Luù 20

Wɔŋ mààŋdàwè e nyaàiŋ dè e gààŋ Jisɛ̀ɛ

(Maafiù 21.23-27; Mài 11.27-33)

1Ke ɗɔ̀ɔ̀ guùŋ wo Jisɛ̀ yaà wa kaa ko Saaŋ Zòòlò Dayài yèè wò yaà wòò Ebò Siaàŋ koɓɛ̀ anyùùŋ nyaŋ. Aŋ kànà sìèfèìŋ zòòlo nyàŋ, aŋ kààmɔ̀ɔ̀ŋ maŋ Sàwà Dayà nyaŋ, yaà aŋ màmànkùmɛ̀ŋ fuɔɔ̀ŋ naŋ hnè 2auŋ dawè nyààŋ, “Gààŋ ɓòò sùà mùŋ yaà nyìnìè maŋ keì mààŋ mɛɛ̀ŋ? Yèè ɓòò naum kìɛ̀ŋ e gààŋ bì?”

3Wo Jisɛ̀ naŋ nyiŋ fasàì wààŋ, “Mìŋ doiŋ nàŋ dàwè wɔŋ mààŋdàwè guùŋ. Wòo nìim, 4kòò wo Jɔ̀ɔŋ gè wa e gààaŋ wò guo anyùùŋ nyaŋ? Wo Dayà sìwè e yìwìà ko àìjɛnɛ̀ŋ ɔ̀ɔ̀ anyuùŋ kpùuŋ bà sìwè?”

5Àŋ naŋ tɔ̀ɔ̀tù kpàànè kpaane nyiŋ wouwòù e fèemàŋ nyààŋ, “Kiìŋ è naiŋ ɓɛ̀nɛ̀ŋ wòo? Sèè e woò wìàà, ‘Wo Dayà sìwè e yìwìà ko àìjɛnɛ̀ŋ,’ wo do wi nàŋ dawè, ‘Kɛ̀ wèè kiìŋ niŋ gò wa hààwè wò Jɔ̀ɔŋ?’ 6Kɛɛ sèè zà eiŋ ɓɛìŋ woò wìàà, ‘Wo nyuùŋkpùuŋ sìwè,’ anyùùŋ nyɛɛ̀ŋ gbiŋ do wi nàŋ hɔ̀wɔ̀, esaɓù kɛ̀ anyùùŋ nyaŋ gbiŋ wa haawè kɛ̀ wo Jɔ̀ɔŋ yaà wa wo wɛ̀ijì.” 7Weètii àŋ naŋ fìlè wɔŋ mààŋdàwèɔ àŋ naŋ wòò wo Jisɛ̀ nyààŋ, “E nyimààŋ kɛ̀ kòò è yewe.”

8Wo Jisɛ̀ naŋ nyiŋ woò wààŋ, “Kɛ̀ miàŋ pɛɛ, miŋ naìŋ tɔɔ̀ kɛ̀ kòò mìŋ gè è gààaŋ mìŋ nyɛnɛŋ maŋ keì mɛɛ̀ŋ.”

Ke kàɓànè anyuùŋ yɛ̀mɛ̀ wɔŋ ɓù manɛ̀ŋ wuiyeɔ̀ diɛŋ

(Maafiù 21.33-46; Mài 12.1-12)

