Luù 21

E kìɛ̀ŋ jɔ̀ùŋèèdààa

(Mài 12.41-44)

1Wo Jisɛ̀ naŋ wa yɛ̀mɛ̀ anyuùŋ bàne nyàŋ àŋ yaà gbìàŋ sùà manɛ̀ŋ kìɛŋ nyiŋ màŋ ko pòum sìà nɛ̀ŋ kìɛɛ̀ŋ ko Saaŋ Zòòlò Dayài. 2Wò naŋ ɓɛìŋ yɛ̀mɛ̀ wo jɔ̀ùnèèdàà bà naŋ hnè woo gbìàŋ e nɛɛnɛŋ wɛiŋ wɛ̀ìŋ è tìyèe. 3Wo Jisɛ̀ naŋ wòo wààŋ, “Tɔ̀ miŋ woòiŋ e tɔɔɓaaà, wo jɔ̀ùnèèdàà pɔ̀ɔ wɛɛ̀ naŋ gbìɛ̀ŋ e nɛɛnɛŋ ko pòum sìà nɛ̀ŋ kìɛɛ̀ŋ e nìàŋ anyuùŋ gbànaŋ nyàŋ gbiŋ. 4Anyuùŋ gbànaŋ nyàŋ gbiŋ naŋ gbìɛ̀ŋ e nɛ̀ŋ kìɛŋ e yìwìà e bàne nyiŋ nɛ̀ sùà, kɛɛ wuŋ wò nao gbìɛ̀ŋ e yèɛ gbiŋ yàaùŋ sìwè lɛ, e yèɛ gbiŋ wò kuwa wèè wo nyɛ̀nɛ̀ŋ wɔŋ nyiiŋ gèeuŋ nɔɔ̀ŋ lɛ.”

Wo Jisɛ̀ naŋ wòò e ɗeweɛ̀ ko Saaŋ Zòòlò Dayàa do nàŋ pɔɔpɔ̀ɔ̀ lɛ

(Maafiù 24.1, 2; Mài 13.1, 2)

5Anyùùŋ màŋjɛ̀wɛ̀ Jisɛ̀ nyaŋ bà yaà wa wòò è kèè maŋ dùò sìàŋ maŋ àŋ naŋ nyìlìè ke Saaŋ Zòòlò Dayàa, e kpùlìà manɛ̀ŋ kpàa siaŋ màŋ anyùùŋ naŋ wa kiɛ̀ŋ yèè àŋ naŋ kpàà ke saaàŋ maŋ. Kɛɛ wo Jisɛ̀ naŋ woò wààŋ, 6“Nàŋ yɛ̀mɛ̀ maŋ dùò mɛɛ̀ŋ gbiŋ? E teenga do nàŋ hnè ke dùò guùŋ pɛɛ ke naàŋ jèè hàwè kè dàwi nyiŋ nɛɛ̀ŋ diɛŋ, maŋ gbiŋ do nàŋ sɔ̀ɔ̀.”

Maŋ keì nyìnga yèè e ngàìŋɓu

(Maafiù 24.3-14; Mài 13.3-13)

7Aŋ bà nyiŋ naŋ woò nyààŋ, “Wòò wi, Kààmɔɔŋ, e teengaà tɛɛ̀ do nàŋ kaaìŋ lɛ, yèè kiìŋ nàŋ do nàŋ nɔ̀ŋ e tɔ̀ɔ̀màŋseìɛ kɛ̀ e teengaà è haì wèè maŋ keì bi maŋ kaaìŋ?”

8Wo Jisɛ̀ naŋ nyiŋ wòo wààŋ, “Yɛ̀mɛìŋ nyɛ̀iŋ bi diɛŋ, yèè ɓɔ̀ nìŋ daŋgè wo nyùùŋ bà gbiŋ doiŋ zuwò. Anyuùŋ zimgbe do nàŋ hnè e deè mɛ̀ diɛŋ aŋ woò nyààŋ, ‘Miàŋ nàŋ yaà wo yèɔ wo Dayà naŋ tàeɗùù wɔ wèè wo joeyè e ɗuunyaàŋ, wo Kulaìɔ,’ e kìlà ‘E teengaà lɛɛ̀!’ Kɛɛ ɓɔ̀ nìŋ dè nyiŋ màŋjɛ̀wɛ. 9E tèèngà guùŋ bi, sèè nìŋ komo ebò maŋ gììmè ɗuà sòmaŋ yèè maŋ nyààntààŋ, ɓɔ̀ nìŋ dangè tii doiŋ sɛ̀ɛ̀ jii. Jàaiŋ jii kɛ̀ wo Dayà naŋ woò wààŋ maŋ keì mààŋ miiŋ do nàŋ kaaìŋ. Kɛɛ sèè màŋ kaaìŋ, tii gò tɔɔ̀ kɛ̀ e teengaà gbɛ̀ɛ̀ wèè e ɗuunyaàŋ hàì ko dìa.”

