Lucas 8

Areme Ekodure Jesus Apo

1Jesus uture ture jorduwadowu imebo boe eda jamedu boe ka tuwo boe ewie tuwadaru pemegareuji, tumagowo Pao Kurireu rore jiboeji boe ewiagai. Makore boei Pao Kurireu umoduie boe eimijerado pudumi kuri je. Nou Jesus ure jorduwadowuge enodo padure doze. 2-3Ia areme ekodure Jesus apo jamedu. Iarodo iere Maria Madalena. Metago iere Joana. Nou iarodo iere Susana. Marigudu bope doge emedure nou Maria Madalena tada. Nou bope doge enodo padure sete. Mare Jesus ure nou bope doge etawuje nou Maria Madalena piji dukodire nou Maria Madalena kodure apo. Nou Joana oredu iere Cuza. Nou Cuza maragodure boe eimijera Herodes ai. Ia areme ekodure Jesus apo jamedu. Jesus ure bope doge etawuje iage epiji. Ure iage epemegago tugogodae piji. Dukodire nou areme ere tugera maku etai nou toe makudu tabo Jesus ai, nou utugarege etai jamedu.

Boepa Tadaboe Jiwu Bakaru Reo

4Boe emagare taregodu tabo Jesus ae. Etaregodure tieda jamedu boe piji tuwo bato pui Jesus ae tumearduwo Jesus makore jiboeji. Dukeje Jesus readodure ewiagai ia bakaruji tuwo jebato toro nouia Pao Kurireu meardae ka. 5Akore: – Ia imedu ure tudawuje tuwo boe a roto ja ja moto joki to boepa tada. Ia a buture awara okwaji. Boe ewure jore nou buture awara okwa jiwu a keje, kiebarege ere nou boe a rugadu kowuje. 6Ia a buture toriguru tada. Boture mare kidure, tori uru koia, moto pegare ji kodi. 7Ia a buture botoguru tada. Botoguru boture tabo jamedu mare botoguru ure bito. 8Mare ia a buture moto pemegareu keje. Ere tuguwu sacu ure mitotu je. Botu pemegare, ričodu pemegare, enari kurire rugadu. Kidure dukeje ere rawuje čiwu piji. Ere a rawuje tuwo tugu sacuto. Nou sacu oto padure kejeboere cem nou boe a tabo.

Nono Jesus okituware nou boei. Akore: – Tawiapaga pemegado awu iwadaruji tarduwawo kaba jiba inagoino tai.

Jesus Ure Ture Jorduwadowuge Erduwado Tumagore Jiboeji

9Nou Jesus ure jorduwadowuge enarare ji: – Kaba awadaru jiba akaidure čerduwawo akagoino čei duji?

10Jesus akore: – Ire boe erduwado toro nouia Pao Kurireu meardaeji rugadu nou bakaru tabo. Mare paga karega. Ireadodure aino Pao Kurireu uwo tarduwado meture pudabowu tumeardae boeji, boe ewo tugimijerado tu ema, tarduwawo nuba Pao Kurireu romode tudugaregei. Mare ireadodure bakaruji kodire ia boe erduwamode awu bakaruji mare emodukare boe pa nou bakaruji. Ewiapagamode ji mare erduwamodukare nou Pao Kurireu meardaeji.#8.10 Awu bataru padure Isaías 6.9 keje.