9Kpeiŋ wo Jisɛ̀ naŋ gììyè anyùùŋ nyaŋ ke kàɓanè yɛɛ̀ wààŋ, “Wo felaa bà naŋ wa tòmò wɔŋ ɓù gbɛɛwɛ̀jɛ̀wɛ̀uŋ nɔɔ̀ŋ yèè wò naŋ kìɛ̀ŋ wɔŋ ɓù bi anyuùŋ tòmò ɓù bà wèè àŋ tomàŋ aŋ pààwà ejotì yèè wò naŋ kɔ̀ wɔŋ fuɔŋ bà wèè e teenga mùnlaŋ. 10E tèèngà maŋ gbɛ̀mɛ̀ɛ̀ŋ komaŋ màŋ kpàa naŋ haì yèè wò naŋ tùɔ̀ŋ wo ɗouŋ nɔɔ̀ŋ koɓɛ̀ anyùùŋ nyaŋ ko ɓù manɛ̀ŋ wuiyeì wèè aŋ paawà e jotìuŋ nɛ̀. Kɛɛ anyùùŋ nyaŋ ko ɓùi naŋ kùwò wo ɗoɔ̀, auŋ ɓùlà, wo kɛ̀lɛ̀ɛ̀ le siwè foo. 11Wò kɛ̀ɛ̀nɛ̀ŋ ɓùɔ naŋ ɓɛìŋ tùɔ̀ŋ wo ɗoɔ̀ bà, àŋ naŋ wii ɓùlò e ɗì auŋ sìà sàngè wo kɛ̀lɛ̀ɛ̀ le siwè foo. 12Wo felaaà naŋ ɓɛìŋ tùɔ̀ŋ wo ɗo dìà taaiɔ̀. Anyuùŋ yɛ̀mɛ̀ ɓù diɛŋ nyàŋ nauŋ ɓùlò auŋ nɛɛmùŋ yèè àŋ nauŋ gbìɛ̀ŋ ko jɔɔlèi. 13Kpeiŋ wo kɛ̀ɛ̀nɛ̀ŋ wɔŋ ɓù manɛ̀ŋ wuiyeɔ̀ naŋ woò wààŋ, ‘Kiìŋ mìŋ nyɛnɛŋ naàŋ? Mìŋ do nàŋ tùɔ̀ŋ wo jɔ̀àfèlàà jii miɔ̀ŋ. Kà haawè àŋ douŋ nàŋ kìɛ̀ŋ ɓɛ̀ɛ̀jàa!’ 14Kɛɛ anyuùŋ yɛ̀mɛ̀ ɓù diɛŋ nyàŋ naŋ wòò nyiŋ bi e fèemàŋ nyààŋ, ‘Wo jɔ̀àfèlàà kenàaŋ wuŋ bi wɛɛ̀. Jìwà winùuŋ, kɛ̀ manɛ̀ŋ èdààuŋ màŋ nɔ̀ŋ weè wi!’ 15Kpeiŋ àŋ naŋ kùwò wo jɔ̀àfèlàà kɛ̀ɛ̀nɛ̀ŋ ɓùɔ yèè àŋ nauŋ jìwè aŋ gbìàŋ e dieuŋ nɛ̀ wɔŋ ɓùɔ jɛ̀wɛ̀.”

Wo Jisɛ̀ naŋ nyiŋ dawè wààŋ, “Sèè e keì kaaìŋ yɛi, kiìŋ wo kɛ̀ɛ̀nɛ̀ŋ wɔŋ ɓù manɛ̀ŋ wuiyeɔ̀ do nàŋ nyɛ̀nɛ̀ŋ? 16Wò do nàŋ hnè wo jìwà anyuùŋ yɛ̀mɛ̀ ɓù diɛŋ nyiiŋ gbiŋ, e kìlà wo fè wɔŋ ɓù gbɛɛwɛ̀jɛ̀wɛ̀uŋ nɔɔ̀ŋ koɓɛ̀ anyuùŋ joo bà.”

Nààŋ anyùùŋ nyaŋ naŋ tɛɛ̀ kòmò, àŋ naŋ woò nyààŋ, “Julɔfɔ tɛɛ̀ ɓɔ̀ è kaaìŋ.”

17Wo Jisɛ̀ naŋ nyiŋ yɛmɛ̀ yèè wò naŋ woò wààŋ, “Kiìŋ e sìnga lɛɛ̀ wɔŋ fɛ̀ì Dayàa sùà naŋ fasàì?

‘Ke dùòɛ aŋ nyùuŋ nyɛ̀lɛ nyàŋ àŋ gò wa jàà kùàŋ dìì yɛ

kiiŋ naŋ wa nɔ̀ŋ ke duò kpɛnɛ tùlìà jii gbeeɛ̀ e nyɛ̀lɛɛ̀ gbiŋ sùà.’

18Wo nyùnɔ̀ɔŋ gbiŋ sɔɔ ke dùò yii diɛŋ wɔ̀ wò do nàŋ nyime nyìmè. Sèè zà ke dùò yii sɔɔ wo nyùùŋ gbiŋ diɛŋ kè douŋ nàŋ hike hìkè.”