10Kpeiŋ wo Jisɛ̀ naŋ nyiŋ woò wààŋ, “Maŋ gbòò e yìwìà maŋ fuɔŋ ɗi zimgbe do nàŋ sùmìè miiŋ bi e fèemàŋ. Maŋ kànà maŋ fuɔŋ ɗi do nàŋ sùmìè miiŋ bi e fèemàŋ. E dììɛ do nàŋ kìlè, e kìlà e jìè yaà e keì nyìnga do nàŋ sɔ̀ɔ̀ maŋ tàta zimgbe sùà. 11E dììɛ do nàŋ kìlè, e kìlà e jìè yaà e keì nyìnga do nàŋ sɔ̀ɔ̀ maŋ tàta zimgbe. Anyùùŋ do nàŋ yɛ̀mɛ̀ maŋ keì maŋ nyiŋ nyìnìàŋ jùù. Maŋ tɔ̀ɔ̀màŋsèì maŋ kèì jùù zimgbe do nàŋ kààìŋ ke nyiliɛ̀. 12Wèè paŋ maŋ keì mɛɛ̀ŋ gbiŋ maŋ kaaìŋ, anyùùŋ doiŋ nàŋ kùwò aiŋ kòà ke sàwà wèè aiŋ gbaì. Àŋ doiŋ nàŋ kɔ̀ɔ̀ maŋ sààŋ zòòlò aŋ Juùù nyaŋ dìì e kìlà àŋ doiŋ nàŋ gbìɛ̀ŋ ko sààŋ nyìwì. Nìŋ do nàŋ sìè aŋ kana yaà aŋ ɓɛ̀mànɗì fuɔŋ fɛɛ̀feìŋ wèè esàɓù e deè mɛ̀. 13Tɛɛ̀ do nàŋ nɔ̀ŋ e teengaiŋ nɛ̀ wèè naŋ nyiŋ kìɛ̀ŋ ke mìè seì e nyaàiŋ dè Ebò Siaàŋ. 14Ɓɔ̀ nìŋ sɛɛ̀ jii wèè e nɛ̀ɛŋ nìŋ do nàŋ woò lɛ paŋgàà è kaaìŋ, 15esaɓù kɛ̀ mìŋ doiŋ nàŋ kìɛ̀ŋ maŋ mìè gbòa miiŋ yaà e jiikɛ̀ɛ lii, wèè kɛ̀ aŋ jooiŋ nyàŋ bà gbiŋ naàìŋ gììyè màŋhɛɛ ɔ̀ɔ̀ aŋ naàŋ woò nyààŋ niŋ naŋ wòò è keì nàànààŋ. 16Anyuùŋ kòmaiŋ nyàŋ, aŋ wùìyaiŋ nyàŋ, e hààwè anyuùŋ mɔ̀ɔ̀nɔiŋ nyàŋ doiŋ nàŋ maàŋ. E kìlà àŋ do nàŋ jìwè nyɛ̀iŋ nààŋ bà nyiŋ. 17Aŋ nyùùŋ nyaŋ gbiŋ doiŋ nàŋ wùɔ̀ŋ esàɓù e deè mɛ̀. 18Kɛɛ ke ɗì dùùm kpèè guùŋ pɛɛ maŋ ɗìiŋ màŋ ke naàŋ go. 19Sèè nìŋ jeeà e hààwe sùà ko nɛ̀ɛ̀ŋ miìŋ, niŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà.

