Lucas 9

Jesus Ure Tumaragodae Maku Ture Jorduwadowuge Etai

1Nono Jesus makore ture jorduwadowuge ewagai. Enodo padure doze. Ure turaga maku etai ewo boe epemegago ewo bope doge etawuje boe epiji jamedu. Ure eragado turaga tabo ewo boe epemegago ekogodae boe piji. 2-5Jesus makore nou ture jorduwadowugei. Akore: – Tadukaba nou tagedure jiwu tagaibo tabo. Tadukaba marenaru ukudau areia meture tadawu kadarabo tabo. Tadukaba tage tabo. Tadukaba diero tabo. Tadudo tu meture taiwu tagudau areia tabo. Tadukaba ia tagudau areia metia tabo pugeje. Tagaregodumode ia boe eda ka dukeje tardumode boei. Etaidumode tai dukeje tamugudo ebo jii nou tadumode kejewu meri ka. Mare tagaregodumode ia boe eda ka pugeje mare nou boe etaidumodukare tai. Ekimadumodukare tagabo dukeje tadudo epiji. Tadumode epiji dukeje tawure okeakejewu to pui egai tawo moto urugudu tawuje nou tawure okeakejewu piji nou boe erduwo Pao Kurireu aidukare nou erore jiboeji kodire umode tugera ra epiji.

Jesus makore nou ture jorduwadowugei dukeje ure etudo ewo boe ewie Pao Kurireu bataru pemegareuji boe ewo tugimijerado tu Pao Kurireuče. Ure etudo ewo kogodureuge boe epemegago jamedu. 6Dukodire nou Jesus ure jorduwadowuge eture. Eture boe eda jamedu boe ka. Ere boe eiamedu boe ewie nou Jesus bataru pemegareu jamedu boeji. Ere kogodureuge epemegago jamedu.

Herodes Jorduwa Bokware Nou Jesus Ure Jorduwadowuge Erore Jiboeji

7Galiléia moto kejewu boe eimijera iere Herodes. Meardure nou Jesus rore jiboeji makore jiboeji. Mare jorduwa bokware ioguduba nuie ema duji. Ia boe egore João Batista jewoduie pugeje kodie João Batista nure ema. 8Ia boe egore Elias uie tugirimi baru piji. Iage egore ia mariguduwu makore Pao Kurireu bataru jiwu jewoduie pugeje. 9Herodes akore: – Boe egore ia imedu ro rakaie rugadu. Dukodire imire imagore itugaregei ewo João Batista itoru kado. Dukodire ere bito rugadu. Ema karega rore aino. Ča kakojiwu imedu ba ro rakare aino pugeje?

Dukodire Herodes jemarure Jesus bagai tunarawo ji ioguduba nuie ema rugadu.

Jesus Ure Boe Eke Maku Boe Etai. Ime Enodo Padure Cinco Mil

10-11Nou uture Jesus bataru tabowuge ere tugirimi tuibagi Jesus ae. Ereadodure turore jiboeji Jesus biagai. Dukejere Jesus uture ebo pugeje boe epiji. Etuiago toro Betsaida ba kurireu ka. Mare boe erduware Jesus kodure toro duji dukeje eture rekodaji. Emagare. Dukodire Jesus ure tuwuredo nono boe maereu keje tumagowo nou boei. Ure erduwado Pao Kurireu bataru pemegareuji boe ewo tugimijerado Pao Kurireuče. Nono nou tumugureu keje ure boe kogodureuge epemegago jamedu. 12Nono merirekodutabo nou Jesus ure jorduwadowuge emagore Jesusji. Egore: – Boe doge etudo awu boe maereu piji. Edo taodo ia tieda puredureu bagai emuguwo keje etaiwowo ia tuge rogu bagai. Boe bokware woe du kodire.

13-14Jesus akore: – Boro. Taigoiare tamode enogwagedo.

Egore: – Awu boe emagare rugadu. Ime enodo padure cinco mil. Mare page amireu rogure ikera aboudure tu je. Page karo rogure pobetu je. Tu rugadu. Akaidukana čeduwo toro ba kurireuto čewo čegeragu awu boe eiamedu boe ekeji kana?

Mare Jesus akore: – Tamagodo awu boei ewo tudo pui enodo paduwo cinquenta tu tu tumuga boe keje.