Wɔŋ mààŋdàwè e nyaàiŋ dè e nɛ̀ɛ̀nɛ̀ŋ fuɔŋ pààwa

(Maafiù 22.15-22; Mài 12.13-17)

19Aŋ kààmɔ̀ɔ̀ŋ maŋ Sàwà Dayà nyaŋ yaà aŋ kànà sìèfèìŋ zòòlo nyàŋ, naŋ kàmè ɗewe wèè aŋ kùwà wo Jisɛ̀ ko fɛɛ̀feìŋ, esaɓù àŋ wa nyìmàŋ kɛ̀ ke kàɓanèɛ wò naŋ gè lɛ, kɛ̀ nyiiŋ wò sɔ̀à. Kɛɛ àŋ duɔŋ wa e faaàŋ. 20Kpeiŋ aŋ jòò Jisɛ̀ nyɛɛ̀ŋ nauŋ tɔ̀ɔ̀tù tùàŋ maŋ nɔnɔŋ sɔ̀pɛsɔ̀pɛ, esaɓù kɛ̀ àŋ manaŋ wa auŋ kìlà koɓɛ̀ anyùùŋ gbèègbèè fùɔ̀ŋ Luùm nyaŋ. Kpeiŋ àŋ naŋ kìɛ̀ŋ aŋ felaa bà ke gòò dùùm wèè aŋ tɔɔ̀ nyiŋ bi kɛ̀ àŋ yaà anyùùŋ tɔ̀ɔ̀nyaàŋ, yèè àŋ naŋ nyiŋ tùɔ̀ŋ koɓɛ̀ Jisɛ̀i wèè aŋ kuwiàuŋ maŋ mààŋdàwè sùà wèè wo woò e keì naanààŋ. 21Anyùùŋ kàaɓì nyɛɛ̀ŋ naŋ dàwè wo Jisɛ̀ nyààŋ, “Kààmɔɔŋ, è nyìmàŋ kɛ̀ e nɛ̀ɛŋ mùŋ woà yèè mùŋ kaà lɛ è yaà tɔ̀ɔ̀nyaàŋ. Muŋ fè dùàŋ è gòngò kìì nyuùŋkpùuŋ, mùŋ woà ke mìè Dayàa e tɔ̀ɔ̀nyaàŋ diɛŋ. 22Wòò wi, ke sàwà naŋ wi gè nyààŋ diɛŋ wèè eiŋ pààwà e nɛ̀ɛ̀nɛ̀ŋ fuɔŋ koɓɛ̀ Siisɔ̀i, wo Kànà Fùɔ̀ŋ anyùùŋ Luùm nyaŋ ɔ̀ɔ̀ ɓɔ̀ è paawàiŋ nìŋ?”

23Kɛɛ wo Jisɛ̀ wa nyìmàŋ e kàaɓì nyiŋ nɛ̀ tɛ, yèè wò naŋ nyiŋ woò wààŋ, 24“Hìaìŋ nìim ke kaiŋ fua nɛɛnɛŋ miŋ yɛmɛ̀ nyiŋ.” Kpeiŋ wò naŋ nyiŋ dawè wààŋ, “Ɗèwà ɓòò wɛɛ̀ŋ yèè dèè ɓòò lɛɛ̀ ke nɛɛnɛŋ yɛɛ̀?”

Àŋ naŋ fasàì nyààŋ, “Wo Siisɔ̀, wo Kànà fùɔ̀ŋ anyùùŋ Luùm nyaŋ.”

25Kpeiŋ wo Jisɛ̀ naŋ nyiŋ woò wààŋ, “Kìɛ̀ŋ koɓɛ̀ Siisɔ̀i, wo Kànà Fùɔ̀ŋ anyùùŋ Luùm nyaŋ e nɛ̀ɛŋ wò kanaŋ lɛ̀, yèè niŋ kiɛ̀ŋ wo Dayà e nɛ̀ɛŋ wò kanaŋ lɛ̀.”

26Aŋ jòò Jisɛ̀ nyaŋ gòuŋ wa ɓɛ̀nɛ̀ŋ kùwìà kè mìè gbòa nyààŋ wèè wo wòò è keì naanààŋ gbiŋ ànyùùŋ nyaŋ fɛɛ̀feìŋ. E keì bi naŋ nyiŋ wa foonò e nyaàiŋ dè e yèɛ wò naŋ nyiŋ woò lɛ, yèè àŋ naŋ nɔ̀ŋ gìli.

