MARAKO 12

1KANDI akabanza okubaza nabo omu nfumu. Omuntu akabyara oruginjo orwemizabibu,yarutaho orukoroba, yalimamu endeba, yayombekamu ekikomero, yainikamu abalimi, yagenda omu nsi endi. 2kandi omwaka obugwahikire yatuma omuiru rubale hali abalimi, ahebwe hali abalimi habyana byemizabibu. 3Kandi bamukwata, bamutera, bamubinga, atanyina kantu. 4Kandi yagaruka okubatumira omuiru rubale ondi; nogu bamutera orubale, nibamugiza ensoni. 5Kandi yatuma ondi; nogu bamuita: nabandi baingi; abandi nibabatera, abandi nibabaita. 6Akaba akyanyina omu, omwana owagonza: hanyuma yamutuma nambere bali, nagamba ati Baratina omwana wange. 7baitu abalimi abo bakagambirangana bonka ngu Onu nuwe mugwetwa, Muije, tumuite, nobugwetwa buliba bwaitu. 8Bamukwata, bamuita, bamunaga aheru yorugonjo rwemizabibu. 9Nukwo mukama worugonjo rwemizabibu aligira ata? Aliija alihwerekereza abalimi, orugonjo rwemizabibu aliruha abandi. 10Timukasomaga eki ekyahandikirwe, ngu

Ibale abombeki eribayangire,

Eri likaforwa omutwe gwakarugu:

11Eki kikaruga hali Mukama,

Kandi kyamahano omu maiso gaitu. 12Kabdi bakase’ra okumukwata; nibatina ekitebe, baitu nbakamanya abacwerire bo orujumo oru: bamuleka, bagenda.

13Kandi bakatuma namberali abomu bafalisayo na baherodiani, okumusonasona omu bigambo. 14Kandi obubaizire, bamugambira ngu omwegesa, tumanyire iwe oli wamananu, kandi ebigambo ebyomuntu wena tobitaho mutima; baitu tosorora omubantu, baitu oyegesa, omuhanda gwa Ruhanga omu mananu: kirungi okuziniraga Kaisali ebintu, nandiki tikirikyo? 15Tuhetoga, nandiki tuleke? Baitu obuyamanyire obugobya bwabu, yabagambira ati Nimunyoheza ki? Mundetere edinali,ngirole.bagireta. 16Yabagambira ati Ekisisani kinuna nebihandikirweho binu byoha? Bamugambira ngu Bya kaisali. 17Yesu yabagambira ati Muheyoga hali Kaisali, ebya Kaisali, na Ruhanga, ebya Ruhanga. Bamuhuni’ra muno.

18Kandi gakaija namberali Abasadukayo abarukugamba ngu Busaho kuhumbuka: bamukaguza ngu Omwegesa, 19Musa akatuhandikira ati Mugenzi womuntu obwarafaga, nasiga mukaziwe, atasigire mwana,mugenziwe atwale mukaziwe omuza’re mugenziwe abana. 20Kandi hakaba haloho baisemu musanju; owokubanza akaswera omukazi, yafa atasigireho bana: 21kandi owakabirir yamuswera, yafa, kandi nauwe atasigeho bana. Nowakasatu nukwo ati: 22na bona omusanju batasigeho bana. Hanyuma bona bahoireho, nomukazi yafa. 23Omu kuhumbuka aliba mukoha hali abo? Baitu omusanju bakamuswera. 24Yesu yabagambira ati Tinikyo muhabira, okutamanya Ebyahandikirwe, nobugakuba amani ga Ruhanga? 25Baitu obubalihumbuka omu bafu tibaliswera, nobukwakuba okugabuka; baitu baliba nka bamaraika abomu iguru. 26baitu ebyabafire, nokuhumburwa kwabu, timukasomaga omu kitabu kya Musa ha Lusaka, Ruhanga obuyamugambire, nagamba ati Ninyowe Ruhanga wa Ibarahimu, Ruhanga wa Isaka, Ruhanga wa Yakobo? 27Tali Ruhanga wabafu, baitu wabomezi: muhabire muno.

28Kandi omu hali abahandiki yaija, yabahu’ra nibakaguzangana bonka, kandi amanyire abagarukiremu kurungi, yamukaguza ati Kiragiro ki ekirukubanza ha Byona? 29Yesu yagarukamu ati Ekirukubanza nkinu. Hu’ra Isareri; Mukama Ruhanga waitu, Mukama ali omu; 30kandi ogonzege Mukama Ruhanga wawe nimutima gwawe gwona, nobwomezi bwawe bwona, namagezi gawe gona, namani gawe gona. 31Ekyakabiri nkinu. Gonza omutahi wawe bkokweyegonza wenka. Busaho kiragiro kindi ekirukukira ebi. 32Omuhandiki ymugambira ati Munanukwo Omwegesa ogambire kurungi ali omu; kandi busho ondi, rundi uwe wenka. 33kandi okumugonza nomutima gwona nokwetegereza kwona, namani gona, nokugonza omutahiwe nkokwayegonza wenka, nikikira muno ebihongwa byona ebihikirire ebyokeze nebyonzira. 34Kandi Yesu obuyaboine amugarukiremu nokwetegereza, yamugambira ati Tobuli hara obukama bwa Ruhanga. Kandi hanyuma busaho Muntu ayagumire okumuka guza ekigambo.

35Kandi Yesu yagarukamu, obwakaba nayegesa omu yekeru, nagamba ati Abahandiki kiki ekibagambisa ngu Kristo mwana wa Daudi? 36Daudi wenka akagamba omu Mwoyo Ogurukwera ati

Mukama akagambira Mukama wange ati

Ika’ra ha Mukono gwange ogwobulyo,

Okuhikya obundihindura abanyanzigwa bawe akatebe kebigere byawe.

37Daudi wenka amweta Mukamawe; aba ata omwanawe? Kandi ebekitebe bamuhu’raga nokusemererwa.

38Kandi omu kwegesakwe akagamba ati Mwerinde Abahandiki, abagonza okugenda bajwaire ebyokujwaire ebyokujwara ebiraihire, nokuramukibwa omu butale, 39nentebe eza hagati omu maso’rokaniro, nebiikaro ebyekitinisa omu bugenyi: 40abalya enju ezabafakati, kandi abasaba muno omu bugobya; abo baligwe’rwa omusango ogurukukira obukoto.

41Kandi akaika’ra okurole’ra eryahu’ro, yarora ekitebe okukyanigire erupiya omu lyahu’ro: baingi abakaba bali abaguda banagamu nyingi. 42Kandi hakaija omufakati omu owamasege, yanagamu obucweka bubiri, niyo kodolante. 43Kandi yayeta abegeswabe, nabagambira ati Mananukwo nimbagambira nti Omufakati onu owamasege anagiremu bingi okukira bona abarukunaga omu lyahu’ro; 44baitu bona banagiremu ebibasagirire; baitu ogu omu masegege anagiremu byona ebyanyinabyo, niryo itungolye lyona.

Currently Selected:

MARAKO 12: BRR64

Highlight

Copy