1 PETERA 2
2
Lung nung leh hnam thianghlim chu
1Chutichuan, sualna zawng zawng te, ngamthlêmna zawng zawng te, vervêkna te, îtsîkna te, sawichhiatna zawng zawng te bânsan ula, 2nausên piang hlimte angin thlarau lam hnutê, eng mah pawlh loh chu châk rawh u, chumiah chuan chhandamna tling khawpa in ṭhan len theih nân; 3Lalpa chu mi khawngaih thei tak a ni tih in hriat tawh phawt chuan. #Sam 34.8 4Amah chu lung nung, mihringte duh loh ngei, Pathian ngaihah erawh chuan thlan leh hlu tak a ni, ama hnênah chuan lo kalin, 5nangni pawh lung nungte angin thlarau lam ina rem chhohvin in awm, Isua Krista zâra Pathian lâwm zâwng thlarau lam inthawina hlân tûrin puithiam thianghlimho in lo nih nân. 6Chuvângin, Pathian Lehkha Thûah chuan,
“Ngai teh u, Zion-ah chuan a
kila lung pawimawh ber,
thlan, hlu tak ka rem a ni;
Amah ringtu chu
a mualpho lo vang,”
tih a chuang a ni. #Is 28.16
7Chutichuan, nangni a âwihte tân chuan hlu tak a ni, a âwih lote tân erawh chuan,
“In satuten lung an duh loh kha,
Chu ngei chu a kila lung
ṭangkai ber a lo ni ta,#Sam 118.22
8Tlûkna lung leh dâlna lungpui,”
nên. An âwih lo va, thûah chuan an tlu si ṭhîn a; chutianga ti tûr chuan ruat an ni rêng bawk a. #Is 8.14-15 9Nimahsela, thim ata chhuaka, a êng mak taka lût tûra kotu che u ṭhatna chu in entîr theih nân, nangni zawng chi thlan, lal puithiamho, hnam thianghlim, Pathian mite ngei in ni si a; #Ex 19.5-6; Deut 4.20; 7.6; 14.2; Is 9.2; 43.20,21; Tit 2.14 10hmânlai khân mi rêng in ni lo va, tûnah erawh chuan Pathian mi in ni ta a; hmânlai khân zahngaihna in hmu lo va, tûnah erawh chuan zahngaihna in hmu ta. #Hos 2.23
Pathian bâwihte
11Duh takte u, mikhual leh khualzin in nih avângin, thlarau do ṭhîntu tisa châknate bânsan tûrin ka ngên a che u; 12Jentail-te zînga in chêtzia chu mawi tak ni rawh se; chutichuan, thil tisualtute anga an sawi chhiat che u kawngah chuan, in thil tihṭhat an hmuhte avângin fanin an awm hunah chuan Pathian an chawimawi thei ang.
13Lalpa avâng chuan mihring ruat apiangte hnênah intulût rawh u, chungnunga awm lalber hnênah emaw, 14thil tisualtute chunga phuba la tûr leh, thil ṭha titute fak tûra a tirh chhâwn ram awptu hnênah pawh. 15Hei hi Pathian duh zâwng a ni si, mi âte thusawi fing lo chu thil ṭha tia in tih dân hi; 16zalên in ni a; nimahsela, in zalênna chu sual khuh nân hmang lovin, Pathian bâwiha awm nân hmang zâwk rawh u. 17Mi zawng zawng chawimawi rawh u. Unaute chu hmangaih rawh u. Pathian ṭih dêk rawh u. Lalber chu chawimawi rawh u.
Krista tuarna entawn tûr
18Chhiahhlawhte u, ṭih dêk hlîrin in hotute thû thûin awm rawh u; mi ṭha leh mi nunnêmte lakah chauh ni lovin, mi nunrâwngte lakah pawh. 19Miin Pathian hriatna avângin tuar loh tûr tuarin, lungngaihna a tuar hrâm hrâm chuan, chu chu Pathian lâwm zâwng a ni si. 20In suala, kut thlâk in tuarin chhel takin tuar mah ula, fak eng nge in hlawh ṭhin? Amaherawhchu, thil in tihṭhata, in tuarin chhel taka in tuar chuan, chu chu Pathian lâwm zâwng a ni. 21Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha. 22Ani chuan thil rêng a tisual lo va, a kaah ngamthlêmna a awm hek lo; #Is 53.9 23mi hauva a awm laiin a hau ve thung lo va, a tuar laiin a vau lo va; fel taka ngaihtuah ṭhîntua hnênah chuan a inpe zâwk a. #Is 53.7 24Sual lamahte thi tawhin felna lamah kan nun theih nân, amah ngeiin thingah khân a taksain kan sualte a phur a; amah vuakna vualte chuan tihdamin in awm ta a. #Is 53.5 25Berâm bo anga in bo kha; tûnah erawh chuan in thlarau Vêngtu leh Hotu hnênah chuan in kîr leh tâk hi. #Is 53.6
Currently Selected:
1 PETERA 2: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
