FIREMONI 1

1Paulo omunyankomo wa Kristo Yesu, na Timoseo mwene waitu, hali Firemoni anyakugonzebwa na mukozi mutahi 2waitu, nahali Apofia mwene waitu, na Arakipo omurwani mutahi waitu, nekanisa enyakuli omu nju yawe: 3embabazi zibe halinywe nobusinge, ebiruga hali Ruhanga Isitwe na Mukama waitu Yesu Kristo.

4Ninsima Ruhanga wange ebiro byona ninkuijuka obutosa omu kusaba kwange kwona,

5Obumpu’ra okugonza kwawe nokuikiriza kwawe okwonyinakwo hali Mukama waitu Yesu, na hali abarukwera bona; 6nukwo okuterana kwokuikiriza kwawe kugase okukora omulimo omu kumanyira kimu ekigambo kyona ekirungi, ekiri omulinywe habwa Kristo. 7Baitu nkabanyina okusemererwa kwingi nokuhumizibwa obwokugonza kwawe, baitu emitima yabarukwera ekahumuzibwa obwawe, mwene waitu. 8Nukwo nobunyina obumanzi bwona omu Kristo okukukometereza ebisemire, 9baitu obwokugonza ninyesengereza kwonka, baitu ninsisana nkokundi Paulo omugurusi, kandi hati bunu omunyankomo wa Kristo Yesu: 10ninkwesengereza habwomwana wange ounazaire omu nsengo zange, 11Onesimo, akaba atarukukugasira ira, baitu hati bunu nakugasira iwe nanyowe: 12ounagaruire we nyini namberoli, nuwe mutima gwange mali mali: 13nyowe oumbaire ningonza aikale nanyowe, ampereze omu kiikaro kyawe omu nsengo zenjiri: 14baitu ntagonza okukora ekigambo kyona, iwe otakimanyire; embabazi zawe zireke okuba omu kuhambirizibwa, baitu omu kugonza. 15Baitu rundi habwekigambo kinu nikyo yabaganizibwemu naiwe akacukake, iwe ogaruke okuba nauwe ebiro byona; 16atakiri nkomuiru rubale, baitu okukira omuiru rubale, nka mwene wanyu arukugonzebwa, hali nyowe muno muno, baitu okukira namberoli, nomu mubiri nomu Mukama waitu. 17Nukwo obworaba notekereza okuterana nanyowe, omuikirize nka nyowe nyenka. 18Baitu araba yakusisire, rundi anyina ibanja namberoli, ntonga nyowe eri; 19nyowe Paulo mpandikire nomukono gwange nti nyowe ndikama’ra ndeke okukugambira nti onyina ibanja namberendi habwawe wenka. 20Nukwo, mwene waitu, kantunge okusemererwa namberoli omu Mukama waitu: ompumuze omu mutima gwange omu Kristo. 21Nkuhandikire nyesigire okuhu’ra kwawe, kandi manyire nti olikora, kandi olihingurana, ebindukugamba. 22Kandi ontekanirize hokurara: baitu ninihira nti obwokusaba kwanyu mulihabwa okumbona.

23Epafura omukwatwa mutahi wange omu Kristo Yesu akuramukize: 24na Marako na Alisitako na Dema na Luka, abakozi batahi bange.

Embabazi za Mukama waitu 25Yesu Kristo ziikale nomwoyo gwanyu. Amina.

Currently Selected:

FIREMONI 1: BRR64

Highlight

Copy