11– Ainore awu bakaru ure. Boe eire inagoino. Pao Kurireu bataru ure nono nou boe a mogadure. Mare boe a ji karega inagoino. Pao Kurireu bataru aregodumode boe etae. Nono boe emeardumode Pao Kurireu bataruji. Dujire inagoino. 12Boe emeardumode Pao Kurireu bataruji dukeje bope doge eimijera umode nou Pao Kurireu bataru tawuje nou boe epiji nono nou kiebarege ere nou boe a tawuje moto piji dumogadure. Mare kiebarege ei karega inagoino. Bope doge eimijera jire inagoino. Umode boe ewiago Pao Kurireu bataru piji. Dujire inagoino. Dukodire nou boe emeartorumodukare Pao Kurireu bataruji pugeje. 13Ia boe emeardumode Pao Kurireu bataruji pugeje. Nono nou boe emode nono nou boture toriguru tadawu boe a mogadure. Nou boture toriguru tadawu boe a rakamodukare. Mare boe a ji karega inagoino. Boe eire inagoino. Nou boe eragamodukare tumeartoru raiwo Pao Kurireuji. Dujire inagoino. Emode tugeragu Pao Kurireu bataruji tiagare tabo mare emeartoru raimodukare ji. Dujire inagoino. 14Ia boe emeardumode Pao Kurireu bataruji pugeje. Awu boe emode nono nou boture botoguru tadawu boe a mogadure. Botoguru umode boe pegado ji. Mare boture botoguru tadawu boe a ji karega inagoino. Boe eire inagoino. Nou boe emeardumode Pao Kurireu bataruji mare emororamagadumode tu nou tumeardae pegareu boeji. Dujire inagoino. Emeardaere tu pudui tuwo to diero kurido. Emeardaere tu nou taidure jiboeji. Dukodire toro ia meri keje nou boe emode tugera ra Pao Kurireu bataru piji. Dujire inagoino. 15Mare ia boe emeardumode Pao Kurireu bataruji dukeje emeartorumode ji rugadu. Dukodire epemegamode rugadu nono nou boture moto pemegareu boe a mogadure. Mare boture moto pemegareu kejewu boe a ji karega inagoino. Boe eire inagoino. Nou boe emeardumode Pao Kurireu bataruji nono emeartorumode ji rugadu. Dujire inagoino. Emodukare tugera ra tumeartorure jitu piji rugadu jii toro rugadu. Dujire inagoino.

Boe Emodukare Pori Bu Jorugu Aogeje

16Jesus makore kimo. Akore: – Boe emode pori bu jorugu aogeje dukeje urugumodukare. Boe emode jorugu mugudo tuba kuda dukeje urugumodukare jamedu. Mare boe emode jorugu bararedo, uruguwo pudui. 17-18Mare paga karega iwadaru ure nono nou lamparina urugu mogadure. Mare lamparina urugu ji karega inagoino. Marigudu boe erduwakare ia Pao Kurireu meardaeji. Marigudu boe erduwakare ia boe ero pegare jiboeji. Mare boe emeardumode iwadaruji dukeje boe erduwamode Pao Kurireu meardae pemegareu jamedu boeji. Boe emeardumode iwadaruji dukeje erduwamode boe ero pegare jiboeji. Dujire inagoino. Erduwakare ia boe ero pegare jiboeji mare erduwamode ji. Dujire inagoino. Erduwakare ia Pao Kurireu meardae pemegareuji mare erduwamode ji. Dujire inagoino. Dukodire tameardae pemegado tawiapagare jiwu iwadaruji tawo taragado tai tameartoruwo ji rugadu. Mare paga karega. Boe etaidumode tumeartoruwo tuiorduware jiwu Pao Kurireu bataruji dukeje Pao Kurireu umode erduwa kurido pudui emeartoruwo pudui rugadu. Mare ia boe etaidumodukare tumeartoruwo tuiorduware jiwu Pao Kurireu bataruji dukeje Pao Kurireu umode erduwa bokwado tuwadaruji. Emeardaere tuiorduwaie rugadu mare pagatu je.

Jesus Uče Uwiemage Etaregodure

19Jesus uče uwiemage etaregodure tuiorduwo Jesusji tumagowo ji. Mare eroiwakare tubureduwo ji boe emagare nono apo kodi. 20Ia imedu ure Jesus bie. Akore: – Ikimijera. Ače, awiemage etaregodure awagai. Etaidure tumagowo ai.

21Mare Jesus makore: – Biapagare Pao Kurireu bataru jiwuge emeartorure jiwuge ere nono iwobe emogadure. Ere nono iwie mage emogadure. Ere nono muga mage emogadure.

Jesus Ure Bakuru Pegareu Akedudo

22Ia meri keje Jesus ure turemo ture jorduwadowugebo ia ika kurireuto. Makore ei: – Pagurugoduwo awu pobo maereu okwa abowu ka.