15Nono nou Jesus ure jorduwadowuge erore aino. Ere nou boe eiamedu boe edo tudo pui tumuga jamedu boe keje. Eiamedu boe ere tudo pui rugadu. Dukodire ere tumugudo tu tu tumuga boe keje. 16Nono Jesus ure tugeragu nou boe eke roguji tumagowo Tuwo Kurireu bagai baruto nou boe eke rogu paru tabo. Imadure Tuwo Kurireu apo nou boe eke rogu paru tabo dukeje Jesus ure nou boe eke kado puiato ture jorduwadowuge ewo maku boe etai. Nou boe erore puku je nou boe eke itodure aino duji. Dukodire nou boe eke ure turugadu boe eiamedu boei. 17Boe eiamedu boe enogwagere. Nono ča ekuredure egarere pudui rugadu. Ča nou Jesus ure jorduwadowuge ere nou kadarabo doge ekorau nou boe eke kobo tabo. Nou kadarabo doge enodo padure doze nou boe eke kobo tabo rugadu.

Pedro Makore Nuba Tumeardaere Jesusji

18Ia meri keje Jesus makore baruto Tuo Kurireu bagai. Rakojere tuginaigodu. Tu nou Jesus ure jorduwadowuge edure tu nono Jesus apo. Jesus ure tuwadaru akedudo dukeje unarare nou ture jorduwadowugei: – Nuba boe emeardaere i?

19Egore: – Boe egore João Batista nuie aki. Nou iage egore Elias nuie aki. Nou iage egore ia mariguduwu makore Pao Kurireu bataru jiwu imedu jewodureu nuie aki.

20Jesus akore: – Mare tagi. Nuba tameardaere i?

Pedro akore: – Pao Kurireu ure maku boe etaiwu nure aki. Umode boe ekinorudowu nure aki.

21-22Jesus akore: – Tareadodukaba nou inoduji boe ewiagai. Mare du inodu tabo boe erorerumode i. Boe etaidumodukare i. Judeu doge eimijerage erdu pegamode i rugadu. Jorduware Judeu doge eno bakaru jiwuge erdu pegamode i rugadu. Nou ure Judeu doge enomea maku Pao Kurireu aiwuge eimijerage erdu pegamode i rugadu. Boe emode iwido rugadu. Mare merimode pobe metia bokware dukeje iewodumode tači je pugeje.

23Nono Jesus makore nouia boei pugeje. Akore: – Ia tagi tagaidure tagoduwo itabo kana? Ča iwo tawie. Tagaidumode dukeje tameartorudo tu i dukeje tagera ra taro pegareu piji, tawia ra tameardae pegareu piji, tagaidure jiboe piji jamedu. Tado tarugadu meri jameduji boe pegamode tai nono boe pegamode i dumogadure. Iwimode ipo padure pugajejewu keje. Dukodire inagoino tai tado tarugadu tagoduwo itabo. 24Mare ia boe ewiapagamode tuwo boe pemegado tu pudui turaga tabo dukeje nou boe eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare ia boe ewiapagamodukare tumeardaeji pugeje tuwo tugera ra nou turo pegareu piji tumeardae pegareu piji taidure jiboe piji dukeje Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto jamedu. 25Pagatu jere boe emode turagado pudui toe kuriwo awu moto keje. Ča nou enoe umodukare erududo baruto. Ewiagorokare tuwo tumeartorudo tu Pao Kurireuji kodi. Ewiagorore tu tuwo toe kurido mare pagatu je. 26Ia boe epogurumode tumagowo iwadaruji tumedage ewiagai dukeje imi imodukare ikeragu ei itae. Itaregodumode Pao Kurireu o jorugu kurireu tabo Pao Kurireu utugarege baru tadawugebo dukeje imodukare ikeragu ei. Nou Pao Kurireu o jorugu kurireu urugure Pao Kurireu kujegajeje. Imode ikirimi mato dukeje urugumode ikujegajeje jamedu. Urugumode nou aregodumode itabowu Pao Kurireu utugarege baru tadawuge ekujegajeje jamedu. 27Iwo tawie boe remawuji. Pao Kurireu umode boe eimijera kurireudo pudumi dukeje ia tagi tardumode awu Pao Kurireu roino duji. Tawimodukare jii toro tardumode roino jitu ka.

Jesus Ruture Tori Ao Ka

28Nou akoinodu bataru rekodaji semanare mito. Dukeje Jesus uture Pedro apo, Tiago apo, João apo jamedu toro ia tori ričoreu ao ka. Toro nou tori ričoreu ao kejere Jesus makore Pao Kurireu bagai baruto. 29Jesus makore baruto dukeje je ure tudo tuginai. Ukudau areia kigadu maere ji. Gurugure nono boeiaragudu urugu mogadure rugadu. 30-31Nono ia ime doge epadure tači toro ae. Ere pobe. Ia iere Moisés. Metia iere Elias. Nou Pao Kurireu jorugu pemegareu urugure ekujegajeje. Emagore Jesusji. Jesus makore ei jamedu. Ere pu bie Pao Kurireu meardaeji. Nou Pao Kurireu meardae koiare boe pegamoduie Jesusji nono Jerusalém ba kurireu keje dukodire Jesus bimoduie Jerusalém ba kurireu keje rugadu. Mare jewodumoduie pugeje turuduwo baruto rugadu.