Wɔŋ mààŋdàwè e nyaàiŋ dè e fàa yèwà dèèɛ

(Maafiù 22.23-33; Mài 12.18-27)

27Aŋ sìèfèìŋ aŋ Juùù nyaŋ àŋ nyaaŋ aŋ Sadusiì nyaŋ, woà nyààŋ sèè wo nyùùŋ fà wo fè ɓɛìŋ yèwà dìì. Àŋ bà naŋ hnè koɓɛ̀ Jisɛ̀i 28yèè àŋ nauŋ woò nyààŋ, “Kààmɔɔŋ, wo Mòòze naŋ wa sìngè ke sàwà yɛɛ̀ weè wi yèè wò naŋ woò kɛ̀, ‘Sèè wo kpài nyuuŋ wo fà e yèɛ yaà wo jàwè aŋ gò kòmàŋ àŋ jɔ̀à, wo nanàŋ nyùnɔ̀ɔŋ ɓemè wo jɔùŋ bi aŋ kòmàŋ aŋ jɔ̀à wèè wo nyuùŋ fàaà.’ 29Kpeiŋ è naŋ hɛɛnɛ̀ŋ kɛ̀ aŋ wùìyà nɔɔnɔŋ le tìyèe yaào wa. Wo jiɛ̀jiɛ̀ɔ naŋ gè wo jɔùŋ kɛɛ aŋ gò kòmàŋ yèè wò naŋ fɔ̀. 30Wo dìà tìyèeɔ̀ naŋ ɓèmè wo jɔ̀ùŋ guùŋ bi, kɛɛ aŋ gò kòmàŋ yèè wuŋ pɛɛ wò naŋ fɔ̀. 31E kèì guùŋ nɛ naŋ kààìŋ koɓɛ̀ wo wùìya dìà taaiɔ̀. E kèì guùŋ nɛ naŋ kààìŋ nyiŋ nɔɔnɔŋ lè tìyèe, wo bà guùŋ pɛɛ gò kòmàŋ yèè ko diemeì aŋ gbiŋ naŋ fɔ̀. 32Eɓìèmàŋjɛ̀wɛ̀ tii wo jɔnɔ̀ɔŋ naŋ fɔ̀. 33È manaŋ eiŋ nyìmàŋ, sèè anyuùŋ fàa nyàŋ gbiŋ wa nàwèè yèwà dìì wɔŋ nyiiŋ gèeo sùà, jàwè ɓòò wò do nàŋ nɔ̀ŋ? Nyiŋ nɔɔnɔŋ le tìyèe nauŋ wa ɓemè wo nɔ̀ŋ wo jawè nyiŋ.”

34Wo Jisɛ̀ naŋ nyiŋ fasàì wààŋ, “Anyuùŋ kpùuŋ nyàŋ e teenga lɛɛ̀ sùà àŋ kɔ̀à maŋ yɛ̀ɛ̀ yèè àŋ gbiɛŋ maŋ yɛ̀ɛ̀, 35kɛɛ anyuùŋ kpùuŋ nyàŋ wo Dayà do nàŋ jàà kùàŋ dìì wèè aŋ nɔ̀ŋ tɛ̀ɛ̀ aŋ wa nàwèè yèwà e fàaà dìì yèè aŋ nɔ̀ŋ wɔŋ nyiiŋ gèeo sùà nyaŋ, aŋ naàŋ kɔ̀ màŋ yɛ̀ɛ̀ ɔ̀ɔ̀ aŋ gbìàŋ màŋ yɛ̀ɛ̀ è teenga lii sùà. 36Àŋ do nàŋ nɔ̀ŋ mààŋ aŋ màikà nyaŋ yèè aŋ fè ɓɛ̀nɛ̀ŋ fàa. Nyiŋ nàŋ yaà aŋ jɔ̀à Dayà nyaŋ, esaɓù kɛ̀ àŋ yèwà e fàaà dìì. 37E sìngaà wɔŋ fɛ̀ì Mòòzeɔ̀ sùà naŋ wòò janjai kɛ̀ anyuùŋ fàa nyàŋ yèwà e fàaà dìì wɔŋ nyiiŋ gèeo sùà. Ke kàɓanèɛ kò yèi è sìngaà naŋ wòò e kèè e ɓìè hmɔɔ̀ŋ kùwa gbeeɛ̀ lɛ, wo Mòòze naŋ nyààŋ wo Kanaà ‘wo Dayà Eɓulɔhɛɛ̀ɔŋ, wo Dayà Ààzeɔ̀, yèè wo Dayà Jègɔɔ̀.’ 38Wuŋ nàŋ yaà wo Dàyà anyuùŋ gè nyiiŋ nyàŋ, wo fè wò Dayà ànyuùŋ fàa, esaɓù tɛɛ̀ naŋ tɔɔ̀ kɛ̀ anyùùŋ nyaŋ gbiŋ kòò àŋ yaà wɔŋ nyiiŋ gèeo sùà ko fɛɛ̀fenùuŋ niìŋ.”