23Nono eture. Ekurugodure dutabo Jesus unudure. Mačare ia bakuru pegareu aregodure etae tači je. Nou bakuru ure nou pobo maereu rutudo. Kodire pobo jeture nou ika kurireuji. Dukejere nou pobore turemo nou ika kurireuto rugadu. Boe pegare nou ika kurireu tadawu boe dogei rugadu. 24Jesus ure jorduwadowuge epagudugodure rugadu dukodire ere Jesus jetadudo. Egore: – Čegimijera! Pawimode poboto!

Nono Jesus ure turagojedo. Nono makore nou bakuruji nou poboji dukodire nou bakuru akedure, nou pobo butugugodure jamedu. 25Nono Jesus makore nou ture jorduwadowugei. Akore: – Tameartorukare i na?

Mare epagudure. Ebogodure. Egore pui: – Duboba nure awu imeduče? Kočare bakuru, pobo emeartorure awu imedu bataruji rugadu!

Jesus Ure Bope Doge Etawuje Imedu Piji

26Ekurugodure Galiléia pobo maereu okwa abowu ka. Nou etaregodure kawu moto iere Gerasa. 27-29Nono Jesus ure tudawuje ika piji dukeje bope doge emedu tadawu imedu uture Jesus togi. Marigudu nou bope doge emedure nou imedu tada dukodire boe ere kogudo ia meriri iku tabo boe etuwo ji rekodukawo. Mare nou bope doge ere nou imedu rakado rugadu dukodire nou imedu ure nou meriri iku kado tu tu je. Nono nou bope doge ere nou imedu utudo boe epiji. Dukodire merure tuwiri kedo tabo, rekodure tuwai piji jamedu. Mugure boe ere bireuge etugu tadawu tori poro ja tada boe maereu keje.

Nono Jesus makore nou meture nou imedu tadawu bope dogei. Akore: – Tadawuje nou imedu piji!

Nou imedu kudugodu rakare dukeje ure tuwududo Jesus jokorai. Ure tumago rakado. Akore: – Jesus! Boe eimijera Pao Kurireu onaregedu nure aki! Nuba aromode čei? Inogwamagudumode ai. Akaba čedudo boe pegareuto.

30-31Jesus unarare ji: – Nuba akiere?

Nou meture nou imedu tadawu mareboe doge emagare dukodire egore: – Čegiere bope doge makareuge.

Nono nou meture nou imedu tadawu bope doge enogwamagudu raire Jesusji ro pegakawo pudui ukawo tuwarigu boe eiawu moto koreuto.

32Jugureuge edu puredure nono togwage tabo. Nono nou mareboe doge enogwamagudure Jesusji uwo tudo turemo nou jugureugeto. Jesus makore ei uie turugadu. 33Nono ere tudawuje nou imedu piji dukejere ere turemo nou jugureugeto. Dukodire nou jugureuge eregodure kuri ia moto ri ao piji poboto. Dukodi eiamedu boe ewire poboto.

34Dukodire nou jeture jugureuge eiwuge ime eregodure toro nou tuwai mugure tadawu ba kurireu ka tureadoduwo boe ewiagai nono. Ereadodure nou Jesus rore jiboeji boe eiamedu boe ewiagai nou moto jamedu boe parugajeje. 35-39Nou ba kurireu kejewuge eture toro Jesus ae dukeje erdure nou bope doge emedu tadawu imeduji pemegagodure duji. Butugugodure. Ukudau areia meture jituji. Erduware Jesus ure bope doge etawuje nou imedu piji dukejere epagudugodure. Eiamedu boe emagore Jesusji utuwo nou to moto piji. Dukodire Jesus ure tuduiago dukeje nou bope doge ere tudawuje pijiwu imedu makore Jesusji. Akore: – Itaidure ikoduwo akabo.

Mare Jesus akore: – Atudo aibagi awai ka. Areadoduwo boe ewiagai nuba Pao Kurireu ro pemegare ai duji.

Dukodire nou imedu uture tuibagi tuwai ka. Readodure nou ba kurireu kejewuge boe eiamedu boe ewiagai nuba Jesus ro pemegare pudui duji.