Wo Jisɛ̀ naŋ wòò e ɗeweɛ̀ ko Jùlusɛ̀làm do nàŋ pɔɔpɔ̀ɔ̀ lɛ

(Maafiù 24.15-21; Mài 13.14-19)

20“Sèè nìŋ yɛmɛ̀ wa nàwèè aŋ kààlòòɗùà àŋ kilià ko Jùlusɛ̀làm, nyìmaìŋ kɛ̀ è jòò e teenga kpuu wèè ko nɔ̀ŋ pɔ̀ɔ̀pɔɔ. 21Kpeiŋ kɛ̀ e teenga lii sùà, sɔɔ̀ anyùùŋ nyaŋ ko Jùdià aŋ dùàŋ aŋ kà koɓɛ̀ maŋ toò maŋ. Anyùùŋ nyaŋ yaà ko jawa gbeeì nyaŋ sɔɔ̀ aŋo yèwà fiò, e kìlà anyùùŋ nyaŋ gbiŋ yaà maŋ tiwi jawa màŋ sùà nyaŋ, ɓɔ̀ àŋ ka ɓɛìŋ kò jawa gbeeì. 22Esaɓù kɛ̀ maŋ ɗɔɔ miiŋ do wa nàwèè nàŋ nɔ̀ŋ maŋ ‘Ɗɔ̀ɔ̀ keì nyìnga gbee,’ wèè e nyɛ̀nɛ̀ŋ e nɛ̀ɛŋ yaà sìnga niŋ maŋ fɛ̀ì Dayà maŋ sùà lɛ e hɛɛnɛ̀ŋ. 23Maŋ ɗɔɔ miiŋ do nàŋ nɔ̀ŋ maŋ ɗɔ̀ɔ̀ e keì nyìnga wèè aŋ jàwèsùà nyaŋ yaà aŋ jɔùŋ kɛ̀ɛ̀nɛ̀ŋ aŋ jɔ̀à yàaa nyàŋ. Anyùùŋ nyaŋ gbiŋ e dììɛ diɛŋ do nàŋ kùwò e keì nyìnga gbee e kìlà wo Dayà do nyiŋ nàŋ mɔɔnɛ̀ŋ. 24Àŋ do nàŋ jìwìè aŋ bà nyiŋ maŋ kòyà ɗùà. Àŋ do nàŋ kɔ̀ɔ̀ aŋ bà nyiŋ e pèesìnàŋ dìì maŋ fuɔŋ joo sùà. Anyùùŋ nyaŋ fè àŋ Juùù nyaŋ do nàŋ ɓèmè ko Jùlusɛ̀làm, e kìlà aŋ doo nàŋ jeè e jèèsùà e tèèngà anyùùŋ maŋ fuɔŋ joo nyàŋ e jùà.

E teengaà miàim wo Jɔ̀àfèlàà Nyuùŋ Kpùnɔɔ̀ŋ dò naŋ hnè lɛ

(Maafiù 24.29-31; Mài 13.24-27)

25“E tɔ̀ɔ̀màŋsèì maŋ kèè mèè do nàŋ kààìŋ e gɔɛɛ̀, wɔŋ wààa, yèè maŋ ɗu màŋ. E jùù do nàŋ nyɛ̀nɛ̀ŋ anyuùŋ kpùuŋ nyàŋ gbiŋ e dììɛ diɛŋ sèè àŋ yɛmɛ̀ wɔŋ juwoɔ̀ wɔ̀ŋ nɔ̀ŋ ɓuluno ɓuluno e kìlà e bɔiŋ nɛ̀ jowo, yèè aŋ naàŋ nyìmè kɛ̀ kiìŋ àŋ do nàŋ nyɛ̀nɛ̀ŋ. 26E jùù do nàŋ nyɛ̀nɛ̀ŋ anyùùŋ aŋ fengèè sèè àŋ yɛmɛ̀ maŋ keì maŋ yaà kaaiŋ màŋ e ɗuunyaàŋ gbiŋ diɛŋ. Manɛ̀ŋ gààŋ maŋ ke nyiliɛ̀ do nàŋ mɛɛmɛ̀ɛ̀ŋ e yìwìà ko jɛ̀i miŋ niìŋ. 27Kpeiŋ anyùùŋ do nàŋ yɛ̀mɛ̀ miàim, wo Jɔ̀àfèlàà Nyuùŋ kpùnɔɔ̀ŋ mìŋ yaà hìnìè ke nyili fua sùà ko fùùiŋ e yìwìà e gaàŋ gbee yèè e gbolòùŋ. 28Sèè maŋ keì mɛɛ̀ŋ màŋ tɔɔtù kàaiŋ, sìeìŋ ɗeiŋ niŋ gè maŋ ɗì dìì, esaɓù kɛ̀ e tèèngà e jòèyeiŋ nɛ̀ è gbɛ̀ɛ̀.”

