Copy