Jesus Ure Areme Epemegago

40Jesus kurugodure tuibagi ika kurireu tabo pobo maereu okwa abowu ka pugeje ture jorduwadowugebo. Etaregodure dukeje boe ekimadure Jesus apo. Epagare bagai marigudu tuwiapagawo Jesus bataruji. 41-42Ča ia bai kejewu boe eimijera iere Jairo. Judeu doge ere bato puiwu bai kejewu boe eimijera nure ema. Nou imedu Jairo aregodure Jesus ae, tragudu tabo. Okwamagudure Jesusji koduiago pudabo toro tuwai ka. Tonaregedu nogwaredu rogu ure mitotu jedu bigoduiure.

Dukodire Jesus uture apo uwai ka. Mare nono nou boe emagare rugadu dukodire ere taiado pači Jesus apo. 43Ia aredu kodure ebo Jesus rekodaji. Marigudu nou aredu kogodaere tu tu je. Nou aredu ku rere piji nono areme etorewudae mogadure. Mare nou aredu ku akedukare piji. Re kimore piji meri jamedu boeji. Joru oto padure doze nou aredu ku rere piji dukeje. Kodire uture jorubo epage etae. Mare ekare nou aredu pemegago nou tugogodae piji. Pega kimore rugadu. 44Aino čare nou aredu ure tugera raido. Nono iera otorogu jeture Jesus ukudau areiaji. Dukeje nou aredu pemegagodure tači je. Nou aredu ku rekare piji pugeje. 45Ča Jesus ure tuwuredo tu je. Akore: – Ioguduba ure tugera raido ikudau areia ka?

Boe emagokare boeji. Dukejere Pedro akore: – Kodiba akagore aino? Boe emagare woe pagabo. Boe eiamedu boe ekera jeture akudau areiaji.

46Mare Jesus akore: – Iorduware ipijire ia iraga rakareu ure tudawuje dukejere iogore ia boei. Dukodire iorduware ia boe ekera jeture ikudau areia jituji.

47Nou aredu jorduwagodure Jesus jorduware pudumie tuie tugera raido pudae duji. Dukodire ure tuburedo Jesusji. Mare pagudure dukodire mororamagadure. Ure tubu jodo moto keje Jesus jokorai dukejere readodure turore jiboeji Jesus biagai. 48Jesus makore ji. Akore: – Are. Ameartorure tu i dukodire apemegagodure. Mare amororamagadukaba. Ire akogodae akedudo apiji rugadu.

49Jesus mako kimore nou areduji dukeje ia imedu aregodure etae Jairo uwai piji. Makore Jairoji. Akore: – Akanaregedu rogu bokware. Amagokaba nou pagimijeraji pugeje.

50Mare Jesus meardure emagore pui duji. Nono makore Jairoji. Akore: – Amororamagadukaba. Ameartorudo i rugadu. Akanaregedu pemegagodumode.

51-53Makore aino dukeje Jesus uture ture jorduwadowugebo Jairo apo uwai ka. Etaregodure uwai ka dukeje boe emagare nono tragudu tabo nou Jairo onaregedu rekodaji bire kodi.

Jesus akore: – Tagragudukaba pugeje. Bikare. Unudunure. Unure tamudo tu je.

Mare nou nogwaredu bire rugadu. Mare Jesus jorduware turomode jiboeji dukodire akoino ei. Mare nou boe erduware nou nogwaredu bire rugadu duji. Dukodire enogwarigodure ji emeartorukare ji kodi. Nono Jesus makore Pedroji, Joãoji, Tiagoji jamedu, ewo turemo pudabo, Jairo apo, Jairo oreduje apo jamedu. Makore nou iagei epagawo toro bawadu keje.

54Ere turemo dukeje Jesus ure tugeragu nou nogwaredu ieraji. Makore ji. Akore: – Are. Aragojedo.

55-56Ča. Nou nogwaredu jewodure tači je. Nono ure turagojedo. Uče, uo erore ta je Jesus rore aino duji. Mare Jesus makore ei. Akore: – Awu tagonaregedu okwagedo. Imode tawie. Tareadodukaba boe ewiagai irore aino woe tawai keje duji.

Currently Selected:

Lucas 8: borBiblia

Highlight

Copy