ZABULI 118
118
1MUSIME MUKAMA; baitu murungi:
Baitu okkukganyirakwe kwebiro nebiro.
2Isareri agambe hati bunu
Ngu okuganyirakwe kwebiro nebiro.
3Enju ya Aron egambe hati bunu
Ngu Okuganyirakwe kwebiro nebiro.
4Abarukutina MUKAMA bagambe hati bunu
Ngu Okuganyirakwe kwebiro nebiro.
5Omu muhito gwange nkakunga MUKAMA:
MUKAMA yangarukamu, yandeta omu kiikaro ekigalihire.
6MUKAMA ali habwange; tintine:
Abantu barasobora okunkora ki?
7MUKAMA ali habwange omuli abo abankonyera:
Nikyo ndibonera okwegomba kwange hali abo aba’nobere.
8Kirungi okwesiga MUKAMA.
Okukira okunihira abantu.
9Kirungi okwesiga MUKAMA
Okukira okunihira abakuru.
10Amahanga gona ganyehingulirize:
Omu ibara lya MUKAMA ndigahwerekereza.
11Ganyehingulirize; ego, ganyehingulirize:
Omu ibara lya MUKAMA ndigahwerekereza.
12Ganyehingulirize nkenjoki; garaire nkomu’ro ogwamahwa:
Omu ibara lya MUKAMA ndigahwerekereza.
13Okansohya muno okungwisa
Baitu MUKAMA yankonyera.
14MUKAMA nigo mani gange, nekizina kyange;
Kandi afokere okujunwa kwange.
15Iraka eryokusemererwa neryokujunwa liri omu hema ezabahikirire:
Omukono ogwobulyo ogwa MUKAMA gunyumuzibwe:
16Omukono ogwobulyo ogwa MUKAMA gunyumizibwe:
Omukono ogwobulyo ogwa MUKAMA gukora ebyobumanzi.
17Tindifa, baitu ndyemera,
Kandi nditebeza emirimo ya MUKAMA.
18MUKAMA ambonaboneseze muno:
Baitu tampaireyo hali okufa.
19Nkingu’raho amalembo agokuhiki’ra:
Ndagatahamu, ndasima MUKAMA.
20Linu niryo irembo lya MUKAMA;
Abahikirire nibo baliritahamu.
21Ndikusima, baitu niwe wangarukiremu,
Kandi afokere okujunwa kwange.
22Ibale abombeki eribayehakaine
Niryo lifokere erikuru eryahakarugu.
23MUKAMA nuwe akikozire;
Kyamahano omu maiso gaitu.
24Kinu nikyo kiro MUKAMA ekiyakozire;
Turasemererwa, turakyanganukira eki.
25Juna hati bunu, tukwewengerize, ai MUKAMA:
Ai MUKAMA, tukwesengerize, otutwekere omugisa.
26Ayina omugisa arukuija omu ibara lya MUKAMA:
Tubasabire omugisa( tuli) omu nju ya MUKAMA.
27MUKAMA nuwe Ruhanga, kandi atuhaire omusana:
Mubohe ekyonzira nemuguha, mukibohe ha mahembe gekyoto.
28Niwe Ruhanga wange, nanyowe ndakusima:
Niwe Ruhanga wange ndakunyumiza.
29Musime MUKAMA; baitu murungi:
Baitu okuganyirakwe kwebiro nebiro.
Currently Selected:
ZABULI 118: BRR64
Highlight
Share
Copy
Want to have your highlights saved across all your devices? Sign up or sign in
Bible in Runyoro-Rutooro 1964 Version © Bible Society of Uganda, 1964.