32Mare Pedro unudure tumedagebo. Čare edadure dukeje erdure nou urugure Jesus kujegajejewu Pao Kurireu jorugu pemegareuji. Erdure nou ime pobedu dogei jamedu. 33Ča nou ime pobedu doge ere tuduiago tuibagi baruto dukeje Pedro makore Jesusji. Akore: – Ikimijera. Ure turugadu paeduwo woe. Čemode ia mačebradudo pobe metia bokware. Iamode akai. Iamode Moisés ai. Iamode Elias ai jamedu.

Mare Pedro jorduwakare tuiordure jiboeji dukodire mako pagare.

34Pedro mako kimore dukeje ia boe tugu ure turawuje etae. Nou boe tugu ure turorido eiogi. Dukodire nou Pedro, nou rakojere apowuge metage epagudugodure. 35Nono emeardure ia boe emagoji nou boe tugu piji. Akore: – Imeardu kurire jiwu itonaregedu reo. Ire ikeragu ji iwo udo boe ekinorudo. Tawiapaga pemegado makore jiboeji.

36Akore aino dukeje nou boe tugu akedure. Ča Jesus rakojere nono. Nou ime pobedu doge eragojekare nono pugeje. Mare Pedro, Tiago, João nou meriji ereadodukare tumedage ewiagai tuiordure tumeardure jiboeji jii toro, ia boe ewiagai jii toro jamedu.

Jesus Ure Bope Uwari Tawuje Iparedu Piji

37Nou barogwato ere turawuje nou tori ao piji dukejere boe emagare taregodu tabo Jesus togi. 38-40Ia imedu akore: – Ikimijera! Ikimijera! Inogwamaguduwo ai itonaregedu rogu paru tabo bope uwari pegareu meture tada kodi. Nou bope uwari ro pegare ji kodire ure magadudo, ure kudugo. Jataro aregodure jabiji, rakakare tuwo turagojedo pugeje. Kodire ure tiamedu boe korido. Ukare tudawuje itonaregedu piji rugadu. Dukodire inogwamagudunure ai akaiwowo ji awo pemegago. Rogure mitotu inai. Imagore awu ia are jorduwadowugei ewo nou bope uwari pegareu barigu piji. Mare ero rakakare ji.

41Jesus akore nou boei: – Tare ikiarigo. Tameartorukare rugadu. Tarduwakare tawo tameardae pemegado. Iragoje raimodukare tagabo. Nuba tagaidure irowo tameartoruwo i?

Nono Jesus makore nou imeduji. Akore: – Mato akanaregedu apo.

42Nono boe ere nou iparedu reko Jesus ae dukeje nou bope uwari pegareu ure nou iparedu butudo moto keje pugeje. Magadugodure nono nou moto keje. Mare Jesus mako rakare nou bope uwariji uwo tudawuje nou iparedu piji. Ainore čare ure nou bope tawuje nou iparedu piji rugadu. Dukodire ure pemegago. Nono ure nou iparedu maku tuo ai pugeje. 43Boe eiamedu boe ebogodure Pao Kurireu ro rakare aino duji.

Jesus Ure Ewie Pugeje Tuwimoduie Duji

Nou boe ebogodu kimore Jesus rore jiboeji. Dukeje Jesus makore ture jorduwadowugei pugeje. 44Akore: – Imedu Onaregedu nure imi. Imagudumode ro pegareuge etai ero pegawo i. Tawiagodukaba awu imagore tai dupiji.

45Mare nou Jesus ure jorduwadowuge erduwakare kaba jiba Jesus akoino pudui duji. Nou Jesus makore jiboe ukare turemo etaorato. Dukodire ure tuwiado epiji. Mare epagudure jamedu tunarawo Jesusji kaba jiba Jesus akoino pudui.

