1 PETERA 1
1
Chibai bûkna
1-2Petera, Isua Krista tirhkoh chuan Ponto ram te, Galatia ram te, Kappadokia ram te, Asia ram te, Bithunia ram tea Darhho awm, âwih tûr leh Isua Krista thisen theh dawng tûra Thlarau tihhrana, Pa Pathian hriat lâwk anga thlante hnênah chuan:
In chungah khawngaihna leh remna tihpunin awm rawh se.
Beiseina nung
3Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin, mitthi zîng ata Isua Krista thawhlehna avângin beiseina nung hmu tûrin min hring leh a, 4rochan chhe thei lo, bawlhhlawh kai lo, chuai thei lo, vâna in tâna khêk chu, hmuhna tûrin; 5chhandamna, hun hnuhnûnga lang tûra peih sa chu hmu tûrin, rinna avângin Pathian thiltihtheihnaa vên chu in ni. 6Chumiah chuan nasa takin in hlim a ni, tûnah (a ṭûl chuan) thlêmna tinrêng avângin lungngai rih mah ula; 7in rinna fiahna, rangkachak meia fiah hnu pawha boral ṭhîn aia hlu zâwk chu, Isua Krista inlâr hunah chuan fakna leh chawimawina leh ropuina tûr a lo nih theih nân. 8Amah chu hmu ngai lo pawhin in hmangaih a, amah chu tûnah hmu lo mah ula in ring a, lâwm sawi hleih theih loh leh ropui takin in hlim êm êm ṭhîn; 9in rin chhan - in thlarau chhandamna chu - hmuin.
10,11In chunga khawngaihna lo thleng tûr thu hril lâwktu zâwlneiten, Krista Thlarau anmahnia awm chuan Krista tuarna tûrte leh chumi hnua ropuina awm tûrte chu a hriat lâwktîr laite khân, eng hun nge ni, eng ang hun nge ni a hriattîr ṭhin tih chhui chhuah tumin, chu chhandamna chanchin chu an zawng a, ngun takin an chhui ṭhîn. 12Chûng thu chuan mahni rawng inbâwl lovin, nangmahni rawng an bâwl zâwk tih an hnênah hriattîr a ni tawh, chûng thu chu vân aṭanga tirh chhuah Thlarau Thianghlim ṭanpuiin, Chanchin Ṭha hrilhtu che u khân tûnah an hrilh che u a; chûng thil chu vântirhkohten bih an duh ṭhîn a ni.
Nun thianghlim nei tûra sâwmna
13Chuvângin, in rilru puan vengin ngaihven ula, Isua Krista inlâr hunah chuan khawngaihna a rawn kensak tûr che u chu, beidawng lovin beisei zêl rawh u; 14fa tihawihte angin, in hriat loh laia in hmânlai châknate anga awm lovin; 15a kotu che u a thianghlim angin, nangni pawh in chêtzia zawng zawngah lo thianghlim zâwk rawh u; 16“Nangni in thianghlim tûr a ni, kei ka thianghlim si a,” tih ziak a nih kha. #Lev 11.44-45; 19.2
17Tin, thlei bîk nei lova mi tin hnathawh ang ṭheuhva ngaihtuah ṭhîntu chu Pa anga in lam chuan, heta in châm chhûng zawng ṭih dêkin awm rawh u. 18,19In thlahtute pêk chhâwn, in awm dân eng khaw ni lawi lo lak ata chu thil chhe thei, tangkarua leh rangkachaka tlan in ni lo va, berâmno hmêlhem lo leh bawlhhlawh kai lo thisen anga Krista thisen hlû chuan tlan in ni zâwk tih in hre si a; 20ani chu leilung pian hmain ruat lâwkin a awm ngei mai; nimahsela, hun hnuhnûngahte hian nangmahni avângin inlârin a awm a; 21amah avângin mitthi zîng ata kaithotu leh ropuina petu Pathian ringtute in ni a, in rinna leh in beiseina chu Pathianah a awm theih nân.
22Unaute hmangaih tak tak tûrin, thutak zâwma in thlarau in tihthianghlim tawh avângin, thinlunga ṭhahnemngai takin inhmangaih tawn rawh u; 23chi chhe thei lakah ni lovin, Pathian thu nung reng leh awm rengah chuan, chi chhe thei lo laka piang thar in ni zâwk si a.
24“Mi zawng zawng hlobet ang
an ni a,
An ropuina zawng zawng pawh
hlobet pâr ang a ni.
Hlobet chu a vuai a,
A pâr chu a tla a; #Is 40.6-8
25Lalpa thu erawh chu
Chatuanin a awm reng a ni,”
tih a ni si a. Chu chu a ni Chanchin Ṭha thu an hrilh che u kha.
Currently Selected:
1 PETERA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