E nɛ̀ŋ gbèeɛ̀ e nyaàiŋ dè ke feì kùlɛ̀ɛ

(Maafiù 24.32-35; Mài 13.28-31)

29Wo Jisɛ̀ naŋ nyiŋ gììyè ke kàɓanè yɛɛ̀ wààŋ, “Yɛ̀mɛìŋ ke feè kùlɛ̀ɛ yèè maŋ kuù gbànaŋ màŋ gbiŋ. 30Nààŋ nɔŋ màŋ tɔɔtù maŋ tùwa jɛi ɓème, nyìmaìŋ kɛ̀ e sɛ̀ɛ̀ɛ kòò è yaà dòmaŋ. 31E jììkɛ̀ɛ̀ guùŋ bi sùà, sèè nìŋ yɛmɛ̀ nɔŋ maŋ keì mɛɛ̀ŋ gbiŋ màŋ nɔ̀ŋ kàaiŋ sùà, nyìmaìŋ kɛ̀ e Kànà Dayàa è gbɛ̀ɛ̀.

32“Mìŋ yààìŋ wòo sùà e tɔɔɓaaà, anyuùŋ kpùuŋ nyàŋ bà nyiŋ naàŋ fɔ̀ e jèèsùà maŋ keì mɛɛ̀ŋ gbiŋ maŋ kaaìŋ. 33Ko àìjɛnɛ̀ŋ yèè e ɗuunyaàŋ do nàŋ mààŋ, kɛɛ maŋ mìè nyaàim màŋ naàŋ wa nàwèè mààŋ.”

Yɛ̀mɛìŋ nyɛ̀iŋ bi diɛŋ

34Wo Jisɛ̀ naŋ ɓɛìŋ woò wààŋ, “Yɛ̀mɛìŋ nyɛ̀iŋ bi diɛŋ! Ɓɔ̀ nìŋ dangè è wànàŋ gbana yaà màŋ muàŋ tìa e kpùlìà ke jìì sɛ̀ɛ̀ wɔ̀ŋ nyiiŋ gèe wɛɛ̀ŋ wɔŋ doiŋ dìà màŋ jiio sùà, esaɓù wèè ke ɗɔɔ yii goiŋ wa nàwèè nàŋ foonò 35mààŋ ke gbaù naŋ kùwò wo yilì. Esaɓù kɛ̀ ke ɗɔɔ bi do nàŋ gbùwò anyùùŋ nyaŋ diɛŋ e dììɛ gbiŋ diɛŋ e fòòno nyiŋ sùà. 36Yɛ̀mɛìŋ nyɛ̀iŋ bi diɛŋ yèè niŋ dawè wo Dayà e teenga gbiŋ wo kiɛ̀iŋ e gààŋ wèè maŋ keì mɛɛ̀ŋ do yaà nàŋ kaaìŋ maŋ gbaàiŋ bòìbòì e kìlà miàim wo Jɔ̀àfèlàà Nyuùŋ Kpùnɔɔ̀ŋ nɔ̀ŋ ke jii fàa sùà weèiŋ.”

37Wo Jisɛ̀ naŋ wa tòòmò maŋ ɗɔɔ miiŋ ko Saaŋ Zòòlò Dayài wèè anyùùŋ nyaŋ kàa, kɛɛ wɔŋ dùùm gbiŋ wò kɔ̀à wa wo jàwà wɔŋ toòɔ àŋ nyaaŋ wɔŋ tòò maŋ Ɔlè Kùùɔ dìmɛ̀. 38Maŋ nyiìŋ tɛ̀tɛ̀ ke ɗɔɔ gbiŋ anyùùŋ nyaŋ gbiŋ hewa kà ko Saaŋ Zòòlò Dayài wèè aŋ kùmìàŋ e yèɛ wò yaà kaa lɛ̀.

Currently Selected:

Luù 21: WFESD

Highlight

Copy