39Aŋ kààmɔ̀ɔ̀ŋ maŋ Sàwà Dayà nyaŋ bà naŋ woò nyààŋ, “Kààmɔɔŋ, mùŋ naŋ gbòò tɛ̀ɛ̀!” 40Eɓìèmàŋjɛ̀wɛ̀ tɛɛ̀, wo nyùùŋ gbiŋ gòuŋ wa ɓɛìŋ gbìàŋ màŋ mààŋdàwè bà gbiŋ.

Wɔŋ mààŋdàwè e nyaàiŋ dè wo yèɔ wo Dayà naŋ tàeɗùù wɔ

(Maafiù 22.41-46; Mài 12.35-37)

41Wo Jisɛ̀ naŋ nyiŋ dawè wààŋ, “Dièsɔa anyùùŋ nyaŋ naŋ ɓɛ̀nɛ̀ŋ wòo kɛ̀ wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Kulaìɔ, do nàŋ fòlò ke kpòò Dèèweɛ̀ sùà? 42Wo Dèèwe wuŋ bi naŋ wa gbòò e yìwìà wɔŋ fɛ̀ì Saàaŋ sùà wààŋ,

‘Wo Kanaà Dayà naŋ wòò wo Kana miɔ̀ŋ wààŋ,

“Jɛ̀ì kià wɔŋ kùàŋ jìka miɔ̀ŋ

43e jèèsùà ka nyɛ̀nɛ̀ŋ aŋ jooum nyàŋ aŋ nɔ̀ŋ e nɛ̀ŋ dè maŋ gòlò diɛum.” ’

44Wo Dèèwe wuŋ bi nauŋ nyààŋ ‘wo Kanaà,’ kpeiŋ kɛ̀ dièsɔa wo yèɔ wo Dayà naŋ tàeɗùù wèè wo joeyè e ɗuunyaàŋ wɔ naŋ ɓɛ̀nɛ̀ŋ fòlà ke kpòò Dèèweɛ̀ sùà?”

Wo Jisɛ̀ naŋ fè mìè gòo e nyaàiŋ dè aŋ kààmɔ̀ɔ̀ŋ maŋ Sàwà Dayà nyaŋ

(Maafiù 23.1-36; Mài 12.38-40)

45Nààŋ anyùùŋ nyaŋ gbiŋ yaà wa kùmiaŋ sùà wo Jisɛ̀, wò naŋ wòò anyùùŋ màŋjɛ̀wɛ̀uŋ nyàŋ wààŋ, 46“Yɛ̀mɛìŋ nyɛiŋ bi diɛŋ e nyaàiŋ dè aŋ kààmɔ̀ɔ̀ŋ maŋ Sàwà Dayà nyaŋ. Àŋ manaŋ emààmè maŋ ɓuuɓane kùmà mùnlòmunlo sùà, e kìlà àŋ manaŋ wèè aŋ nyiŋ zuumò e kìlà wèè aŋ nyiŋ kìɛ̀ŋ e ɓɛ̀ɛ̀jàa koɓɛ̀i àŋ nyiniàŋ maŋ bòli màŋ lɛ. Àŋ jaà maŋ jɛ̀i kɛnɛ màŋ àŋ naŋ jàà e ɓula titi màŋ maŋ sààŋ zòòlò aŋ Juùù nyaŋ dìì, yaà maŋ jɛ̀i kɛnɛ màŋ maŋ ɗaa gèe màŋ diɛŋ. 47Àŋ nyinìàŋ aŋ jɔ̀ùŋnèèdàà nyaŋ kàaɓì yèè aŋ nyiŋ gè maŋ tùlìè jii nyiŋ màŋ sìwè maŋ gboo nyiŋ màŋ sùà. Àŋ manaŋ kèè nyiŋ bi tɔ̀ɔ yèè maŋ zòòlo nyiŋ màŋ mùŋloe jèì. Anyùùŋ mààŋ nyiiŋ do wa nàwèè nàŋ kùwò e nimilà nyìnga e mààŋ nyààŋ!”

Currently Selected:

Luù 20: WFESD

Highlight

Copy