Jesus Ure Jorduwadowuge Etaidure Tuiorduwawo Kakojiwu Pudumi Ba Boe Eimijera Mode Pudumi Dubagai

46Nou Jesus ure jorduwadowuge ere bato pui tunarawo kakojiwu pudumiba boe kurireu mode ema. Eiamedu boe egore boe eimijera kurireu moduie pudumi nou tumedage epiji. 47Mare Jesus jorduware emeardae jamedu boeji. Nono Jesus ure tugeragu ia boe etonaregedu roguji. Makore ji rakojewo nono pudabo tugana pemegareu jagwai. 48Nono Jesus makore ture jorduwadowugei. Akore: – Meartorure iwu umode tugera podo boe etonaregedu apo dukeje unure tugera podo itabo jamedu. Meartorure iwu umode tugera podo itabo dukeje unure tugera podo nou ure itarego matowu apo jamedu. Tagaidumodukare tawo tagurido tamedage ekori pugeje, mare tamode tado itugaregedo tagi dukeje Pao Kurireu aidu kurimode tai boe eimijerage kurireuge ekori.

Ro Pegakare Paiwuge Emeardu Kurinure Pai

49João makore Jesusji. Akore: – Čerdure ia imeduji. Ure bope doge etawuje boe epiji akie tabo. Pamedia karegure ema. Dukodire čemagore ji uwo tugera ra nou turo piji makokawo akie tabo pugeje.

50Mare Jesus makore ei. Akore: – Piji. Ro pegakare paiwuge emeardu kurinure pai.

Ia Samaria Moto Kejewu Boe Etaidukare Jesusji

51Jesus jorduware meri puredugodure pudui turuduwo baruto. Dukodire ure tumeardae udo turugadu tuduwo Jerusalém ba kurireu ka. 52Ure tugeragu nouia ture jorduwadowuge pobedu dogei tuwo etudo tododai tuwadaru tabo toro Samaria moto kejewu ia boe eda ka ewo boe udo turugadu Jesus togi aregodumode toro kodi. 53Dukodire nou pobedu doge eture nou Samaria moto kejewu boe eda ka rugadu. Mare nou boe erduware Jesus utumoduie Jerusalém ba kurireu ka dukodire etaidukare Jesus aregoduwo pudae. 54Mare nou pobedu doge erduware nou boe emeardaeji dukodire ere tugirimi Jesus ae tuwo Jesus bie nou boe egore Jesus jituji. Ere Jesus bie dukeje nou Tiago, nou João emeardure egoino duji jamedu. Dukodire emagore Jesusji. Egore: – Čegimijera. Akaidukana čemagowo baruto joru butuwo nou boe ewugeje, uwo nou boe etagedudo?

55Mare Jesus akore: – Boro. Tameardae pegakaba ei.

56Dukejere Jesus uture ture jorduwadowugebo toro ia boe eda ka pugeje.

Ia Boe Etaidu Jokodukare Tugoduwo Jesus Apo

57Jesus kodure awaraji dukeje ia imedu aregodure ae. Makore ji. Akore: – Itaidure ikoduwo akabo rugadu atumode kaboe ka.

58Jesus makore ji. Akore: – Okwa doge emode tamudo tiari poro ja tada. Kiebarege emode tamudo tuwaradu ja tada jamedu. Imedu Onaregedu nure imi. Mare iwai bokware dukodire imode itamudo tadaboe bokware.

59Dukeje Jesus makore ia imeduji. Akore: – Ako itabo.

Mare nou imedu akore: – Ikodumode akabo rugadu mare kajao. Aino kuri aino itumode iogwa uwai ka. Iogwa bire dukodire iwo iogwa tugu mototo jao. Dukejere ikodumode akabo akodure jiboe ka.

60Jesus akore: – Bireuge etugudumode mototo bireugebo mare awiapagakaba ei. Atudo epiji ia boe eda ka awo nou boe ewie boe eimijera kurireu moduie Pao Kurireuče rugadu duji.

61Ia boe makore Jesusji pugeje. Akore: – Ikodumode akabo rugadu. Mare kajao. Iwo ikirimi iwai ka jao ikimaduwo iwobebo.

62Mare Jesus makore ji. Akore: – Ia boe aidumode tumaragoduwo motoji tuwo nou merirido moto kado kuwaru apo dukeje umodukare tuie mekido tododaiwu moto piji tuwo nou ture kadowu moto jetorodo. Aiwomodukare tuibagi. Tarodo nono nou umode moto kadowu ro mogadure. Mare umode moto kadowu ro ji karega inagoino. Tamaragoduwo Pao Kurireu ai tawo boe ewie boe eimijera kurireu mode Pao Kurireuče. Dujire inagoino. Boe etaidumode tumaragoduwo Pao Kurireu ai dukeje ekawo tugera ra Pao Kurireu piji tuwo tugirimi turo pegareu ka pugeje. Dujire inagoino. Emode tugera ra Pao Kurireu piji dukeje Pao Kurireu umodukare tudugaregedo emage.

Currently Selected:

Lucas 9: borBiblia

Highlight

Copy